СЕМЬЯ

Вӧскресенньӧыслы паныда войӧ друг кынмис. Ва гӧпъяс йизисны, пужйыс ставсӧ едждӧдіс. Челядь чеччисны вольпась вылысь, видзӧдлісны гыӧра ӧшинь вылӧ да горӧдісны:

— Кӧдзыдыс мусӧ солӧн киськалӧма!..

Педӧсь кыскис пачсьыс картупель чугун да аслыс нюммуніс. Коляыслӧн, ичӧт пиыслӧн, гӧлӧсыс вӧсни, неуна шушкыль. Ыджыдджык пиыс, Митя, сёрнитіс гораа, верстьӧ йӧз моз, кыз гӧлӧсӧн.

Сійӧс, мый гыӧрыс дзик сов кодь, первой горӧдіс Митя. А Коля аслас шушкыль кывнас сідз горзіс, весиг, буракӧ, ачыс оз гӧгӧрво, мый горзӧ. Узьӧм бӧрас гӧрдӧдыштӧм бан бокъяса, сійӧ кӧмтӧм кокъяснас чеччаліс лабичын. Кык воклӧн костыс нёль кымын во.

Пока мамыс ноксис картупель чугун дорын, Митя пасьтасис да петаліс ывлаӧ. Бӧр пырис керкаас, видзӧдліс пасьтӧм на вокыс вылӧ да горӧдіс:

Пасьтӧм рака — кар да кар!

Кыз рушкуа самӧвар.

— Тэ ачыд лака, — ӧбидитчис вокыс да заводитіс кокас сюйны чулкисӧ. — Мама, чулкиыс бала оз тӧл.

Митя кызӧктіс..

— А кӧмыд кӧні? Бара нин нырнад вуграсян?

Коля копыртчыліс лабич улас, но сэтысь кӧмкотсӧ эз аддзы да кутіс лимзыны-бӧрдны.

— Тэ ачыд... вугласян! Некутшӧм кӧм сэні абу!

— Отсав вокыдлы. Мый нерсян? — горӧдіс Митялы мамыс.

— Ме сылы абу слуга, — вочавидзис Митя да тшӧтш кутіс корсьны кӧмсӧ. Аддзис сійӧс крӧвать улысь да кутіс ӧлӧдны Коляӧс, а ачыс батьыс моз жӧ шуаліс:

Ӧти кокыс куш,

Мӧдыс — руш.

Мӧдыс вочавидзны та вылӧ эз сяммы, сӧмын горзіс:

— Тэ ачыд луш, луш, луш...

Педӧсь ноксис кухняын, грымакыліс коколюкаӧн, укватӧн да самӧварӧн. Челядь сылы эз мешайтчыны.

— Митя, пиук, пачад гоз-мӧд пестор сюйышт, — корис сійӧ. — Мый талун тіянлы лӧсьӧдны? Каколя рок али каколя шлап пӧжыштны?

— И лок, лок и шлап, шлап, — горӧдіс Коля, а ачыс, буракӧ, эз на тӧд, мый бурджык, рокыс али шлапыс. Митя торкис сійӧс:

— Бурджык шлапсӧ пӧжалышт, мам! — шуис сійӧ да котӧрӧн петіс сарайӧ ичӧт пач песла.

Найӧ керкасянь улич мӧдар бокас, неуна водзынджык, совхоз контора дорын жӧдзисны йӧз. Коркӧ важӧн тайӧ луннас Ягдорын вӧлі ыджыд праздник, Воздвижение. Татчӧ, праздник вылас, весиг волывлісны рӧдвужыс орчча сиктъясысь. А ӧні тайӧ луннас пасйылісны гожся да арся уджъяс эштӧдӧм, а Воздвижениесӧ пасйылісны сӧмын пӧрысь да олӧма йӧз.

Педӧсь нырис картупель, гудраліс пызьӧн да кутіс вӧчавны картупель шлап. Регыд мысти и пачыс ваймис. Кад нин вӧлі воны гортас и верӧсыслы. Сійӧ уджаліс фермаын скӧтникӧн. Регыд нин пӧсь нянь лоӧ дась, но верӧсыс, Иваныс, век на абу.

Педӧсьлӧн пач жарсьыс банйыштӧма чужӧмыс. Сійӧ видзӧдліс челядьыс вылӧ да шуис:

— Челядь, ветлӧй батьыдлы воча. Эз-ӧ ылав да кытчӧкӧ пыр дӧва ордӧ... праздничайтны.

— Дзик пыр вайӧда, мам! — пыр жӧ сӧгласитчис Митя, юр вылас пуктіс батьыслысь пелюк-шапкасӧ да уськӧдчис ӧдзӧслань. Коля сы бӧрся.

