КОЗИН

Прокӧ Веняӧс сиктын тӧдісны быдӧн, пӧрысь и том. Совхозын сійӧ шофёраліс, и уджаліс эз лёка, но нималіс ёнджыкасӧ аслас кокни мывкыднас. Аслас самосвалӧн сійӧ эз куж ветлӧдлыны ньӧжйӧ, а лэбаліс рака моз. Аддзасны сійӧс челядь да лёкысь горзӧны нин: «Видзӧд, Прокӧ рака лэбӧ... Прокӧ рака лэбӧ...» Ачыс — юр вундысь кодь збой, лэчыд кывъя, частӧ шызьӧдліс сиктса войтырӧс. Сылӧн ёсь кывйыс веськавлі весиг олӧмаджык йӧзлы, кодъяс босьтчылісны ӧлӧдны сійӧс. А нывъяс йылысь, кодъяс серавлісны сы вылын, лӧсьӧдавліс ӧбиднӧй частушкаяс да сьывліс-гӧрлӧпанитліс другъясыскӧд клуб дорын. Вӧйиник нывъяс, дерт, полісны сыысь да зілисны не паныдасьны сыкӧд. Татшӧм сійӧ вӧлі, но бӧръя кадас сійӧс быттьӧ друг вежисны, ветлӧдліс зумыш, быттьӧ висисны пиньясыс. «Тырмас! — шуис аслыс. — А то йӧзыс збыльысь кутасны шуны не тыр вежӧраӧн...»

Оліс сійӧ аслас сиктын пӧрысь мамыскӧд, батьыс эз вӧв, а коді сійӧ, и ачыс эз тӧд, и мамыслысь эз юасьлы. Оліс гажаа, шог эз тӧдлы, кызь вит арӧсӧн друг гӧтрасис, а стӧчджыка шуны, другъясыс гӧтралісны сійӧс учительница вылӧ, коді кольӧм во локтіс карысь. Карса ныв — карса ныв и эм, кыдзи унаӧн на пиысь, пусьыны ни пӧжасьны эз куж, аслас учебникъяс да тетрадьяс кындзи нинӧм эз тӧд, гортса уджӧ эз кутчысьлы. Веня ыстас вӧлі сійӧ мӧс лысьтыны либӧ польӧсӧ вердны, но оз мун, — шуӧ: ме пӧ пола наысь. Недыр мысти Веня лэччысис сыысь, эз нин тшӧктыв нинӧм вӧчны, лоис сылы бокӧвӧй мортӧн. Гашкӧ, сійӧ и вӧлі налӧн ӧтувъяыс, мый узьлісны ӧти вольпасьын. Кор аддзис, мый семейнӧй олӧмыс эз ладмы, кутіс важ моз бӧр гуляйтны аслас гӧтыртӧм другъяскӧд, няжгис аслас выль гудӧкӧн, кодӧс неважӧн ньӧбис сельмагысь. Механизаторъяс совхозын нажӧвитлісны бура, и удждоныслысь джынсӧ Веня век сетліс Алевтина гӧтырыслы. А гӧтырыс деньгасӧ ёна эз жалит: пыллис ӧтарӧ-мӧдарӧ. Шойччан лунъясӧ сійӧ ветліс районӧ либӧ весиг лэччыліс карӧдз да ньӧбавліс сэні быдсяма шылльӧ-мылльӧсӧ. Венялы тайӧ, дерт, эз кажитчыв, ӧлӧдліс сійӧс, мед омӧльджыка видзас деньгасӧ нем абу вылас, но Алевтина эз кывзысьлы сылысь, век вӧчліс ас ногӧныс. Кыптыліс шум-зык, и сэки Веня босьтліс ассьыс гудӧксӧ да мунліс аслас другъяс дорӧ. Веня вӧдитчис деньгаӧн, вӧлі кӧть и кокни мывкыда, но юӧм вылӧ эз сетчы, — терпитны оз вермы юысьясӧс.

