АЛӦЙ ДЗОРИДЗ

Кирьян петіс совхоз контораысь да пыраліс мастерскӧйӧ, медым босьтны кутшӧмсюрӧ инструмент. Аски асывнас сійӧ шуис ветлыны Шорсай отделениеӧ, а сэсянь веськыда районӧ, больничаӧ, кӧні тӧлысьысь дырджык нин куйліс гӧтырыс. Мир туй вылын сійӧ сувтіс, пуктіс сумкасӧ асфальт вылӧ, ӧзтіс сигарет да азыма кыскыштіс, мый весиг тшӧкмунлі. Сэсся видзӧдліс сиктлань. Сиктын вӧлі лунын кодь югыд — керкаясын и улича пӧлӧн дзирдалісны югыд бияс. Ӧзйис биыс и на керкаын. «Сідзкӧ, локтӧма?! Лэдзӧмаӧсь?!» — думыштіс Кирьян. Юрас жуис мӧвп: «Мый вӧчны?» Но думайт — эн думайт, а мунны колӧ. «Колӧ мунны, — гораа шуис аслыс, — колӧ!» Тайӧ торъя кывсӧ шӧпкӧдігтыр, Кирьян мӧдӧдчис тэрыба восьлавны гортланьыс. Кымын матысмис, сымын ёнджыка йирксис сьӧлӧмыс, быттьӧ кӧсйис чеччыштны морӧс пытшсьыс. Кильчӧ дорас пуксис скамья вылӧ, разис дӧрӧм кизьяссӧ да бара ӧзтіс сигарет. Сьӧлӧмыс неуна такалыштіс.

Кирьянлы син водзас сувтіс, кыдзи сійӧ каяс кильчӧ вылӧ, друг пырас керкаас да аддзас сійӧс, ассьыс Ольгасӧ, Олюшсӧ. Гӧтырыс гажаа нюмъялӧ, сылы, дерт, нимкодь, мый лэдзисны больничаысь... Сідзкӧ, сійӧ оз вись, дзонь-здоров. А висьӧ ёна, вель дыр нин. Ачыс сійӧ весиг оз тӧд, мый висьӧ лечитны позьтӧм висьӧмӧн, мый сылы коли овнысӧ лыда вежонъяс, гашкӧ, и лунъяс.

А Кирьян тӧдӧ, ставсӧ тӧдӧ... Тӧдӧ и забеднӧ сыысь, мый отсавны нинӧмӧн оз вермы. «Мый вӧчны» — бара юаліс ассьыс, но воча кывсӧ сідзи и эз аддзы... Колӧ, гашкӧ, сӧмын виччысьны, кор ставыс помасяс.

А вӧлі кад, наысь шуда семьяыс, шуда йӧзыс, эз вӧвны свет вылас, сэтшӧма радейтісны-любитісны ӧта-мӧднысӧ. Гӧтрасьӧм бӧрас найӧ мыйкӧ дыра олісны карбердса посёлокын. Сетісны налы кык жыръя квартира. Кирьян сэки гожӧмнас ветлӧдліс теплоход вылын механикӧн, а тӧвнас уджаліс суднояс ремонтируйтан заводын. Ольга уджаліс сійӧ жӧ заводас. Ов да ов, — сӧмын радейтчы.

Но шудыд, буракӧ, оз пыр ӧтнасӧн ветлӧдлы. Во-мӧд мысти Ольга друг кутіс майшасьны, нервничайтны. Чусаммис чужӧмыс, синъясыс эз нин сідзи ворсны, воддза моз. Пыр частӧджык кутіс норасьны морӧс вылас. Гашкӧ, верӧс сайын олӧмыс эз лӧсяв? И сэки Ольга кутіс нуӧдчыны овны аслас рӧднӧй сиктӧ.

— Мунам, Кирьян, сиктӧ... Меным тані сьӧкыд, быттьӧ сынӧдыс оз тырмы... пӧдтӧ. А сэні ӧд мый? Да, тэ ачыд тӧдан, эн ӧтчыд вӧвлы...

Кирьян сэки бура нин тӧдіс Вежъяг сиктсӧ. Не сӧмын сиктсӧ, но и сэтчӧс йӧзсӧ.

— А уджыд, майбыр, сэні сюрас... Совхоз — ыджыд, машинаяс — уна. Механикъяс — абуӧсь... Ыджыд мастерскӧй эм, — шуаліс Ольга.

Кирьян эз пыксьы. Сылы вӧлі ӧткодь, кӧні уджавны да овны, медтыкӧ Олялы вӧлі лӧсьыд. Сійӧ и ачыс чужис да быдмис сиктын.

