ЫЛІ ТУЙӦ ПЕТІГӦН
Митипер дядь локтіс удж вылысь, коскӧдзыс пӧрччысис, пачсьыс кӧшӧн петкӧдіс дэбыд ва да майтӧгӧн мыськис сьӧдасьӧм кияссӧ. Кисӧ косӧдӧм бӧрын ветліс юкмӧс дорӧ, вайис сэтысь кӧдзыд ва ведра да кисьтіс мыссян дозъяс. Первой мыськис чужӧмсӧ, сэсся упкигтыр зыраліс кӧдзыд ванас сьылісӧ, морӧссӧ, кытчӧдз судзис мышкусӧ. Пыр жӧ быттьӧ лӧсьыдджык лои, а то ывлаыс жар и мастерскӧйын жар, лолавны нинӧмӧн. Важӧн нин татшӧм жар гожӧм помыс эз вӧвлы. Во дас нин сійӧ механикалӧ совхоз мастерскӧйын, но татшӧм жар поводдясӧ оз помнит. Мыссьӧм бӧрас пукалыштіс кильчӧ лабичын да вӧлисти пырис керкаас.
— Но и жар талун. Тӧрытъя дорысь, буракӧ, жарджык, — пыригмозыс шуис сійӧ.
— Пӧжӧ тай. Вермас шерӧн зэрны, — шыасис гӧтырыс.
— Шер не шер, а татшӧм кӧ лун-мӧд ещӧ лоӧ, ставсӧ косьтас-сотас. Кӧдзӧм турун и то лёбзьӧма.
Митиперлӧн Ӧлдӧтья гӧтырыс, не арлыд сертиыс пӧрысьмӧм чужӧма, но визув на баб, пукаліс шӧр ӧшинь дорас лабичын да дӧмис верӧсыслы дӧрӧм.
Кор помаліс, пыртіс дӧрӧмсӧ комнатаас, сюйис шкапӧ, а пызан вывсьыс петкӧдіс письмӧ.
— Со письмӧ вайисны. Челядьсяньыд, кӧнкӧ. Поштальон Ӧгаш висьталіс, Москвасянь пӧ, — гарыштіс Ӧлдӧтья да письмӧсӧ пуктіс пызан вылас. Митипер дядь зеркалӧ водзын сынасис, сэсся пыркнитіс дӧрӧмсӧ да матыстчис пызан дорас. Сэні нюжӧдліс кисӧ да судзӧдіс пельӧс джаджсьыс ӧчкисӧ, лолыштіс сы вылӧ да дӧрӧм бӧжнас чышкаліс стеклӧяссӧ да вӧлисти пуксис пызан сайӧ. Тэрмасьтӧг восьтіс письмӧсӧ да заводитіс лыддьыны. Лыддис ас кежсьыс, корсюрӧ мыйкӧ шӧпкӧдаліс вомгорулас, письмӧыс, буракӧ, эз гажӧд Митиперӧс, чужӧмыс сылӧн вочасӧн зумышмис, плешкас лоисны содтӧд чукыръяс.
Гӧтырыс сулаліс сы дорын да синсӧ вештывтӧг видзӧдіс верӧсыс вылӧ. Сійӧ, дерт, пыр жӧ казяліс, кыдзи вежсис верӧсыслӧн чужӧмыс, да сэк жӧ думыштіс: мыйкӧ челядькӧд неладнӧ. Юавны нинӧм эз юав, но тӧждысяна виччысис, мый висьталас Митипер.
А Митипер помаліс лыддьыны, босьтіс ӧчкисӧ да письмӧыскӧд тшӧтш пуктіс пызан вылас.
— Мый нӧ вомад ва босьтін? — эз вермы терпитны Ӧлдӧтья.
— Натальыд гижӧ, — шуыштіс Митипер, сэсся бӧр ӧчкиасис да кутіс лыддьыны письмӧсӧ мӧд пӧв.
— Да мый нинӧм он шу? — горӧдіс Ӧлдӧтья. — Лыддьы вай гораа...