Алевтина верӧсыслӧн оласног вылӧ первойсӧ видзӧдіс веськодя. Дерт, гӧтрасьӧм бӧрас заводитліс жӧ ӧлӧдны Веняӧс, янӧдны сійӧс, но регыд мысти эновтчис, ӧвтыштіс кинас: дӧзмас дурӧмсьыс да ачыс дугдас. Да и Алевтина ачыс зілис, мед на пӧвстын эз вӧв зык ни шум, мед эз паськав на йылысь лёк сёрни. Кӧть кутшӧм, а век жӧ семья. Веня первойсӧ частӧ гаравліс гӧтырыслы, мед сійӧ козьналас сылы мичаник нывкаӧс, но колис нин во кык, но кагаыс век на эз вӧв. Да и оз и ло. Веня, кор гӧтрасис, дерт, эз тӧд и тӧдны эз вермы, мый Алевтина велӧдчигас на вӧчӧма аборт, перйысьлӧма, а абу больничаын, а гусьӧн, кутшӧмкӧ баб ордын. Алевтина кӧсйис вӧчны сідз, мед некод эз тӧдлы, но татшӧмтортӧ дзебны он вермы, ӧдйӧ йӧзасис. Алевтиналӧн мамыс ӧдва ловъяӧс нин нуис больничаӧ. Мамыс вӧлі стрӧг нывбаба, нылыс поліс сыысь. Гашкӧ, сы вӧсна и вӧчис тайӧ ковтӧмторсӧ. Алевтина куйліс больничаын тӧлысьӧн-джынйӧн. Петігас нин лечитысь врачыс шуис сылы:

— Ми тэнӧ мездім смерть киысь... но кут тӧд вылад: коркӧ кутан кевмысьны, медым кага лоис, но кагаыс тэнад оз нин ло... Ставсьыс ачыд мыжа.

Алевтина гӧгӧрвоис эз тайӧ кывъясыслысь вежӧртассӧ? Код тӧдас. Первойсӧ сійӧ быттьӧ майшасискодь, но регыд мысти, буракӧ, ставыс вуні. А уджавнысӧ сійӧ ачыс вӧзйысис сиктӧ. Венялы, дерт, висьтавны та йылысь эз вермы да и эз лысьт.

Коркӧ ӧтчыд Веня паніс сёрни, мый налӧн кагаыс абу, а сійӧ ёна радейтӧ челядьӧс... Гашкӧ, босьтны детдомысь нывка?! Майбыр, ылӧ оз ков мунны, детдомыс на сиктын. О, Енмӧй, мый сэки лои? Алевтина пузис, кутіс тіравны, сингӧгыльяснас йирис верӧссӧ да шуаліс:

— Детдомысь кага?! Да мый нӧ тэ, думайтан он? Тэ ӧд ачыд кагасьыс-кага... «Быдтыны... воспитайтны!..» — нерис Веняӧс. — Да тэнӧ асьтӧ колӧ воспитайтны... Шӧйтан лун и вой, гортад сӧмын узьны волан... Йӧй улӧ лэдзчысьӧмыд!.. Дурак! Дурак — дурак и эм!

— Дуракъяссӧ оз ков кӧдзны, найӧ асьныс быдмӧны... Сэсся и артышт, ми вок кодь дуракъяс вылас муыс сулалӧ, — сӧмын шуис Веня, скӧрысь клопнитіс ӧдзӧснас да муніс клубӧ, кӧні рытывбыд ворсіс бильярдӧн.

Та бӧрын Веня ньӧтчыд эз панлы кага йылысь сёрни, но сьӧлӧмас коли сылы кутшӧмкӧ курыд кӧмӧк. На костын олӧмас артмис ещӧ ӧти потас, коді век ыдждіс, паськаліс, содіс. Бокысянь видзӧдны, найӧ гортас важ моз олісны лӧня, эз пинясьны, эз зычитны, но кыкнанныс олісны асланыс олӧмӧн. Веня луннас уджаліс, а рытнас сёйыштӧм бӧрын мунліс то клубӧ, то другъясыс ордӧ.

Гожӧмнас, кор заводитісны силосуйтчыны, вой бок муяс вылысь ытшкӧм турун ваялігӧн, сикт шӧрын сылы паныдасис Петыр Нина. Веня кежӧдіс туй бокас тыра машинасӧ, восьтіс кабина ӧдзӧссӧ да чеччыштіс муас. Дыр аддзывтӧм бӧрын, виччысьтӧмысла, Веня быттьӧ падмыштіс. Нина паськыда нюмъяліс.

— Мый, эн тӧд менӧ, Венюк?

— Мыйла эг тӧд? Тӧді, — сідзжӧ нюмъяліг вочавидзис Веня. Сійӧ ӧні вӧлі сьӧлӧмсяньыс рад Ниналы, но нюмыс регыд воши и ачыс шӧйӧвошикодь: Нина вӧлі ыджыд кынӧма.

