АЙКАТЫЛАЫН

(Емдін уездын)

Таво нажӧткаяс вӧліны зэв омӧльӧсь. Колян во арнас сю кӧйдыс вайлісны 1325 пуд гӧгӧр. Сійӧ кӧйдысӧн кӧдзӧм ӧзимъяс зэв омӧльӧсь. Таво тулыс коді вермис кӧдзис выль пӧв идйӧн, ӧткымынлӧн сідзи кӧдзтӧг коли. Ид кӧйдыс тулысын вайисны 3,280 пуд. Сӧмын эз вайны анькытш да шабді кӧйдыс; сы вӧсна крестьянаыс колины кӧйдыстӧг.

Сибырӧ таво муніс квайт кӧзяйство — 37 морт.

ИСПОЛКОМЛӦН УДЖЫС.

Исполком уджалӧ шӧркоддьӧма. Исполкомса шленъясыс коммунист ячейкакӧд ӧтвылысь ветлывлӧны сиктъясӧ, висьтавлӧны сэні асланыс удж йылысь. Крестьяна лӧсьыда видзӧдӧны исполком вылӧ, индалӧны, кыдзи колӧ исполкомлы водзӧ уджавны. Колян вося налог чукӧртісны 79,3%.

Омӧльторъясыс исполком уджас: йӧзсӧ сӧвет уджас омӧльджыка зільӧны кыскыны. Сэсся мукӧд крестьяна норасьӧны ӧткымын шленъяс вылӧ, лёкысь пӧ сёрнитӧны.

Землеустройство удж оз нуӧднысӧ вермыны. Сьӧмыс сы вылӧ йӧзыслӧн абу.

КООПЕРАТИВЪЯС.

Вӧлӧсьтын эм куим потребительскӧй общество, инвалидъяслӧн ӧтувтчӧм (объединение) да Союз Охоталӧн лавка. Медбура уджалӧ Айкатыласа кооператив. 1924 во октябр 1-ӧд лунсянь апрель 1-ӧд лунӧдз оборотыс вӧлі 15 сюрс шайт. Барышыс воис 2,300 шайт. Семуков сиктын эм сылӧн отделенньӧ. Шленыс ставыс 300 морт, на пиысь 51 нывбаба. Членскӧй взносъяс да пайяс ставныслӧн нин мынтӧма тырӧдз. Ва воссьӧм бӧрын нин кооперативыс лӧсьӧдіс тӧвар 6000 шайт дон. Сэсся лӧсьӧдӧма 1200 пуд сю. Сюыс Котласын на.

Инвалидъяслӧн уджыс мунӧ омӧля. Важ правленньӧсьыс ӧти шлен Педӧсь Вань видзліс нёльсё шайт саяс. Сійӧс эськӧ важӧн нин сетӧма судӧ, да мыйкӧ судас делӧыс ӧнӧдз на нюжалі видлавтӧг. Колӧ эськӧ регыдджык судлы видлавны тайӧ делӧсӧ.

ЭЛЕКТРИЧЕСТВО НУӦДАН ТӦВАРИЩЕСТВОЛЫ

ӧні вайисны выль динамо-машина. Сійӧ машинасӧ пуктӧма нин местаас, лӧсьӧдӧма гӧгӧр дай видлалӧма нин. Регыд кутас ломтысьны-югдӧдны Айкатыла да Шежам. Тӧвариществоас 156 шлен.

ПЕЛЬШӦРСКӦЙ ПУНКТӦ

крестьяна оз зэв волыны. Пельшӧрыс тшӧкыдакодь юӧ. Мукӧддырйи крестьянин локтас дас нёль верст сайсянь, да аптекаыс пӧдса.

КЕР ЛЭДЗӦМ.

Таво вӧлі сетӧма лэдзны 145 сюрс кер Северолесӧн. Сійӧ сетіс бур нажӧтка крестьяналы.

Сӧмын колӧ индыны ӧткымын нелючки вӧчӧмъяс Северолесын уджалысьясӧн. Айкатыласа удждысян тӧвариществолы март тӧлысьын Северолес сетіс 17 сюрс кер кылӧдны. Сэсся локтіс Айкатылаӧ Северолеслӧн инспекторыс Селенинов да ӧткажитіс удждысян тӧвариществоыдлы, а кер кылӧдансӧ сетіс Тыдорса мортлы Одинцовлы. Одинцовыс босьталіс уджалысьяссӧ кыдз аслыс вӧлі окота, ставсӧ От вӧлӧсьтысь, Тыдорса крестьянаыс ставыс уджтӧмӧсь колины. Договорсӧ Северолесас мӧдӧдісны волисполкомӧн эскӧдтӧг.

Сэсся бара мӧд нелючки уджалӧм. Госпароходстволы пес лӧсьӧдігӧн уполномоченнӧйӧн вӧлі Калимов В. Сійӧ эз судзсьы 140 пуд да 36 пунт нянь тусьӧн да 42 пуд да 20 пунт пызьӧн. Шежамса профсоюзса шленъяс эськӧ ёна увгисны, тшӧктісны вӧтлыны Калимовтӧ. Сӧмын обласьтувса ёртъяс Вешняков да Терентьев колисны Калимовтӧ бӧр уполномоченнӧйӧ.

Айкинаса Коммунист ячейкаысь секретар Й. Исаков.