Найӧ локтісны сиктӧ, но Олялы бурджыкыс эз ло, рӧкыд вӧтлысис на бӧрся. Кирьян водтӧдіс гӧтырсӧ районнӧй больничаӧ, сэсянь лэччӧдісны карӧ. Кирьян быд вӧскресенньӧӧ лэччывліс карӧ видлыны сійӧс, дыр сёрнитліс Оляӧс лечитысь врачкӧд.

...Кирьян пыркнитіс юрнас, медым мынтӧдчыны казьтылӧмъясысь. Кильчӧ перилӧас кутчысьӧмӧн сійӧ ньӧжйӧник шытӧг кайис кильчӧ вылас, неуна сулыштіс, медым кутыштны лов шысӧ, пырис посводзас. Инструментъяса сумкасӧ пуктіс посводз пельӧсас, сэсся пӧрччис да тув йылӧ ӧшӧдіс курткасӧ. Сэсся матыстчис ӧдзӧс дорас, друг восьтіс керка ӧдзӧссӧ да воськовтіс порог вомӧн керкаас.

Кыдзи и думайтіс, Ольга сулаліс джодж шӧрын да паськыда восьтӧм синъясӧн, гажаа нюмъялігтыр, меліа видзӧдіс верӧсыс вылӧ.

— Эн виччысь менӧ, гуляка?! Ме нин луннас локті, а тэ гӧтыртӧгыд велалӧмыд шляйтчыны, — шутитігтыр броткис Ольга. — Кӧть и гусьӧн локтін, а ме ӧд аддзылі тэнӧ, ӧшинь занавес костӧд видзӧді, виччыси... — нюмъяліс Ольга.

Сійӧ вӧлі пасьталӧма ассьыс медся радейтана, медмуса платтьӧсӧ и ёнджыкасӧ муніс эз нывбаба вылӧ, а томиник нывка вылӧ.

— Неужели тэ? — тіралан гӧлӧсӧн горӧдіс Кирьян. — Ай да Оля! Шуан, лэдзисны? — ковтӧг юаліс сійӧ да бергӧдчис мӧдарӧ, медым дзебны кортӧм синвасӧ.

Ольга век на сулаліс да сюся видзӧдіс верӧсыс вылӧ.

— Ме, ме! — кыдзкӧ аслысногӧн шӧпнитіс Ольга, сэсся матыстчис Кирьян дорӧ да сывйыштіс сійӧс. — Ёна гажыд быри?

— Юасян тай? Ещӧ кыдзи!.. — видзӧдліс Ольга вылӧ да окыштіс бан бокас.

На олӧмын тайӧ эз вӧв выльторйӧн либӧ ыпнитлысь биӧн. Ольга век тадзи паныдавліс верӧссӧ.

Тадзи кутчысьӧмӧн найӧ сулалісны здук-мӧд. Но талун Кирьянлы кажитчис, мый сійӧ вермас тадзи сулавны рытывбыд, войбыд, нэм чӧжыс. Сӧмын сійӧ кутіс асьсӧ мый вынсьыс, мед эз тюрӧбты синваыс. А вежӧрас кодкӧ быттьӧ дугдывтӧг дӧлбитіс: «Гашкӧ, тадзисӧ сулалам медбӧръяысь?» И сійӧ друг топыда, кыдзи коркӧ зонмалігас на, кутыштіс Ольгаӧс да кутіс окавны бан бокас, синъясас, юрсиас...

Кӧть и вӧлі мавтчыштӧма духиӧн и чужӧмсӧ пудритыштӧма, Ольга дорысь ӧвтіс лекарство дукӧн. Кирьян кыкнан ки пыдӧснас топӧдліс гӧтырыслысь бан бокъяссӧ да сюся видзӧдліс чужӧмас. Век на сэтшӧм мича. Чуть лӧзӧдыштӧм син дорас посни-посни чукыръяс. Чужӧмыс — кельыд, кӧсичаас тӧдчисны некымын дзор сі.

— Гажыд ёна быри? — бара юаліс Оля.

— Дерт жӧ.

— А ме весиг висьтавнысӧ ог куж, кутшӧма гажтӧмтчи, — сэсся окыштіс верӧссӧ бан бокас да вешйис сы дорысь. — Йӧймим, ичӧтъяс моз. Мун пӧрччысь, мыссьы. Ме ӧд тӧда нин, тіян вӧлі собрание... Лавкаын ӧнтай бабаяс сёрнитісны.