— Кыдзи нин мый олӧны-вылӧны карас? — век жӧ сідз-тадз юаліс Веня.

— Кыдзи мый? Он аддзы?

— Мыйла ог аддзы? Аддза, абу ӧд синтӧм... А кӧні сійӧ?.. Мужикыд, мися?

— Тю-тю лэбис... — шеныштіс кинас Нина. — Эновтіс... Томджыкӧс аддзис... А ме рӧдита да тэ менӧ босьтан каганас? — серӧктіс Нина. — Гуляйтігад пӧди эн на вермы лӧсьӧдны кагасӧ?

— Ог кӧсйы лӧсьӧдны, — пинь пырыс сӧдзӧдіс Веня, а сэсся гажаа содтіс: — А тэнӧ... радпырысь босьта, кӧть двӧйняӧн...

— Вешйы сэсь... «Ог кӧсйы!..» — нерыштіс Веняӧс да мӧдӧдчис гортланьыс.

Найӧ торйӧдчисны. Веня пуксис аслас машинаӧ да мӧдӧдчис сикт помас силос гу дорӧ. Кор найӧ сулалісны, Веняӧс ордйис кык машина, ӧчередьыс торксис.

Нинакӧд аддзысьлӧм бӧрын Веня лоис кутшӧмкӧ лӧнь, жугыль, йӧз дырйи эз нин сэтшӧма ышмыв. Частӧ казьтывліс важсӧ, бӧрӧ кольӧмасӧ, ставсӧ сійӧс, мый вӧлі налӧн Нинакӧд. Лёкыс, дерт, на костын нинӧм эз вӧв. Веня сэки кӧсйис гӧтрасьны Нина вылӧ, весиг корасьны ветлісны, но Ниналӧн мамыс ыръянитны кутіс, ӧткажитіс: «Ог сет и ставыс! Этатшӧм шалапут сайӧ? Ог, ог, дай ещӧ ог!.. Миян Ниночкалы бурджык жӧник сюрас!..»

Мый вӧчан? Додь вожсӧ ковмис бергӧдны мӧдарӧ. Нинӧм он вӧч!.. А веськыда кӧ нин шуны, найӧ радейтлісны ӧта-мӧдсӧ, Нина радпырысь эськӧ муніс сы сайӧ, сыкӧд гажтӧмыд оз босьт... Но мыйлакӧ мамыслы эз перечит, весиг кыв ни джын эз шу, медым дорйыштны Веняӧс. А регыд мысти Веня кывліс, мый Нинаыс пӧ лэччӧма карӧ да пырӧма уджавны лесокомбинатӧ. Сысянь коли нёль во сайӧ нин. Нина сӧмын ӧтчыд и воліс аслас сиктӧ, да веськалі сідз, мый Веня сэки эз вӧв гортас.

Ӧні Веня зілис аддзӧдлыны сійӧс, но Нина некытчӧ эз петав гортсьыс. Сӧмын кыдзкӧ ӧтчыд аддзыліс, кор Нина вӧлі кытчӧкӧ мунӧ мамыскӧд. Мамыс дырйи Веня, дерт, эз матыстчы на дінӧ.

«Видзӧдтӧ, кыдзи дундӧма, — сӧмын и думыштіс Веня, — буракӧ, двойня ваяс...» Машина сайсяньыс Веня ещӧ ӧтчыд видзӧдліс Нина вылӧ да думсьыс дивитыштіс: «Ме сайӧ эз мун, а карсянь ыджыд рушкуӧн локтіс... Да и мужикыс пӧ абу...» Но кыдзи кӧть эз дивит да кӧрит Нинаӧс, но век жӧ жалитіс сійӧс, сьӧлӧмыс кыскис сы дорӧ.

И кор кутшӧмкӧ асылӧ чуксаліс сійӧс Ниналӧн ичӧтджык вокыс, Веня первойсӧ эз гӧгӧрво, коді да мыйла сійӧс садьмӧдӧны. «Коді? Кутшӧм машина?» — бормочитіс сійӧ, сэсся друг паляліс да гӧгӧрвоис ставсӧ. Сійӧ ырскӧбтіс-чеччис, ӧти коксӧ сюйис гач кокас да кутіс чеччавны кок пӧв йылас: некыдз оз веськав мӧд кокас.

— Мися, Нина корис!.. — кымынӧдысь нин шуис Ниналӧн вокыс. — Больничаӧ, мися, колӧ нуны... Рӧдитны, буракӧ, кӧсйӧ...

