КӦНІ ШУДЫС?

Автобус муніс асфальтируйтӧм шоссе кузя. Туй бокъясас сулаліс вӧр, помтӧм вӧр, быттьӧ сылӧн абу помыс. Пипуяс да вӧсни кока кыдз пуяс костын кӧнсюрӧ зымвидзисны ыджыд шапкаа кузь пожӧмъяс. Пуяслӧн коръясыс заводитӧмаӧсь вижӧдны, уна рӧмӧн вералісны син водзын. Сынӧдын кылӧ арлӧн лов шыыс.

Вӧлі шондіа, но абу нин гожӧмын кодь жар. Шондіыс быттьӧ тупкысьӧма еджгов-лӧз занавесӧн. Автобусӧ восьса ӧшиньӧдыс пырис загӧр тшын дук, — кӧнкӧ, буракӧ, сотчис торфяник.

Катя видзӧдіс восьса ӧшиньӧдыс, шондіыс кучкис сылы веськыда синмас, но эз ёр. Нывбаба радліс шондіыслы, став вӧр-ваыслы, мый сійӧ ставсӧ бара аддзӧ ас кежас, аслас синъясӧн.

Сыысь водзынджык, веськыдладор пуклӧс вылас пукалісны эня-пиа. Кагаыс вӧлі ар куима, кызіник, лӧз матросскӧй костюма, лентаа бескозырка шапкаа, кытчӧ водзладорас зарни букваясӧн гижӧма «Герой». Детинка ыждаліс, дугдывтӧг пыр юны корис, мамыс зілис бурӧдны. «Буракӧ, карсянь отпускӧ мунӧны дед-баб дорас», — думыштіс Катя. Сылы телепит вӧлі куритчыны, но автобусын куритчыны оз позь, и сійӧ терпитіс. Нем вӧчигмозыс сійӧ видзӧдліс автобусын пукалысь йӧз вылӧ, зілис думсьыс тӧдмавны, коді кытчӧ ветліс да кытчӧ мунӧ. Сылы окота вӧлі панны кодкӧдкӧ сёрни, висьтавны аслас пи йылысь, мый мунӧ пиысла, но чӧв оліс, поліс: «Друг висьтала да ог аддзы сійӧс!» Весиг кӧритіс асьсӧ тайӧ думсьыс.

Катя неважӧн, вежон сайын, локтіс гортас, аслас тыртӧм керкаӧ. Батьыс усьлі война вылын, а мамыс эз вермы виччысьны сійӧс, во сайын кувсис, и керкаыс вӧлі овтӧм. Идрасис-пелькӧдчис и пыр жӧ муніс сельсӧветӧ, юасьны пи йывсьыс. Волісны сійӧс видлыны соседкаясыс, рӧдвужыс, но прамӧй сёрни накӧд эз артмыв. Бабаяс жалитісны мамсӧ, мый водз кувсис сійӧ, и думсьыс кӧритісны, мыжалісны Катяӧс. Катя, дерт, и натӧг тӧдіс тайӧс, мый ставсьыс сійӧ, сӧмын сійӧ, мыжа, но чӧв оліс. Тӧрыт детдомсянь воис воча кыв, — сійӧ корисны пиысла.

Войнас Катя эз куньлы синъяссӧ, сідзи и войбыд туплясис вольпась вылас да думайтіс, кыдзи мунас пиыс дорӧ, кыдзи сыкӧд аддзысяс, тӧдас оз сійӧ ассьыс мамсӧ. Асывнас чеччис водз, пӧжаліс дас кымын кӧвдум да петіс шоссе вылӧ виччысьны рейсӧвӧй автобус, коді муніс буретш сійӧ сиктӧдыс, кӧні вӧлі сылӧн пиыс. Сійӧ шуд вылӧ автобус локтіс регыд, да и вӧліны сэні местаяс, — шофёр босьтіс. Ӧні мунігас узьтӧм вой бӧрын кӧсйис кӧть вугралыштны, но эз вермы: дугдывтӧг тёльӧдчис мамыскӧд матросскӧй костюма детинка. Катя кывзіс налысь сёрнисӧ да пыдісянь ышлолаліс, эз вешйыв вежӧрсьыс аслас пиыс.

Автобус прӧйдитіс кутшӧмкӧ ичӧтик сикт дорті да сувтіс туйдорса юкмӧс дорӧ. Шофёрыс, ичӧтик тушаа рыжӧй уска дядьӧ, бергӧдчис пассажиръяслань да горӧдіс:

— Тӧварышъяс! Кодлӧн горшыс косьмӧ, верманныд юыштны. Ме татчӧ век сувтла. Ваыс кӧдзыд, чӧскыд кӧра, кӧть гожӧм пом нин, а абу на шоналӧма. Юан да пиньтӧ ёнтӧ!

