КӦДЗАЛӦМ ВИР

— Анна, Ануш! Кытчӧ вошин? — Кильчӧ вывсяньыс горзіс Анушлӧн мамыс. Нывка пӧдругаясыскӧд ворсіс орчча керка ӧшинь улас. Сэні налы некод оз мешайт, некод оз вид: керкаас некод оз ов, ӧшиньяссӧ тувъялӧма пӧвъясӧн. Ануш видзӧдліс туй вылӧ: сэні некод абу, сэсся видзӧдліс асланыс керкалань. Сэні кильчӧ вылас сулаліс мамыс, ӧвтчис кияснас.

— Ануш, аканьӧй, волы котӧртлы гортад.

Нывкалы, дерт, жаль вӧлі эновтны пӧдругаяссӧ, но котӧрӧн локтіс гортас, кайис мамыс дінӧ кильчӧ вылас.

— Мый, мамук?

— Кывзы, аканьӧй менам, — мыйлакӧ ньӧжйӧникӧн заводитіс мамыс. — Локтӧма Ангелина.

— Кутшӧм Ангелина?

— Быттьӧ он тӧд. Павел Иванович дедыдлӧн нылыс. Кодлы письмӧястӧ да телеграммаястӧ новлін почта вылӧ.

Нывка нинӧм эз шу, а чуймӧмӧн видзӧдіс мамыс вылӧ. Сэсся быттьӧ друг очсовтіс да веськодьпырысь шуис:

— Но и мый? Локтіс кӧ и мед локтіс! — Ануш ӧні ачыс гӧгӧрвоис, код йылысь мунӧ сёрниыс. Сылӧн и сідз лӧгыс петіс Ангелина вылӧ.

Мамыс пуксьӧдіс Анушӧс кильчӧ лабич вылас орччӧн да малыштіс юрсӧ.

— Павел Иванович дед гу вылад кӧсйӧ ветлыны.

...Павел Иванович Ненев кувсьыліс во сайын нин. Лабутнӧй, ыджыд сьӧлӧма морт вӧлі, сиктын ставӧн тӧдісны, пыдди пуктылісны сійӧс быдӧн, пӧрысь и том.

Воліс сійӧ Вежъягӧ война бӧрас вель дыр мысти нин. Война бӧръя лунъясас сьӧкыда ранитчӧма да дыр куйлӧма Уфа карса госпитальын. Сэні и вӧлі гӧтрасьӧма медицинскӧй сестра вылӧ. Мыйла локтӧма Вежъягӧ, ачыс некор эз висьтавлы, пыр чӧв оліс, кӧть и сійӧ ачыс чужлӧма да быдмылӧма тані, Комиын, кӧнкӧ войвылын. Война дырйиыс служитӧма морскӧй пехотаын, унаысь ранитчылӧма.

Совхозын уджаліс разнӧй уджъяс вылын: вӧлі скӧтникӧн, мыйкӧ дыра бригадираліс, бӧрыннас стрӧитчан бригадаын. Шуны кӧ, эз ӧткажитчыв любӧй уджысь. Гӧтырыскӧд олісны бура-лада, Вежъягын нин чужис налӧн ныв, шуисны сійӧс Ангелинаӧн. Татшӧм нимыс Вежъягын некодлӧн на эз вӧв. Вежъягын наысь шудаджык семьяыс эз вӧв. Но шудыс, вӧлӧмкӧ, оз ӧтнасӧн ветлӧдлы. Кага вайигӧн Полина кувсис, но Павел Иванович выльысь эз гӧтрась, нывсӧ быдтіс-лелькуйтіс ӧтнасӧн. Гӧтыр кулӧм бӧрас нин Павел Иванович Анушъяскӧд орччӧн лэптіс выль керка, надейтчыліс нылыс вылӧ: коркӧ пӧ сэні внукъясӧс кута нянчитны. Но нэмсӧ коллявны ковмис ӧтнаслы, нылыс эз волы весиг батьсӧ дзебны. Керка ӧшиньяссӧ ковмис тувъявны.

— Ануш, сё зӧлӧта, ветлы тшӧтш кладбище вылас, петкӧдлы гусӧ. Ме ачым ог эшты, фермаӧ колӧ мунны. Вай кӧсатӧ лӧсьӧдышта да пырам керкаад.