— Мый лыддьынысӧ? — Митипер ышловзис. — Свадьба кежлӧ лӧсьӧдчы. Пиыд пӧ гӧтрасьны кӧсйӧ. Натальыд корӧ волыны Москваас.
Ӧлдӧтья тайӧ юӧрысь шогӧ эз усь. Сійӧ важӧн нин думайтіс, мый пиыслы кад нин гӧтрасьны, семья лӧсьӧдны. Гӧтыртӧг олӧмыд — абу олӧм, да ещӧ учёнӧй мортлы. Быдтор вермас лоны. Слабог, абу нин том, таво выль во бӧрын кызь кӧкъямыс нин талялас. Институт помалӧм бӧрас Москваӧ колисны, кутшӧмкӧ кандидат нин пӧ... Весиг ичӧт чойсӧ, Наташаӧс, нуӧдіс ас дорас велӧдчыны. Регыд нин сійӧ институт помалас. Сідзкӧ, слабог, ставыс лючки-ладнӧ. Мыйла сылы не гӧтрасьны? Самӧй кад, а то сідзи и вермас пӧрысьмыны.
— А тэ мый шогӧ усин? Али абу рад? — Ӧлдӧтья сюся видзӧдліс шӧйӧвошӧм верӧс вылӧ.
— Мыйла абу рад, шуан? Ме думысь, водз на радлынысӧ. Натальыдлы невестаыс зэв абу кажитчӧма. Сы вӧсна и корӧ, мед торкны свадьбасӧ.
— Мый сійӧ гӧгӧрвоӧ?! Ачыс на челядь мывкыда. Юрас тӧв шутьлялӧ...
— Сідзтӧ, гашкӧ, и сідз. Но зэв нин ёна кулитӧ невестасӧ.
Сэки и Ӧлдӧтья зумыштчис, но век жӧ шуис:
— А тэ лыддьы, лыддьы письмӧсӧ, мый пыксян?
— «Лыддьы, лыддьы!» На, ачыд лыддьы, колӧкӧ, — босьтіс письмӧсӧ да вештіс гӧтырыслань. — Ачыс учёнӧй, кандидат, а невестаыс пӧ кокни мывкыда. Уджалӧ пӧ ресторанын официанткаӧн... Ноко, вайлы письмӧсӧ, — нюжӧдіс веськыд кисӧ Митипер. — Со тай гижӧ: «Ӧтчыд Витя нуӧдліс менӧ ресторанас ужнайтны. Кор волас гортӧ, оз сэтшӧма веглясь. А сэні? Быдӧнлы нюмъялӧ, копрасьӧ, веглясьӧ. Мавтчӧма да пудритчӧма сідзи, быттьӧ маскаа. Ме кымынысь шулі Витяыдлы, мый татшӧм кикимора вылас он жӧ гӧтрась. А сійӧ сӧмын сералӧ. Оз кывзысь менсьым. Волӧй татчӧ да ӧлӧдӧй сійӧс, мед оз гӧтрась сы вылӧ, а то сёр лоӧ. ЗАГС-ӧ шыӧдчӧм нин сетӧмаӧсь. Ачыс тіянлы нинӧм оз гиж, кӧнкӧ, сӧмын свадьба вылас корас...»
Ӧлдӧтьялӧн доршасис синваыс. Сійӧ босьтіс киас письмӧсӧ, но лыддьыны эз кут, бӧр пуктіс пызан вылас, а ачыс ыджыда ышловзис:
—Сідзкӧ, невестасӧ абу ас сертиыс бӧрйӧма.
— Гашкӧ и. Нинӧм, юртӧ эн ӧшӧд, — Митипер видзӧдліс вылӧ. — Мый нӧ? Ветлам али мый? Натальыд тай корӧ. Витя пиыд эськӧ оз кор да. Татшӧм гын юрыд... Учёнӧй лоӧма... Быттьӧ ми сійӧс эг быдтӧй да велӧдӧй, — аслыс ныр улас броткис Митипер дядь, сэсся пуксис лабичас ӧшинь дорас да кутіс ротшйӧдлыны чуньяссӧ, — кор скӧралӧ, век сійӧ тадзи вӧчӧ.
