УСИС ЛЫМ

— Ой, мамӧ, мамӧ! Видзӧд, видзӧд, Коляыд локтӧ! — ӧшинь дорсяньыс горӧдіс Настя, кузиник тушаа косіник нывка, да котӧрӧн уськӧдчис вокыслы воча. Ӧшинь ув дзиръя дорын сулаліс латшкӧс тушаа, паськыд пельпомъяса том морт. Сійӧ вӧлі кучик курткаа, дона мехӧвӧй шапкаа. Настя уськӧдчис сылы сьыліас, кутліс, окаліс да радлігтыр шуаліс:

— Коля-Кольча! Коля-Кольча локтіс! — тадзи коркӧ, армияас мунтӧдз, Настя шулывліс воксӧ.

— Эк, Настасья, тэ Настасья! Тырмас! Удитан на! Лок пырам, а то кынман-гегдан! Со лым петіс.

Настя кватитіс чемодансӧ киас да, ӧтарӧ-мӧдарӧ пӧлнясиг, мӧдӧдчис кильчӧлань.

— Из али мый сэтчӧ тэчин? — мунігмозыс пошкис Настя. Вокыс нинӧм эз шу. Сійӧ босьтіс ыджыд гӧрд сумка да нюмъялігтыр вӧтчис чойыс бӧрся.

Керкаас Настя пуктіс сьӧкыд чемодансӧ джодж шӧрас да бара уськӧдчис вокыслы сьылі вылас.

— Да лэдзчысь нин тэ, сырчик! Пӧдтан! Вешйы, видзӧдла тэ вылӧ бурджыка.

— Мый видзӧдан? Век сэтшӧм жӧ.

— Абу. Абу сэтшӧм. Мунігӧн аршин судта вӧлін, а ӧні со невеста лоӧмыд! Настӧящӧй невеста, кӧть талун жӧ верӧс сайӧ сет.

— Эн сӧр! Первой тэ гӧтрась! Меным водз на! — чиктыліс радысла Настя.

— Колюк, сьӧлӧмшӧрӧй менам! — керкаас пырис мамыс да бӧрдігтыр уськӧдчис пиыс дорӧ. Сійӧ пуктіс юрсӧ пиыс морӧс вылӧ да лимзігтыр лыддьӧдліс:

— Дзикӧдз вунӧдін пӧрысь мамтӧ. Кӧні кӧть вӧлін сы дырасӧ? Быдса во письмӧыд эз волы. Сьӧлӧмӧй потӧ шогысла. Пӧрысьмыны нин удиті. Первой батьыд эновтіс, уна ранаяс вӧснаыс кувсис, а сэсся тэ мунін...

— Прӧстит, мамӧ! Ме ёна мыжа... Но верит, ей-богу, некор вӧлі письмӧяссӧ гижны,.. — правдайтчис Коля. — А деньгаыс воліс?

— Пасибӧ. Деньгаыд воліс. Куимысь сё чӧлкӧвӧйӧн. Пасибӧ...

Мамыс чышъян помнас чышкаліс синъяссӧ да, нюмъялігтыр нин, шуис:

— Да мый нӧ ме, йӧйми али мый? Локтін ӧд, а ме бӧрда. Настук, аканьӧй, мун пызантӧ лӧсьӧд. Менам дона пиӧй ӧд локтіс! Сійӧ менам ӧти! Гортын ӧні асланым мужик лоӧ!

Пызан сайӧ пуксьытӧдз Коля сеталіс козинъяс: мамыслы лӧз шерстянӧй ковта да пухӧвӧй шаль, а Настялы шерстянӧй платтьӧ да мичаник туфли. Сэсся чемодансӧ игнавтӧгыс пуктіс диван вылас.