— Бабаяс быдтор тӧдӧны...

— Но, но... Мужик... Тэ, пӧди, тшыг, кынӧмыд сюмалӧ? — тэрмӧдліс Оля верӧссӧ. — Мун мыссьы да вежсьы. Талун миян тэкӧд праздник... Чӧскыд ужын лӧсьӧді дай вина ньӧби. Юам?

— Вина? — сӧстӧм выль дӧрӧм пасьталігтыр юаліс сійӧ. — А тэныд позьӧ?

— Больничаысь кӧ лэдзисны, мый оз позь? Вот босьта талун да коддзытӧдз юа... Гортын быдтор позьӧ... — Ольга вочасӧн варовмис, дугдывтӧг сёрнитіс, висьтавліс быдторсӧ: и палата кузя аслас ёртъяс йылысь, и врачьяс йылысь, сылӧн тӧдса сестра йылысь. Весиг на йылысь, кодъяс волісны сійӧс видлыны да мый найӧ вайлісны.

Кирьян кывзіс, но ӧлӧдны Оляӧс эз тырмы выныс. Окота вӧлі шуны: «Олюк, донаӧй, неуна ланьтышт, чӧв олышт, тэ ӧд абу сэтшӧм варов збыль вылас». Но эз вермы, эз лысьт.

— А тэ мый сэтшӧм жугыль? — друг тӧждысяна юаліс Ольга.

— Мудзи, кӧнкӧ, — ылӧдіс сійӧ. — Уджыс уна да и кык час чӧж пӧшти соборуйтім.

Кирьян зілис бергӧдны сёрнисӧ мӧд визьӧ, висьталіс кымынкӧ серамбана сёрни-басни, но Ольга пыр жӧ казяліс: «Эн ылӧдлы пӧ менӧ... Ме ӧд тӧда тэнӧ ог первой лун...» И кывзіс веськодьпырысь, видзӧдіс бокӧ да корсюрӧ ышловзьыліс.

Чеччисны пызан сайысь. Чукӧртісны пӧсуда.

— Зарни кӧмӧк, ме талун пӧсудатӧ мыська, — горӧдіс Кирьян. — Ме велалі нин...

— Мыськав, аттьӧ висьтала, — шуис Ольга. — Ме муна белье лӧсьӧда... Регыд водны...

Кирьян чайникысь тазйӧ кисьтіс пӧсь ва, тэчис сэтчӧ вилка-пань, тарелкаяс да кутіс сёльӧдчыны. Кӧть кыдзи эз зіль, но бӧръя тарелкаыс век жӧ уси кисьыс, жугалі.

— Шуд вылӧ! — горӧдіс сійӧ.

— Пӧсуда век жугласьӧ шуд вылӧ, — комнатасянь кыліс Ольгалӧн гӧлӧсыс.

...Ольга узис. Кирьян эз лысьт вӧрзьӧдчыштны, мед эськӧ не садьмӧдны сійӧс, кывзысис сылӧн лов шыӧ. А Оля лолаліс спокойнӧя, ӧтмоза, рӧвнӧя. Комнатаын вӧлі шоныд, лӧнь. Ӧшиньӧд писькӧдчис уличавывса пӧнарлӧн кельыдлӧз югӧрыс, швачкис сійӧ воча сулалысь зеркалӧ-трюмоӧ, мыйысь комнатаыс кажитчис ещӧ на югыдджыкӧн, гажаджыкӧн. Комната пельӧсын, камод вылын, пыр ӧтмоза точкис будильник: тіч-точ, тіч-точ!..

Кирьян, дерт, эз узь. Сійӧ ньӧжйӧник бергӧдчис Олялань чужӧмӧн. Оля тяпкӧдыштіс вомсӧ, ыджыда ышловзис, юрсӧ ляскис Кирьян морӧс бердӧ да бӧр унмовсис. Кирьянлы вӧлі сьӧлӧм доймытӧдзыс жаль сійӧ, окота вӧлі топыда кутлыны, пӧся окавны, но эз лысьт: садьмас, повзяс, гӧгӧрвоана. Асывнас садьмис водз, кӧсйис ырскӧбтыны-чеччыны, но эз чеччы. «Мед лоас сідзи, кыдзи век вӧвлі. Ме быттьӧ нинӧм ог тӧд» — думайтіс Кирьян.

Кор зильӧбтіс будильник, Ольга садьмис, пуксис крӧвать вылас, тільыштіс синъяссӧ, сэсся пасьталіс халатсӧ да петіс кухняӧ. Включитіс, кылӧ, электрочайник.

