1925−26 ВОСЯ СЕЛЬСКОКӦЗЯЙСТВЕННӦЙ НАЛОГ МЫНТӦМ СРОКЪЯС ЙЫЛЫСЬ КОМИ ОБЛАСЬТЫН

РАБОЧӦЙ, КРЕСТЬЯНА ДА ГӦРДАРМИЯСА ДЕПУТАТЪЯС СӦВЕТЪЯС КОМИ АВТОНОМИЯА ОБЛАСЬТУВСА ИСПОЛНИТЕЛЬНӦЙ КОМИТЕТЛӦН ШУӦМ

Медым кокниджык лои крестьяналы мынтыны сельскокӧзяйственнӧй налог, артыштӧмӧн — корджык крестьяна иналӧны (вузалӧны) ассьыныс видз-мусьыс босьтӧм прӧдуктасӧ, корджык босьтӧны донсӧ кер лэдзӧмысь, вӧралӧмысь, мукӧд прӧмыслысь, — сельскокӧзяйственнӧй налог йылысь положенньӧ 40§ серти (кодӧс лӧсьӧдӧма 1925 воын май 7-ӧд лунӧ) да РСФСР Наркомфинсянь май 23-ӧд лунӧ воӧм телеграмма серти (401601/3 номер) — Обласьтувса Исполнительнӧй Комитет шуис:

§1.

Лӧсьӧдны обласьтувса став уездъяслы дай вӧлӧсьтъяслы сельскокӧзяйственнӧй налог мынтӧм вылӧ куим срок:

1-ӧд срокыс 1926 вося январ 1-ӧд лун — 40 прӧч.

2-ӧд „ 1926 вося февраль 15-ӧд лун — 30 прӧч.

3-ӧд „ 1926 вося май 1-ӧд лун — 30 прӧч.

§2.

Тайӧ шуӧмас 1-ӧд §-ас индӧм срокъяссӧ сельскокӧзяйственнӧй налог мынтӧм вылӧ уисполкомъяс да волисполкомъяс став 1925−26 во чӧж вежны некыдзи оз вермыны. Индӧм срокъясыс пасъяссьӧ налог мынтысьлы сетан окладнӧй листъясӧ.

§3.

Сельскокӧзяйственнӧй налог мынтыссьӧ сьӧмӧн либӧ Крестьяналысь Воана удждысьӧм облигацияясӧн. Кӧть коднас, кӧть мыйта став налогсӧ мынтасны, дугӧдны он вермы.

§4.

Ӧтка да ӧтувъя крестьяна кӧзяйствояс став обласьт пасьта мынтӧны налогсӧ Обфинотделса приходо-расходнӧй кассаясӧ либӧ волисполкомъясӧ.

Содтӧд: Сӧветскӧй кӧзяйствояслы мынтыны позьӧ сӧмын приходо-расходнӧй кассаясӧ.

§5.

Налог мынтысьысьяслы позьӧ ассьыныс налогсӧ ыставны пошта пыр дай телеграфӧн асланыс волисполкомъясӧ либӧ приходо-расходнӧй кассаясӧ.

§6.

Мынтысьысьяс налогсӧ мынтӧны сӧмын окладнӧй листъяс серти. Кассаяс да волисполкомъяс оз вермыны ӧткажитчыны босьтӧмысь, кӧть унджыкӧд пайсӧ став налогыслысь мынтысьысьяс сетӧны.

§7.

Мынтысьысьяслы позьӧ налогсӧ сетны ӧтвывтчӧмӧн аслыныс уполномоченнӧйяс пыр. Уполномоченнӧйясыс кыв видзӧны мынтысьысьяс водзын лючки да кадын волисполкомӧ либӧ кассаӧ налог сетӧмысь.

§8.

Налог босьтӧм йылысь мынтысьысьяслы сетсьӧ нарошнӧ лӧсьӧдӧм квитанция дай тшӧтш быть пасйыссьӧ мынтӧм йывсьыс окладнӧй листас.

Содтӧд: 1) Ӧтвывтчӧмӧн налогсӧ мынтысигӧн быд мынтысьысьлы сетсьӧ торъя квитанция дай мынтӧм йывсьыс пасйыссьӧ став окладнӧй листъясас.

2) Сетӧм квитанция оз веж окладнӧй листын пасйӧмсӧ.

§9.

Мынтысьысьяс, оз кӧ сетны налогсӧ индӧм срокъясын, лоӧны мыжаӧсь налогъяс да сборъяс босьтӧм йылысь положенньӧ серти.

§10.

Тайӧ шуӧмсӧ нуӧдны олӧмӧ (вӧчны) тшӧктыссьӧ вӧлӧсьтувса исполнительнӧй комитетъяслы. Волисполкомъяслы быть колӧ паськыда висьтавны йӧзыслы налог мынтӧм срокъяс йывсьыс да налог мынтанінъяс йывсьыс.

§11.

Обласьтувса Финансӧвӧй юкӧдлы тшӧктыссьӧ тайӧ шуӧм сертиыс лэдзны туйдӧдъяс (инструкцияяс) да торъя тшӧктӧмъяс.

§12.

Тайӧ шуӧмыс вынсялӧ «Югыд туй» либӧ «Коми сикт» газетъясын юӧртӧм лунсянь.

Обисполкомса председательӧс вежысьыс Нахлупин.

Обисполкомса президиумлысь делӧсӧ нуӧдысь Бергер.

№ 5293.

Юнь 11 лун 1925 во.

Сыктывдінкар.