Рытнас некодӧс кортӧг чукӧрмисны гӧстьяс: Колялӧн ёртъясыс, соседъяс, рӧдвужыс. Юисны, сёйисны, гораа варовитісны, юасисны Колялысь, кыдзи мый олӧны Сибирын, кузя-ӧ нюжаліс нин БАМ, рабочӧйяс уна-ӧ нажӧвитӧны, кыдз сэні сёян-юанӧн? Висьталісны и сиктса выльторъяс йылысь...

Сиктын быдӧн нин тӧдісны, мый армияысь демобилизуйтчӧм бӧрас Коля эз лок гортас, а салдат-ёртъясыскӧд муніс стрӧитны БАМ. Мамыслы, дерт, эз вӧв окота, мед муніс, но ёнасӧ эз невӧлит. И со локтіс гортас кык во мысти. Первойя вонас корсюрӧ гижавліс на письмӧяс, а мӧд вонас чӧв оліс, корсюрӧ ыстывліс сӧмын переводъяс. Локтігас весиг телеграмма эз сет.

Гӧстьяс варовитісны пызан сайын, а Настя пӧдругаясыскӧд пукалісны диван вылын да шӧпкӧдчисны. Друг Настя тӧдлытӧг восьтіс вокыслысь чемодансӧ да чуймӧмӧн горӧдіс:

— Вот тайӧ да! Вот тайӧ чышъян! Бумагаыс абу рочӧн гижӧма, буракӧ, заграничнӧй. Мича-а!.. — нимкодясис сійӧ. — О Енмӧй! А сапӧгыс! Киад босьтны он лысьт, непӧштӧ кӧмавны. Но и мича жӧ!..

— Эй, Настя! Эн лукйысь чемоданас. Эн вӧрӧд, абу сійӧс тэныд пуктӧма! — чойыслы горӧдіс Коля, муніс чемодан дорас да игналіс сійӧс.

Настя ӧбидапырысь видзӧдліс сы вылӧ:

— Кодлы? Мамыдлы, да?

Гӧстьяс ланьтісны, кутісны шӧпкӧдчыны ас костаныс: «Сідзкӧ, сійӧ нинӧм на оз тӧд?!» Том йӧз пиысь кодсюрӧ жальпырысь видзӧдлывлісны Коля вылӧ.

Кор сійӧ пуксис бӧр аслас местаӧ, Витя, сылӧн важся другыс, совхозса тракторист, шӧпнитіс пеляс:

— Кольча, петалам кильчӧ вылад куритчыны. Тані жар лоис.

Найӧ петісны, ӧзтісны папирос и вель дыр чӧв олісны. Сэсся Витя друг юаліс:

— Тэ ӧмӧй, друганӧй, збыль нинӧм он тӧд?

Коля збыль эз гӧгӧрво.

— А мый колӧ тӧдны?

— Кыдз нӧ сідз? Ми чайтім, тэ ставсӧ тӧдан... Настяыд эз али мый гижлы?

— Мый гижас? Мый нӧдкывъясӧн сёрнитан? Висьтав веськыда, мый мыр гӧгӧр гӧгралан? Меным некод нинӧм эз гижлы...

— Вот кыдз. Ме чайті... — ещӧ на кӧсйис нюжӧдны Витя, но друг крапкис-шуис: — Да Нинаыд тэнад верӧс сайӧ петіс... — Сэсся друг ланьтіс, быттьӧ сійӧ ачыс мыжа вӧлі сыысь.

Коля быттьӧ кӧсйис мыйкӧ шуны, но нинӧм эз шу. Сӧмын вель дыр чӧв олӧм бӧрын юаліс:

— Важӧн нин?

— Да важӧнкодь нин. Шуӧны, кынӧма нин пӧ. Веськыда кӧ шуны, ме сійӧс важӧнкодь нин эг аддзыв...

— Коді сійӧ?