— А-а... Мед сідзи и висьталін, мый машина колӧ. А то мыйкӧ нускан ныр улад... Мун висьтав, мед лӧсьӧдчӧ...

Сёрни шыас садьмыліс Алевтина, но эз чеччы, — бергӧдчис мӧдар бок вылас да шебрасис юр вывтіыс.

Веня тэрыба пасьтасис, кружкаӧ самӧварысь кисьтіс кӧдзыд чай, ньылыштіс гоз-мӧдысь да петіс гортсьыс. Регыд мысти машинаыс сулаліс нин Нина керка дорын. Веня сулыштіс здук-мӧд, сэсся сетіс сигнал. Нина петіс керкасьыс мамыскӧд. Мамыс кутіс сійӧс пельпомӧдыс, локтігмозыс мыйкӧ шӧпкӧдіс нылыслы, — буракӧ, велӧдіс, сеталіс сӧветъяс. Веня чеччыштіс кабинасьыс да отсаліс пуксьыны Ниналы. Мамыс кӧсйис тшӧтш пуксьыны, но Веня пӧдлаліс ӧдзӧссӧ: «Оз пӧ позь... ГАИ кутас...» Ачыс тэрыба пуксис руль сайӧ, и машина кокниа мӧдӧдчис. Мамыс сулаліс да не то бӧрдӧмӧн, не то лӧгысь видзӧдіс ылыстчысь машина бӧрся. Сиктын некод на эз ветлӧдлы, ставӧн узисны на. А ывлаас коставлытӧг шлявгис зэр.

Тайӧ пӧрйӧ Веня машинасӧ нуӧдіс ньӧжйӧ, видзчысьӧмӧн, туй вылысь кытшовтліс став ва гӧпъяссӧ, гуранторъяссӧ. Зэрыс швачӧдіс лобӧвӧй стеклӧас, щӧтка-дворник эз удит чышкавны васӧ. Мунісны нин вель дыр, а Веня эз на шыасьлы Нина дорӧ, сӧмын корсюрӧ видзӧдлывліс сы вылӧ. Мӧдыс пукаліс лӧня, ӧдзӧс стеклӧ вылас юрсӧ пӧлыньтӧмӧн. Чужӧмыс сылӧн вӧлі кельыд, лӧзӧдӧм вом доръяссӧ топӧдӧма, плешкас чепӧсйӧмаӧсь ньылӧм войтъяс. Корсюрӧ негораа ымӧстлывліс да йирис вом доръяссӧ. Веня сьӧлӧмсяньыс жалитіс сійӧс, аддзис, кутшӧма мучитчӧ сійӧ, кутшӧм сьӧкыд сылы.

Тадзисӧ кольлі здук-мӧд, и сійӧс бӧр кокньӧдыштліс, лӧсьыдджыка пуксьыліс пуклӧс вылас да чуймӧм синъясӧн видзӧдлывліс водзӧ, вильыд туй вылас, Веня вылӧ...

— Мый нин, Нина? — тӧждысяна юаліс Веня.

— Нинӧм! — мырдысьӧн нюмъёвтіс сійӧ. — Босьтчин кӧ, вай ӧдйӧджык ну... А то машинаад вая тэныд...

Недыр мысти бара топӧдліс кынӧмыс, а ачыс бергаліс пуклӧс вылас да чукрасигтыр йирис вом доръяссӧ. Сэки Веня надзмӧдліс машинасӧ, зілис не тракӧдны, да частӧ видзӧдлывліс Нина вылӧ.

Татшӧм ньӧжйӧ, тадз видзчысьӧмӧн, Веня некор на эз ветлы.

Райцентрын Веня пыр жӧ муніс роддом дорӧ, — туйсӧ сэтчӧ тӧдіс, — кольӧм во воча чойсӧ вайӧдіс татчӧ. Кор машина сувтіс роддом дорас, Ниналы лои ещӧ на сьӧкыд. Сійӧ ружтіс, горзіс. Веня муртса вермис пыртны приёмнӧй покойӧдз. Водзӧ сэсся сійӧс эз лэдзны. Томиник сестра потшис сылы туйсӧ:

— Водзӧ, папаша, оз позь... Эн шенась... Шуӧны тэныд: оз позь!

— Кутшӧм ме тэныд папаша, — кӧсйис горӧдны Веня, но эз горӧд, а раминика корис: — он аддзы, мортыс оз вермы...