Некымынӧн чеччисны. Петіс тшӧтш и кагаа нывбаба. Найӧ ас могӧн кежисны туй бокӧ, кустъяс сайӧ, а кык нывка котӧртісны керка сайӧ. Катя юыштіс кӧдзыд васӧ да ӧзтіс сигарет. Куритчис азыма, горша, тшынсӧ апаліс сідз, мый весиг тшӧкмунлі. Лагерын пукалігас сійӧ куритіс махорка, и ӧні ӧти сигаретнас некыдз эз вермы пӧтны.

Кор пассажиръяс бӧр чукӧрмисны автобусӧ, вӧрзьытӧдзыс шофёр ӧлӧдіс:

— Автобус мунӧ сӧмын Шойнаӧдз. Водзӧ оз мун. Рытнас меным бӧр колӧ воӧдчыны карӧдз.

Пассажиръяс лӧнисны, бара вӧйисны асланыс думъясӧ. Катя чеччис да юр вевдорса полка вылысь босьтіс ассьыс вижовсьӧд сумка да бӧр пуксис аслас местаӧ.

— Эн тэрмась, — шуис сылы орччӧн пукалысь старушка. — Абу на дзик матын. Гажӧй быри аслам керкаысь да паччӧрысь, — содтіс пӧч. Сылы, буракӧ, лои окота ошйысьыштны. — Карӧ ветлі. Нывъяс дорын гӧститі. Ӧні гортӧ со бӧр мӧдӧдчи.

— Ті сідзкӧ Шойнаысь? Сэні оланныд? — юасьны кутіс Катя. — Ті тӧданныд сэтысь детдомсӧ? Крупская нима детдом. Со меным письмӧ эм сэтысянь,.. — пытшкӧс зепсьыс Катя перйис конверт да бӧр адрессӧ зілис петкӧдлыны пӧчлы.

— Тэ, бур ныв, эн сідз майшась. Ӧчкиӧй абу сьӧрысь, ог аддзы. Ме и письмӧтӧгыс верита.

Друг на мыш сайсянь сувтіс детинка, копыртчыліс пӧчлань да шуис налы:

— Вернӧ, Шойна сикт. Сэні детдом эм.

Старушка бергӧдчис Катялань да тӧждысяна гӧлӧсӧн содтіс:

— Эмнас эм, но ме сэтчӧ эг на волы. Ме ола сикт шӧрас, а детдомыс сикт мӧдар помас. Зэв вильышӧсь пӧ челядьыс...

— Крупская нима детдом... — эз лэччысь Катя. — Менам пиӧй сэні.

Старука босьтіс конвертсӧ, конверта кисӧ нюжӧдіс водзлань, да мыйкӧ заводитіс шӧпкӧдны аслыс. Катя синсӧ вештывтӧг видзӧдіс сы вылӧ.

Старука бӧр сетіс конвертсӧ.

— На... Нинӧм ог аддзы... Но-о! Пи, шуан, детдомас?

Катя неуна нюммуныштіс, быттьӧ аттьӧаліс пӧчсӧ.

— Да, менам пи сэні, — мыжапырысь шуис Катя. — Кык во сайӧ нин эг аддзыв...

— Мый нӧ сідз?

— Да сідз нин артмис, — шуыштіс Катя да водзӧ сёрнисӧ эз нуӧд.

Сёрнитігтыр кадыс коли ӧдйӧ. Автобус сувтіс сикт шӧрас, клуб дорӧ. Старушка бӧрся тшӧтш петіс Катя.

— Слабог, вои места вылӧдз. А тэ, бур ныв, со таті веськыда водзӧ мун. Некытчӧ эн кеж. Сикт помас эм корсянторйыд, — кинас Катялы петкӧдліс пӧч. — А нинӧм кӧ оз артмы, лок татчӧ бӧр. Со менам керкаӧй, квайт ӧшиняыс. Юав, кӧні Чипсановъяс олӧны, любӧй висьталас. Местаыд, майбыр, тырмас. Ӧтнамӧн ола.

— Аттьӧ, ыджыд аттьӧ тэд, бабушка, — аттьӧаліс пӧчӧс, босьтіс сумкасӧ киас да мӧдӧдчис водзӧ. Муніс тэрыба, тэрмасис, быттьӧ мыйкӧ поліс воштыны аслас син улысь. Сылы паныдасьлісны кутшӧмсюрӧ йӧз, но сійӧ сувтыштлытӧг прӧйдитліс на дорті. Йӧзыс жӧ, мӧдарӧ, сувтӧмӧн видзӧдісны сы вылӧ, синъяснас колльӧдлісны сійӧс да шензисны: «Кытчӧ сэтшӧма тэрмасьӧ тайӧ тӧдтӧм нывбабаыс? Мый лоӧма?..»

