ТУРЪЯСА КООПЕРАТИВЪЯСЫН

Туръя вӧлӧсьтын (Емдін у.) эм куим кооператив: Туръяас, Кониын да Веслянаын. Быд сё керка юрысь пырӧмаӧсь шленӧ кооперативъясас Туръяын 52 морт, Веслянаын 80, Кониын 39. Шленъяс кооперативъясын оз ӧткодя уджавны. Туръяын позьӧ эськӧ вӧлі уджавны зэв бура да, шленъясыс ставсӧ дзугӧны. Собранньӧяс вылын век мӧда-мӧднысӧ видӧны, нинӧм мӧда-мӧдлысь оз веритны, велӧдчӧмджык йӧзлысь оз кывзыны. Январ тӧлысьын собранньӧ вылын чӧвтісны бур юралысьяснысӧ, пуктісны выльясӧс. Найӧ кык тӧлысьӧн сюйисны асланыс зептас 500 шайт. Сы бӧрын сӧмын шленъясыд восьтісны синъяссӧ да кутісныджык кывзыны прамӧй шленъяслысь: бӧрйисны бурджык юралысьясӧс.

500 шайт ковмис велӧдны тӧлктӧм шленъясӧс!...

Шлен пайыс Туръя кооперативын 2 шайт да 60 ур, Кониын 2 шайт да 70 ур, Веслянаын 2 шайт да 48 ур.

Куимнан кооперативыслӧн во джынйӧн капиталыс соді 185 шайт да 53 ур.

Тӧвар вузалӧм колян во серти соді жӧ. Куимнан кооперативсьыс кӧ шӧрсӧ босьтны, соді тӧлысся вузалӧмыс 60 шайтсянь 125 шайтӧдз.

Рӧскодыс кооперативъясын чині. Быд сё шайт дон вузалӧм тӧвар вылӧ рӧскодыс воӧ Туръя кооперативын 9 шайт 70 ур, Кониын 7 шайт 30 ур, Веслянаын 16 шайт. Колян во сьӧм шӧр рӧскодыс куим кооперативыслӧн 12 шайт да джын, таво — 11 шайт.

Куимнан кооперативыс таво босьтӧмаӧсь барышсӧ 1818 шайт. Сы вӧсна да ещӧ пайяс ӧктӧм вӧсна оборотыс кооперативъяслӧн ёна соді. Колян во октябрын ставыслӧн капиталыс вӧлі 2137 шайт, ӧні 3568 шайт. Сӧмын уджӧн вӧралысьяслы сеталӧма. Найӧ ур вӧвтӧм вӧсна мынтыныс таво эз вермыны. Сы вӧсна кооперативъяслы вексельясӧн (уджӧн) тӧргуйтны зэв сьӧкыд. Йӧзыс кооперативъясыслы уджйӧзаӧсь 11,281 шайт, асланыс (кооперативъясыслӧн) сӧмын 3.568 шайт, ӧстальнӧйыс ставыс векселя.