Нина бергӧдчыліс сылань, аттьӧалана нюмъёвтіс сылы, да ньӧжйӧник шуыштіс:

— Аттьӧ, Венюк... А тэ мун ӧні...

Веня чабраліс киас кӧтасьӧм кепкасӧ.

— Но... ладнӧ!.. Тэ регыдджык... этайӧ... бура! Ме муні, сідзкӧ, — сэсся ва кепкасӧ пуктіс юр вылас да тэрыба петіс.

Ывлаас век на шлявгис-зэрис. Веня пуксис кабинаас, но моторсӧ эз заводит, морӧснас пыксис руль вылас да тадзи пукаліс... Сы син водзын век на сулаліс вешкыртчӧм чужӧма Нина. «Некутшӧм бур кыв эг вермы шуны, — думайтіс Веня. — Дурак — дурак и эм, — видіс асьсӧ, — мый вӧчны?»

Дум вылас уси не ӧнія, а коркӧяся Нинаыс. Сійӧ пукалӧ Веня пидзӧс вылын да нюмъялігтыр видзӧдӧ сылы синмас. Сэсся кутлысьӧны да чӧскыда окасьӧны... «Экма! — ышловзис Веня. — Колӧ вӧлі сэки менам Нина бӧрсяыс лэччыны карӧ... Ставыс эськӧ сэні ладмис, гӧтрасим эськӧ... А мамыс? А мамыс прӧститіс эськӧ. Вот тадз. А Нина, аддза, ӧні на каитчӧ, мый эз мун ме сайӧ... Сьӧлӧмӧн кыла, ӧні на радейтӧ менӧ...»

Кабинаас пукаліс вель дыр, думсьыс кӧритіс асьсӧ, кутшӧм ыджыд ӧшыбка вӧчис аслас олӧмын. Нина... Алевтина... Нина... Но, ладнӧ, Алевтина гӧгӧрвоана... Сійӧ менӧ эз и радейтлы... Ме гӧтраси сы вылӧ Ниналы лёк вылӧ... Но а мыйла Нинаыскӧд нинӧм эз артмы?

Веня видзӧдліс часі вылас, сэсся бергӧдіс зажигание ключсӧ. Моторыс мурӧстіс. Веня ньӧжйӧник петіс больнича ӧграда сайӧ... «Кытчӧ мунны?» — юрас туис мӧвп. Ньӧжйӧник локтіс гортас мунан туй вежӧдз, но сэтчӧ эз кеж, а веськӧдіс машинасӧ райцентр шӧрлань и недыр мысти сувтіс раймаг дорӧ.

Магазиныс вӧлі восьса нин. Веня тэрмасьтӧг пырис пытшкас. Ньӧбасьысьяс эз на вӧвны. Сійӧ ветлӧдліс сэті, видзӧдаліс тӧваръяс, сэсся сувтіс прилавок дорӧ, кӧні вузалісны челядьлы кӧлуй. Сулаліс сэні вель дыр, но вузасьысь дорӧ, буракӧ, яндысис шыасьны. Сэки сы дорӧ матыстчис кудриа еджгов юрсиа томиник ныв да юаліс:

— Мый тіянлы?

— Мем эськӧ... этайӧ... Мед быдтор вӧлі...

— Мый мед быдтор вӧлі? — эз гӧгӧрво вузасьысь.

— Да эсійӧ... кагалы приданнӧй... — мыкталіс Веня, а чужӧмыс гӧрдӧдіс, сотчӧ...

— Миян ставыс эм. Дӧрӧмъяс, пелёнкаяс вузассьӧны торйӧн, эм и комплект... приданнӧй. Кык пӧлӧс... Сэні быдтор эм...

— А дона-ӧ сійӧ?

— Комплектыс? Эм комын вита, эм нелямына...

— Вай меным донаджыксӧ...

— Пӧжалуйста... Поздравляйта тіянӧс, папаша! — нюмъялігтыр шуис вузасьысь.

«Вот ещӧ! Талун мӧдысь нин шуисны папашаӧн!» — вирдыштіс юрас.

Веня муніс кассаӧ мынтысьны. Кор Веня бӧр локтіс да сетіс чексӧ, вузасьысь эз лэдзчысь, бара юаліс:

— Папаша, а папаша! Ті извинитӧй! А коді тіян? Ныв али пи?

— Пи! — нюммуніс Веня. Сэсся босьтіс кӧрӧбкасӧ да тэрыба петіс машина дорас. Ывлаас век на шлявгис-зэрис.