***

Туръяыбса (Емдін у.) кооператив лавкаын уджалӧны правленньӧсьыс кык шлен — ӧтикыс Лапин П. И. (партияысь вӧтлылісны 1920 воын), вузасьӧ лавкаас, мӧдыс Петра Вась Вань — юралысь лавкаас.

Лапин зэв гежӧда (шоча) восьтывлӧ лавкасӧ. Воасны крестьянаыд кык-куим верст сайсянь да, пыр лоӧ корсьны. Сійӧ сӧмын матьӧн вӧтлас крестьянинтӧ: часыс пӧ кольӧма нин, — шуас. Крестьяниныдлы сідзи и лоӧ мунны. Мукӧддырйи воласны лун шӧр гӧгӧр да, частӧ кымын пыр лоӧ виччысьны. Лавкаас пыр жӧ вузасьысьыд матькӧ.

Юралысь Петра Вась Ваньлӧн ӧти праздник оз кольлы ютӧм. Коддзас да сэсся пыр косясьӧ. Катыдпомын ӧтчыд кутӧма косясьны. Милиционеръяс ӧлӧдны кутӧмаӧсь да, сійӧ матькигтырйи горзӧ: ме пӧ некутшӧм милиционерысь ог пов, некутшӧм власьтлы пӧ ог подчинитчы, ме пӧ анархист.

Татшӧм «анархистъяссӧ» эськӧ колӧ весавны ӧдйӧджык лавкасьыс, крестьяна ёна нин дӧзмӧмаӧсь.

Крестьянин пи.