— Со и ми локтім, — порогсӧ воськовтігӧн на горӧдіс мамыс, — Ануш, тӧдан он, тайӧ коді? Он, дерт.

Ануш нинӧм эз шу.

— Со тайӧ и эм Ангелина тётяыд, Павел Иванович дедыдлӧн нылыс. А тайӧ со миян Ануш. Павел Иванович, поконик, шуліс сійӧс мада-нылӧн. Вот Ануш и петкӧдлас тіянлы батьыдлысь гусӧ. Но да ладнӧ, ті ветлӧй, а ме удж вылӧ муна.

Ануш дыр видзӧдіс Ангелина вылӧ да ас кежас мӧвпаліс: «Збыль ӧмӧй тайӧ мича нывбабаыс Павел Иванович дедлӧн ныв?» Мужичӧй моз дженьыда шырӧм кудриа сьӧд юрсиа, сэтӧр кодь сьӧд синъяс вевдорын бордъяс моз шевкнитчӧмаӧсь са сьӧд синкымъяс. Пельяс помас лӧсталіс исерга. Веськыд киса нимтӧм чуняс — зарни чунькытш. Восьса морӧса мича платтьӧыс муртса тупкис пидзӧсъяссӧ. Морӧсас уна рӧмӧн лӧсталіс брошка.

Ануш видзӧдіс да шензис: «Татшӧмъяссӧ сӧмын кино вылысь аддзылан!»

— Тэ либӧ менам чой! Вай инӧ ветлам, чоюк, да петкӧдлы меным гусӧ.

Ангелина босьтіс лабичысь лакӧн дзирдалысь сьӧд сумка, перйис сэтысь вӧсньыдик капронӧвӧй сумка да мыйкӧ сэтчӧ тэчис ичӧтик чемоданысь.

Сэсся кыкнанныс петісны ывлаӧ. Насянь веськыдвылын вӧлі совхозлӧн контора, сэні жуисны йӧз: коді пырӧ контораӧ, коді петӧ сэтысь.

Туй кузя ӧтарӧ-мӧдарӧ журъялісны машинаяс, прицепъяса «Беларусь» тракторъяс. Вӧлі тулыс пом. Сулаліс мича жар поводдя. Гӧгӧр ставыс дзоридзаліс. Совхозын буретш заводитісны силосуйтчыны.

— Фу-у! Бусыс мыйта! Дзикӧдз пӧдан, — кинас ӧвтчигтыр шуис Ангелина.

— Регыд оз ло буса. Сикт помсянь заводитісны туйсӧ асфальтӧн тупкыны. Карын моз жӧ лоӧ.

Нывка муніс Ангелина бӧрвылын да частӧ видзӧдлывліс сы вылӧ. Думнас век на шензис: «Рочакань кодь мича. Сійӧн, пӧди, и вунӧдіс батьсӧ!..» Шензис мичлун вылас, а сьӧлӧмнас кыліс дзик мӧдтор: Ангелина эз кажитчы сылы.

Кор кутісны мунны лавка дорті, Ангелина виччысьыштіс Анушӧс да шуис:

— Лок пыралам магазинас.

Найӧ пырисны. Ануш сувтіс ӧшинь дорас да веськодя кутіс видзӧдны ывлаас. Ангелина жӧ ньӧбис кык булки, кило кампет, кык шоколад плитка, лимонад доз, коньяк сулея да ставсӧ тэчис капронӧвӧй сумкаас. Петісны лавкаысь да мӧдӧдчисны водзӧ. Ангелина — водзас, Ануш сы бӧрвылын.

Кладбищеӧдз ылынкодь на. Сикт помсянь сэтчӧдз лоӧ километр кымын.

Шонді кайӧ век вылӧджык, жар, туй вылысь бусыс оз и быравлы.

Нывбаба сувтыштіс.

— Горшыд косьмӧ? На юышт лимонадсӧ.

— Оз ков. Ме лучше тайӧ юкмӧссьыс кӧдзыд ва юышта.

— Кыдз кӧсъян. Мырдӧн ог тшӧкты.