Педӧсь тэрмасис ӧдйӧджык помавны пӧжасьнысӧ. Пач дорын ноксигӧн сылы пыр лои лёкджык и лёкджык, муртса терпитіс. Ыджыд рушкуыс чурвидзӧ-ӧшйӧма, сюйис коскас. Вом доръясыс косӧсь. Сійӧ мырдӧн сорӧн лӧсьӧдіс пызан, перйис нӧк кашник, сэсся муніс пачводзӧ, кӧсйис кавшасьны табурет вылӧ, медым пӧдлавны пачсӧ. Друг сылӧн бергӧдчис юрыс, синмыс пемдіс, шатовтчис. Кутчысис эськӧ нянь зыръяс, но век жӧ уси гырддзаяс вылас.

Кор воис ас садяс, сійӧ куйліс джоджас. Висис-юкаліс став лысьӧмыс.

Кильчӧ помын кылісны кок шыяс, дзуртыштіс кильчӧ ӧдзӧс. Керкаас пырис Коля, и кор аддзис мамсӧ джоджсьыс, зэв ёна повзис да бӧрдігтыр горӧдіс:

— Мам, а мам! Мый лоис? Ёна доймин?

— Эг. Чечча, чечча, Колюк, — кутшӧмкӧ вошӧм гӧлӧсӧн шыасис Педӧсь, да зілис чеччыны. — А Митяыд кӧні?

— Папкӧд локтӧны. — Мамыс вылӧ век на тӧждысяна видзӧдіг, шуис сійӧ да пӧрччис пальтосӧ, шыбитіс сійӧ пельӧсӧ да пуксис пызан сайӧ.

— А папыд шуӧ, мый сылы каколя шлапыд оз ков. Ме пӧ любита яишница да вина.

Иван Багин уджаліс фермаын скӧтникӧн. Тӧдчымӧн чотігтыр, сійӧ пырис керкаӧ, порог дорас гӧликӧн весыштіс сапӧгъяссӧ.

— А-а. Колюш тані нин! Видзӧдтӧ, удитӧма нин пуксьыны пызан сайӧ.

Митя батьыс бӧрын чышкаліс кокъяссӧ, ӧшӧдіс тув вылӧ важ фуфайкасӧ. Таво арнас сійӧ первойысь муніс школаӧ, ньӧбисны сылы выль форма, но школаын кындзи мамыс эз лэдз сійӧс пасьтавны, весиг праздник лунъясӧ.

Педӧсь гребенкаӧн сыналыштіс юрсисӧ да видзӧдлывліс мыссян дозлань, кӧні мыссисны ая-пиа. Первой Митя киськаліс батьыслы киас, сэсся — батьыс Митялы, сэсся косӧдчисны ки чышкӧдӧн. Ая-пиа дзик ӧткодьӧсь, неуна рыжӧйкодь юрсиаӧсь. Ӧти кывйӧн кӧ шуны, Митя вӧлі дзик батьыс кодь, весиг походканас и сямнас. Коляӧс мыссьӧдіс Педӧсь ачыс.

— Эй, петукъяс! Пуксялӧй пызан сайӧ, — шуис батьыс, а ачыс петаліс чуланӧ да пыртіс сэтысь шкалик вина. «Праздничайтны кӧ и праздничайтны», — шуис сӧмын.

— Ме винатӧ ог любит, — жугыля шуис Коля. — Зато мам меным унджык шлап сетас дай нӧк!

Багин восьтіс сулеясӧ, кисьтіс румкаӧ да вӧзйис гӧтырыслы:

— Гашкӧ, Педӧсь, видлан, босьтлан вом дорад?

Но гӧтырыс сӧмын ӧвтыштіс кинас:

— И сідз нин ӧдва ловъя...

Багин босьтіс румкасӧ, кыпыда видзӧдліс челядьыс вылӧ, шыльӧдыштіс ыргӧн рӧма уссӧ да шуис:

— Но-о... Ӧти пи — абу пи, кык пи — сӧмын пи джын. Став бурсӧ тіянлы, совхозникъяс. А тэ, муса гӧтыр, эн вунӧд: куим пи — сӧмын сійӧ пи.

Митя да Коля нинӧм эз гӧгӧрвоны батьыслӧн кывъясысь да чуймӧмӧн видзӧдісны батьыс вылӧ. А кор бать юис да чӧскыда акнитіс, кутіс чӧскыда закусывайтны мичаа банйӧм шлапӧн, найӧс кыкнаннысӧ кезйӧдіс.

— Кульыд? — жалитыштіс батьсӧ Коля. — Вай ме нюлышта.

— Винаыс абу курыд, а кывтӧ курччалӧ, — шуис Митя. — Петшӧр кодь!

— А кӧні нӧ тэ видлін? — серӧктіс Педӧсь. — Эн-ӧ нин сэк, кор дедыд воліс гӧститны?

Педӧсьӧс бара топӧдіс, зургыны кутіс коскас, орйӧдліс кынӧм увсӧ. Сійӧ пуктіс кисьыс шлапсӧ пызан вылас, пырис комнатаӧ да водіс крӧвать вылас.

— Мамыд кольмӧма! — ышловзис быдтор тӧдысь Коля. — Сылӧн унмыс локтӧ.

И быттьӧ нинӧм эз и вӧвлы, сійӧ кутіс шлапнас чунявны нӧк, лякис чужӧмсӧ и кисӧ.

