СОВНАРКОМЛӦН ӦТУВ ГУБЕРНЯУВСА, УЕЗДУВСА ДА ВӦЛӦСЬТУВСА ЙӦЗКӦД ЗАСЕДАННЬӦ

Йӧзӧс велӧдӧм удж йылысь сёрни

Гырысь йӧзӧс велӧдім колян вося серти кык мында. Сӧмын тайӧ этша на. Колӧ вӧлі велӧдны куим мында ӧнія велӧдӧм дорысь. Велӧдӧм удж вылӧ колӧ сьӧм.

Май 29-ӧд лунӧ вӧлі заседанньӧ РСФСР-са Народнӧй Комиссаръяс Сӧветлӧн. Сійӧ заседанньӧ вылас тшӧтш вӧліны губерняувса, уездувса да вӧлӧсьтувса исполкомъяссянь представительяс.

Йӧзӧс велӧдан Комиссариат (Наркомпрос) удж йылысь доклад вӧчис Луначарскӧй ёрт. Луначарскӧй ёрт шуис: сиктса велӧдысьяс олӧны зэв на омӧля, огӧ на ми тырмидз вермӧй мынтыны налы дон. Таво гырысь йӧзӧс велӧдӧм ёна паськалі. Велӧдім колян во серти кык мында йӧзӧс, сӧмын велӧдӧм лыдыс сійӧ ёна на этша кӧсйысьӧм серти. План серти ми кӧсйылім велӧдны таво куим сы мында. Тайӧ удж вылӧ миян колӧ корсьны кыськӧ сьӧм. Велӧдны грамотаӧ колӧ ещӧ 17 миллион йӧзӧс — сійӧ вывті сьӧкыд удж, сьӧмтӧг нинӧм вӧчны он вермы. Луначарскӧй ёрт доклад кузя ёна сёрнитісны представительяс. Медбӧръяысь Луначарскӧй ёртӧн висьталӧм бӧрын бӧрйисны комиссия доклад кузяыс лӧсьӧдны резолюция. Комиссияас тшӧтш бӧрйисны губерняувса, уездувса да вӧлӧсьтувса исполкомъяссянь представительяс пытшсьыс.