— Тэнад армияын служитігӧн карысь совхозӧ инженерӧс вайисны. Ӧні сы ки улын став машинаясыс. Быдлаӧ нырсӧ сюйӧ, кытчӧ колӧ и оз ков. Зывӧк видзӧдны. Ог тӧд, кыдзи мый налӧн артмис?! Ачыс кыз, сундук кодь, чужӧм ни рожа абу. Первойсӧ Нинаыд быттьӧ ӧтдортчис сыысь. Да и ми ӧлӧдлім инженерсӧ, мед оз сюйсьы Нина дорас. Но сійӧ лемасьысь сир кодь вӧлӧма, азарт, — некыдз эз лэдзчысь, — а мӧдыс, буракӧ, эз вермы кутчысьны, сыліс сы водзын. Но ми ӧвтыштім киӧн: мый кӧсйӧ, сійӧ и вӧчӧ, абу ӧд ичӧт. Да и тэ ачыд Сибирсяньыд ӧти письмӧ абу ыстылӧмыд сылы. Мыйла эн гижлы?

— Ог тӧд, сідз нин артмис. Думайті, ёна кӧ, мися, любитӧ, кӧть мый дыра виччысяс, — Коля ыджыда ышловзис да содтіс:

— Со тай кыдз виччысьӧма?! А ме, йӧйыд, лун и вой сы йылысь думайта. Мися, локта гортӧ да пыр жӧ свадьба вӧчам... — Коля кильчӧ перилӧас личкис папирос помсӧ, шыбитіс, сэсся ӧзтіс выль папирос. — Да тэ, Витя, пыр гӧстьяс дорӧ, а ме тані сулышта.

...Керкаын гӧстьяс варовитісны, быттьӧ вунӧдісны Коля йылысь. Сӧмын Витя ӧтнасӧн виччысьӧмӧн видзӧдлывліс ӧдзӧс вылӧ: мыйла сы дыра оз пыр другыс? Сійӧ бура тӧдіс Коляӧс, и ӧні поліс сы вӧсна, вежӧрнас гӧгӧрвоис, мыйла сы дыра абу другыс.

Витя гусьӧникӧн мигнитіс зонъяслы, и найӧ петісны ывлаӧ. Кильчӧ помас налы паныдасис почтальон Вера. Сійӧ кытысянькӧ локтіс котӧрӧн да пошкигтыр висьталіс, мый Коляӧс нӧйтӧны Ниналӧн батьыс да инженер-зятьыс. Зонъяс уськӧдчисны сэтчӧ, но найӧс эз нин суны: пырӧмаӧсь гортас да игнасьӧмаӧсь, весиг бисӧ кусӧдӧмаӧсь. Коля сулаліс потшӧс дорын да чышкаліс носӧвикӧн вирӧсь чужӧмсӧ. Дӧрӧмыс лётъяліс пельпом вылас леторосӧн.

Кор Витякӧд найӧ бӧр локтісны гортаныс, гӧстьяс эз нин вӧвны, мунӧмаӧсь гортаныс. Мамыс да Настя идралісны пызан.

— О господи! Мый лоис? — бара бӧрддзис мамыс. — Коді тэнӧ тадзисӧ? Кутшӧм пежлӧн лыбис киыс тэ вылӧ? — лыддьӧдліс мамыс. — Дерт, нин Петыр Нинаыдлӧн рӧдвужыс. Сэсся некодлы...

— Ладнӧ, ладнӧ, мам! — мыссигмозыс такӧдіс мамсӧ Коля, сэсся пасьталіс выль дӧрӧм. — Ёна лёкыс нинӧм эз ло. Куимӧн ӧти вылӧ уськӧдчисны, пежъяс. Ме Нинасӧ кори здук кежлӧ петавны ывлаӧ, шуны пара кыв. И со мый лои. Эг виччысь тайӧс...

Найӧ Витякӧд бӧр пуксисны пызан сайӧ, но такавны некыдз эз вермы:

— А сійӧс, кыз бруняӧс, ме век жӧ виа.

