СЕРНӦС ВӦЛӦСЬТЫН
(Сыктыв уездын)
Сернӧс вӧлӧсьт абу ыджыд. Олысьыс ставыс 1117 морт. 93,5% кӧзяйствоыс олӧны гӧля. Сӧмын 6,5% кӧзяйствоыс шӧркоддьӧмасӧ олӧны. Став вӧлӧсьтас ӧні 342 мӧс, 218 вӧв да сэсся эм посни скӧт 327 юр. Скӧтыс ӧні ньӧжйӧник пыр содӧ. Вӧвтӧм кӧзяйствоыс вӧлӧсьтын 15%. Быд во уна скӧтӧс кӧинъяс жугӧдӧны. Колян во кӧинъяс сёйисны 9 мӧс, 12 чань, 6 кукань да 32 ыж. Крестьяналӧн некутшӧм водзсасьӧм кӧинъяскӧд абу. Крестьяна му-видз уджалӧм кындзиыс лэдзӧны вӧр, нажӧвитчыны бокӧ ветлывлӧны да неуна вӧралӧны. Таво кер лэдзан уджсӧ Северолес сетіс сёрӧн дай эз тырмымӧн. Сы вӧсна крестьяналы лои кутчысьны керавны пес Северо-Двинскӧй леснӧй кооперативлы. Ставсӧ сылы уджалісны 56 морт, лэдзисны пессӧ 750 куб. — вит шайт да джынйӧн куб. Северолеслы уджалісны 63 морт. Вӧчисны 10.000 шпал (35 урӧн шпал) да 300 кер (65 урӧн). Тӧвбыдъя нажӧтка вӧр лэдзӧмсьыс воис 3.695 шайт. Мукӧдлаысь нажӧткаяс крестьяна омӧля босьтісны. Тӧргӧвӧй организацияяслы крестьяна ӧнӧдз на эз вермыны ассьыныс уджйӧзъяссӧ мынтыны.
Крестьяна зільӧны бурмӧдны вӧлӧсьтса овмӧссӧ, ӧтвылысь найӧ лэптісны школа, мельнича. Уджалісны быд керка юрысь пӧдельщина 70-ӧн кымын.
Вӧлӧсьтас эм комсомол ячейка, сӧмын уджыс прамӧя оз мун, удж нуӧдысьыс абу да.
Колӧ эськӧ Укомлы прамӧйджыка видзӧдлыны ячейка вылас да отсавны том йӧзлы петны югыдлань. Ас выннас найӧ оз вермыны.
Исполкомын уджалысьяс секретарыс кындзи оз зэв зільны уджавны. Сы вӧсна мукӧдлатіыс уджыс оз зэв шыльыда мун. Вӧлӧсьтувса организацияяс да учрежденньӧяс удж вылӧ оз видзӧдны. Ас удж нуӧдӧм йывсьыс йӧз водзын оз жӧ висьтавлыны.
Кооперативын уджыс оз жӧ зэв бура мун. Кооперативас 188 морт. Собранньӧяс вӧчлывлӧны шоча, удж йывсьыс висьтавлӧны сӧмын беспартийнӧй конференция вылын. Ревизионнӧй комиссияыс узьӧ, ревизияыс эз нин вӧв 1924 вося ноябр тӧлыссянь.
Тӧварыс кооперативас 1.580 шайт дон; уджйӧзыс кооперативлӧн 6.742 шайт, аслыс сылы уджйӧзаӧсь сӧмын 328 шайт. Тайӧ сьӧмсӧ видзисны мельнича вӧчӧм вылӧ (6,000 да 3,000 пӧдельщина). Сьӧмсӧ кӧсйӧны бергӧдны 15−20 воӧн. Тӧварыс йӧзыслы оз тырмы, медъёнасӧ нин видз-му уджалан кӧлуй оз судзсьы.
