ӦШ ЛӦСЬӦДӦМ ЙЫЛЫСЬ

Омӧль ӧшкӧн омӧль куканьяс.

Миян крестьяна зэв омӧля тӧждысьӧны асланыс скӧтлы бур ӧш лӧсьӧдӧм вӧсна. Кодлӧнкӧ кӧ эм ӧш, кӧть мед кутшӧм сійӧ вӧлі, сы дінӧ и нуӧны мӧсъястӧ. Ӧш видзысьыд, дерт, медъёнасӧ зільӧ унджык сьӧм босьтны. Сійӧ ӧш бурмӧдӧм йылысь оз зэв тӧждысь.

Бурджыка кӧ мӧвпыштан, бур ӧш лӧсьӧдӧм йылысь колӧ тӧждысьны став сиктыслы. Бур ӧшкысь сӧмын вермас лоны бур куканьыд, бур мӧскыд. Став бурыс и омӧльыс вуджӧ ӧшсянь да мӧссянь куканяс. Медомӧль мӧс ёна на бур омӧль ӧш дінын. Мӧскыд убыткасӧ вайӧ сӧмын ӧти крестьянинлы, омӧль ӧшкыд ваяс убыткасӧ быдса сиктлы.

Сэсся унаысь ӧшкыд (омӧля вердӧмла либӧ томӧн мӧс дінӧ лэдзӧм вӧсна) оз вермы тырсьӧдны мӧсъястӧ. Сы вӧсна миян пыр зэв уна тыртӧм мӧскыд. Сэсся омӧль ӧшкысь лоӧны торъя висьӧмъяс. Миян орчча Архангельска губерня улын скӧтыд кутіс ёна висьны (инфекционный вагинит). Сійӧ висьӧмыс зэв вуджысь, дай бурдӧдны сьӧкыд. Вуджӧ сійӧ висьӧмыс кызысьсӧ ӧшсянь мӧс вылӧ чеччалігӧн.

Ӧні аддзанныд, кутшӧма колӧ крестьяналы бур, висьтӧм ӧш.

Кутшӧм ӧш колӧ бӧрйыны.

Ӧш бӧрйигӧн колӧ медвойдӧр юасьны, кутшӧм мам-батьыс сылӧн вӧліны. Сэсся мед ӧшкыд вӧлі кокньыдик кос юра, паськыд да джуджыд морӧса, ачыс гӧгрӧс веськыд мышкуа, вӧсньыдик лыяса да кучика.

Он кӧ тӧд ӧш мамыслысь да бабыслысь лысьтӧмсӧ, оз ков сійӧс ньӧбны весиг выставкаяс вылысь. Мамыс да бабыс кӧ ӧшкыдлӧн вӧліны ичӧт йӧлаӧсь, ӧшкыд бурсӧ крестьяналы ваяс зэв этша, мед кӧть сылы выставка вылад сетасны сэсся дас награда. Мӧсъяс дінӧ лэдзтӧдз колӧ ӧшкӧс петкӧдлыны скӧт лечитысь докторлы либӧ пельшӧрлы — оз-ӧ сійӧ вись кутшӧмкӧ висьӧмӧн.

Кор ӧш дінӧ ёнджыка ваявлӧны мӧсъясӧс, сэки ёнджыка колӧ вердны сійӧс, сӧмын колӧ видзӧдны, мед ӧшкыд оз госав. Госа ӧшкыд тшыг ӧш моз жӧ омӧля чеччалӧ мӧсъяс вылӧ, оз вермы тырсьӧдны мӧсъясӧс.

Мӧс дінӧ ӧшкӧс оз ков лэдзны кык арӧс тыртӧдз кымын.

Бур ӧшкӧн сӧмын ми вермам бурмӧдны крестьяна скӧт. Сы вӧсна колӧ сійӧс бӧрйӧм вылӧ да вердӧм вылӧ ёнджыка видзӧдлыны.

Зоотехник МУЛИХИН.