ВОСЯ УДЖ УЛЫС ОТСА КООПЕРАТИВЛӦН^Видзӧдӧй веськӧдӧмъяс/^

Колян во тулысланьыс Улыс Отса (Емдін уездын) мужикъяс собранньӧ вылын лӧсьӧдісны восьтыны аслыныс кооператив, бокиас зэв ылын ветлыны ньӧбасьныс да. Шыасисны крестьяна асланыс пельшӧр Лапин дінӧ отсавны налы восьтыны кооператив. Лӧсьӧдісны членскӧй взнос 3 шайт да 50 ур, заводитчисны зіля пырны шленӧ. Май 16-ӧд лунӧ 1924 воӧ воліс разрешенньӧ восьтыны кооператив. Кооперативыс заводитіс уджавны дай во чӧж уджаліс зэв бура. Воӧн кооперативлӧн аслас чукӧрмис сьӧм 1657 шайт да 70 ур. Оборотыс ӧні 1195 шайт да 97 ур. Вобыд кооператив уджаліс зэв кужӧмӧн, вайис сӧмын колан тӧвар. Сы понда сылӧн тӧварыс некор эз куйлы, сьӧмыс пыр бергӧдчис. Таво эськӧ и прӧмыс вӧлі зэв омӧль да, ньӧбасьӧм оз чин, пыр содӧ. Колян во первойсӧ тӧлысьнас вӧлі вузалӧны 1011 шайт дон, ӧні 1390 шайт дон. Тӧвар дон вылӧ вузасигӧн пуктыссьӧ 16% содтӧд.

Рӧскод кооперативлӧн абу ыджыд, первой во джынъяс вӧлі 11% оборотыслӧн, мӧд во джынъяс 8%. Мӧд во джыннас кооператив босьтіс барышсӧ 832 шайт. Бокысь крестьяна ньӧти оз ньӧбасьны, став колан тӧвар эм асланыс кооперативын. Ӧні кооперативас 78 шлен — 90% керка лыдсьыс.

Вӧралысьяслы арнас вӧлі сеталӧма 6 сюрс шайт гӧгӧр. Прӧмысыс эськӧ таво омӧль вӧлі да, уджйӧзсӧ кызсӧ мынтісны, коли сӧмын кык сюрс шайт гӧгӧр. Апрель тӧлыссянь пайсӧ содтісны нёль шайтӧдз.

Отса кооперативлӧн уджыс первойсяньыс муніс лӧсьыда, крестьянаыс зэв зіля, ӧтвылысь кутчысисны сійӧ удж бердас да. Ӧтлаын прӧста (бесплатно) вӧчисны зэв лӧсьыд керка лавка улӧ, ӧні лавкаыс вузасьӧ аслас керкаын. Ӧні бара крестьяна прӧста жӧ вӧчӧны тӧвар улӧ амбар, регыд нин эштас. Сы вӧсна рӧскодыс кооперативлӧн оз ло ыджыд, дай крестьянаыс ӧтвылысь уджалігӧн ёнджыка тӧждысьӧны кооперативыс вӧсна.

Н. Рам.