Водзынджык, туй шӧрын, мачӧн ворсісны челядь — нывкаяс да зонкаяс. Налӧн гора гӧлӧсыс кыліс ылысянь на. Катя на дінӧ сувтыштліс да вель дыр видзӧдіс на вылӧ, зілис ӧткодявны на пиысь кодӧскӧ Славик пиыскӧд... «Кутшӧмджык ӧні сійӧ? Аддза кӧ, гашкӧ, ог и тӧд да», — думыштіс сійӧ.

Сы дорті дзужӧбтіс пес тыра машина, сы бӧрся трактор «Беларусь». Катя бара мӧдӧдчис водзӧ. Ӧти керка дорын веськыда уличас поткӧдлісны пес. Поткӧдчысьыс — томиник мужик, пӧрччӧма дӧрӧмсӧ да сідз и школӧдӧ пипу чуркаяс. Поткӧдас и пессӧ шыбитӧ потшӧс сайӧ ӧшинь улас. А сэні томиник нывбаба, дерт нин гӧтырыс, нуаліс бокӧджык да тэчис чипасӧ. Поткӧдчысь сатшкис черсӧ пес чуркаӧ да сувтӧмӧн кутіс видзӧдны налань локтысь тӧдтӧм нывбаба вылӧ. Катя матыстчис сы дорӧ да юаліс, ылын-ӧ ещӧ детдомӧдз. Мужик перйис зепсьыс носӧвӧй чышъян, чышкис чужӧм вывсьыс пӧсьсӧ да вочавидзис:

— Абу нин ылын, — мужик сюся видзӧдліс нывбаба вылӧ. Гӧтырыс сылӧн локтіс жӧ потшӧс дорӧ да сідзжӧ кутіс видзӧдны Катя вылӧ. — Со шорсӧ аддзан? — индіс мужик. — Сэні шор мӧдарас и эм. Кык судта ыджыд виж керка. Заборыс лӧз...

— Аттьӧ, — вочавидзис Катя да мӧдӧдчис водзӧ. Муніс ӧні тэрмасьтӧг, и вежӧрнас кыліс, кыдзи сылы мышкуас сюся видзӧдӧны да шензьӧны пес поткӧдлысь гозъя. Гӧтырыс, буракӧ, мыйкӧ кӧсйис юавны туй мортлысь, но эз удит, либӧ окотаыс быри, сӧмын лэптыштліс пельпомъяссӧ да юалана шуис верӧсыслы:

— Коді татшӧмыс?

Ӧні, кор корсян керкаыс кутіс тыдавны, Катялы сьӧлӧм вылас лои кокни. Сійӧ зілис нинӧм не думайтны, весиг заводитліс лыддьӧдлыны сёӧдз, кыдзи сійӧ частӧ вӧчліс ичӧт дырйиыс, но эз артмы, пыр жӧ торксис да эновтчис.

Шор дорас паныдасис сылы нянь сумкаа детинка, еджгов юрсиа, чёлкаыс нюжалӧма синкымӧдзыс. Катя сюся видзӧдліс сы вылӧ да бара (кымынӧдысь нин!) кӧсйис ӧткодявны тӧдтӧм детинкасӧ аслас пиыскӧд, — мый эськӧ налӧн ӧткодьыс: юрсиыс, синъясыс, нырыс? Кӧсйис, но эз вермы... Сы вӧсна мый торйӧдчигас пиыслы вӧлі кык арӧс сайӧ, а ӧні вит нин лоӧ. Аддзас кӧ, гашкӧ, оз и тӧд?! Мыйта кад коли?..

Да, кадыс мыйта коли? Ме сійӧс бура тӧда, мыйта. А сьӧлӧмсянь-ӧ радейта ме сійӧс ӧні? Мыйла менӧ ӧні кыскӧ сы дорӧ? А сэки? Радейтлі-ӧ? Коді менӧ тойліс мунны гортысь, эновтны кагасӧ пӧрысь мам дінӧ? А? Коді? Тайӧс, буракӧ, и ачыс оз тӧд...

