ОБИСПОЛКОМЫН

ВИДЗ-МУ УДЖАЛАН МАШИНАЯС ВУЗАВЛАН СКЛАД ЙЫЛЫСЬ

вӧчис Обисполкомлы доклад складнас заведуйтысьыс Пятин ёрт. Таво пӧ обласьтӧ вайим 3000 плуг, 21 кӧдзан машина, 25 тӧлӧдчан, 33 кӧйдыс весалан, 10 триер, 60 окучник, 58 пиня (агас), 29 культиватор, 20 ытшкан машина, 26 вартан маш., 35 привод, 10 идзас шыран маш., 20 сепаратор, 20 маслобойка, 20 няръясян маш., 120 пуд турун (клевер) кӧйдыс, 850 пуд шабді кӧйдыс, 100 пуд вика, 300 пуд анькытш, 20 пуд тимофеевка кӧйдыс. Ставсӧ 61.726 шайт 50 ур дон.

Машинаясыс сёрӧн воисны да, инавнысӧ вермим этша. Май тӧлысьын лои вузалӧма 1270 плуг, 36 окучник, 10 кӧдзан маш., 5 триер, 13 тӧлӧдчан маш., 7 кӧйдыс весалан маш., 6 няръясян маш., 36 пиня (агас), 3 идзас шыран маш.; ставсӧ 23.036 шайт дон.

Машинаяссӧ вайӧм рӧскодыс кайӧ машинаяс дон вылас 30%. Воӧны тшӧтш татӧні инасьтӧм машинаяс. Колян во сэтшӧмыс коли 12.000 шайт дон.

Обисполком тшӧктіс докладчикӧс да Видз-му Управленньӧӧс водзӧ кежлӧ мырсьыны вайны инасян машинаяс; кыпӧдны Видз-му Комиссариат водзын сёрни машинаяс вайӧм рӧскодсӧ чинтӧм йылысь; кыпӧдны Госсельсклад Управленньӧ водзын сёрни Изьваӧ отделенньӧ восьтӧм йылысь; машинаяс вузавлӧм йылысь йитчыны кредитнӧй да сельск.-коз. тӧвариществояскӧд.

ТЕЛЕФОНЪЯС ЛӦСЬӦДӦМ ВЫЛӦ

Изьва-Печӧраса Уисполкомлы Обисполком сетіс 7.000 шайт.

НАРСУДДЯӦ

Сыктыв уездувса 2-ӧд участокӧ Обисполком пуктіс Красильников Яков Микулайӧс.