ЧОЯ-ВОКА

Вой. Часі петкӧдлӧ коймӧд час. Кухняын газӧвӧй плита вылын Валя шонтӧ ужын коляс: макарон сора яй. Байкӧвӧй халат морӧссӧ тупкӧма, юрсисӧ гартлӧма бигудиӧн.

Ӧдзӧс дорас табурет вылын пукалӧ да куритчӧ вокыс — Сергей Сурин. Вылыс кизьыс дӧрӧм юрйылас восьса, еджыд чутӧсь лӧз галстуксӧ личӧдӧма. Пинжаксӧ ӧшӧдӧма улӧс юр вылӧ.

— Валь, а шыдыд абу кольӧма? — юаліс сійӧ, тыдалӧ, ёна сюмалӧ кынӧмыс. — Тарелка джын кӧть?

— Эк, Сергунь, Сергунь! Чудак тэ! — вочавидзӧ Валя. — Кутшӧм шыд ӧні вермас лоны?! Абу ӧмӧй вой?

— И батьыдлӧн нинӧм абу — буфетад?

— Ог тӧд. Видзӧдлы ачыд. Сӧмын ньӧжйӧ — эн гремит...

Кок чунь йылас Сергей пырис орчча комнатаӧ — буфетӧ да пемыдас сэні кутіс шарӧдчыны-гольӧдчыны.

— Ньӧжйӧджык тэ сэні, укшаль чӧрт! — шӧпкӧдіс Валя, кор кыліс буфетысь гольӧдчӧмсӧ. — Ньӧжйӧджыка он вермы?

Сергей бӧр локтіс кухняӧ. Киас сылӧн вӧлі ичӧтик графин.

— Тэчӧмаӧсь сэтчӧ быдторсӧ, муртса эг пӧрӧд, — правдайтчис Сергей.

— Рок эм. Шонта? — юаліс Валя.

— А тэ сёян?

— Гашкӧ, и паньышта гоз-мӧдысь.

— Сёян кӧ, шонты.

— А ог кӧ сёй?

— Кыдзи окота.

Вокыс сыысь ыджыдджык, но Валя кутӧ асьсӧ сідзи, быттьӧ сійӧ ыджыдджыкыс. Сылы кажитчӧ тайӧ, кажитчӧ корсюрӧ велӧдыштны сійӧс, петкӧдлыны асьсӧ тӧлкаджыкӧн.

Найӧ кӧть и чоя-вока, но абу ӧти мамсянь. Аддзысьлӧны шоча. Куим во сайын Сергей помаліс 10-ӧд класс, но институтӧ пырны эз вермы: баллыс эз судзсьы. Пырис уджавны заводӧ, велӧдчис токаравны. А Валя сӧмын на таво помаліс школасӧ, а институтӧ пырны сідзжӧ эз вермы. А ӧні уджавны оз уджав, и оз тӧд, мый вӧчны. Батьыс войнаса инвалид, служитліс банкын, а ӧні пенсия вылын. Мамыс век на велӧдӧ школаын.

Школаын велӧдчигас Сергей оліс гортас, но кор пырис уджавны, пыр жӧ муніс завод общежитиеӧ. Аслас рӧднӧй мамыс куліс водз, а тьӧткаыд век тьӧтка, кӧть кутшӧм бур эз вӧв.

— На, юышт мекӧд, Валька! — вӧзйӧ Сергей да граненӧй стопка тыр кисьтӧ вина. — Ми ӧд тэкӧд век жӧ чоя-вока.

— Мый ме йӧйми али мый? — чужӧмсӧ кӧрліг, ӧтказывайтчӧ Валя.

— Ачыд тӧдан. Кыдз кӧсъян.

Сёяныс пызан вылын нин, насянь кылӧ чӧскыд кӧр.