— Мый лоис тэкӧд, Педӧсь? — горӧдіс верӧсыс. — Ёна мудзин?

— Сёйӧй, сёйӧй ті, — эз пыр шыась сійӧ. — А ме куйлышта... Ок!

Багин чеччис пызан сайысь да пырис комнатаас. Педӧсь куснясис крӧвать вылас, вирӧдз курччалӧма вом доръяссӧ, сьӧкыда лолаліс да ойзіс.

— Но, мый лоис? — Иван видзчысьӧмӧн пуксис крӧвать дорышас. — Збыльысь кольмин?

— Сьӧкыд меным, — норасис Педӧсь да бӧрддзис, — буракӧ, кад воис, Ваня.

Багин пыр жӧ гӧгӧрвоис, мый гӧтырыс шуис. Сэсся мыйкӧ думайтыштіс да содтіс:

— А гашкӧ, прӧста топӧдіс кынӧмтӧ?

— Эз... Ачым кыла... Сідзи жӧ, кыдзи и Коляӧс вайигӧн, мучитча.

— Сідз, сідз, — гӧгӧрвоис гӧтырыслысь кывъяссӧ Багин, чеччис, веськӧдчис: — Сідзкӧ, ещӧ ӧти совхозник лоас.

Багин кӧсйис гаровтны чигарка, но эз вермы, табакыс киссис. Сійӧ аддзӧ, кыдзи гӧтырыс мучитчӧ, да тэрыба шуис:

— Вӧвла ветлыны али мый?

— Ветлы, Ваня. Ок! Да кӧть прӧстыня кутшӧмӧскӧ вольсав!

— Дзик пыр, дзик пыр. Терпитышт.

Сійӧ вӧчис, мый тшӧктіс гӧтырыс, тшӧктіс челядьыслы пасьтасьны да петны ывлаӧ, а ачыс котӧртіс конюшняӧ. Роддомыс вӧлі Висдорын, Ягдорсянь кӧкъямыс километр сайын. Пока кыссян сэтчӧдз, оз этша кад коль.

Педӧсь колис ӧтнасӧн, виччысьыштіс, кор неуна лӧньыштас дойыс, ньӧжйӧник чеччис. Колӧ вӧлі аслыс пасьтасьны, чукӧртны приданӧй пузчужӧм кагаыслы да и мыйсюрӧ вӧчыштны гортас.

«Кӧть нин сійӧ бур, мый порсьяслы да мӧслы удиті картупель пуны-дасьтыны, — радліс сійӧ, — ковмас, тыдалӧ, Марья соседкаӧс корны, медым челядь бӧрся видзӧдіс...»

Кага рӧдитӧмысь сійӧ эз пов, абу нин первойысь, велавлӧма нин.

Но повзьӧдліс сійӧс дзик мӧдтор — выль чужӧм кагаыс; бара на содас тӧждысьӧмыс, челядь вӧсна да и олӧм вӧснаыс.

— Ме ёна эг мучитчы, — ошйысьліс соседкаясыслы Педӧсь. — Кӧні колӧ рӧдита.

И збыльысь, медводдза писӧ, Митяӧс, рӧдитіс видз вылын, мӧдсӧ, Коляӧс, гортас. Сэки поконча энькаыс на вӧлі ловъя, коді примитіс кагасӧ, и ставыс помасис бура, лючки-ладнӧ. Ӧні жӧ Висдорын воссис выль больнича и гортас некод нин оз рӧдит.

«Ӧти пи — абу пи, кык пи — джын пи». Педӧсь тайӧс бура тӧдіс, верӧссьыс не омӧльджыка, и ачыс. Любӧй кага — мамлы и нимкодь, и сьӧкыдлун ӧтлаын. Мыйта вын да эбӧс ковмас пуктыны мамлы, медым сійӧс вердны-юктавны, сувтӧдны кок йылӧ, вӧчны сійӧс мортӧн. Батьыд — сійӧ бать и эм, сылӧн аслас тӧждлун, а сылы и видзны, и вердны-дӧзьӧритны, мед эз висьны, быдса войяс не узьны, водз чеччыны да сёр водны, лолавны сы вылӧ, пока эз бордъясь, быдмы.

«Куимыд абу кык, — тӧждысьӧ сійӧ. — Сьӧлӧмад местаыс быдӧнлы тырмас, быдӧнлы тырмас любовь. Быдмасны, а лоӧ кӧ война беда вылӧ? Мый сэки? Кытчӧ воштысьны накӧд? Кытчӧ дзебан, кӧні видзан найӧс?» Таӧдз Педӧсь уджаліс овощеводческӧй бригадаын, парникъясын да теплицаясын. Быть ӧд. Уна-ӧ вермис нажӧвитны верӧс-инвалидыс?

А ӧні ичӧт каганад бригадаад уна он нажӧвит, ковмас, тыдалӧ, чорыдджыка босьтчыны гортса овмӧс бердӧ.