Ануш кежис юкмӧс дорӧ, черпушкаӧн лэптіс васӧ, юыштіс, кольӧм васӧ бӧр кисьтіс юкмӧсас, сэсся котӧрӧн вӧтӧдіс Ангелинаӧс. Мыйкӧ дыра муныштісны орччӧн. Аннушка тушанас вӧлі ичӧткодь, и Ангелина юаліс сылысь:

— Тэ кӧть велӧдчан он нин?

— Мыйла нӧ ог велӧдчы? — чуймис нывка. — Таво нёльӧд классӧ вуджи.

— Бура велӧдчан?

— Ог тӧд. Вай ме нуышта сумкатӧ, китӧ шойччӧдышт, — мӧдарӧ бергӧдіс сёрнисӧ Ануш.

— Тэ? — серӧктіс Ангелина. — Он вермы. Сьӧкыд ӧд!

— Вай, вай! — горӧдіс Ануш да кутчысис сумка вугъяс.

Нывбаба век жӧ сетіс сумкасӧ.

— На видлы, колӧкӧ.

Сумкаыс и збыльысь вӧлӧм сьӧкыдкодь. Неуна на и мунісны, а Аннушка некымынысь нин вежліс кияссӧ.

Ангелина частӧ видзӧдлывліс нывка вылӧ, буракӧ, мыйкӧ кӧсйис юавны, но мыйлакӧ чӧв оліс. Мӧдыслӧн, Аннушкалӧн, сідзжӧ гиляліс кывйыс, окота вӧлі юавны, мыйла сійӧ сы дырасӧ эз волы гортас, кор на батьыс вӧлі ловъя, дзонь-здоров, мыйла сійӧ эз волы весиг батьсӧ дзебны, но эз лысьт. Быд пӧрйӧ, кор налӧн паныдасьлісны синъясыс, тӧдчис, мый найӧ кӧритӧны ӧта-мӧдсӧ. Ангелиналӧн чужӧмыс корсюрӧ пемдыліс, вежыньтчыліс, йирис вом доръяссӧ. Мыйла? Код тӧдас, гашкӧ, яндзимысла, гашкӧ, ӧбидаысла...

Ануш сьӧкыда лолаліс, буракӧ, мудзис. Ангелина бергӧдчис сылань да бӧр корис сумкасӧ.

— Ме жӧ тэныд шулі, мися, сьӧкыд...

Ануш кыв шутӧг сетіс сумкасӧ. Найӧс ордйис машина, и машина бӧрвылас кыз сюръяӧн лыбис бус, вевттис туй кузя мунысьясӧс.

— Будь проклят тайӧ тіян туйныд! — видчыштіс Ангелина да кутіс ӧвтчыны кияснас. — Кыдзи нӧ тайӧс позьӧ терпитны?

Ануш нинӧм эз шу, чӧв оліс. Мыйкӧ дыра муныштісны шы ни тӧв.

Кор нин петісны сиктысь, Ангелина, пӧжалуй, первойысь шыасис Ануш дорӧ нимнас:

— Анечка (тадзисӧ сійӧс некод эз шулы), тэ бура тӧдлін менсьым батьӧс, ассьыд дедтӧ? — юаліс сійӧ. Сэсся пыраліс сумкаас да перйис сэтысь кык кампет. — На босьт, сёй!

Ануш босьтіс, аттьӧаліс.

— Ме? Павел Иванович дедӧс? Дерт жӧ, тӧдлі. Сійӧ миян сосед вӧлі дай меным дед вӧлі.

— Дерт жӧ, тэныд, кодлы нӧ инӧ!.. — серам сорӧн шуыштіс нывбаба да син бӧжнас видзӧдліс Ануш вылӧ.