— Вот ме батьыдлы висьтала, мый тэ юан войнас, — кӧсйӧ повзьӧдны Валя. — Окота эськӧ тӧдны, мыйла юан? Быттьӧ алкаш.

Сергей пӧрӧдіс вомас румкасӧ да заводитіс сёйны. Сёйис сідзи азыма, быттьӧ сійӧ не сӧмын абу ужнайтлӧма, но и абу ӧбедайтлӧма.

Регыд мысти и скӧвӧрӧдаыс рекмис. Нянь торйӧн чышкаліс сійӧс, сэсся вӧлисти шуис:

— А тэныд эз и коль.

— Но и мед, — эскӧдӧ Валя. — А чайтӧ юан?

— Шонты. Юа.

Газ би вылӧ Валя пуктіс чайник, сэсся вокыслысь кисьыс босьтіс графин да бӧр пыртіс буфетас.

— Смотри, эн жугӧд! — бӧрсяньыс сералӧ вокыс. — А вӧлі эськӧ бурджык, меным кӧ мӧд румка кисьтін.

— Тырмас! — шуӧ Валя, да кухняӧ локтӧм бӧрын сёрнисӧ бергӧдӧ мӧдарӧ. — А тэ кыдзи нин олан, Сергей? Вой-вой век шӧйтан-ветлӧдлан, асьтӧ ньӧти он видз! Тадзитӧ олігад регыд нинӧмӧ пӧран! Мамӧй вернӧ шуӧ, мый тадзи олігад пӧ любӧй здоровӧй морт вермас вошны.

— Да мамыд тэнад дзик быдторйын прав. Сійӧ рентген аппарат моз ставсӧ пырыс аддзӧ.

— Мый аддзӧ? Кутшӧм рентген?

— Да аслас сылӧн рентген. Мися, ставсӧ пырыс аддзӧ...

Стен сайын, узьлан комнатаын, кылӧ батьыслӧн кызӧктӧм.

Буракӧ, и сійӧс садьмӧдіс чоя-вокалӧн кухняын сёрниыс.

— Но, вот, — кывзысьыштіс да думсьыс кӧритіс не то асьсӧ, не то воксӧ Валя. — Ӧдйӧджык чайтӧ ю да вод. Уна-ӧ нин кадыс?

— Куим нин лоӧ.

Сергей чай стӧканас пыдзыртіс лимон чӧлан, курччыштіс сакар тор да кутіс азыма юны чай. Кельыд чужӧмыс неуна гӧрдӧдыштіс, плешкас чепӧсйӧма пӧсь. Но синмыс вӧлі век на жугыль. Кодкӧ кӧ ӧні бурджыка видзӧдліс сылы синмас, гӧгӧрвоис эськӧ, мый сыкӧд абу ставыс лючки-ладнӧ. Но Валя мыськис пӧсуда да эз казяв тайӧс.

— Миян нывъяс ставӧн пырисны удж вылӧ, стаж чукӧртны, — норасис сійӧ. — Сӧмын ме ӧтнам ог тӧд, мый вӧчны?

Сергей зумыша видзӧдліс сы вылӧ. Сэсся лэптыштліс пельпомъяссӧ да шуӧ:

— Лок миян заводӧ.

— Мый вӧчны?

— Токарӧ велӧдчы.

— Ме бурджык вурсян мастерскӧйӧ муна.

— Мун. Лоан портнихаӧн, — сӧгласитчис Сергей. Тыдалӧ, сійӧс оз ёна интересуйт, кытчӧ мунас чойыс. Валя чӧв олӧ. Сійӧ кисьтіс аслыс чай и пуксис вокыслы воча.

— Вот мунны эськӧ кытчӧкӧ ылӧ, шуам, геологическӧй экспедицияӧ, — мыйкӧ думайтігтыр, шуис Валя. — Сэні абу тіян заводын кодь.

Сергей ӧзтӧ сигарет, заводитӧ куритчыны.

— Романтика! Миян кодсюрӧ ветлісны жӧ экспедицияас.

