СТЕНӦ ӦШӦДАН ГАЗЕТ СИННЫСӦ СЁЙӦ

Зеленечын (Сыктыв уездын) комсомол ячейка лыддьысян керкаын лэдзӧ стенӧ ӧшӧдан газет. Газетас нёльӧд номерын гижӧма вӧлі самӧкур юӧмсӧ исполкомса юралысьлысь Игнатовлысь, делопроизводитель Колпаковлысь, милиционер Ерогодскӧйлысь, тшӧт нуӧдысь Колпаковлысь да лыддьысян керкаын удж нуӧдысь Мальцевлысь. Ӧні ставныс найӧ лёк звер кодьӧсь газет редколлегия вылӧ дай комсомолечьяс вылӧ, кодъяс вылӧ чайтӧны газетас гижӧмнас. На пиысь Мальцев шуӧ: «Татшӧмтор гижны газетӧ да ещӧ РКП-са кандидатъяс да комсомолечьяс йылысь оз позь». Март да апрель тӧлысся номеръясын Игнатовлысь омӧль олӧмсӧ гижӧма жӧ вӧлі. Тшӧтш гижӧма вӧлі бабка Спирина йылысь. Ставныс найӧ скӧралӧны. Воласны лыддьысян керкаӧ да буртор висьталӧм пыдди быдсяма омӧльторнас видчасны. Газет редколлегияӧс нёльнан боксяньыс нин кутісны топӧдны. Шуасьӧны — водзӧ кежлӧ газет лэдзӧмысь пӧ лоӧ дугдыны.

Оз ӧмӧй позь гижны газетӧ омӧля уджалӧмсӧ татшӧм йӧзыслысь?

Бианьӧв.

Редакциясянь: Омӧля уджалӧм йылысь кӧть кутшӧм мортӧн газетӧ гижны позьӧ дай колӧ. Медым сӧмын збыль вӧлі. Зэв омӧль лоӧ, Зеленечса комсомол ячейка кӧ дугдас стенӧ ӧшӧдан газет лэдзӧмысь. Газет редколлегиялы дай газетӧ гижысьяслы повны нинӧм. Веськыда гижӧмысь найӧс вӧрзьӧдны некод оз лысьт.