КОДЪЯСӦС ДА КЫДЗИ КОЛӦ БОСЬТАВНЫ КОММУНИСТ ПАРТИЯӦ СИКТЪЯСЫН
Тайӧ медбӧръя кык вонас миян коммунист партия каръясын ёна ёнмис. Кыксё сюрс саяс пабрик-заводса рабочӧйяс пырисны партияӧ. Позьӧ нин шуны — коммунист партия тайӧ воясас дзикӧдз йитчис рабочӧйяскӧд, рабочӧйяс кутісны чорыда эскыны партиялы.
Ӧні партия нуӧдӧ сэтшӧм жӧ удж сиктъясын. Партия ӧні зільӧ бурмӧдны сиктса олӧм, крестьяналысь кӧзяйствосӧ кыпӧдны. Партияса медбӧръя ставсоюзса конференция шуӧмъясысь аддзам, кутшӧм чорыда коммунист партия кутчысис сійӧ уджас.
Мед тайӧ уджыс мунны кутас ӧдйӧнджык да помала, коммунист партиялы колӧ ёнджыка пырны крестьяна пытшкас.
Тайӧ позьӧ вӧчны кык ногӧн. Партия бӧрйӧ ёртъясӧс, кодъяс зэв бура тӧдӧны сиктса олӧм, кодъяс кужӧны уджавны сиктас крестьяна пӧвстын, да ысталӧ найӧс сиктъясӧ уджавны. Ӧні коммунист партия лӧсьӧдіс нин ыстыны сиктъясӧ квайт сюрс ёртӧс. Сӧмын уна миллион крестьяна пӧвстад сымда уджалысьыд зэв на этша. Сідзкӧ колӧ ещӧ, медым став медбур крестьянаыс, кодъяс кӧсйӧны сьӧлӧмсянь нуӧдны коммунист партиялысь уджсӧ, пырасны сэтчӧ.
Дерт, став пырысьсӧ ас пышкас партия оз вермы лэдзны. Партияын вермасны лоны сӧмын сэтшӧм уджалысь йӧз, кодъяс сетасны став вынсӧ ассьыныс коммунизм вӧсна.
Сиктъясын эмӧсь быдпӧлӧс олысь: батракъяс, гӧль крестьяна, шӧркоддьӧма олысь крестьяна, кулакъяс, сідз водзӧ. На пиысь рабочӧйяслы медматынӧсь, медъёна на дор мунӧны батракъяс да гӧль крестьяна. Медвойдӧр колӧ восьтыны коммунист партияӧ ӧдзӧссӧ налы.
Дерт, быд батракӧс да гӧль крестьянинӧс партияӧ босьтны оз позь. Позьӧ босьтны сӧмын сэтшӧмъясӧс, кодъяс кӧсйӧны бура уджавны революциялы, коді некутшӧм омӧльтор некор абу вӧчлӧма. Сы вӧсна каръясын дай сиктъясын партияӧ босьталӧны дай колӧ босьтавны явӧ, а оз гусьӧн, медым став сиктса йӧзыс шуасны — шогмас оз пырысь мортыс партияас, позьӧ оз сійӧс босьтныс.
Партияӧ босьтӧны и шӧркоддьӧма олысь крестьянаӧс, сӧмын на пиысь босьтавныс колӧ ещӧ нин бӧрйысьӧмӧн. Шӧркоддьӧма олысь крестьянин кӧ аслас кӧзяйство кындзи нинӧм оз кӧсйы тӧдны, сійӧ кӧ обществоса уджӧ оз кутчысь — сэтшӧмыдлы партияын местаыс, дерт, абу.
Партияӧ позьӧ босьтны сӧмын сэтшӧм шӧркоддьӧма олысь крестьянинӧс, коді кӧсйӧ водзсасьны рабочӧйяскӧд ӧтвылысь революция дор. Кыдз нӧ сійӧс тӧдан? Сӧмын обществоса удж вылын. Сиктса ячейкаяслы колӧ тӧдмасьны Сӧвет власьт дор мунысь крестьянакӧд, кыскыны найӧс сиктса сӧвет уджӧ, корлывлыны найӧс собранньӧяс вылӧ, сетавны вӧчны налы кутшӧмкӧ обществоса уджъяс. Сідзи позьӧ тӧдны, шогмас оз мортыс партияӧ.
Сэсся сиктъясын эмӧсь ещӧ учительяс, агрономъяс, врачьяс. Партиялы ёна колӧны велӧдчӧм йӧз пиысь рабочӧй да крестьяна революция дор сулалысьяс. Сӧмын партия ёна бӧрйысьӧмӧн босьталӧ велӧдчӧм йӧзтӧ (интеллигенциятӧ) ас пытшкас. Сӧмын сэтшӧм интеллигентъясӧс позьӧ партияӧ босьтны, кодъяс петкӧдлісны ассьыныс революция дор сулалӧмсӧ, кодъяс тӧдӧны, мый вӧсна вермасьӧ партияыс, тӧдӧны партиялысь программасӧ да кужӧны сійӧс ставсӧ висьтавлыны крестьяналы.