— О-о, ме сійӧс ёна радейтлі. Мый ме? Челядь ставӧн радейтлісны. Частӧ школаӧ воліс, висьтасьліс, кыдз море вылын фашистъяскӧд тышкасьӧма. Менӧ сійӧ шуліс мада-нылукӧн. А мый мадаыс лоӧ, ог тӧд. А корсюрӧ и внучкаӧн на шуліс, — ошйысьыштіс Ануш, сэсся ыджыда ышловзис: — Частӧ гаравліс, мый коркӧ сылӧн вӧлӧма ме кодь жӧ ичӧтик нывка. Мый ме быдма да лоа сэтшӧм жӧ мича да шань нылӧн. А кымын чача вӧчліс меным. Сетіс меным тэнсьыд важся аканьястӧ. Дадь вӧчліс. Сэсся сійӧ висьмис. Ми мамӧкӧд быд лун кык-ӧ-куимысь пыравлім сы ордӧ. Почта вылӧ ме нулі уна телеграмма, письмӧяс. А коркӧ мамӧй шуис, мый телеграммаясыс пӧ кытчӧкӧ вошӧны, оз воны Ангелина киӧдз. Сэсся Павел Иванович дед эз кут вермыны чеччыны крӧвать вывсьыс. Куйлігас век видзӧдӧ ӧшиньӧ, тэнӧ виччысьӧ, а тэ он лок! — друг скӧрысь помаліс сійӧ.

Ангелиналӧн чужӧмыс вежыньтчыліс. Неуна чӧв олыштӧм бӧрын бара юаліс:

— А менӧ нӧ гаравліс эз?

— Кыдзи нӧ эз гаравлы? — Ануш бугжыльӧн видзӧдліс Ангелина вылӧ. — Лун и вой. Видзӧдӧ туй вылӧ, а ачыс шӧпкӧдӧ: «Ангелина, Ангелина». Аслас синваыс тюрӧмӧн тюрӧ. — Ануш чышкыштіс син доръяссӧ, ыджыда ышловзис: — Ӧтчыд ме локті школаысь, а тіян керка дорын уна йӧз чукӧрмӧмаӧсь. Ме котӧрті сэтчӧ, и бать меным шуӧ: — Ануш, Павел Иванович дедыд кувсьӧма...

Сэсся дядьӧяс миян дінын вӧчисны горт, гӧрд кумачӧн эжисны. Мастерскӧйын кӧрт памятник вӧчисны, гӧрд звездааӧс. Аскинас, кор кутісны катӧдны кладбище вылӧ, йӧзыс чукӧрмис уна-уна, ӧшинь улад оз тӧрны. Машинаясӧн районсянь и карсянь локтӧмаӧсь. Сэсся кутшӧмкӧ дядьӧяс сёрнитісны машина вывсянь: «Зарни ки... Бур мастер... Шань морт... Войнавывса ветеран...» Гу вылас уна венок коли. Ми челядькӧд лыддим, да дас кымын вӧлі.

Ануш ланьтіс. Сійӧ виччысис, мый вӧвлӧм соседкаыс, тайӧ мича нывбабаыс, кодӧс шуӧны Ангелинаӧн, мыйкӧ ещӧ юалас либӧ шуас. Но сійӧ чӧв оліс, юрсӧ лэдзӧмӧн восьлаліс водзӧ. Тыдовтчис кладбище.

— Тётя! Ті татчӧ пуксьӧй да неуна шойччыштӧй. Ме со эстчӧ кежала дзоридзьясла. Букет вӧчам! Дед ёна радейтліс дзоридзьяссӧ.

Ангелина, дерт, тайӧс тӧдіс Ануш серти ёна бурджыка. Сійӧ ачыс батьыскӧд эз этша нуавлыны мамыс гу вылӧ.

— Коді нӧ сылы дзоридзьяссӧ ваявліс?

— Ачыс ӧктыліс. Корсюрӧ нулывліс кладбище вылӧ, тётя Полина гу вылӧ, а корсюрӧ и вайліс гортас. И ме вайлывлі.

— Но ладнӧ, ветлы. Ме тані пукышта.

Ануш пелька чеччыштіс канава вомӧн, и здук мысти саяліс нин кустъяс сайӧ.

Ангелина пуксис, думыштчис. О, енмӧй, мыйла ставыс тадзи артмис? Сійӧ ӧмӧй коркӧ омӧля радейтліс батьсӧ? Найӧ ӧд мый дыра олісны кыкӧн сӧмын, батьыс эз гӧтрась, медым не ӧбидитны нывсӧ. Батьыс сійӧс быдтіс-лелькуйтіс, велӧдіс, мортӧн кӧсйис вӧчны. А кыдзи ме аттьӧалі сійӧс?

