КОМИ СИКТЫН ШОЙЧЧӦМ

Троица лун. Поводдя лунтыр кежлӧ пуксис зэв шоныд да мича. Вичкоысь сьывсьӧм бӧрти бабаяс да челядьяс босьталӧмаӧсь вежӧдӧм кыдз пу росъяс да тэрмасьӧны гортас.

Луннас, ӧбед бӧрын, кымынкӧ мужик лыддьысян керка дорын эжа вылын пукалӧны. Быдӧнлӧн пӧшти кианыс газет. Сэки карсянь воӧма пошта да, мужикъяс шонді водзын лыддьӧны «свежӧй» коми газетъяс.

Шонді ымралӧ, шонтӧ мужикъяслысь мудзӧм спинаяс. Лун тӧв зэв небыдика пӧлялӧ. Зэв лӧсьыд шойччыны сьӧкыд удж бӧрын.

— Тэ нӧ, Василей, мый йылысь лыддин? — юаліс Микайлӧ орчча пукалысь мужиклысь.

— Заводӧ ветлӧм йылысь, — шуис Василей. Бара мӧдіс видзӧдны газет вылӧ.

— А ме лыдди, — мӧдіс висьтавны Микайлӧ, — кыдзи тонӧ Пальса поп заводитлӧма пӧръявны том мортӧс да том мортыд абу сетчӧма поп кыв улӧ. Вӧвсӧ и мӧссӧ попыд ас горшнас вӧлӧмкӧ том мортыдлысь корӧ, кулӧм батьсӧ казьтылӧм вылӧ.

— Тӧрыт вот ме лыдди Ӧльӧксан Невскӧй йылысь, водзӧ висьталӧ Микайлӧ, — кыдзи сійӧ шведъяскӧд тышкасьӧм понда воӧма святӧйӧ. Мыйтӧм кисьтісны вир, кымынлысь орӧдісны кисӧ да коксӧ. Сы пыдди Ӧльӧксан Невскӧйӧс пуктӧмаӧсь святӧйӧ. Ми кодь пемыд йӧзыд юрбитам-клёнгам.

— Дерт, буракӧ, кутшӧмкӧ гӧль салдатӧс, кодлӧн киыс либӧ кокыс ори, святӧяд оз пуктыны. Кужӧны ӧд бӧрйыны кодӧс колӧ, — мыччысис ар 50 на кымын мужик.

Мӧдлаын ӧтик баба, ар 35, посни челядьяскӧд ворсӧ шарӧн, зэв чорыда матькыштлывлӧ. Бабаыд вӧлӧма код. Сылӧн ас дінас кык посни челядь бергалӧны, видзӧдӧны сылысь кодалӧмсӧ.

Воис рыт. Мужикъяс да бабаяс важӧн нин пырисны гортаныс узьны, медым асывнас водзджык мунны удж вылӧ. Улич вылын нывъяс да зонъяс ветлӧдлӧны. Ӧти-мӧдлаын кылӧны зэв лёк нога сьылӧм да чорыда матькӧм шы. Тайӧ лёк оласнога зонъяс юӧмаӧсь самӧкур да ветлӧдлӧны кодалӧны.

Уна сиктса йӧз олӧны коми сиктын. Ичӧта на тыдалӧ выль оласног. Чорыда дзугӧ пемыд йӧзӧс самӧкур, мужикъяс да зонъяс кындзи дикмӧдӧ (йӧймӧдӧ) тшӧтш нывбабаӧс.

Коми сиктын йӧзӧс югдӧдан удж колӧ ёнджыка чорзьӧдны.

Сиктса морт.