ШОНДІБАНӦЙ, ВЕЛӦДЫСЬ ЖӦ ӦД!

Кыркӧтшса школаын (Емдін у.) велӧдӧ А. П. Политова. Сійӧ ӧнӧдз на абу вермӧма дугдыны енлы да знакаркаяслы эскӧмысь. Нӧбасьӧм вӧсна сылы сетісны нёль тӧлысь кежлӧ отпуск. Отпуск дырйи пыр оліс школаын. Том йӧзлы зэв нимкодь: велӧдысьлӧн пӧ регыд октябрина лоӧ, — шуӧны. Коркӧ кывсьӧ, Политова пӧ кагасӧ вайӧма дай пыртӧма нин вичкоын. Сэк кежлӧ нарошнӧ корлас мужиксӧ, мед ачыс оз мыжмы.

Сійӧ ӧд мый на!

Степан лунӧ (Кыркӧтшын местнӧй праздник) Политоваыд лэччас сиктӧ гуляйтны. Сылы паныдасяс Лука Ёгор гӧтыр. Политоваыд вӧлӧм зэв ёна полӧ сыысь. Кодкӧ висьталӧма сылы: Лука Ёгор гӧтырыд пӧ тӧдысь (еретнича). Сы шӧрӧ-водзӧ: Политоваыд рытнад гортас локтӧм бӧрын и висьмӧма. Мӧд асывнас сійӧ корӧма нимкыв видзысь бабаӧс, шуӧ: менӧ пӧ Лука Ёгор гӧтыр тӧрыт вомдзаліс, сы вӧсна пӧ ме и висьми. Нимвидзысь бабаыд корас ва да дӧрӧм. Дӧрӧм помсӧ ваад сюяс, куимысь кресталас мыйкӧ шуалігтырйи (лыддяс лечитан молитвасӧ). Сэсся ваад сюяс пурт да шуӧ: то ӧд пӧ тэнӧ кутшӧма тшыкӧдлӧмаӧсь, пуртыс пӧ быдӧн сувтіс ваас...

Со ӧд кутшӧм велӧдысьыд миян Кыркӧтшад. Бура бара сійӧ «велӧдас» челядьтӧ.

Тӧдысь.