Школасӧ помалӧм бӧрын Катя во-мӧд уджаліс совхозын, видзис куканьяс. Кутшӧмкӧ гожӧмӧ ас сиктас воліс ылі войвыв карысь сылӧн важ пӧдругаыс, кодкӧд ӧтлаын велӧдчисны школаын. Пӧдругаыс нуӧдіс Катяӧс сійӧ карас: «Мунам, сэні гажа, карыс ыджыд. Йӧзыс уна, абу миян сиктын кодь. Сэні позьӧ деньга нажӧвитны, пасьтасьны кыдз колӧ...» Мамыс бӧрдіс, эз лэдз, но нылыс ышмис да мырдӧн сорӧн и муніс кокни нажӧтка корсьны, а во мысти гортас локтіс ичӧт кагаӧн. Кытчӧ воштысян: мам ӧд мам и эм. Мунігас эз кӧсйы примитны гортас, а примитіс, дзебис ӧбидасӧ мам сьӧлӧмас. Дерт, забеднӧ сылы: быдтіс нывсӧ ӧтнасӧн, батьыс усьлі война вылын, а со мый артмис. Сиктын дивитӧны не сӧмын нывсӧ, ёнджыка мамсӧ. Весиг кодкӧ ёсь кывъя морт шуӧма Катялысь Славиксӧ «вӧчтӧм пиӧн». Мамыс да и пӧдругаясыс кымынысь юасьлісны Катялысь, коді кагаыслӧн батьыс, но сійӧ чӧв оліс, вомас ва босьтӧма. Арнас муніс совхозӧ разнӧй уджъяс вылӧ, а мамыс кутіс кага видзны. Коли во-мӧд. Кутшӧмкӧ гожӧмын совхозын уджалісны шабашникъяс. Катя тӧдмасис на пиысь ӧтикӧд, весиг вайӧдліс некымынысь гортас. Видзӧднысӧ кажитчис прамӧй мортӧн, сёрнитіс лабутнӧя, эз ышнясьлы да вина вылӧ эз усьлась. Тӧв заводитчигӧн шабашникъяс мунісны, муніс тӧдсаыскӧд и Катя, кӧть и мамыс бара оз вӧлі лэдз. Катя кӧсйысис: «Карысь квартира аддзам и Славикӧс и тэнӧ босьтам». Но кӧсйысьӧмыс эз збыльмы. Мый накӧд лои, сиктын некод эз тӧд, но кывсис, мый тӧдсаыс эновтӧма сійӧс, а Катя веськалӧма тюрьмаӧ кык во кежлӧ. Мыйысь? Сиктын некод эз тӧд. Мамыслӧн сьӧлӧмыс эз выдержит, висьмис и во мысти кувсис. Катя колис ӧтнасӧн. Славик веськаліс детдомӧ. И со Катя ӧні мунӧ сыла.

...Вуджис шор, кежис кык судта важ ыджыд керка дорӧ. Керкасӧ потшӧма джуджыд заборӧн, заборсӧ мавтӧма лӧз краскаӧн. Забор саяс кылісны челядьлӧн гора гӧлӧсъяс. Катя эз друг, а ньӧжйӧник ичӧтика восьтыштіс ӧдзӧссӧ да видзӧдліс пытшкас. Керка ӧшинь улас ворсісны челядь. На пиысь кодкӧ гораа шутёвтіс да, «ура» горзігтыр котӧртісны керка саяс.

Катя ыджыда ышловзис да пуксис-лэччысис забор бокас, быттьӧ лёздісны кокъясыс, быри сылӧн вын-эбӧсыс. Бара кутіс майшасьны: то чеччылас, то бӧр пуксьылас, — поліс воськовтны порог вомӧн, поліс аддзысьны пиыскӧд. Друг да сійӧ оз тӧд менӧ? Кутшӧмджык ӧні сійӧ?

Катя век жӧ восьтіс ӧдзӧссӧ да пырис ӧшинь улӧ. Сэні некод эз вӧв, челядь кылісны керка сайын. Мӧдӧдчис кильчӧлань, кайис поскӧдыс кильчӧ вылас. Восьса ӧдзӧс дорас, шуйгавылас, зарни букваясӧн вӧлі гижӧма вывеска: «Н. К. Крупская нима Шойнаса детдом». Катя пырис посводзас. Шуйгавылас ӧдзӧс. Сэні кыліс нывбабаяслӧн да челядьлӧн гӧлӧсъяс, пӧсудаӧн гольӧдчӧм. Дзик веськыда тыдаліс перилӧа паськыд пос, сійӧ катӧдіс вылі судтаас. Сэні кылісны жӧ челядь гӧлӧсъяс: буракӧ, сэні олісны челядьыс. Веськыдвылас бара ӧдзӧс. Катя сулыштіс посводзас, но выліас кайны эз лысьт, а пырис тайӧ ӧдзӧсӧдыс да веськаліс неыджыд комнатаӧ. Сэні ичӧтик пызан сайын пукаліс лӧз халата томиник ныв. Пызан вылас сылӧн вӧлі разӧдӧма бумага листъяс.

