ГАЗЕТӦ ГИЖЫСЬЯС ЙЫЛЫСЬ

КОДІ ЛОӦ ГАЗЕТӦ ГИЖЫСЬЫС.

Сиктъяссянь газетӧ гижысьяс абу куш ӧти гижысьяс. Налӧн уджыс абу сӧмын газетӧ гижны — дай пом. Найӧ асланыс сиктын обществоса удж нуӧдысьяс. Найӧ асланыс уджӧн ёна отсалӧны Сӧвет власьтлы дай коммунист партиялы. Газетӧ гижысь аслас газет пыр ыджыд отсӧг миян Ленин ёрт тшӧктӧмлы — рабочӧйяслы крестьянакӧд ӧтувтчӧмлы, карлы сикткӧд йитчӧмлы. Газетӧ гижысь аслас газет пыр висьталӧ став пемыд олӧмсӧ, югыд олӧмсӧ, чуйдӧдӧ сиктса йӧзӧс югыд олӧмас. Сійӧ газет пыр вештӧ обществоса служба вылӧ сюйсьӧм лёк йӧзӧс. Сійӧ нуӧдӧ крестьянасӧ, ставнас сиктсӧ югыд, долыд, кокни олӧмӧ, кутшӧмӧс зільӧ лӧсьӧдны тільсьысь-пессьысь йӧзлы коммунист партия, тшӧтш Сӧвет власьт.

КЫТЧӦ ӦТУВТЧЫНЫ ГАЗЕТӦ ГИЖЫСЬЯСЛЫ.

Миян Коми обласьтувса сиктъясын газетӧ гижысьяс эмӧсь вель уна. Найӧ гижӧны «Югыд туйӧ», «Коми сиктӧ», «Красная Печора» газетӧ. Эмӧсь гижысьяс и Центрса газетъясӧ. Сэсся миян обласьтын сиктъясын лэдзӧны стенӧ ӧшӧдан газетъяс. Сэні бара эмӧсь уна гижысьяс. Ставыс, ме чайта, миян сиктъясын лоӧ газетӧ гижысьыд морт витсё кымын, ещӧ унджык на. Ставсӧ найӧс колӧ ӧтувтны. Кытчӧ ӧтувтны? Медбур газетӧ гижысьяслы ӧтувтчыны «Газетлы отсасян» кружокъясӧ.

«ГАЗЕТЛЫ ОТСАСЯН» КРУЖОК.

Ми гижлім нин «Газетлы отсасян» кружокъяс йылысь. Гижлім нин, мыйла найӧ колӧны. Найӧ колӧны, медым газетӧ гижысьяс бурджыка велӧдчисны кружокас газетӧ гижны; медым найӧлы кокниджыка позис колан чуйдӧд сетны; медым найӧ крестьяналы лыддялісны газетъяс; медым кружокъяс унджык газет сюйисны крестьяна пӧвстӧ.

Ми не ӧтчыд нин гижлім, коді вермас «Газетлы отсасян» кружокӧ пырны, кодлы колӧ сэні удж нуӧдӧмас босьтчыны, кӧні уджавны кружокыслы. Гижлім тшӧтш, мый колӧ вӧчны «Газетлы отсасян» кружоклы. Став йывсьыс гижлім нин важӧнкодь.

МЫЙ ВӦСНА?

Сӧмын мый вӧсна кӧ миян чукӧстчӧм вылӧ некод на некӧні эз шыӧдчы. Весиг ӧти сиктын на абу «Газетлы отсасян» кружокыд. Мый вӧсна? Ми чайтам, быдӧн ӧд нин тӧдӧны, быдӧн гӧгӧрвоисны, мый лоӧ газетӧ гижысьыс, мыйла колӧ найӧс ӧтувтны, мыйла колӧ кыскыны «Газетлы отсасян» кружокӧ унджык крестьянаӧс.

КОЛӦ БОСЬТЧЫНЫ КРУЖОКЪЯС ЛӦСЬӦДӦМӦ.

Колӧ босьтчыны «Газетлы отсасян» кружокъяс лӧсьӧдӧмӧ регыдджык, колӧ тэрмасьыштны. Нюжӧдчыны ньӧти оз ков. Мукӧд губерняясын уналаын нин эмӧсь татшӧм кружокъясыс. Ставныс найӧ босьтчӧмаӧсь чорыда уджӧ, ставныс петкӧдлісны кружокъяслысь коланлунсӧ. Кӧні эм «Газетлы отсасян» кружок, сэні и содӧны газетӧ гижысьяс, сэні и вочасӧн бурджыка да бурджыка газетӧ гижӧдыс артмӧ, сэні и унджык крестьяна кружокъяснас ышӧдӧм вӧсна судзӧдӧны аслыныс газет.

Миян сиктъясын оз ков видзӧдны да повны этшаӧн кружокӧ пырӧмысь. Мед сэтчӧ пырасны куим морт, нёль морт. Мед сӧмын найӧ босьтчасны уджавны. Сэсся вочасӧн унджык крестьяна кружокад пырас.

БЫДӦНЛЫ МОГ БОСЬТЧЫНЫ КРУЖОК ЛӦСЬӦДНЫ.

Стенӧ ӧшӧдан газет редколлегияяс, асьныд газетӧ гижысьяс, коммунист, комсомол да профсоюз ячейкаяс, сёрниталӧй «Газетлы отсасян» кружокъяс йылысь, босьтчӧй сійӧс асланыд сиктын лӧсьӧдны, кыскӧй унджык йӧзӧс, пырӧй сэтчӧ асьныд, нуӧдӧй сэні уджсӧ. Школаын велӧдысьяс, избачьяс, агрономъяс, быд гӧгӧрвоысь ёрт, тіян тшӧтш мог босьтчӧдны «Газетлы отсасян» кружокъяс лӧсьӧдӧм, уджсӧ сэні сувтӧдны.

Кӧні коді оз гӧгӧрво, код ногӧн колӧ восьтыны тайӧ кружоксӧ, мый сэні уджавны, гижӧй «Коми сикт» редакцияӧ либӧ обласьтувса газетӧ гижысьяс бюроӧ (сійӧ редакция бердын жӧ). Найӧ газет пырыс либӧ торъя юӧрӧн висьталасны ставсӧ «Газетлы отсасян» кружокъяс йылысь.

Гижӧй тшӧтш, кӧні восьтӧма лоӧ «Газетлы отсасян» кружокыс, кымын морт сэтчӧ пырис, коді нуӧдӧ уджсӧ, мый кружокыс уджалӧ. Ми сы йылысь гижны кутам газетын.

Кӧні медвойдӧр лоӧ «Газетлы отсасян» кружок? Коді медводз босьтчас тайӧ уджӧ? Гижӧй газетӧ. Ми ёна виччысям!