ПЕРНА

«Меным мамӧ пыр тшӧктӧ новлыны перна.

Сӧмын ме ставсӧ нин сылысь запассӧ вошталі».

(Юӧръясысь.)

Перна... Быдӧн ми сійӧс тӧдам. Сійӧ крест кодь. Крест кодь, мый вылӧ быттьӧкӧ пӧ ӧшӧдлісны кутшӧмкӧ Исус Кристосӧс. Перна новлӧны сьывйын енлы эскысь йӧз, омӧльяс сибалӧмысь видзчысьӧны. Тшӧтш новлӧны мырдӧн-сорӧн енлы эскытӧм войтыр.

Микит Микул Степан Иван оз вӧлі енлы эскы. Тшӧтш оз радейт вӧлі новлыны перна. Мамыс сылӧн вӧлі «шалтай-болтай» эскысь морт. Сӧмын пыр вӧлі новлӧ перна дай челядьсӧ новлӧдӧ пернаӧн. Сійӧ вӧлі гӧлиник дӧва баба. Челядьсӧ новлӧдліс жӧч пернаӧн. Коркӧ аддзис пиыслысь узигас — сьыліыс пернатӧм. Мортыдлӧн сьӧлӧмыс гудыртчис. Ньӧжйӧ-ньӧжйӧ, гусясьысь моз ӧшӧдіс пилы перна пыш шӧрт йылӧ голяас. Микит Микул Степан Иван садьмис, казяліс пернатӧ гӧляысь, нюммуні. Аскинас асывнас бара сылӧн пернаыд абу. Мамыс бара ӧшӧдіс. Аскомысьнас бара нин Микит Микул Степан Иванлӧн перна эз ло. Дзонь вит перна сідзи гӧлиник дӧва баба видзис Микит Микул Степан Иванлы. Став запасыс быри. Ньӧбныд некысь. Дӧзмис мортыд. Видыштіс писӧ. Чорыда видыштіс — енмӧс да омӧльӧс сорӧн-сорӧн казьтылӧмӧн, молитва да ёрччӧм сорӧн.

Микит Микул Степан Иван нюмъялӧ сӧмын. «Мый меным пернасьыс, сӧмын няйтчӧдӧ яйтӧ!» — шуӧ. «Ланьтан он!» — горӧдас мамыд. «Вай меным зарни перна зарни чеп йылын — дай новла», — шуӧ нюмъялігтырйи пиыд. Тӧдӧ, мамыд оз вермы лӧсьӧдны сэтшӧм пернатӧ.

Микит Микул Степан Иван мыні перна новлӧмысь. Мамыс тільсьӧ-пессьӧ — зільӧ судзӧдны зарни перна.

Дугды, дугды, муса тьӧтушкаӧй, пессьыны. Этша нин ен тӧдтӧм питӧ пернаӧ пӧртан. Бурджык лоӧ, ассьыд кӧ тшӧтш пернатӧ шыбитан, сыкӧд тшӧтш енлы эскӧмтӧ.

Том йӧзлысь ставныслысь корам видлавны сьылісӧ — оз-ӧ сэні перна гӧвкъяв. Коді убӧлитас шыбитны — юӧртӧй меным.