«А вӧлі кӧ эськӧ детсад? — думайтӧ сійӧ. — Ставыс эськӧ мӧд ног лоӧ!»

Педӧсь частӧ шензьыліс сійӧ нывбабаяс вылӧ, кодъяслӧн не кык-куим челядь, кыдзи сылӧн, а вит-квайт. Сійӧ ачыс думыштны эз куж, кыдзи эськӧ сійӧ накӧд оліс-выліс. Весиг сылӧн тайӧ коймӧд кагаыс пӧраӧн кажитчис сылы не вын сертиыс, а кыдзи пӧ водзӧсӧ!

Совхозын ӧні кокньыдджык, лӧсьыдджык лои овны. А челядь — челядь и эм, ас дорсьыс некытчӧ оз лэдзны: ни парникӧ, ни теплицаӧ, совхозын некутшӧм удж вылӧ. Кымын унджык Педӧсь думайтіс та йылысь, сымын бурджыка гӧгӧрвоис: «Вӧлӧмкӧ, позьӧ овны совхозын и не радлыны сылы, мый радуйтӧ мукӧдӧс, не тӧждысьны бригада удж вӧсна, сылӧн удачаяс да неудачаяс вӧсна!»

Теплицаын ӧні, пӧди, капусталысь рӧсада садитӧны, ӧгурцы. Помидор кустъяс, кӧнкӧ, регыд заводитасны дзоридзавны. Ӧшинь стеклӧ сайын — гыӧр, кӧдзыд, а сэні градъяс вылысь кылӧ шоныд тувсов му кӧр, ӧвтӧ веж петасъясӧн, быдмыны заводитӧм лук кор кӧрӧн. Теплицаын нывъяс уджалӧны платтьӧ кежысь, гожӧмын моз, — ёг весалӧны, киськасьӧны, дӧзьӧритӧны быдмӧгъяс. Кольӧм во тепличнӧй-парникӧвӧй овмӧсыс сетіс совхозлы миллион джын прибыль, таво бригадаыс кӧсйысис доходсӧ вайӧдны миллионӧдз.

«И тайӧ ставыс лоӧ метӧг, — шогсис Педӧсь. — Вошӧ удждон, премияяс, почёт».

Кор Багин вайӧдіс вӧв, сійӧ удитіс чукӧртны став коланасӧ, мӧскыслы петкӧдны ныас, порсьяслы — сёян да корны соседкасӧ видзӧдны сылӧн челядь бӧрся.

— Ладнӧ, ладнӧ, — кӧсйысис соседкаыс. — Ми ӧд тэкӧд ӧткодьӧсь: ме тэнсьыд ӧні, а тэ менсьым — рӧштво бӧрын.

— Вильшасьны эн лэдз, — велӧдіс Педӧсь. — Ӧлӧд!

— Мун, эн пов. Став бӧрсяыс видзӧда, ставыс лоӧ лючки-ладнӧ, — Педӧсьӧс колльӧдны петігмозыс нин шуаліс соседныс. — Шойччышт сэні, пока куйлан!

— Кӧні ещӧ шойччан, он кӧ роддомын, — ышловзис Педӧсь. Вернӧ шуӧны: ичӧт челядь узьны оз лэдзны, а гырысьяскӧд — ачыд он узь.

Педӧсьӧс бара топӧдіс дойыс, заставитіс кутчысьны кильчӧ перилӧас. Чужӧмыс ньылӧмзьӧма, ачыс сьӧкыда лолаліс, — сійӧ виччысис, кор лэдзыштас дойыс, лэдзас мунны гортӧдзыс.

Верӧсыс да соседкаыс отсалісны сылы мунны телега дорӧдз да пуксьӧдны сэтчӧ. Митя петкӧдіс заптӧм тубрассӧ.

— Мам, а мам! Ме тшӧтш тэкӧд, — вӧзйысис Коля. — А больничаад ме ог мун. Сэні докторша емӧн зурӧдчӧ.

— Он мун, он мун, Колюк, — муртса шыасьны вермис Педӧсь. — Пырӧй Митякӧд гортӧ, а то ывлаыс кӧдзыд. Да Марья тьӧтыдлысь кывзысьӧй.

Багин поліс, мый кын корога муыс треситны кутас Педӧсьӧс.

Совхоз контора дорын йӧзыс жугыльпырысь видзӧдісны-колльӧдісны Багинъясӧс.

— Мӧдісны Багинъяс капуста лист улысь коймӧд пи корсьны.

Кельдӧдӧм чужӧма Педӧсь пукаліс телегаын да катласис ӧтарӧ-мӧдарӧ, быттьӧкӧ сыысь кокньыдджык вӧлі, да кутчысис горӧдӧмысь. Верӧсыс тэрмӧдліс вӧвсӧ, ӧвтчис ньӧрнас, да частӧ полігтыр видзӧдлывліс гӧтырыс вылӧ.

Кор мунісны джын туйсӧ, сылы друг тӧд вылас уси, мый вунӧдіс вердны чипанъяссӧ. Ӧдвакӧ Митя да Коля гӧгӧрвоасны вердны найӧс, а кор бӧр локтас Ваняыс — луныс кольӧ.

