МЫЙ ШУИС СССР-СА СӦВЕТЪЯСЛӦН 3-ӦД СЪЕЗД КРЕСТЬЯНАЛЫСЬ ДОХОД СОДТӦМ ЙЫЛЫСЬ

Ставреспубликаса Сӧветъяслӧн 3-ӧд съезд Калинин ёртлысь доклад кывзӧм мысти шуис:

13. Водзӧ вылӧ нуӧдны политика — чинтыны дон государствоса промышленносьтӧн вӧчӧм тӧваръяс вылӧ, кодъяс мунӧны крестьяналы. Крестьяна тӧварлы лӧсьӧдны сэтшӧм дон, медым эськӧ сійӧ вевттис крестьяналысь уджӧ пуктӧм рӧскодсӧ ставсӧ дай коли на ассьыныс овмӧссӧ кыпӧдӧм вылӧ. Государстволы колӧ лӧсьӧдны крестьяна тӧвар вылӧ сэтшӧм донъяс, медым некутшӧм ногӧн сійӧ донъясыс вӧсна крестьяна эз рӧзӧритчыны; торъя нин не личкыны крестьянаӧс государственнӧй тӧргӧвӧй организацияяскӧд условйӧяс вӧчигъясӧн.

14. Крестьянскӧй кӧзяйстволысь доход кыпӧдӧмыс сэсся ёна сулалӧ мукӧд государствоясӧ налысь тӧварсӧ (продукты) вузалӧм сайын. Колӧ лӧсьӧдны сідзи, медым государственнӧй организацияяс быд ногӧн зілисны унджык крестьянскӧй тӧвар вузавны заграничаын да сыысь воӧм доходсьыс сетны крестьяналы ыджыдджык пай, медым найӧ ёнджыка вермисны кутчысьны унджык продукт уджавны (нянь, шабді, вый, яй, пӧтка, мукӧдтор); колӧ йӧз государствокӧд вузасян удж бердас кыскыны сельскокӧзяйственнӧй кооперативъясӧс.

15. Крестьяналӧн доход ёнджыка вермас кыптыны, вузалан продуктсӧ кӧ найӧ кутасны места вылас лӧсьӧдны бурджыка (переработка). Сы вӧсна колӧ государстволы быд ногыс отсавны крестьяналы восьтавны сэтшӧм заводъяссӧ, кӧні эськӧ крестьяна вермисны ассьыныс продуктъяссӧ бурмӧдны (вый завод, картупель пызь вӧчан, шабді весалан, мукӧдӧс).

16. Торъя ёна государстволы колӧ босьтчыны кыпӧдны крестьяналысь кӧзяйствосӧ косьманаинъясын. Сэтшӧминъясас колӧ сетны сы мында сьӧм, медым эськӧ во витӧн-квайтӧн став уджыс эштіс да медым некор сэтшӧминъясас нянь косьмӧмъяс (засухи) водзвылӧ эз вӧв. Ӧні кежлӧ сетны 77 миллион шайт.