АБУ ВЕСЬКЫДА ГИЖӦМА

(Вочакыв «пионеръясӧс дзескӧдӧны» гижӧд вылӧ)

«Коми Сиктын» 1-ӧд №-ын кодкӧ гижӧ — быттьӧ пӧ ме рытъясын вӧтлыся пионеръяс бӧрся, быд ног вида да бать-мамныслы шуа, мед найӧ челядьсӧ школаӧ оз лэдзны. Гижысьыс кывлӧма звӧн да оз тӧд сійӧ кӧн.

Миян пионер костын эмӧсь морт мӧд-коймӧд, кодъяс ывлаті ветлӧны да йӧзсӧ быдсяма ногнас понъялӧны, войясын понъясян кывъясӧн сьылӧны. Сідзи вӧчысьястӧ кыдзи сэсся шуан, он кӧ кулиганӧн.

Ӧтчыд мунігӧн рытын час дас-ӧти гӧгӧр меным паныдасисны морт куим-нёль да кутісны менӧ понъявны. Ме муніг моз шуи: «Ак ті, кулиганъяс!» Найӧ ещӧ чорыдджыка кутісны менӧ понъявны. Сэки ме бергӧдчи да на пиысь ӧтикӧс и куті. Сэсся сійӧс нуӧді гортас батьыс дінӧ дай висьталі сылы кулиганитӧмсӧ.

Со кутшӧм вӧлі могыс, — не вӧтлысьӧм да Ленинлысь индӧм уджсӧ дугдӧдӧм.

Висьтавлыны бать-мамъяслы, мед найӧ ассьыныс челядьнысӧ школаӧ оз лэдзны, ме эг вермы. Менам аслам сійӧ жӧ школаын велӧдчӧны куим челядь.

Куим-нёль пионеръяс асьнысӧ омӧля видзӧм йылысь Полякова дай мукӧд не ӧтчыд нин норасьлісны пионеръяс пӧвстын удж нуӧдысьлы. Поляковалӧн некутшӧм мыж абу.

Мукӧд пионеръяс асьнысӧ зэв бура видзӧны кыдзи колӧ устав ногӧн. На вылӧ омӧль кыв шуны оз позь.

Не веськыда гижысьӧс газетӧ сетӧма судӧ. Сэні збыльыс воссяс.

Степанов.