Сэсся думыс гартчыны кутіс верӧсыс гӧгӧр. Бӧръя кадӧ Багин некутшӧм помкатӧг кыпӧдлывліс сы вылӧ гӧлӧссӧ, кӧнкӧ частӧ шӧйтіс-ветлӧдліс, тӧдчымӧн кӧдзаліс сы дорӧ. Баба сьӧлӧмнас Педӧсь кыліс тайӧс бура, и думайтіс, мый кынӧма да сійӧн ёна сьӧкыд сылы. А сиктса бабаяс шӧпкӧдчисны ас костаныс: Шорсайса Варук дӧва ордын быд рыт мужикъяс картіасьӧны да юӧны. Педӧсь поліс, мый верӧсыс дзикӧдз лэдзчысяс, юны кутас, кӧртасяс кутшӧмкӧ гуляйтысь баба дінӧ да эновтас семьясӧ. Да-а, мый лоны лоас, а век жӧ полӧмӧн виччысис кагасӧ.

«Гашкӧ, та бӧрын босьтчас вежӧрас, — думайтіс Педӧсь. — Куимӧн ӧд лоӧны. Коді найӧс быдтас, кок йылас сувтӧдас, огӧ кӧ ми?»

Вом доръяссӧ курччӧмӧн да синва сорӧн, Педӧсь гусьӧник видзӧдлывліс верӧсыс вылӧ да думсьыс кӧритіс сійӧс ставсьыс. А верӧсыслы весиг эз волы юрас гӧтырыслӧн мучитчӧмыс да страдайтӧмыс, эз лыддьы асьсӧ мыжаӧн.

Больничаӧдз коли километра кык. Туйыс лёк, ёна тракӧдӧ, да ещӧ чой вылӧ чой. Чойсӧ кайигӧн Багин чеччывліс телегаысь да чотігтыр мунліс орччӧн, лӧсьӧдышталіс гӧтыр дорсьыс турунсӧ.

— Но, кыдзи-мый? Лючки-ладнӧ воам?

— Ставсӧ треситіс, — норасис Педӧсь. — Регыдджык мед нин воны. — Пальто кизьясыс разьсьӧмаӧсь, чышъяныс пельпомъяс вылас дзугсьӧма.

— Терпитышт ещӧ. Ӧні абу нин ылын.

— Ме нин сідз терпита, терпита, вынӧй сэсся абу...

Педӧсь эз вермы кутчысьны. Синваыс брызнитіс да тюргис няйтӧсь чужӧмӧдыс. Но верӧсыс эз успокоит сійӧс, чеччыштіс-пуксис телегаас, сӧтыштіс-кучкис вӧлыслы.

Больнича дорын, пока дежурнӧй санитаркаыс ветліс акушеркала, Педӧсь рӧдитіс телегаас дӧра вылӧ. Томиник докторша локтіс котӧрӧн, босьтіс кагасӧ, а Багин весиг дрӧгмуні: первойысь сійӧ аслас синъясӧн аддзыліс пузчужӧм кагасӧ, кутшӧм сійӧ чужис ен югыдас.

— Нывкаӧн тіянӧс! — чолӧмаліс докторша. — И мыйла ті таӧдз нюжӧдчинныд?

Педӧсьӧс пыртісны палатаӧ, а сэк кості локтіс ещӧ ӧти вӧла. Томиник да мичаник том ныв вайӧдӧма ассьыс пӧдругасӧ.

Бӧрсӧ Багин муніс тэрмасьтӧг. Медся страшнӧй пӧраыс коли бӧрӧ: ӧні позьӧ сьӧлӧм бурмытӧдз куритчыштны, думайтыштны.

Сійӧ ньӧти эз пов, мый коймӧд кагаыс лоас налы ковтӧмӧн, но век жӧ неуна шӧйӧвошикодь: чужис эз пи, а нывка. Вӧлӧмкӧ, оз быдтор артмы сідзи, кыдзи тэд колӧ.

Вӧлыс сулалігас кынмыштіс, а ӧні тэрмасьтӧг рӧдтіс. Телега кӧлесаясыс гораа таркӧдісны.

«Мед, — думайтіс Багин, — мамыслы отсасьысь колӧ жӧ. Абу быть детинкалы лоны пӧдрад».

Кыдзи и Педӧсь, сійӧ думайтіс, мый гӧтырыс ӧні бригадаын уджавны оз кут вермыны да сылы отсасьны, да и нажӧткаыд лоӧ этшаджык. Сы вылӧ ёнасӧ он писькӧдчы. Сёйны-юны, кӧмасьны-пасьтасьны колӧ...

Багин думайтӧ, кӧні эськӧ позис унджык нажӧвитны, но фермаын тайӧ абу сідз кокни. Скӧтникалӧмысь мынтӧны этша. Быдӧн ӧд ас местаас: дояркаӧн оз вермы, заведующӧйӧ оз пуктыны.