— Но и мый? Интереснӧ? Вай висьтышт!

— А мый висьтавнысӧ? Тундра да нюр, тырыс геб-ном.

— Ставыс? А энтузиазм? Подвиг? Сьӧкыдлунъяс венӧм?!

Сергей серам сорӧн видзӧдӧ чойыс вылӧ, лэдзалӧ вомсьыс тшынсӧ кольчаясӧн.

— Тадзи гижӧны сӧмын книгаясын, Сурина ёрт!

Валя неуна скӧрмыштӧ.

— Тэ некор эн шу менӧ тадзи. Ме тэныд абу Сурина!

— Ладнӧ, ладнӧ. Эн скӧрав, ог кут сэсся.

— Эн ёна лэптысь, пӧжалуйста.

— Ме шуи: тырмас. Бурджык вольсав меным кытчӧкӧ,.. — очсыштіс Сергей. — Сэтшӧма унмӧй локтӧ.

Валя мыськалӧ пӧсудасӧ да идралӧ шкапӧ, пӧдлалӧ ӧдзӧссӧ.

— Час, вольсала.

— Валюша, а Валюша! — быттьӧ друг тӧд вылас мыйкӧ уси сылы. — Тэ он... удждыв меным деньгатӧ... неуна? Менам нинӧм эз коль, а удждон босьттӧдз кык лун на.

— Кытысь меным, уджавтӧм мортлӧн, деньгаыс? Час, видзӧдла, мыйкӧ, гашкӧ, и сюрыштас.

— Видзӧдлы, видзӧдлы.

Валя пыраліс аслас жырйӧ да вайӧ сэтысь ичӧтик сумка, да перйӧ сэтысь ставсӧ, мый эм: ичӧтик носӧвӧй чышъян, бигуди, кутшӧмкӧ бумагаяс, кымынкӧ бумага деньга. — Со ставыс, мый эм, — шуис сійӧ, да мый вӧлі, ставсӧ сетіс Сергейлы. — Но ме кӧсъя шуны тэныд: оз позь тадзи овны, Сергей, оз позь!

Сергей сюйӧ деньгасӧ пинжак зептас.

— Кыдз тадз?

— Да сідз, кыдзи тэ олан! — шуис Валя, сідзи, мый он гӧгӧрво — не то кӧритӧ сійӧ, не то жалитӧ: — Думыштлы ачыд — босьтан деньгасӧ тырмымӧн, а зептыд век куш, нинӧм абу...

— А вот и абу век.

Валя быттьӧ ышмыштіс да думайтігтыр шуӧ:

— Менам кӧ эськӧ та мында деньгаыс?! Меным эськӧ быдтор вылӧ вичмис. И коли на эськӧ.

Сергей мунӧ сы бӧрся ыджыд комнатаӧ, ӧзтӧ би. Пока чойыс вольсалӧ диван вылӧ, Сергей ньӧти яндысьтӧг, вок моз пӧрччысьӧ да улӧс вылӧ тэчӧ паськӧмсӧ.

— Но и мый?

— Колӧ кужны овны, воканӧй?! — дзик мамыс моз шуис Валя. — А тэ ӧнӧдз на абу велалӧмыд овнысӧ да, кӧнкӧ, он и велав некор! — сэсся друг юаліс:

— Мыйла тэ он гӧтрась? Он кӧсйы асьтӧ домавны семья дінӧ?

— Давай, давай! Сын водзӧ! — Сергей пырӧ эшкын улас, а кияссӧ пуктӧ юр улас. — Дзик жӧ нин тэ мамыд кодь!

— Эн бергӧд сёрнисӧ мӧдлаӧ. Висьтав веськыда!

— Мый ме тэд висьтала?

Валя пуксис диван дорышас, друг юалӧ:

— Оляыд оз нин тэнӧ радейт?

— Оля? — ышловзис Сергей.