— Видза тіянлы.

— Здрасте, — вочавидзис нывка, сэсся кутіс чукӧртны бумага листъяссӧ. — Пуксьӧй, пӧжалуйста.

— Меным эськӧ колӧ директортӧ аддзӧдлыны, — шыасис Катя.

— А ті пуксьӧй, пуксьӧй! Сійӧ абу места вылас. Час, ме муна корся сійӧс.

Катя пуксис улӧс вылӧ да гӧгӧрбок видзӧдліс. Дзик ӧшинь дорас сулаліс диван, а бокъясас кымынкӧ улӧс. Пельӧсас ичӧтик пызан вылын сулаліс важ радиоприёмник. Веськыда тыдаліс бара ӧдзӧс, а ӧдзӧс вевдорас ӧшаліс ичӧтик вывеска «Директор».

Катяӧс бара шымыртіс полӧм: ӧні лоас сійӧ здукыс, мый думайтіс кузь кык во чӧжӧн уна узьтӧм войясӧ. Сьӧлӧмыс мӧдіс грымгыны-чеччавны, быттьӧ кӧсйис петны морӧс пытшкӧссьыс.

Недыр мысти воссис ӧдзӧс, и комнатаӧ пырис олӧма нин, но абу на пӧрысь нывбаба. Ӧчки пырыс сійӧ тэрыба видзӧдліс Катя вылӧ, матыстчис сы дорӧ да нюжӧдіс кисӧ. Киыс сылӧн вӧлі еджыд-еджыд, вата кодь небыд. Нывбаба кутліс Катялысь сарӧгӧсь чорыд кисӧ да меліа нюммуніс.

— Ті, буракӧ, кодлӧнкӧ мам лоанныд? Бу-ур. — Нюжӧдіс сійӧ да ещӧ видзӧдліс Катя вылӧ.

— Да-да. Ме, ме гижлі тіянлы аслам пи йылысь. Со тіян воча кывйыд, — мыкталігтыр шуис Катя, перйис зепсьыс письмӧ да мыччис сійӧс ӧчкиа нывбабалы.

— Лок, пӧжалуйста, прӧйдитӧй кабинетӧ, — шуис нывбаба да пырис пыді комнатаас. — Пуксьӧй со татчӧ, — индіс сійӧ пызандорса улӧс вылӧ. — Ме кӧ вернӧ гӧгӧрвои, ті лоанныд Славиклӧн мам? Да ті пуксьӧй, пуксьӧй, пӧжалуйста. Энӧ полӧй. Менӧ шуӧны Анна Ивановнаӧн. Тайӧ детдомас ме директорӧн лоа. А тіянӧс?

Катя пуксис, но директор юалӧм вылӧ эз вочавидз, а ачыс юаліс:

— Сійӧ оз вись?

— Некод оз вись. Ставныс здоровӧсь, — вочавидзис директор да сэк жӧ содтіс:

— Ті, пӧжалуйста, энӧ волнуйтчӧй. Ставыс лючки-ладнӧ. Сідзкӧ, ті Славиклӧн мам? — мӧдысь юаліс директор.

— Да-да, — довкнитіс юрнас Катя.

— Бу-ур! Ме эськӧ кӧсйи тӧдны, мамаша, ті кӧсъянныд Славиксӧ прӧста аддзӧдлыны али...

Директор эз удит помавны мӧвпсӧ, Катя торкис сійӧс:

— А позяс аддзӧдлыны сійӧс?

Директор сувтіс да чуймӧмӧн видзӧдліс сы вылӧ: «Но и асныра нывбаба». Шуны эз шу, а думайтіс тадзи, сэсся век жӧ, буракӧ, гӧгӧрвоис Катялысь волнуйтчӧмсӧ да раминика содтіс:

— Ладнӧ. Бӧрынджык сёрнитам. А Славикыд талун столӧвӧйын дежуритӧ. Ме тшӧкта корны татчӧ. Лок петам мӧдарас. Пуксьы диван вылас.

Директор пӧдлаліс ассьыс кабинетсӧ да петіс.

Катя пуксис диван вылӧ, пӧрччис чышъянсӧ да витнан чуньнас шыльӧдыштіс юрсисӧ. Сылӧн зэв ёна косьмис горшыс, но ваыс комнатаас эз тыдав. Сійӧ пукаліс да виччысис. Ӧдзӧс дорын кылісны кок шыяс, Катя синсӧ вештывтӧг видзӧдіс сылань. Воссис ӧдзӧс и директор пырис ӧтнас: сыкӧд некод эз вӧв.