«Ковмас, тыдалӧ, пастукавны мунны гожӧмнас, — думайтӧ сійӧ. — Правда, ранитчӧм кокнад оз ло кокни, но нинӧм он вӧч... Няньыд кӧ абу, ковмас сукар йирны!»

Пастукъяс гожӧмнас нажӧвитӧны уна. Тулыссяньыс сёр арӧдз найӧ кӧтасьӧны зэр улас либӧ пӧжсьӧны жар шонді улын, чеччӧны водз да водӧны сёрӧн. А кыдз котралӧны скӧт бӧрсяыс?!

«Нинӧм, нинӧм, — шуӧ Багин. — Митя отсыштас школа бӧрын. Справитчам, медтыкӧ дӧверитасны».

Аскинас Багин вайис гӧтырыслы передача: печенньӧ да яблӧк, а чайсӧ юны донтӧминик кампет-пӧдушка. Больничаас сійӧс эз лэдзны. Олӧма санитарка нуис Педӧсьлы передачасӧ, и кор бӧр локтіс, скӧрысь шуис:

— Пет ӧшинь улас. Сэні сёрнитӧй!..

Педӧсьлы крӧватьыс веськалӧма дзик ӧшинь дорас да позьӧ вӧлі сёрнитны ӧшинь пырыс.

— Кутшӧм здоровьеыд? — тӧждысяна юаліс Багин да видзӧдіс гӧтырыслӧн югъялысь синъяса омӧльтчӧм чужӧм вылас. Сылӧн синъясас тӧдчис эз сӧмын выль чужӧм нывкасӧ радейтӧм, но и гортсаяс вӧсна тӧждысьӧм. — Кыдзи кылан асьтӧ?

— Бура, — муртса кывмӧн шуис сійӧ. — Кыдзи челядьыд? Митя? Коля?

Багин гӧгӧрвоис, мый гӧтырыс тӧждысьӧ: пӧтӧсь-ӧ челядьыс?

— Пӧтӧсь, пӧтӧсь. Эн тӧждысь, — эскӧдіс сійӧ. — Марья видзӧдӧ на бӧрся, вердӧ-юкталӧ.

— А Сераньтӧ лысьтанныд? — юаліс. — Висьтав Марьялы, мед челядьлы йӧвнас манка пуас.

— Петкӧдлы нывкатӧ! — корис Багин. — Мися, нывкатӧ петкӧдлы! Нывкатӧ!

Педӧсь серӧктіс, пыркӧдіс юрнас. Пузчужӧм кагаяс вӧліны мӧд палатаын.

— Час мысти ваясны сёйны, сэки и аддзылан.

— А кыдз ми сійӧс шуам?

Багинлы кажитчылісны мича нимъяс, кутшӧмӧсь овлӧны карын: Тамара, Людмила, Валентина, Светлана... Педӧсь пыркнитіс юрнас: огӧй пӧ.

— Ольгаӧн шуам.

— А гашкӧ, Валюшаӧн? Либӧ Тамараӧн?

— Огӧ, огӧ! — Эз сӧгласитчы Педӧсь. — Оляӧн ме нимті нин.

Виччысьны видзӧдлыны нывсӧ Багин эз кут. Прӧщайтчигас шуис:

— Аскомысь вола. Мый тэныд вайны?

— Мыйкӧ шоматор колӧ, — корис Педӧсь. — И ма. Сыысь, шуӧны, йӧлыс юмовджык лоӧ...

— Челядь вӧзйысьӧны, — гараліс Багин. — Босьтны?

— Оз ков. Мед бурджыка керкатӧ видзасны.

— Ми сійӧс игналам! Но, аддзысьлытӧдз!..

Педӧсьлы окота вӧлі шуны, медым сійӧ эз ветлы Шорсайса Варук ордӧ, но верӧсыс ӧвтыштіс нин кинас да мӧдӧдчис гортланьыс. Синсӧ вештывтӧг Педӧсь видзӧдіс сы бӧрся ӧшинь пырыс, пока эз саяв ворота сайӧ, сійӧ — чотысь, олӧма морт, важ ыж ку пася, важ салдатскӧй шапкаа, кӧзяин да верӧс, сылӧн куим челядьлӧн батьыс. Война вылын сійӧ эз нин вӧв, эз удит. Армияын служитіс пограничникӧн и вӧлі ранитчӧма кокас. Армияысь локтіс кок пӧла — чотігтыр, но Педӧсь некор эз жалитлы, мый муніс сы сайӧ, инвалид сайӧ, верӧс сайӧ. Ӧні Педӧсь думайтіс сы йылысь. Тэрмасигтыр, чотігтыр, сійӧ мунас кӧкъямыс километр гортӧдзыс, кыдзи и локтіс татчӧ, медым аддзӧдлыны да такӧдыштны сійӧс, тӧдмӧдны сійӧс ньӧбӧм козинӧн.

«И ныв йылысь думайтӧма, — радліс Педӧсь. — Весиг со кутшӧм ним думыштӧма... Тамара».

