***

«Правда» газетын (юнь витӧд лунся номерын) «Нянь чукӧртны лӧсьӧдчӧм йылысь» статьяын гижӧма:

Тайӧ лунӧдз воӧм юӧръяс серти, таво позьӧ виччысьны колян вося дорысь бурджык нянь воӧм. Сэсся таво ещӧ колян во серти няньсӧ кӧдзӧма унджык. Омӧлика лыддьӧмӧн нин таво воны колӧ няньлы 300 миллион пудйӧн унджык колян во серти. Тайӧ лыддьӧм сертиыс кӧ нянь воас, миян сійӧ тырмас асланым Союзлы дай вель уна на вермам петкӧдны заграничаӧ. Сійӧ нянь петкӧдӧмнас ми ёнмӧдам ассьыным Сӧвет республикаясӧс, вайны заграничаысь кӧ крестьяналы колан тӧвар да видз-му уджалан кӧлуй. Сійӧн ми лэптам регыдджык крестьяналысь овмӧссӧ. Медыджыд уджыс ӧні тайӧ тӧлысьяснас — лӧсьӧдчыны чукӧртны нянь. Нянь му вылысь босьтӧм бӧрын уна миллион пуд крестьяна петкӧдасны вузавны. Колӧ лӧсьӧдчыны, мед кооперативъяс да мукӧд пӧлӧс государственнӧй организацияяс сэк кежлӧ вӧліны гӧтовӧсь нин. Кымын лоӧ бур урожай, сымын сійӧ уджыс лоӧ сьӧкыдджык.

Сьӧм доныс миян ӧні оз усь, чорыда сулалӧ. Сьӧмыс эм тырмымӧн, вермам лӧсьӧдны нянь ньӧбалігкежлӧ. Сійӧ боксянь повны миянлы дзик нинӧм. Медсьӧкыд уджыс таво лоӧ — лӧсьӧдны нянь вузалігкежлӧ крестьяналы колан тӧвар. Крестьянин нянь вузалігӧн кутас корны аслыс тӧвар. Кыдз-мый верман, ас вынӧн миян лоӧ лӧсьӧдны сійӧ колан тӧварсӧ, загранича вылӧ надейтчыны нинӧм. Сэсся сійӧ лӧсьӧдӧм тӧварсӧ колӧ кужны кадын разӧдны кытчӧ колӧ.

Мед тӧварсӧ удитан кадын разӧдны, колӧ ӧнісянь жӧ заводитны лӧсьӧдавны быдсяма пӧлӧс тӧвар новлӧдлан туйяс, медъёнасӧ кӧрт туйяс.

Вермам кӧ лӧсьӧдчыны чукӧртны нянь да бура сійӧс крестьяналысь чукӧртам, ми ещӧ на ёнджыка ӧтувтам крестьянаӧс рабочӧйяскӧд.