Кор неуна такалыштісны юӧрсьыс, гозъя пуксисны орччӧн да кутісны гадайтны: мунны али не мунны?! Первой ӧтвылысь видісны писӧ, мый ӧтдортчис гортсьыс, бать-мамсьыс. Квайт во чӧжӧн ӧтчыд на воліс гортас, да и то тшук кежлӧ, быттьӧ эз отпускын вӧв, а командировкаын. Збыль ӧмӧй налӧн пиыс, вежӧра морт, учёнӧй, босьтӧ гӧтырнас шогмытӧм нылӧс? Видыштісны и Наталь нывсӧ: гашкӧ, сійӧ эз ставсӧ бура тӧдмав да прӧста суклясис-гижис?! Да ӧд бара кӧ думыштлыны, сійӧ вокыслӧн шудыслы паныд эз сувт?! Мый вӧчны? Бать-мамныд — бать-мам на и эм. Кӧть мый эз ло, гозъя шуисны ветлыны видлыны чоя-вокаӧс. Майбыр, кадыс эм, картупель босьтны оз на ков.
Ыджыд карын чоя-вока олісны ӧтлаын, Витя квартираын. Нинӧм, оз вошны. Ӧлдӧтья тьӧт кӧть и райцентрысь ылӧджык некытчӧ эз на ветлы, зато Митипер дядь война дырйи уналаын вӧлі, весиг граница сайын, во-мӧд сайын пи ордас гӧститіс Москваын и.
Ӧні кыкнанныс пукалісны чӧла да думайтісны, мый вӧчны. Шуны кӧ нин веськыда, кыкнанныслӧн гудрасис сьӧлӧмыс, кыкнанныслы неокота вӧлі вӧрзьӧдчыны гортсьыс.
— Митипер, шу мыйкӧ. Мый он сёрнит? Ковмас ӧд, буракӧ, ветлыны, али эновтчам? — дыр чӧв олӧм бӧрын шыасис Ӧлдӧтья, а ачыс друг думыштіс: кутшӧм страшнӧ лоӧ ыджыд карад да ещӧ Наталья шуӧ, мый ковмас пӧ мунны пыді му пытшті — метроӧн...
Митипер дыр нинӧм эз шу. Пызан вывсьыс сійӧ босьтіс письмӧсӧ, бӧр сюйис конверт пытшкас, сӧмын сӧдзӧдіс:
— Думайт, эн думайт. Рӧднӧй челядь ӧд... — сэсся бергӧдчис гӧтырыслань да содтіс: — А тэ, Ӧлдӧть, думыштлы, мый босьтны гӧснеч пыддиыс. Куш киӧн он мун.
— Мый и босьтнысӧ? Сэні, майбыр, кӧнкӧ, быдтор эм, абу миян лавкаын моз — картупельтӧ да шома капустатӧ он ну. Сераласны. Чери-яйыд сэні, пӧди, тырмӧ, сёйӧны мыльсавтӧдзыс.
— А тэ вот чери-яйсӧ и лӧсьӧд. Час, ме кайла лӧскӧ да бурджык кос яй кусӧкъяс бӧръя. А тэ лэччыв кӧбрегад да бӧрйы бӧръя кыйӧмсьыс гырысьджык черияс, аски водзджык чеччы да пӧжасьышт. Рыська шаньга, сӧчӧн, черинянь. Суткинад оз тшыксьы. А тэ шуан, «картупель да капуста». Куш киӧн, аканьӧй, оз позь. Гортса гӧснечыд медся на любӧ: сійӧ бать-мам керкаысь, кӧні найӧ чужисны да быдмисны. Мед найӧ уськӧдасны тӧд вылас, кӧні налӧн эм бать-мам, рӧднӧй горт... Вот сідз. А тэ шуан... — Митипер чеччис да лӧсьӧдыштіс дӧрӧмсӧ: — Тэ, Ӧлдӧтья, лӧсьӧдчы, а ме ветла управляющӧй дорӧ, вӧзйыся вежон кежлӧ. Да и колӧ тӧдмавны, кутшӧм машинаяс аски карас лэччӧны.