А Кирьян думайтіс: «Меным удж вылӧ колӧ... Лунтыр ог ло гортын. А врач шуис, мый страшнӧйторйыс вермас лоны быд здукӧ».

Чай юигӧн юаліс:

— Гашкӧ, меным вӧзйысьлыны удж вылысь лун-мӧд кежлӧ? Шойччигмоз, ӧтлаын олыштам... Гажӧй быри, мися...

— Нинӧмла... Регыд отпускӧ петан. Сэки и ми тэкӧд гуляйтыштам... Ӧбедайтнытӧ волан?

— Ме ӧні муна Шорсай отделениеӧ. Фермаас кутшӧмкӧ механизм оз уджав... Ог тӧд, дыр-ӧ тырмас?.. Водзджык кӧ локта, вола, дерт.

— Волы, ме тэныд радейтана сёянтӧ лӧсьӧда...

Луныс кажитчис Кирьянлы помтӧм кузь. Шорсайысь локтіс водз, — уджыс сэні вӧлӧма час джын кежлӧ. Частӧ видзӧдлывліс часі вылас, но стрелкаясыс вӧлі быттьӧ сибдӧмаӧсь ӧти местаӧ. Кор век жӧ воис ӧбед кадыс, сійӧ котӧрӧн лэччис гортас. Посводзас кывзысьыштіс — керкаын шы ни тӧв. Тракнитіс керка ӧдзӧссӧ, пырис керкаас, — кухняын некод абу, но нырас чамгис чӧскыд кӧр. Кӧсйис нин горӧдны «Оля!», но эз горӧд, а негораа юаліс:

— Оленька, кӧні тэ?

Гӧтырыс петіс комнатасьыс, очсовтіс:

— Пукси диван вылӧ шойччыштны, да ойбыртсьӧма. Талун мыйкӧ став лысьӧмӧс жуглӧ, морӧсӧс сотӧ и... — сувтіс кок чунь йылас да окыштіс верӧссӧ бан бокас, сэсся вешйис плиталань.

— Кытчӧкӧ ветлін? — кисӧ мыськигмоз юаліс Кирьян.

— Сельмагӧдз ветлі... Импортнӧй туфлияс вузалісны, но меным эз нин сюр. Ещӧ вель дыр ӧчередьын сулалі... — сэсся друг бергӧдчис верӧсыслань да кутіс манитны сійӧс чуньнас: — Лок пыралам комнатаӧ... А ме мыйкӧ ньӧби тэныд... Мыйкӧ ньӧби...

Ольга восьтіс шифоньер ӧдзӧссӧ да перйис сэтысь лӧсталысь сьӧд кучик куртка.

— Мича ӧд? Кажитчӧ? Со морӧсас кык зеп, «молния» томанаӧсь, дай со бокъясас...

— Ой, молодчина жӧ менам!

Колис вежон, мӧд. Колис тӧлысь. Ольга век на вӧлі сэтшӧм: эз вӧв бурджык, и лёкджыкыс, буракӧ, эз вӧв. «А гашкӧ, врачьяс ӧшыбитчисны? — пыр частӧджык думыштчыліс Кирьян. — Вермас ӧд татшӧмыс лоны?!»

Оля кувсис октябрь тӧлысся шондіа мича лунӧ. Ӧшинь ув садйын кышакылісны вижӧдӧм коръяса пуяс, лэбачьяс сьылісны кузь туйӧ петтӧдз бӧръя сьыланкывъяссӧ. Кирьян вӧлі удж вылын.

Дзебӧм бӧрас дыркодь эз пыравлы гортас, узьліс другыс ордын. Кор неуна такалыштіс сьӧлӧмыс, ӧтчыд век жӧ пырис гортас. Керкаыс — тыртӧм, лӧнь, пельыд чуналӧ. Пырис комнатаас, восьтіс шифоньер ӧдзӧссӧ да перйис сэтысь кучик курткасӧ, кодӧс ньӧбліс Оля гӧтырыс. Кутіс видлавны сійӧс да шуйга морӧс зепсьыс аддзис записка.

«Менам меддона да муса мортӧй! Прӧстит менӧ! Ме регыд эновта тэнӧ пыр кежлӧ. Эн мучит асьтӧ. Мед менам радейтӧмыс оз кӧртав тэнӧ нинӧмӧн. Помтӧг окала». Сэсся мыйкӧ черкайтӧма да бӧрас содтӧма: «Тулыснас, верман кӧ, менам гу вылӧ садит алӧй дзоридз — миян радейтчӧмлысь пас».