— Но да! Мыйла тэ юалін?

Сергей гыжъялыштіс юрсӧ да ки пыдӧсъяснас тупкис чужӧмсӧ.

— Мыйла оз? Радейтӧ, кӧнкӧ. Да ме... — мыйкӧ кӧсйис шуны, но эз шу.

— А тэ ӧмӧй он радейт сійӧс?

— Ог тӧд, — шӧйӧвошӧмӧн шуис вокыс.

— Сійӧ жӧ зэв шань нывкаыс. Вежӧра, тӧлка. Регыд учительницаӧн лоас.

Сёрниыс мунӧ Оля Зотова йылысь, батьыс друглӧн ныв йылысь. Велӧдчӧ сійӧ университетын. Регыд помалас.

— «Вежӧра, тӧлка... Помалас университет»... — нерис чойсӧ. — Кага на тэ, нинӧм он гӧгӧрво!

Мукӧддырйи Валя эськӧ скӧрмис, но ӧні эз. Сылы лои окота тӧдны, мый жӧ лои на костын.

— Пинясинныд? Лӧгасинныд? Сы вӧсна и сідз ветлӧдлан, зумыш?

— Да эг. Эгӧ ми зыксьӧй ни эгӧ пинясьӧй.

— Сямныд эз лӧсявлы?

Сергей зумыштчис да неокотапырысь вочавидзис:

— Буракӧ.

— Мый вӧсна?

— Видзӧдтӧ, сылы яндзим, мый ме сӧмын токарь.

— А тэ пыр институтӧ, велӧдчы.

— А мыйла? Менам и сідз витӧд разряд, — шуис Сергей. — Мукӧд инженеръяс меысь этшаджык босьтӧны.

Синсӧ читкыртлӧмӧн Валя жальпырысь видзӧдӧ вокыс вылӧ, сійӧ оз гӧгӧрво.

— Да образованиеыс, культураыс ӧмӧй колӧны сӧмын ыджыд удждон вылӧ?

Сергей кыпӧдчис гырддзаяс вылас.

— То-то, мися, мыйла тэ он мун уджавны.

Но Валя быттьӧ эз кыв кӧритӧмсӧ.

— А Оляыд мый шуӧ? Таысь ӧмӧй позьӧ пинясьны?

— Да не сӧмын таысь. Сійӧ тэ моз жӧ ӧшйис институтнас ме вылӧ. Арнас пыр миян институтӧ, пыр. Но ме пыри. И весьшӧрӧ. Ми вок студентъяс вылӧ заводын видзӧдӧны бугжыльӧн.

— Рытъя отделениеӧ? — радлӧ Валя да содтӧ ас йывсьыс: — А менам вот нинӧм оз артмы...

Сергей бергӧдчис мышнас да шуӧ:

— Нинӧмла тайӧ вӧлі ставыс.

— Эн сӧр, Сергей!

Валя и збыльысь нинӧм эз гӧгӧрво, мый на костын лоӧма.

— Нинӧм тэ он тӧд, Валюша, — ышловзис Сергей да сюйис кисӧ пинжак зептас сигаретла. — Помнитан, коркӧ гожӧмнас ми паныдасим... кор вӧлі локтам книжнӧй базар вылысь?

— Кодкӧд паныдасим?

— Пановакӧд. Сійӧ миян заводын технологӧн уджалӧ.

— А-а. Ыджыдкодь тушаа. Краситӧм еджыд юрсиа? Да, да, помнита. Тэ сэки эновтін менӧ да мунін сыкӧд. Чайтан, ме тайӧ верма вунӧдны?

— Прӧстит тэ менӧ таысь, Валюша. Водзӧ вылӧ сэсся ог кут, — сералӧ Сергей.

— Позор! Эновтін менӧ детинка моз.