— Абу? — повзис Катя.

— Эн пов. Регыд локтас. Столӧвӧйын лӧсьӧдӧны ужын кежлӧ пызанъяс. Регыд локтас, — мӧдысь шуис директор да пуксис ичӧтик пызан сайӧ, кӧні водзджык пукаліс лӧз халата нывка.

Катя копыртіс юрсӧ да кутіс ротшйӧдлыны чуньяссӧ, но сьӧлӧмнас кыліс, кыдзи сы вылӧ видзӧдӧ директор.

Кодкӧ слабиника таркӧдыштіс ӧдзӧсӧ:

— Пыр, пыр, Славик! — горӧдіс директор.

Ӧдзӧс муртса воссьыштіс да костӧдыс тыдовтчис кодлӧнкӧ нюмъялан чужӧм. «О, господи, Славик али абу?!» — мыйлакӧ друг вирдыштіс юрас.

— Славик, лок пыр, пыр, — меліа шуис директор.

Детинка ньӧжйӧник локтіс комната шӧрӧдзыс, но ӧні эз нин нюмъяв. Кыдзкӧ букышӧн моз видзӧдліс Катя вылӧ, копыртіс юрсӧ да кутіс видзӧдны джоджас.

— Славик, колӧ, буракӧ, чолӧмасьны, — бара меліа шуис директор.

Славик мыйкӧ шӧпнитіс вомгорулас.

— Славик, видзӧдлы тайӧ тётя вылас. Тӧдан он тэ сійӧс?

Детинка дрӧгмуні, но шӧпнитіс:

— Да.

Катя сьӧлӧмнас кыліс пиыслысь лов шысӧ, а чужӧмӧдыс дугдывтӧг тюрис синваыс. Сійӧ кӧсйис чукӧстны писӧ нимнас, но эз вермы, горшыс гӧрддзасис, сӧмын вермис нюжӧдны кияссӧ. Детинка воськовтіс сылань.

— Сла-а-вик, сьӧлӧмшӧрӧй менам!.. — сӧмын и горӧдіс, быттьӧ тайӧ кывъясыс мынісны лэчкысь. Славик топӧдчис мамыс морӧс бердӧ да кыкнанныс ымзісны-бӧрдісны. Кыдз сӧмын вермис, Катя кутліс сійӧс, окаліс чужӧмас, синъясас, юрас, быттьӧ кык воӧн чӧжсьӧм мелілунсӧ кӧсйис сетны пиыслы ӧтпырйӧ. Катя оз вермы кутчысьны, сыркъялӧмӧн бӧрдӧ. Анна Ивановна матыстчис на дорӧ, неуна вештыштіс Славикӧс мам дорсьыс да шуис детинкалы:

— Мун, Славик, петав. Ме тэнӧ бӧрынджык кора, — сэсся матыстчис Катя дорӧ да ӧлӧдіс: — Тырмас! Дугды вай кагасӧ повзьӧдлыны!

Детинка бергӧдчис Анна Ивановналань да жугыля видзӧдліс сы вылӧ.

— Лок, лок, Славик, петалам. Аддзан, мамыд некыдз оз вермы успокоитчыны, — сэсся пуктіс детинка пельпом вылӧ кисӧ да колльӧдіс сійӧс ӧдзӧс дорӧдзыс. Мунігмозыс мыйкӧ шӧпнитіс сылы.

Катя колльӧдіс найӧс, пуктіс юрсӧ диван валик вылӧ да ещӧ на ёнджыка бӧрддзис. Бӧрдіс гораа, сыркъяліс сідз, мый тракйысис морӧсыс.

Директор эз бурӧд сійӧс. Успокоитчас, ачыс ланьтас. Вочасӧн сійӧ лӧнис, сӧмын морӧсыс век на тракйысис.

Недыр мысти дзикӧдз лӧнис, кыпӧдіс пыктӧм синъяссӧ Анна Ивановна вылӧ. Слабиника нюммуныштіс.

— Но, мый? Прӧйдитіс? Нинӧм, овлӧ татшӧмыс.

Катя чышъяннас чышкис чужӧмсӧ да пыркнитіс юрсӧ.

— Ставыс! Тырмас!

— Но и бур. Вай сідзкӧ тӧдмасям: менӧ шуӧны Анна Ивановнаӧн, а тіянӧс?

— А ме Катя... Катя Юркина.

— Ладнӧ, Катя. Зэв бур! Успокоитчы, кут асьтӧ киад. Ӧні ме тӧда нин, коді тэ. Кыдзи думайтан водзӧ овны? Кӧні?

