КОМИ ОБЛАСЬТУВСА ИСПОЛНИТЕЛЬНӦЙ КОМИТЕТ ПРЕЗИДИУМЛӦН ШУӦМ
восьтавны Обласьтувса, Уездувса да Вӧлӧсьтувса Экспертнӧй Комиссияяс тӧдмӧдавны, артавны гӧра-кӧдза, турун быдмӧм, нянь да турун воӧм, чукӧртӧм (1925 вося апрель 17-ӧд лунся сёрнигижӧд № 57, §20).
Сы вӧсна: 1) медым тайӧ 1925ʼ воӧ ыджыда коставлытӧг пыр ӧтмоза тӧдмӧдавны турун-нянь быдмӧм йылысь лым улысь петӧмсянь йӧртӧдӧ да зорӧдъясӧ воштытӧдз, тӧдмӧдавны арся сю кӧдза йылысь лым улӧ сюртӧдз, артавны вогӧгӧрся быдтас-пуктас воӧм йылысь, 2) ӧтувтавны, чукӧртавны став тӧдмалӧм, арталӧмсӧ уна пӧлӧс йӧзӧн да 3) кыйӧдны сы туйӧд лючки удж нуӧдӧм сэтшӧм удж нуӧданін тшӧктӧм, индалӧм серти, Коми Обласьтувса Исполнительнӧй Комитет, Ц. С. У. циркуляр серти (1925 в. март 23-ӧд л. № 4273 (133)), шуис:
1. Сӧмын Обласьтувса Статбюроӧс лыддьыны турун-нянь да пуктас быдмӧм, чукӧртӧмъяс тӧдмалан, арталан учрежденньӧӧн. Мукӧд удж нуӧданінъясын татшӧм удж оз позь нуӧдны: лёк кындзи бурсӧ немтор сійӧ оз сет. Видз-му органъяслы позьӧ тӧдмӧдавны турун-нянь быдмӧм йылысь велӧдӧм могысь.
2. Обласьтувса Статбюролы аслас меставывса органъяс пыр ёна колӧ видзӧдны, медым бокӧвӧй удж нуӧданінсянь некутшӧм тӧдмалӧм, арталӧм нянь-турун, пуктас быдмӧм, чукӧртӧм эз вӧв. Казялан кӧ, колӧ вужнас бырӧдны сэтшӧм йӧз уджӧ кутчысьӧмсӧ, мӧдысь кежлӧ мед оз торкны йӧзлысь удж.
3. Кодлыкӧ кӧ колӧ тӧдмавны нянь, турун, пуктас быдмӧм, воӧм Коми обласьтын, мед йитчас, гижӧдчас Обстатбюрокӧд, пырас сійӧ уджалысьяс пиӧ.
4. Бокысь пырӧм уджалысьяслысь уджсӧ удж нуӧдӧм сертиыс либӧ удж нуӧданін тшӧктӧм вӧснаыс бӧрыннас позьӧ торйӧдны Статбюро уджсьыс, вӧчны, быттьӧ торъя удж.
5. Сы вӧсна, медым нянь, турун, пуктас быдмӧм, воӧм тӧдмалӧм муніс ӧти ногӧн, ӧти туйӧд, ӧтилаын, быд Волисполком бердӧ, Уисполком бердӧ, Сыктывдінкарын Обисполком бердӧ восьтавны Экспертнӧй Комиссияяс.
6. Комиссияӧ пырӧны:
а) Вӧлӧсьтувса комиссияӧ: 1) Волисполкомса председатель, 2) ВИК-ын Видз-му делӧясӧн заведуйтысь либӧ участокса агрономъяс пиысь кодкӧ, 3) финанс юкӧдсянь уджалысь, 4) страхӧвӧй агент, 5) кооперативсянь бӧрйӧм морт, 6) волстатистик либӧ сы пыдди уджалысь морт, 7) комсомол ячейкабердса видз-му кружоксянь бӧрйӧм морт, 8) Волисполкомбердса видз-му секцияысь бӧрйӧм морт.
Содтас: Вӧлӧсьтувса комиссияын юралысьнас колӧ лоны Волисполкомса председательлы; секретарнас — волстатистиклы либӧ сы пыдди уджалысьыслы.
б) Уездувса Комиссияӧ ӧти мортӧн: 1) Уисполкомсянь, 2) Укомсянь, 3) Укоммолсянь, 4) Уездувса видз-му юкӧдсянь, 5) фининспектор, 6) страхӧвӧй агент, 7) Видз-му кооперацияысь кодкӧ да 8) Обстатбюросянь уджалысь морт.
в) Обласьтувса Комиссияӧ ӧти мортӧн: 1) Обисполкомсянь, 2) Обкомсянь, 3) Обкоммолсянь, 4) Обфинюкӧдсянь, 5) Обвидз-му управленньӧсянь, 6) Обвнуторгсянь, 7) Обстрахсянь, 8) Р.К.Инс-сянь, 9) Обстатбюросянь, 10) Хлебопродуктсянь да 11) Видз-му кооперативсянь.
г) Удж нуӧданінъяс, кодъяс пырӧны Обласьтувса Комиссияӧ, медым тшӧктасны асланыс уездувса да вӧлӧсьтувса юкӧдъясын уджалысьяслы пырны Экспертнӧй Комиссияӧ, Обстатбюросянь да сылӧн уездувса уджалысьяс быд юасьӧм вылӧ ыставны юӧръяс.
7. Комиссия аслас сёрнитігъясас, тӧлкуйтігъясас вермас корны тӧдысь йӧзӧс.
8. Колӧ, медым Комиссияын уджалысьяс удж помасьтӧдзыс оз вежласьны; медым ӧти пӧлӧс йӧз уджсӧ нуӧдасны помӧдзыс.
9. Волстатистикъяс да Обстатбюросянь карса уполномоченнӧйяс вермасны комиссиякӧд не лӧсьӧдчыны.
10. Комиссияяслӧн колӧ сёрнигижӧдъяссӧ нуӧдны Обстатбюроӧн лӧсьӧдӧм формаяс кузя.
11. Комиссияяслы став уджсӧ нуӧдны, видзӧдны уджалӧмсӧ Обстатбюро тшӧктӧм серти.
12. Быд Уисполкомлы да Волисполкомлы Обласьтын тшӧктысьӧ пырысь-пыр жӧ восьтавны Экспертнӧй Комиссияяс да отсасьны налы уджалігчӧжыс мыйӧн позяс. Удж тайӧ зэв ыджыд да зэв колан.
13. Тайӧ шуӧм кузя удж нуӧдӧм вылӧ тшӧктысьӧ видзӧдны Обстатбюролы.
Коми обисполкомса председатель пыдди Нахлупин.
Секретар Попов.
