КЫТЧӦ ДА КЫДЗИ НОРАСЬНЫ, НЕЛАДНӦ КӦ ПУКТАСНЫ НАЛОГ

Быд крестьянин вермӧ норасьны, налогсӧ кӧ сылы нелючки пуктӧмаӧсь: унджык видз-му либӧ скӧт лыддьӧмаӧсь ли, мый ли.

Норасьӧмъяссӧ видлавны быд вӧлӧсьтса исполком бердӧ лӧсьӧдалӧны налогӧвӧй комиссияяс.^Кыдзи лӧсьӧдавсьӧ сэтшӧм комиссияясыс, видзӧдӧй «Коми Сикт» газетысь № 7./^

Вӧлӧсьтувса налогӧвӧй комиссияяс видлалӧны норасьӧмъяссӧ ӧтка налог мынтысьяслысь дай артельӧн видз-му уджалысьяслысь.

Норасьӧмъяс да заявленньӧяс колӧ сетны гижӧдӧн (кывйӧн висьталӧм пыдди оз пуктыссьы). Заявленньӧас колӧ гижны, кодсянь, кутшӧм сиктсянь, вӧлӧсьтсянь сетсьӧ сійӧ. Сэсся лючки гижны коланторсӧ.

Коді сетӧ норасьӧмсӧ неладнӧ скӧт лыд, либӧ семья лыд, либӧ семья пытшкысь уджавны вермысь лыдсӧ пуктӧмысь, колӧ сельсӧветсянь босьтны эскӧданпас (мый сійӧ крестьяниныслӧн збыль унджык ли этшаджык пуктӧм сертиыс) да ыстыны норасьӧмыскӧд. Му лыдсӧ ли, видз лыдсӧ ли неладнӧ кӧ пуктӧмаӧсь крестьяниныслысь, сэки колӧ корны гижӧд сы йылысь видз-му юкӧдысь, либӧ, эм кӧ, видз-му лӧсьӧдысьлысь (землеустроитель) дай сетны гижӧдсӧ норасьӧмыскӧд.

Налог мынтысьысьлӧн кӧ мыйкӧ лои: скӧт кулі-ӧ, сотчис-ӧ, шерӧн няньсӧ жугӧдіс-ӧ, мукӧд сэтшӧмтор-ӧ, налог мынтысьлы колӧ сетны налогӧвӧй комиссияӧ заявленньӧ, корны комиссиялысь дзикӧдз мездыны налогсьыс либӧ чинтыны мыйкӧ мында. Сэтшӧм нелючкиторйыс кӧ суис дзонь сиктӧс, заявленньӧсӧ колӧ сетны став обществолы сельсӧвет пыр вӧлӧсьтувса налогӧвӧй комиссияӧ жӧ. Комиссияыс сэсся ыстӧ сійӧ сиктас торъя комиссия акт вылӧ вӧчӧм омӧльтор лоӧм йывсьыс. Сэтшӧм заявленньӧяссӧ вӧлӧсьтувса налогӧвӧй комиссия ыстӧ уездувса налогӧвӧй комиссияӧ. Сиктса обществоыслы кӧ оз кажитчы уездувса комиссияыслӧн лӧсьӧдӧмыс, вермас ыстыны губерняувса налогӧвӧй комиссияӧ, сӧмын вермас ыстыны оз веськыда, а вӧлӧсьт пыр либӧ уезд пыр.

Крестьяна кӧзяйствояслы, кодъяслы законӧн сетӧма кокньӧдъяс,^Гижӧма «Коми Сикт» газетӧ 7-ӧд номерын./^ заявленньӧсӧ кокньӧдсӧ сетӧм йывсьыс оз ков гижны. Налы кортӧгыс вӧлӧсьтса волисполкомыс сетӧ кокньӧдсӧ дай пасъялӧ окладнӧй листъясӧ.

Гӧрдармееч семьяяс сетӧны вӧлӧсьтувса исполкомӧ заявленньӧ пыдди эскӧданпас Гӧрд армияын на пиысь служитысьяс йылысь. Сідз жӧ вӧчӧны семьяяс, кодъяслӧн велӧдчӧны коммунист университетын, дай инвалидъяс.

Гӧль крестьяна, оз кӧ вермыны найӧ мынтыны налогсӧ дзикӧдз либӧ срок кежлас, заявленньӧтӧ вермӧны жӧ сетны налог шыбитӧм йылысь ли, чинтӧм йылысь ли, мынтан сроксӧ нюжӧдӧм йылысь ли.

Быдпӧлӧс заявленньӧ колӧ сетны кадын, мыйӧн тӧдлан неладнӧ налог пуктӧм йывсьыс. Пӧжар ли, скӧт усьӧм ли, нянь тшыкӧм кӧ лоӧ, заявленньӧтӧ пыр жӧ лоӧм бӧртиыс колӧ сетны.

Норасьӧмъяс, мукӧд сикас заявленньӧяс сетӧмӧн пыр колӧ тэрмасьны, мед срокыс оз коль. Срокыс кӧ коляс, заявленньӧястӧ оз кутны видлавны.

Вӧлӧсьтувса комиссияыслӧн кӧ лӧсьӧдӧмыс налог мынтысьыслы оз кажитчы веськыдӧн, сійӧ вермас жалӧбасӧ сетны уездувса налогӧвӧй комиссияӧ, сӧмын сетны быть волисполком пыр. Волисполкомыс ыстӧ тшӧтш уездлы колан справкаяс сы йылысь.

Ӧтка налог мынтысьяслы уездувса налогӧвӧй комиссиялӧн лӧсьӧдӧмыс медбӧръя нин. Сы бӧрын норасьӧмсӧ некытчӧ оз позь сетныс.