А мыйсянь ставыс заводитчис? Шӧр школа помалӧм бӧрын Ангелина пӧдругаясыскӧд муніс Архангельскӧ, кӧсйис велӧдчыны врачӧ. Пӧдругаясыс веськалісны институтӧ, а сійӧ конкурс серти эз прӧйдит. Мый вӧчны? Батьысӧн сетӧм деньга кутіс бырны, кӧть и ёна видзтіс. Гортӧ бӧр мунны яндзим. Вӧтлісны общежитиеысь. Слава богу, овнысӧ лэдзис ас дорас кутшӧмкӧ старушка. Пырис трамвайӧ кондукторӧн. Сэсся тӧдмасис томиник лейтенанткӧд, но регыд мысти тыдовтчис, мый сылӧн эм гӧтыр дай нывка. Ангелина муніс сы дорысь. Тадзи олӧмыс мӧдысь швачӧбтіс Ангелиналы сьӧлӧмас. Томиник нывкалӧн вочасӧн сьӧлӧмыс чорзис, измис, кӧдзаліс вирыс. Йӧзыс кажитчыны кутісны злӧдейясӧн. Сылы неокота лои гижны письмӧяс весиг батьыслы. Регыд мысти сійӧ тӧдмасис ӧти инженеркӧд, коді воӧма командировкаӧ Воркутаысь. Инженер вайӧдіс сійӧс Воркутаӧ. Но сыкӧд олӧмыс бара жӧ эз удайтчы: вӧлӧма сійӧ вывті нин асьсӧ радейтысь мортӧн. Во ӧтлаын олӧм бӧрын торйӧдчисны: инженер муніс Тулаӧ, а Ангелина колис Воркутаӧ.

Во джын мысти Ангелина коймӧдысь петіс верӧс сайӧ. Тайӧ пӧрйӧ олӧма морт, солиднӧй дядьӧ сайӧ, коді кык пӧв вӧлі ыджыдджык Ангелинаысь. Сійӧ уджаліс кӧнкӧ торгӧвӧй системаын.

Воркутаын олігӧн нин Ангелина ыстыліс батьыслы кык кывъя дзик ӧти письмӧ, гижліс адрессӧ. Телеграммаяс да письмӧяс, дерт, сійӧ ставсӧ пӧлучитліс, но ни ӧти вылӧ эз вочавидзлы. Мыйла? Код тӧдас, гашкӧ, ӧбижайтчис аслас шогмытӧм олӧм вылас, гашкӧ, яндзим вӧлі батьыслы гижны аслас олӧм-вылӧм йылысь, гашкӧ, яндысис аслас вӧвлӧм пӧдругаясысь, кодъяс важӧн нин уджалісны врачьясӧн. Гашкӧ, яндысис аслас пӧрысь верӧсысь? Код тӧдас... Тадзи вочасӧн кӧдзаліс вирыс батьыс дінӧ, йӧз дінӧ. И со батьыс кулӧмсянь колис во сайӧ нин, и Ангелина сӧмын ӧні локтіс рӧднӧй сиктӧ. Йӧз дорӧ сійӧ ёна эз мыччась, сразу жӧ пырис соседыс ордӧ. Сійӧ ёна поліс, мый сиктса йӧз кутасны сійӧс янӧдны, а гашкӧ, и видны!

Ангелина пукаліс туй бокын да забеднӧпырысь йирис вом доръяссӧ. Мыйла тадзи лои? — кымынӧдысь нин юаліс ассьыс. Но такӧд тшӧтш Ангелиналысь сьӧлӧмсӧ сьӧкыд изйӧн личкис кутшӧмкӧ тӧдтӧм, гӧгӧрвотӧм на шог.

Воис Ануш. Сійӧ ки тырыс вайис ловъя дзоридзьяс — купальнича, катшасин, пӧлӧзнича.

— Анечка, шань ныв, — Ангелина крута бергӧдчис нывкалань. Гӧлӧсыс вӧлі ӧні небыд, мелі: — Анечка, ме мыйкӧ кӧсъя тэнсьыд юавны. Сӧмын некодлы эн висьтав. Но?

— Он кӧ тшӧкты, дерт, ог висьтав. Абу ӧд ичӧт.

