ТОРЙӦДӦМ ПЫДДИ ЁНДЖЫКА РАБОЧӦЙЯС ӦТЛААСЯСНЫ

Лондон. Англияса мукӧд государство кост удж нуӧдысь министр Чемберлен неважӧн шуліс парламентас: ӧти коммунистӧс пӧ мукӧд государствоысь огӧ лэдзӧй Англияӧ, кодъяс локны кутасны англияса коммунист партияса съезд вылӧ Глазгоӧ. Сӧмын абу лоӧма сідз. Выльлунӧ съезд заседанньӧ дырйи ӧдзӧсъяссӧ друг пӧдлалісны, трибуна вылӧ (висьталаніныс) кайисны: германияса коммунист Штеккер ёрт да францияса роботничаяссянь делегатка Мориэль Лебель.

Штеккер ёрт шуис: англияса правительство пӧ чайтӧ сувтӧдны Англияын революция вӧчӧмысь мукӧд государствоса коммунистъясӧс съезд вылӧ лэдзтӧмӧн. Капиталистъяс пӧ зільӧны торйӧдны рабочӧйясӧс, сӧмын пӧ налӧн зільӧмыс ёнджыка ӧтлаалас став государствоса рабочӧйсӧ.

Мориэль Лебель висьталіс омӧль уджсӧ Чемберленлысь. Чемберленлӧн Эрриокӧд ӧтлаасьлӧм кадсянь Францияын пӧ ёна кутісны дзескӧдны рабочӧйясӧс.

Штеккер да Мориэль Лебель ёртъяслысь висьтъяссӧ вуджӧдісны англия кыв вылӧ. Сы бӧрын кыкнаныс кытчӧкӧ вошины.