— Кыдз кӧні? Гортын, дерт. Совхозын уджавны кута. Ме сёрнитчи нин. Ме ӧд Славикла локті. Миянлы лоӧ лӧсьыд. Совхозын детсад эм. Ас сиктын вежань да тьӧткаяс олӧны. Первойсӧ отсаласны.

— А тэ бура думайтін? Гашкӧ, бара торксян олӧмас?

— Ой-ой! Тайӧ сэсся оз ло! — горӧдіс Катя. — Менӧ бура нин велӧдісны. Слабог, тӧдмалі олӧмсӧ...

— Ладнӧ, ме тэныд верита. А век жӧ поручительство колӧ сельсӧветсяньыд либӧ совхозсяньыд.

— Ме тӧді ӧд тайӧс. Вайи бумага совхозсянь, — сюйис кисӧ пытшкӧс зептас да перйис сэтысь конверт. — Со бумагаыс... — Сэсся друг чеччис да шуис: — Уна-ӧ нин кадыс? Миянлы удитны колӧ автобус вылӧ!

— Ӧти-кӧ, автобусыс талун оз нин ло, мӧд-кӧ, вой кежлас ме тіянӧс кагаӧн некытчӧ ог лэдз. Мый кутанныд вӧчны тӧдтӧм сиктын?

— Менӧ ӧти бабушка корис. Ӧтлаын автобусын локтім.

— Нинӧм. Узянныд тані. Со диван, вольпасьсӧ ваям. Документъястӧ да кӧм-паськӧм аски асыв кежлӧ дасьтам. Тіянӧс колльӧдасны. Ме ачым ог ло, роноӧ корисны.

«Сідзкӧ, талун оз на сетны Славикӧс», — думыштіс Катя.

Анна Ивановна петіс. Регыд мысти комнатаӧ пырис лӧз халата ныв да нуӧдіс сійӧс умывальникӧ. Катя окотапырысь мыськис чужӧмсӧ кӧдзыд ваӧн, бӧр пырис комната пытшкӧ. «О, кодкӧ эськӧ тӧдіс кӧ, кутшӧма ме мудзи...» — думыштіс сійӧ.

Сійӧ жӧ лӧз халата нывкаыс вайис сылы ужын: ичӧтик еджыд эмалированнӧй кастрюляын шыд, да тӧрелкаын жаритӧм картупель да котлет. Сэсся петаліс да вайис кружкаӧн компот.

— Сёйӧ, пӧжалуйста. Видлӧй, мыйӧн челядьсӧ вердам.

— Аттьӧ, менам кӧвдум эм. Талун асыв пӧжалышті.

...Катя восьтіс синъяссӧ. Ывлаын лӧзаліс рытъя югыдыс. Комнатаын чӧв-лӧнь, некод абу.

«Слабог, аддзылі Славикӧс», — пыр жӧ дум вылас уси сылы. Пуксис диван вылас, кокъяссӧ лэдзис джоджас. Сылы окота вӧлі куритчыны: тані детдомас вомас эз на босьтлы. Кокас сюйис туфлисӧ, плащ зепсьыс перйис сигарет пачка да думыштіс: «Гашкӧ, тані оз позь да. Челядь ӧд олӧны керкаас». Сэсся друг шуис аслыс: «Тырмас! Кык во балуйтчи. Славиклы, тӧдӧмысь, куритчӧмыд оз кажитчы. Тырмас!» — мӧдысь шуис да сигарет пачкасӧ бӧр сюйис зептас. Матыстчис ӧшинь дорӧ, восьтіс сійӧс. Небесаас югъялісны уна кодзувъяс, уличаын мигайтчисны электрическӧй лампочкаяс. Сиктын вӧлі лӧнь.

Лӧнь вӧлі и керкаын, ставӧн, буракӧ, узисны. Катя кывзысис тайӧ чӧвлунас, думнас зілис кыйны Славиклысь гӧлӧссӧ. «Мый сійӧ ӧні вӧчӧ?» — бара думыштіс Катя. Ӧнтай, первойысьсӧ, бӧрдігад прамӧя эз и кывлы гӧлӧссӧ. Нинӧм. Ставыс водзын. Сійӧ бӧр пӧдлаліс ӧшиньсӧ да пуксис диван вылас.

Друг воссис ӧдзӧс да комнатаас пырис лӧз халата олӧма нин нывбаба, дежурнӧй няня.

— Узян али олан? — биасигмозыс юаліс сійӧ. — Чайті, мися, он на узь, сійӧ и пыри. Окота лои видзӧдлыны Славик мам вылӧ. Миян аски кежлӧ ставыс дась.