Сылы лои сэтшӧм лӧсьыд и друг окота лои бӧрдыштны. Но видзӧдіс сӧстӧм, шондіӧн тырӧм комната вылӧ, крӧвать, занавескаяс вылӧ, Педӧсь эз бӧрддзы и повзискодь.

«Неужели менам сьӧлӧмӧй сэтшӧма чорзис?..»

Но тайӧ эз вӧв сідз. Прӧстӧ сійӧ эз бӧрддзы шудысла.

Ыджыд паськыд ӧшиньясӧ швачкис лэччысь гӧрдов шонді! Луныс бӧрыньтчис ылі муяс, вӧръяс сайӧ.

Педӧсь ышловзис, и тӧд вылас усины сылы челядьыс — Митя да Коля, Оля, коді вом доръяснас корсис мамлысь нёнь гӧрӧдсӧ. Сэсся, кыдзи и век, дум вылас уси верӧсыс, кыдзи сійӧ чотігтыр мунӧ гортас, тэрмасьӧ, ачыс куритӧ чигарка бӧрся чигарка.

«Абу сійӧ збыль, мый бабаяс сӧрӧны, — думнас шуӧ сійӧ, и сьӧлӧмнас такалӧ. — Мый сылы кӧртасьны дӧваяскӧд да гуляйтысь бабаяскӧд? Гашкӧ, коркӧ и ӧтчыд пыраліс, а найӧ нин паськӧдісны сёрни...»

Веськыда кӧ шуны, Педӧсь талун эз виччысь ни верӧссӧ, ни передачасӧ. Сійӧс колльӧдӧм бӧрын Педӧсь водіс крӧвать вылас куйлыштны да заводитіс кывзыны, мый йылысь сёрнитӧны кага вайысь нывбабаяс.

Тайӧ коймӧд кагаыс, кодысь сійӧ сэтшӧма поліс, вайис сылы некор тӧдлытӧм на радлун, ас садяс вайӧдіс, буракӧ, верӧссӧ, бӧр вайӧдіс сійӧс челядь дорас да сы дорӧ. Педӧсь кылӧ, кыдзи морӧсас чукӧрмӧ йӧлыс, сійӧ терпитны вермытӧг виччысис, кор сылы ваясны нёнясьны сылысь Олясӧ. Сійӧ ӧні бӧр кутіс эскыны, мый сылӧн олӧмыс бӧр ладмас да кутасны овны дружнӧя да бура. «Аски сійӧ оз лок, — думайтӧ сійӧ. — А аскомысь кӧсйысис».

Но и аскинас, муртса на Педӧсь вугыртіс ӧбед бӧрын, палата кузя соседкаыс чукӧстіс сійӧс:

— Багина! Видзӧд, видзӧд: абу-ӧ тэнад тайӧ, локтӧны табунӧн.

Педӧсь чеччис, видзӧдліс. Радысла сьӧлӧмыс ыпнитіс.

Асъя гыӧрсьыс нем абу кольӧма. Вӧлі мича шондіа лун. Митя да Коля сюся видзӧдалісны ӧшиньясӧ, корсисны мамсӧ, челядьыслӧн кианыс вӧліны бумагаысь кулёкъяс, не то кампет, не то ягӧд.

«Кутшӧм ӧні ягӧд?! — думыштіс Педӧсь. — Бара на, буракӧ, деньгасӧ видзӧмаӧсь кампет вылӧ. А ме тӧрытъя вайӧмсӧ на эг видлы».

Сійӧ восьтыштіс ӧшиньсӧ, сюйис юрсӧ да горӧдіс:

— Митя! Колюк! Локтӧ татчӧ ӧшинь дорас.

Коля крута бергӧдчис (кисьыс муртса эз уськӧд кулёксӧ), веськӧдчис восьтӧм ӧшинь дорас.

— Мам, мам, ми тэныд тулипув вайим. Со, быдса клужка.

— Кытысь нӧ ті сійӧс босьтінныд? — чуймис Педӧсь. — Сельпоысь али мый?

Митя кайис мудӧд вылас да мыччис мамыслы кулёкъяссӧ.

— Эгӧ. Пашня нюрысь!..

Пока Багин домаліс вӧвсӧ да сетіс сылы турун, найӧ ӧта-мӧд вежмӧн висьталісны мамыслы горт йывсьыс — мӧс йылысь, порсьяс йылысь, чипанъяс йылысь, весиг сы йылысь, кыдзи дасьтӧ да мыйта вердӧ найӧс Марья тьӧт.

— Каколя рок да каколя рок, а шлапсӧ пӧжавны оз куж, — норасис Коля.

А Митялы учительницаыс пуктӧма арифметикаысь двойка. Дерт, тайӧс эськӧ эз кӧсйы висьтавны мамыслы, но удитіс Коля.

— Да кыдз нӧ тайӧ тэ? — кӧритіс мамыс, артасьны оз куж али мый?

— Сійӧ нылнас классас чели кыйӧ-вугласьӧ, — серӧктіс Коля. — Бать тӧрыт сійӧс велӧдіс алтасьны... каканас шлёпкас да юалӧ: уна-ӧ лоӧ... ӧти да нёль... Уна-ӧ?