Валя то ли збыльысь, то ли шуткаӧн скӧрысь видзӧдӧ Сергей вылӧ. Тыдалӧ, ӧбидаыс ӧнӧдз абу вунӧма. Сергей чӧв олӧ.

— А сійӧ? Аддзыліс жӧ ӧд, мый тэ нывкӧд мунан? Яндысьтӧм бугыль!

— Да сійӧ абу мыжа. Мыжаыс ме.

— Но и но! Сідзкӧ, Оляыскӧд торйӧдчинныд тайӧ дамаыс вӧсна? Сьӧлышт сы вылӧ?

— Аттьӧ сӧветсьыд, — пӧшти горӧдіс Сергей.

— Эн горзы! — узьлан комната ӧдзӧс вылӧ видзӧдіг, шуӧ Валя. — Батьыд век водз чеччӧ.

Лои чӧв-лӧнь.

— Неважӧн сійӧ воліс миян цехӧ, технологыс. А цехын аврал, задание оз тыр. Ме сэки эг ветлы кык-куим занятие вылӧ. Уджыс уна вӧлі. Ме муні сы дорӧ. Мый сідзтӧ и сідз, мездӧй, мися, менӧ рытъя сменаысь.

— А сійӧ ведьмаыс мый?

— Мездыны, шуӧ, мездам, Сурин, коранныд кӧ. Но тэнад велӧдчӧмыд мед эськӧ эз торкав вӧчны срочнӧй задание. Кодлы нӧ сетны тэнсьыд детальястӧ?

Валя кывзӧ, нинӧм оз шу. А мӧдыс бара:

— Велӧдчытӧдз нажӧвитлі ме уна. А ӧні, гашкӧ, сӧмын джынсӧ.

— Буракӧ, ме заводиті гӧгӧрвоны тэнӧ, кодарлань тэ сынан, — зумыша шуис Валя. — Мый кутан вӧчны? Неужели эновтчан велӧдчӧмысь?

— Нинӧм ог куж думыштны, — сӧгласитчис Сергей. — Сӧмын тайӧ тэ некодлы эн висьтав.

— Ладнӧ, ладнӧ.

— Видчи ме сэки технологыскӧд, а ачым думайта: мыйкӧ тані абу сідз. Абу менам велӧдчӧмын делӧыс, а мыйынкӧ мӧдторйын.

Валя чӧв олӧ, нинӧм оз шу.

— Да, кажитчӧ сійӧ меным, — ышловзис Сергей. — Кыдз шуласны, ме вӧтлыся сы бӧрся, быдлаын виччыся сійӧс.

Валя ыпнитіс, весиг сувтіс:

— Да сійӧ жӧ челядя баба. Батьтӧм кага быдтӧ. Верӧсыс эновтіс. Мый сӧмын тэ аддзин сыысь?

Сергей пуктіс сигарет помсӧ пепельницаӧ, сэсся нюжӧдчис.

— Йӧзлӧн сёяныс пӧ век чӧскыдджык овлӧ.

Валя юрсьыс лӧсьӧдыштіс бигудияссӧ да чуть ли эз горӧд:

— Ог гӧгӧрво, мый тэ сӧран? Яндзим весиг кывзыны.

— Но бара заводитіс. — Сергей кыскӧ шебрассӧ щӧкаӧдзыс. — Но ладнӧ, мун вод. Узьны колӧ. Весьшӧрӧ ме, буракӧ, тэныд ставсӧ висьталі.

Валя кутӧ асьсӧ, оз кӧсйы видчыны. Сӧмын шуӧ:

— И тайӧ ведьмаыс вӧсна Оляӧс эновтін? Некыдз ог гӧгӧрво!

Сергей веськыд кинас шыльӧдыштіс юрсисӧ да шуис сӧмын:

— Ме ӧмӧй таысь мыжаыс?

— А коді нӧ?

Сергей чӧв олӧ, петкӧдлӧ, мый сійӧ оз кыв.