— «Виа, виа...» — нерсис Витя. — Тэ мый, йӧймин? Садьтӧ воштін? Видзӧд, кутшӧм герой аддзысьӧма. Окота решетка сайӧ пуксьыны? Но и пуксьӧдасны во дас вит кежлӧ. Тэ, другӧ, успокоитчы, эн сӧр нем абусӧ. Вай бурджык кисьт румкаад да юыштам. Сёр нин. Мунны колӧ. — Сійӧ ачыс босьтіс сулея да кисьтіс кык румкаӧ. — Тэ ачыд думыштлы. Кыз бруняыс ӧд абу мыжа. Нинаыд кӧ эз мун сы сайӧ, сійӧ эз гӧтрась. Сідзкӧ, Нинаыдлӧн абу настӧящӧй любов вӧлӧма... эз кӧ вермы виччысьны.

Коля пӧрӧдіс румкасӧ, вомас сюйис сола тшак да, синсӧ тэрыба читкыралігтыр, шуис:

— Ог вермы, ог вермы, Витя! Ме сійӧс сьӧлӧмсянь радейтлі!.. — сэсся ӧвтыштіс кинас: — Муна татысь. Бӧр муна важ местаӧ. Радпырысь бӧр босьтасны. Менам сэні вӧлі ыджыд ён самосвал. Бригадир быттьӧ ваӧ видзӧдӧма, шуис: бӧр пӧ локтан. Сідзи и, буракӧ, артмас. Кӧсйи, мам, тэ дорын олыштны, но эз артмы. Мам, тэ прӧстит менӧ...

Мамыс чышъян помнас чышкаліс синъяссӧ, синваыс сідзи и тюрӧбӧн петіс.

— Мунан да бара вунӧдан миянӧс. Гашкӧ, он мун, а? Колюк, муса пи, а?

— Ог вермы, мамӧ! Верит меным. Синмӧн ог вермы ӧні видзӧдны на вылӧ. Мый сыысь аддзӧма Нинаыс? Мича кӧ вӧлі, ещӧ на. Сӧмын сійӧ и эм, мый инженер. Кутшӧм чӧрт сійӧс татчӧ вайӧма? Быттьӧ сылы карас нывъясыс этша? И сійӧ кутас Нинакӧд овны, а ме видзӧдны? Ой, ог вермы, мам! Ог ве-ермы, Вить, — Коля пуктыліс кисӧ Витялы пельпомас, сэсся кучкис пызанас. Пӧсудаыс, мый сэн на вӧлі, триньӧдчигтыр чеччыштлісны.

Арын пемдӧ водз. Кӧдздӧдыштліс, сэсся бӧр шондӧдіс, лун кык дугдывтӧг шлапкис-уси лым. Кор чужӧмас пыкӧсыс ямыштіс да син доръяссьыс быри лӧзыс, Коля кутіс лӧсьӧдчыны туйӧ. Настя рытнас котӧртліс лавкаӧ, мыйсюрӧ ньӧбис вокыслы. Гортас бӧр локтігӧн нин пемыдсяньыс друг кодкӧ ньӧжйӧник чукӧстіс сійӧс:

— Настя, а Настя! Кылан? Сувтыштлы здук кежлӧ... — Амбар сайсянь матыстчис сы дорӧ Нина, Колялӧн вӧвлӧм пӧдругаыс.

— Мый тэд колӧ? — лӧгысь юаліс Настя.