— Ог узь.

— Но и ладнӧ. Войыс кузь на. Ме кӧсъя, бур ныв, ещӧ юавны: ставсӧ-ӧ бура думыштін? Тані сылы лӧсьыд, кӧма-паськӧма, шоныд, пӧт. Дӧзьӧритӧны,.. — лыддьӧдліс нывбаба. — Мед омӧльджык эз ло!

— Оз ло, оз ло, бабушка. Ме нин уна думайті. Ставыс лоӧ бур.

— Медъя, медъя... Славикыд шань детинка быдмӧ. Мед оз тшык...

— Мый ті, бабушка! — горӧдіс да друг сылӧн вирдыштіс юрас: «Да тайӧ бабыс статьнас и сёрнинас мунӧ менам мам вылӧ. Сэтшӧм жӧ тӧждысьысь, мелі сёрниа...»

Мам... мам! — кырыштіс сьӧлӧмсӧ. Кор бӧръяысь муніс гортсьыс, Славиклы куимыс эз на вӧв. Мамыс и быдтіс, кытчӧдз вермис. Бӧрынджык кымынысь кӧритліс, видліс асьсӧ, но ӧд киссьӧм ватӧ он курышт. Весиг мамсӧ дзебны эз лэдзлыны.

Катялы лои забеднӧ, доршасис синваыс. Медым бара не бӧрддзыны, сійӧ тэрыба юаліс:

— Бабушка, донаӧй. Талун сійӧс позьӧ ещӧ аддзӧдлыны?

— Гашкӧ, аски. Ӧні ставныс нин узьӧны. Оз ков челядьсӧ шызьӧдны. Найӧ ӧд кокниа узьӧны.

— Да ме, бабуш, ньӧжйӧник, ньӧжйӧник, кок чунь йылын. Видзӧдла и пыр жӧ бӧр пета.

— Ладнӧ инӧ. Сӧмын ньӧжйӧ, шытӧг.

Кайисны вылі судтаас, пырисны узьлан комнатаӧ. Сэні вӧлі рӧмыд: ӧдзӧс дорас ӧзйис войся лӧз лампочка. Комнатаын лӧнь, сӧмын кӧнсюрӧ кылӧ челядьлӧн лов шыыс.

— Со сылӧн крӧватьыс. Сӧмын, ен могысь, ньӧжйӧджык.

Катя муніс Славик дорӧ. Сійӧ куйліс веськыд бок вылас, шебрас увсьыс тыдаліс шуйга синмыс.

— Славик! — шӧпнитіс Катя. — Тэ узян?

Детинка павкнитіс шебрассӧ.

— Тайӧ тэ? Ме чайті, тэ бӧр мунін?

— Ме, ме, ме, — шӧпкӧдіс мамыс. Катя копыртчис да сывйыштіс писӧ, пиыс кутчысис сылы сьыліас.

Дежурнӧй няня тэрыба локтіс на дінӧ:

— Ме жӧ тэнӧ бур вылӧ лэдзи. Ӧні жӧ мун татысь. А тэ, Славик, узь, узь. Аски водз чеччыны ковмас.

Детинка некыдз эз кӧсйы лэдзчысьны мам дінсьыс, но няня век жӧ торйӧдіс найӧс.

— Мыйла садьмӧдін?

— Ме эг садьмӧд. Сійӧ эз узь.

— Тайӧс кӧ тӧді, эг эськӧ катӧд. Мун пыр да вод и узь. Директор аски асыв кежлӧ шуис лӧсьӧдны тіянӧс туйӧ. Миян ставыс дась.

— Аттьӧ, ыджыд аттьӧ!

— Нинӧмысь. Асывнас завтракайтанныд да верманныд петны туйӧ. Ми колльӧдам автобусӧдз. Вот сідз, бур нылӧй! Шуда овны тіянлы!

Катя нинӧм эз шу, сӧмын нюмъяліс. Сылы вӧлі нимкодь, мый тані эскӧны сылы, веритӧны, надейтчӧны сы вылӧ. Сылы друг окота лои висьтавны тайӧ пӧрысь нывбабаыслы аслас олӧм йылысь, но нывбаба эз нин вӧв комнатаас, сӧмын ньӧжйӧник аслыс шуис:

— Кутшӧм нин ме бур ныв? Бур кӧ вӧлі, пиӧй эськӧ детдомӧ эз веськав...

Катя водіс, но синъясыс оз куньсьыны. Сылы йиджисны вежӧрӧдзыс бабушкалӧн кывъясыс. Шуд! А кӧні сійӧ? Ме вот мый дыра корсьыси, а сӧмын татысь аддзи!