— Вӧлі сэтшӧмыс! — на дорӧ матыстчиг, шуис батьыс. — Гортын оз пукавсьы, видзӧдан — бара нин ывлаын. А урокъясыс...

Митя чӧв оліс, кӧрт тувйӧн гирскис ӧшиньсьыс замазкасӧ. Выль курткаыс да гачыс вӧліны няйтӧсь.

— Ми ветлім сыкӧд учительница дорас, — шуис батьыс да мигнитіс Митялы, — кӧсйысис, кута пӧ велӧдны урокъяссӧ. Видзӧдлам.

— Правильнӧ, — ошкис Педӧсь, сэсся друг сёрнисӧ бергӧдіс мӧдарӧ: — И мый ті ме дорӧ быд лун локтанныд?

Багин сӧмын шуис:

— Да вот турипув вотны ветлім. Колӧ жӧ вӧлі сійӧс вайны.

— Песокӧн сёй, — шуис Митя. — Учительница висьталіс: турипувъяс витаминыс уна.

— Аттьӧ, пиук! — аттьӧаліс Педӧсь. — Шоматорйыс и збыльысь сэтшӧма колӧ.

— Петкӧдлы Олятӧ, мам! — корис Митя. — Тэ кӧні сійӧс видзан?

— Вай петкӧдлы, петкӧдлы, — тшӧтш корис Коля, сідзи, быттьӧ мамыс нарошнӧ дзебӧма сійӧс аканьӧс моз. — А докторшаыс емнас тэныд зулгис?

Педӧсь серӧктіс.

— Ӧні узьӧ сійӧ. Регыд вая гортӧ, сэки и видзӧдӧй ёна.

— Сӧмын локтігад некодлы эн сет, — эз лэдзчысь Коля. — Сійӧ миянлы аслыным колӧ.

Багин сулаліс ӧшинь улас да юрсӧ чатӧртӧмӧн видзӧдіс гӧтыр вылас. Педӧсь видзӧдіс сылы синмас, да кажитчис сылы, мый синъясыс воддза дорысь ӧні меліджык лоӧмаӧсь.

— Кыдзи нин мый ачыд? — юаліс. — Неуна шойччыштін?

— Да, неуна... — сӧгласитчис сійӧ. — Регыд гортӧ бӧр локта.

— Куйлы, эн тэрмась. Гортад татшӧм шойччӧгсӧ он аддзыв.

Педӧсь велӧдана шуис:

— И тэ эн прӧстасӧ ветлӧдлы. Ӧні волӧй сӧмын вӧскресенньӧӧ, и не водзджык.

— Мый мекӧд лоас? Ме и пекничаӧ на вола, — кӧсйысис Багин да челядьсӧ ыстіс вӧв дорас, сэсся друг содтіс:

— Талун ме сёрниті директоркӧд: кӧсъя тулыссяньыс пастукавны мунны.

Педӧсьлы мыйлакӧ эз кажитчы тайӧ да скӧрысь крапкис:

— Тэ йӧймин? Нэмсӧ Багинъяс эз пастукавлыны.

— Тэ ачыд нинӧм он гӧгӧрво... — воча шуис гӧтырыслы: — Миян ӧні унджык сёйысь лоӧ, а уджалысьыс — ӧти. Мый нӧ, ме век кута фермаын скӧтникавны?

Педӧсь, дерт, гӧгӧрвоӧ тайӧс, и радпырысь да жалитӧмпырысь шуис:

— Оз ло сьӧкыд тэныд, Ваня? Мӧсъяс — мӧсъяс и эмӧсь, на бӧрся он вермы вӧтлысьны.

— Нинӧм, справитчам, — гажаджыка нин шуис Багин. — Колӧ жӧ челядьтӧ быдтыны. А то, кӧні шуам куим — виччысь нёльӧдӧс.

— Ещӧ мый думыштін, — гӧрдӧдіс гӧтырыс. — Тайӧясӧс эськӧ быдтыны, кок йылӧ сувтӧдны...

Кад нин вӧлі мӧдӧдчыны гортас. Ӧзтіс чигаркасӧ да Багин ыстіс челядьсӧ прӧщайтчыны мамыскӧд.

— Мый нӧ тэ, мам, турипувсӧ он сёй? — шуис мамыслы Митя. — Сэні жӧ витамин. Ми ещӧ на вотам — аскомысь кежлӧ.

— Вотам, вотам ещӧ, — кӧсйысис тшӧтш Коля. — Сӧмын тэ сёй да Оляӧс велд!

Педӧсь серӧктіс, сэсся ки пыдӧс вылас кисьтіс ягӧдсӧ. Бура кисьмӧм, кынмыштлӧм нин, ӧні сійӧ ньӧти эз вӧв шома, а юмов, сідзи и сыліс вомад.

Багинъяс мӧдӧдчисны гортас, а Педӧсь синъяснас колльӧдіс найӧс.