Валялы век жӧ жаль вокыс. Кӧсйӧ кыдзкӧ отсавны, но нинӧм оз куж думыштны, сӧмын броткыштіс:

— Дзик детина. Эновтӧм баба бӧрся вӧтлысян. Йӧзсьыс абу яндзим? Любовь? Кутшӧм вермас лоны любовь ассяыд ыджыд баба дінӧ?

— Нелямын арӧса бабаяс кужӧны веськӧдлыны асланыс чувствоӧн. Налӧн опыт.

— Ог тӧд. Гашкӧ, и сідз.

— Валюша, ӧнӧдз ме эг тӧдлы любовсӧ. А сійӧ, мый Олякӧд вӧлі, абу любовь.

— А тайӧ бабаыс любитӧ тэнӧ?

— Ог тӧд, — ышловзис Сергей. — Тайӧ абу сэтшӧм прӧстӧ.

— И мый тэ думайтан вӧчны? А, Сергей?

— Мыйкӧ думыштлам. Миян ставӧн уджалӧны, зільӧны, а ме вошӧм морт кодь ӧні.

— А мый тэнад технологыд? Тшӧктӧ эновтны институттӧ?

Сергей топӧдліс пельпомъяссӧ.

— Видзӧдтӧ, ме кӧ кӧсъя нажӧвитны сідзи жӧ, кыдзи водзті...

Валя некыдз оз гӧгӧрво, мыйла колӧ эновтны институтсӧ сӧмын деньга вӧсна. Не кӧ сійӧ нывбабаыс, делӧыс эськӧ вӧлі дзик мӧд нога. Валя скӧрысла пуксьыліс да пыр жӧ бӧр чеччис диван вылысь.

— Но тайӧ жӧ... Ме ог тӧд мый? Кӧні сӧвестьыд?

— Тсс! Пӧрысьяссӧ садьмӧдан! А мый вӧчны?

— Неужели сійӧ тшӧктӧ эновтны институтсӧ? Но и цаца!

Сергей стӧчмӧдӧ:

— Тшӧктыны веськыда оз тшӧкты, но сідзи артмӧ.

— А тэ мый сылы воча?

— Нинӧм. Ветлӧдла и думайта!

— Войдӧр вӧлі комсомол, партбюро. Позьӧ вӧлі сэтчӧ шыасьны. А ӧні кытчӧ шыасян отсӧгла?

— Ог тӧд.

— А профкомыд эм? Эм кӧ, мун сэтчӧ да ставсӧ висьтав.

Сергей ыджыда ышловзис да сӧгласитчис:

— Ковмас, буракӧ. Ок, и юр тэнад!

Чоя-вока ланьтісны. Комнатаын кыліс, кыдзи ывла вылын шутьлялӧ тӧлыс.

«Неужели Сергей гӧтрасяс сы вылӧ? — думайтӧ Валя. — Сэсся эновтны институт, медым ыджыд удждон не воштыны?! Тешкодь!»

Первойысь Валялы олӧмыс тыдовтчис мӧдар боксянь. Сійӧ терпитны эз вермы, мый ставыс вермас бергӧдчыны мӧдарӧ. Сійӧ ставсьыс ӧні мыжаліс сійӧ нывбабасӧ.

Сергей лӧсьӧдыштіс пӧдушкасӧ да шуис:

— Ог тӧд, кыдзи мый лоас водзӧ? — Мыйкӧ думайтыштіс, сэсся содтіс: — А институтсӧ ог эновт, Валентина!

— Вот тайӧ правильнӧ! — радліс Валя. — Тэ жӧ Су-р-и-н! — И кор аддзис, мый Сергей вокыс бергӧдчис мышкӧн, негораа шуис:

— Бура узьны тэныд, Серёжа! О, Енмӧй, Енмӧй! Регыд нёль час нин лоӧ...

А ывла вылын век на шутьляліс тӧв, дзужгисны проводъяс.