МЫЙЛА ВАЙӦМ КӦЙДЫС ОЗ ЧУЖ?

Уналасянь редакцияӧ воӧны юӧръяс: омӧльӧсь пӧ таво сю ӧзимъяс. Джынвыйӧ пӧшти уналаын лоӧма кӧдзны выль пӧв (идйӧн) тулыснас. Крестьяна шуӧны: ӧзимъяс пӧ омӧльӧсь вайӧм кӧйдысӧн кӧдзӧм вӧсна, тані пӧ мукӧдлаысь вайӧм кӧйдысыс оз лӧсяв.

Сідзжӧ сэсся норасьӧмъяс воӧны: ид кӧдзаяс пӧ таво омӧля петалісны. Бара жӧ крестьяна та йылысь шуӧны: ид кӧйдыс пӧ кытыськӧ таво кежлӧ вайӧмаӧсь Коми обласьтӧ омӧльӧс, чужтӧмӧс, дай зэв пӧ ёгӧсь.

Дерт, ми чайтам, тайӧ норасьӧмъясыс абу весь (прӧста).

Колӧ шуны, шоч коми крестьянинлӧн во гӧгӧр кежлӧ тырмӧ ас няньыс. Гашкӧ эськӧ сійӧ вартігас и кольӧдлас (торйӧдлас) кӧйдыс вылас мыйкӧ мында сюсӧ либӧ идсӧ да, бӧртинас нуждаӧ воас да, сёйны лоӧ кӧйдыссӧ. Сэки сылӧн кольӧ ӧти лача (надея) — вайӧм кӧйдыс вылӧ. Вайӧм кӧйдысыд тай, буракӧ, оз пыр удайтчыв.

Таво серти позьӧ кодсӧкӧ ӧтисӧ шуны: либӧ кыссюрӧ (лунвывланьысь) вайӧм кӧйдысыд миянын оз лӧсяв, либӧ збыль вайӧмаӧсь омӧль, шогмытӧм кӧйдыс, водзвыв чужанлунсӧ (всхожесть) видлытӧг.

Медым водзӧ вылӧ эз ло татшӧм ӧшыбкаыс, миян ногӧн, со мый колӧ вӧчны: 1) тӧдмавны (расследовать), кыдзи-мый воис миян Коми обласьтӧ шогмытӧм кӧйдысыс — коді судзӧдіс, корсьны мыжасӧ; 2) ӧнісянь жӧ кутчысьны лӧсьӧдны сю кӧйдыс арся кӧдзигкежлӧ; 3) крестьяналы колӧ, кыдз-мый вермӧны, заптыны да видзны ассьыныс (татчӧс) кӧйдысъяс; 4) мӧдлаысь вайӧм кӧйдысъяс водзвыв видлавны: чужӧ оз, мича абу, лӧсялас оз миян муяслы. Сэсся, миян ногӧн, колӧ лючки тӧдмавны (гашкӧ, ковмас лӧсьӧдавны торъя комиссияяс), кутшӧм вӧлӧсьтъясын медъёна лои выль пӧв сю ӧзимъяс кӧдзны, кутшӧмъясын идъяс омӧля петалӧмаӧсь, да тайӧ артавны сельхозналог лӧсьӧдалігӧн.

Нянь вотӧм понда таво вермас лоны миян обласьтын бокысь удж (нажӧтка) корсьӧм. Та йылысь колӧ обласьтса власьтлы водзвыв жӧ артыштны, да уджтӧмъяс кӧ лоӧны, налы уджъяс сетны медвойдӧр, кокньыдджык условйӧясӧн.