ЗЕМЛЕУСТРОЙСТВО НУӦДӦМ ЙЫЛЫСЬ СӦВЕТЪЯС 3-ӦД СЪЕЗДЛӦН ТШӦКТӦМЪЯС

Ми «Коми Сиктын» колян 7 (1196) номерас гижлім нин Россияса Сӧветъяслӧн 12-ӧд съездлысь шуӧмъяссӧ землеустройство удж нуӧдӧм кузя. Сійӧ шуліс кокньӧдны крестьяналы землеустройство нуӧдӧм. Та йылысь вӧлі сёрни и Сӧвет республикаяс Союзса Сӧветъяс 3-ӧд съезд вылын. Мый шуис тайӧ съездыс землеустройство удж нуӧдӧм йылысь?

Медвойдӧр колӧ висьтавны со мый. Ставсоюзса Сӧветъяслӧн коймӧд съездыс тшӧктіс сетны государствосянь куим миллион шайт сьӧмӧн, медым гӧль крестьяна вермисны тайӧ сьӧмнас нуӧдны землеустройствосӧ. Тайӧ сьӧмсӧ юклігӧн колӧ ёна видзӧдны, мед эськӧ отсӧгыс лои збыль куш гӧль крестьяналы, мед сьӧмыс веськалі куш налы землеустройствосӧ нуӧдны.

Сэсся съезд шуис, кыдзи позьӧ ӧдйӧнджык нуӧдны землеустройство став Союз пасьта. Тайӧ уджсӧ вӧчны дзик пыр, ӧтпырйӧ он вермы. Та вылӧ оз тырмыны на миян землемеръяс, сэсся миян крестьянинлӧн овмӧсыс гӧль на, уджсӧ падмӧдан мукӧдторъяс вӧсна. Съезд тшӧктіс лӧсьӧдны землеустройство нуӧдӧм вылӧ сэтшӧм план, медым сійӧ план сертиыс позьӧ нуӧдны землеустройствосӧ став Сӧветъяс Союз пасьта дас воӧн. Тайӧ тшӧктӧм сертиыс ӧні и лоӧ ассьыныс уджсӧ нуӧдны видз-му юкӧдъяслы. Налы ӧні лоӧ чорыдджыка нин босьтчыны удж бердӧ, медым срок кежлӧ лоӧ помалӧма землеустройство нуӧдӧмсӧ. Ӧнӧдз ӧд видз-му юкӧдъяс землеустройствосӧ нуӧдлісны некутшӧм плантӧг, мый дыра окота вӧлі.

Дерт, дас вося срокыд вель ыджыд. Миян крестьяна зільӧны регыдджыкӧн нуӧдны землеустройствосӧ, зільӧны регыдджык сувтӧдны бурджыка видз-му уджалӧм. Та вӧсна крестьяналы колӧ мӧвпыштны бурджыка. Крестьяналы колӧ аслыныс, землемерӧн, тыр землеустройство нуӧдтӧдз босьтчыны дась ӧнія видз-мусӧ уджавны выль ногӧн, вуджны куим переменаӧн уджалӧмысь унджык перемена вылӧ.

Позьӧ-ӧ тайӧ уджсӧ крестьяналы вӧчны? Позьӧ кӧ, кыдзи вӧчны? Дерт, позьӧ. Миян овлывлӧ му вешталӧм (му юклӧм — передел). Тайӧ му вешталӧмсӧ некутшӧм сиктын нин оз ков вӧчны важ моз куш вешталӧмӧн. Колӧ мусӧ вештавны-юклыны сідзи, медым сэки бырӧны посни да уна пельын муяс, гырсьӧдны муяссӧ, вуджны уна переменаӧн му уджалӧмӧ.

Ми корам та кузя висьтавны газет пыр, чуйдӧдны крестьянаӧс землемеръяслы, корам ассьыныс чайтӧмсӧ (мнение) та йылысь крестьяналы гижны газетӧ. Медым ми кокньыдджыка, регыдджыка ӧтвылысь сёрнитӧмӧн газет пыр вермам бурмӧдны видз-му уджалӧм.