— Ладнӧ, ладнӧ. Ме тэныд эска.

— Да тэ эн пов. Гусятор кӧ, некодлы кыв ни джын.

Ангелина мыйкӧ дыра кежлӧ ланьтліс, сэсся бара крута бергӧдчис нывкалань да ньӧжйӧникӧн юаліс:

— Дедыд тэнад быд тӧлысь уна деньга босьтліс?

— Да, Павел Иванович дедкӧд ми ӧтчыд почта вылӧ ветлім. Сэні сетісны сылы уна деньга, а кор висьмис — гортас кутісны вайны. Деньгаыс сійӧ пенсияӧн шусьӧ.

— А кытчӧ дедыд деньгасӧ воштыліс?

— Кыдзи кытчӧ? — Эз гӧгӧрво Ануш. — Босьтліс да зептас сюйліс либӧ шкапас пуктыліс, — Ануш гӧгӧрвотӧма видзӧдіс Ангелина вылӧ.

— Ладнӧ, ладнӧ. Тэд мыйкӧ ньӧбліс, мамыдлы?

— Эн сӧр! Мамӧлы нинӧм эз ньӧблы. А меным ирис ньӧблывліс.

— А гашкӧ, кодлыкӧ сетавліс деньгасӧ?

Ануш арыштіс синъяссӧ. Сійӧ нинӧм эз кут гӧгӧрвоны.

— Сетавліс эз? — мӧдысь юаліс Ангелина.

— Ме бара ог тӧд, — дзикӧдз шӧйӧвоши нывка.

— А мамыдлы эз сетавлы?

Ануш, буракӧ, ӧні сӧмын кутіс гӧгӧрвоны, кытчӧ синӧ тайӧ мича нывбабаыс. Сувтіс весиг кок йылас.

— Тэ мый? Йӧй али прӧсуж? Мыйла сылы дедлӧн деньгаыс? Мамӧ миян дояркаалӧ, а батьӧй — шофер, — скӧрысь нин горӧдіс Ануш. — Миян деньгаыс асланым уна.

— Энлы, энлы, эн горзы. Лок пуксьыв, — нюмъялігтыр юасис Ангелина. — А керкасӧ нӧ совхозлы сетӧма? Он тӧд?

— Ог тӧд, — нурбыльтіс Ануш.

— А сійӧ тіянӧ частӧ пыравліс?

— Пыравліс. Батькӧд шахматӧн ворслісны.

— А кор батьыд вӧлі рейсын, мамыд дінӧ пыравліс?

— Пеж лов! Яндысьтӧм бугыль! — Ануш скӧрысь видзӧдіс Ангелина вылӧ. — Абу яндзим быдса бабалы нинӧм абусӧ сёрнитны,.. — крута бергӧдчис да мӧдӧдчис гортланьыс.

Ангелина эз сразу гӧгӧрво, мый лоис. Видзӧдліс, сы дорын некод эз вӧв.

А Ануш пуксис туй бокӧ, пӧрччис шуйга коксьыс туфлисӧ, пыркӧдіс да бӧр кӧмаліс. Сэсся бӧр котӧрӧн локтіс Ангелина дорӧ.

— На, горш кӧин, ачыд жӧрит, — синва сорӧн горӧдіс Ануш да шыбитіс Ангелиналы кок улас ӧнтая кык кампетсӧ, да котӧрӧн бӧр мӧдӧдчис гортланьыс.

— Эй, нывка! Анечка! — горӧдіс Ангелина. — Тэ кытчӧ?

— Тэ... Тэ... Тэ абу Павел Иванович дедлӧн ныв... Сылӧн нылыс абу тэ кодь... Абу!..

— Эй, пӧръячка! Лок, мися, татчӧ! — лёкысь горзіс Ангелина. Но вӧлі сёр нин.

— Тэ ачыд пӧръячка. Дай горш кӧин!.. — ылысянькодь нин горӧдіс Ануш. — Тэ абу дедлӧн ныв! На тэныд! — петкӧдліс кывсӧ да котӧрӧн мӧдӧдчис гортланьыс.

Ангелина шемӧс сулаліс туй шӧрас ӧтнасӧн.