КЫДЗИ ОЗ КОВ ВОДЗӦ КЕЖЛӦ УДЖАВНЫ

Волсяса (Сыктыв уездса) Волисполком корӧ вӧлі таво кежлӧ ид кӧйдыс ӧти сюрс пуд. Сылы сетісны сӧмын 580 пуд. Сы вӧсна ид кӧйдысыс став вылас оз вӧлі тырмы. Потребобществоын вӧлӧма ещӧ ид кӧйдыс 300 пуд. Крестьянаыд сэтчӧ мунісны корны. Потребобщество оз сет, шуӧ: меным пӧ вылісянь эз тшӧктыны нинӧм — да ог пӧ лысьт сетнысӧ. Буракӧ, та кузя ыстылісны мортӧс Визинӧдз. Вӧлӧмкӧ Уисполком ни, Видз-му Управленньӧ ни, кооперативлӧн контораыс ни оз тӧдны сійӧ кӧйдыс йылысь. Лои шыӧдчыны обласьтӧдз, сёрнитны телефонӧн Обсоюзкӧд. Обсоюз вӧлисти сэсся тшӧктіс сетны. Тайӧ кӧйдыснас кыдзкӧ-мыйкӧ вермисны став ид кӧдзасӧ кӧдзны.

Мыйла нӧ кӧйдыссӧ потребобществоас судзӧдӧма да ӧтпырйӧ жӧ судзӧдігас абу тшӧктӧма сетавны сійӧс? Лои весиг гӧриг-кӧдзигӧн нин шыӧдчывны обласьтӧдз.

В.