ЗАВОДЫН УДЖАЛӦМ ЙЫЛЫСЬ

Уна коми йӧз 1923ʼ воын ветлісны Надеждинскӧй заводӧ пес керавны. Сэки уджалӧмсьыс донсӧ мынтісны пызьӧн, ситечӧн да мукӧдторйӧн. Зільджык войтыр сэки тырыс вайисны нажӧтка. Сы вылӧ надеяӧн колян арын коми йӧз ещӧ нин унаӧн мунісны заводад.

Пес кералысьяс унаӧн медасигӧн эз мӧвпыштлыны, кутшӧмджык уджалан договорыс. Мукӧдыс эськӧ вӧлі шуӧны жӧ — донтӧм пӧ таво пескыд. Сӧмын няньтӧм олӧмыд ыстӧ нажӧтка вылад.

Вӧрыс воддза серти заводын вӧлі зэв омӧль. Сэсся сыв пес вылӧ вӧлі сетӧны сӧмын 4 шайт да 68 ур. Сэтшӧм вӧрсьыд верстьӧ кык мужик ёна зільӧмӧн вермӧны вӧлі керавны тӧлысьнас сыв кӧкъямыс — 37 шайт да 44 ур дон. Сёйӧмӧ мунӧ 16−18 шайт тӧлысь. Артыштан кӧ кӧмкот-паськӧмтӧ коз пуад косясьлӧмсӧ, кынӧмпӧтыд кындзи некутшӧм нажӧтка абу. Администрациялы шуа вӧлі донтӧм йывсьыд да лёк вӧр йывсьыд. Сійӧ сӧмын воча шуас: медасигад пӧ ті договортӧ абу видзӧдлӧмныд. Кӧть мед Сосьваӧ (юӧ) сэсся сюйны вӧлі гижӧма договорад.

Договорас ӧтилаын вӧлі пасйӧма лёкинын керасьӧмысь сетны 5 шайт да 41 урӧн сывйысь. Сӧмын сы вылӧ администрацияыд эз видзӧдлы. Ог тӧд, коми уполномоченнӧй Улитин ёрт тӧдліс эз сы йылысь.

Сэсся договорын вӧлі шуӧма быд нажӧвитӧм шайт вылӧ сетны 15 пунт пызь. Удж эштӧм бӧрын кутісны сетны Сыктывдінкарса складысь сӧмын 15 пудйӧн, кӧть мед пес кералысьлӧн мыйта уджалӧма. Пес кералысьяс таысь дӧзмӧмаӧсь, шуӧны, кӧсйысьӧм дон пӧ оз сетны, пӧръясьӧны пӧ.

Мужикъяслы норма тырӧм бӧрти гортас мунігӧн сеталісны суточнӧй сьӧм куим шайт да джынйӧн. Нывбабалы да томджык йӧзлы некутшӧм суточнӧй эз сетны, нормаыс эськӧ вӧлі тырӧма жӧ да. Шуӧны, налӧн пӧ абу удж договорыс. Быттьӧ лӧсьӧдӧм пескыс абу ӧткодь! Миян ӧд нывбабаыд да томджык йӧзыд ӧткодя уджалӧны, ӧткодя жӧ и вӧлі колӧ мынтыны татшӧм уджсьыс.

Колӧ эськӧ мӧд во кежлӧ лӧсьыдджыка да бурджыка лӧсьӧдны договортӧ. Сэсся мед йӧзыс медасигас тӧдӧны вӧлі договорсӧ, тӧдӧны, кутшӧм вӧрын уджавны лоӧ да бур-ӧ вӧрыс.

Ӧньӧ Васька.