— Настя, дона ныв, эн скӧрав. Ӧтитор кора: висьтав Коляыдлы, мый ме прӧща кора сылысь. Ачым ог тӧд, кыдзи тадзисӧ лои. Ме сійӧс дыр виччыси... мудзи... а сійӧ весиг эз кут гижны меным. Гашкӧ, мися, сэні аддзис меысь бурджыкӧс да мичаджыкӧс. Гашкӧ, нарошнӧ, сылы лёк вылӧ петі верӧс саяс да... О, Енмӧй, Енмӧй! Кутшӧма сьӧлӧмӧй висьӧ сы вӧсна. Радейта ӧд, радейта ме сійӧс. Шуӧны, гырддзаыд пӧ матын, да он курччы, — бӧрдігтыр тэрыба шуаліс сійӧ, быттьӧ кодкӧ тэрмӧдліс. — Ме ӧд ӧні дась мунны сы дінӧ, но менӧ татшӧмтӧ оз босьт. Гордӧй сійӧ тіян!.. — сэсся неуна чӧв олыштіс да друг юаліс:

— Кор мунӧ?

— Аски.

— Меным зэв окота аддзӧдлыны, но ӧд сійӧ оз лок... ме дінӧ?

— Оз, дерт. Мый ӧні сійӧ тэ дінысь корсяс? Тэнад эм аслад ан-же-нер!.. Да и ме ог висьтав сылы. Киссьӧм ватӧ он курав...

— Настук, ангелӧй! Ен могысь кора. Мед сійӧ аски туй вылас петас важ кузнеча дорті... Ме сэні кута виччысьны...

Настя бергӧдчис да кыв ни джын шутӧг мӧдӧдчис гортланьыс. Мӧдыс коли шемӧс сулалан...

Аскинас асывсяньыс шлапкис-уси лым. Мамыс да Настя колльӧдісны Коляӧс грезд помӧдзыс. Сэні Коля кежис трӧпа вылӧ, коді петкӧдіс важ кузнеча дорті ыджыд туй вылӧ. Мамыс бӧрдіс. Настялы окота вӧлі висьтавны Нинакӧд тӧрытъя сёрнисӧ, но чӧв оліс. Мӧдарӧ, сійӧ ӧні кӧсйис горӧдны: «Эн мун сэті!», но эз горӧд, зумыша сулаліс да йирис вом доръяссӧ.

Коля кутыштіс мамсӧ:

— Но, мам, энӧ мунӧй сэсся... бергӧдчӧй!..

— Бара эновтін миянӧс! Колӧ жӧ кытчӧкӧ сы ылна мунны! Быттьӧ тані матынджыкас уджыс абу... Кӧть нин письмӧтӧ частӧджык гиж...

— Ладнӧ, ладнӧ, мам! Кута гижны... кыв сета... Эн шогсьы... Сьӧлӧмӧй такалыштас да бӧр воа. Ставыс бур лоӧ. Гашкӧ, гӧтырӧн воа, сибирячка-монь вая, — шутитыштіс Коля, кинас ӧвтыштіс да мӧдіс трӧпа кузя. Настя да мамыс колльӧдісны синъяснас, кытчӧдз тыдаліс мыгӧрыс.

Кузнеча сайсянь сылы воча петіс Нина. Сійӧ уськӧдчис сы дорӧ да ляскысис морӧс бердас.

— Колюш, Коленька, тэ прӧстит менӧ... Ме ӧд радейта, радейта тэнӧ... Ме дыр виччыси тэнӧ... Чайті, вунӧдін, аддзин мӧдӧс... Прӧстит менӧ, ради бога... Ачым ог тӧд, кыдз тайӧ ставыс артмис?.. Ме кӧть ӧні тэкӧд муна...

Коля мыр моз сулаліс, сы юр вывті веськыда видзӧдіс водзӧ. Сэсся ньӧжйӧникӧн вештыштіс Нинаӧс ас дорсьыс, пельпом вывсьыс лӧсьӧдыштіс сумка волыссӧ да мӧдӧдчис водзӧ. Муніс тэрмасьтӧг и ньӧтчыд эз бергӧдчыв бӧрвыв, а мӧдыс сулаліс да синваӧн тырӧм синъясӧн видзӧдіс сылы бӧрвылас. Регыд мыгӧрыс саяліс кустъяс сайӧ. А ывлаын помтӧг усис и усис лым.