ЗАБАСТОВКА ПАСЬКАЛӦ

Лӧсьӧдісны мукӧд государство кост сёрнитны комитет. Комитет чорыда босьтчис уджавны. Пӧлича весиг челядьясӧс лыйлӧ.

Пекин. Шанхайын англияса пӧлича лыйӧма кӧкъямыс арӧса китайса детинаӧс да ранитӧма зэв уна посньыдик челядьӧс. Найӧ вӧлӧм лыйлӧны изйӧн трамвай ӧшиньясас, кӧні вӧлӧм мунӧны пӧличейскӧйясыс.

Забастовка пыр ӧтарӧ паськалӧ. Бастуйтны тшӧтш кутісны карса нянь пӧжалысьяс (пекари), грузчикъяс, машинаяс вӧчан заводысь рабочӧйяс да мукӧд. Телеграф вылын уджалысьяслы начальствоыс кӧсйысис мынтыны донсӧ куим мында, да уджалысьясыс эз кутчысьны уджавнысӧ. Рабочӧйяс, студентъяс да китайса купечьяс лӧсьӧдісны комитет. Сійӧ комитетыс нуӧ став сёрнисӧ мукӧд государствоса представительяскӧд. Комитетыс ӧні корӧ: мыждыны (судӧ сетны) шанхайса пӧличаыслысь начальниксӧ да пӧличейскӧйяссӧ, кодъяс лыйлісны йӧзсӧ, сетны сьӧм лыйлӧм да раниталӧм йӧз семьяяслы, вежны японияса да англияса консулъясӧс Шанхайысь, лэдзны вӧля вылӧ арестуйтӧм йӧзӧс да мукӧдтор.

Бастуйтысь йӧз пыр ӧтарӧ содӧ. Ӧні бастуйтӧны миллион морт кымын нин.

Став школаясын, университетъясын велӧдчысьяс (на пиын эмӧсь америкаса школаясын велӧдчысьяс) лӧсьӧдісны союз да ыстісны телеграммаяс англияса парламентлы, Макдональдлы да Соединённӧй Штатлы. Телеграммаясас висьталӧны китайса йӧзӧс ёна дзескӧдӧм йылысь.