Няньшом гудралӧм бӧрын Ӧлдӧтья пырис комнатаас, восьтіс платтьӧ видзан шкапсӧ да кутіс думайтны, мый эськӧ сылы пасьтавны. Гортад кӧть мый пасьтав, некод оз дивит, некод нинӧм оз шу, — да и коді кутас видзӧдны старикъяс вылӧ. А Москваад, челядь дорад, — дзик мӧд делӧ, лёк паськӧмӧн сэтчӧ он мун. Да и челядьыс дивитасны. Налы лоӧ яндзим, лёка кӧ пасьтасям: шуасны, паськӧм пӧ тіянлы ньӧбалам-ньӧбалам, а онӧ новлӧй. Аслыс перйис шкапсьыс вӧсньыдик еджыд шерстянӧй ковта да кельыдлӧз платье-сарапан. Митиперлы перйис руд костюм да дженьыд соска еджыд дӧрӧм, идзас шляпа да сандалет-туфли.
Ӧлдӧтья сэсся петаліс соседка ордас, корис сійӧс ветлігкостіыс вердыштавны порсьсӧ да видзӧдлывлыны град йӧрас, мед кӧзаяс сэтчӧ оз пырны. А кор локтіс гортас, Митипер гортын нин вӧлі. Тэрыба лӧсьӧдыштіс ужын, но кыкнанныслы, буракӧ, сёяныс эз пыр горшас, сідзи и нинӧм эз сёйны. Митипер юис сӧмын стӧкан чай. Водісны узьны, но Митипер бӧр чеччис: оз узьсьы. Сійӧ ветлӧдліс керкаӧдыс местаысь местаӧ, сэсся пуксис ӧшинь дорас да пинжак морӧсас ӧшӧдіс орденъяс да медальяс. Сэсся кутіс думайтны, кыдзи кутас сёрнитны пиыскӧд.
Аски асывнас, кыдзи и сёрнитчисны, ӧшинь улас сувтіс ыджыд машина, кодӧн карысь ваялӧны совхозлы удобрениеяс. Шоферыс, Юркин Федя, ар комына шутлив морт, петіс кабинасьыс да улӧдз копыртчыліс пассажиръяслы:
— Никифор Иванович да Авдотья Петровна, сьӧлӧмсянь кора пуксьыны таксиӧ. Ме тіянӧс часӧн лэччӧда вокзал дорӧдз, мед ті онӧ сёрмӧй поезд вылас. — Старикъяслысь чемодансӧ ӧкуратнӧя пуктіс кузовас, а асьнысӧ тшӧктіс пуксьыны кабинаас да сумкасӧ босьтны сьӧрсьыс. Федя варов морт, мукӧдъяс моз эз немӧяв, мунігад сыкӧд гажтӧмыд оз босьт.
— Но, мӧдӧдчим!.. — вӧрзьӧдчигас горӧдіс сійӧ, сэсся юрсӧ бергӧдліс Митиперлань да горӧдіс: «Мыйта орденыс да медальыс тэнад, Митипер дядь!..»
Митипер чӧв оліс, а Федя эз лэдзчысь, бара шыасис:
— Мый, Иванович, Витяыд пӧ гӧтрасьӧ? — сэсся быттьӧ ачыс жӧ вочавидзис: — Бу-ур... Важӧн нин кад, — Федя бура тӧдіс Витяӧс. Сӧмын кык арӧсӧн ыджыдджык сыысь. Найӧ быдмисны пӧшти ӧтлаын, костас кык во и эм, но век жӧ юаліс, быттьӧ оз тӧд: — Кымын арӧс нин сылы?
— Тӧвнас, Выль во бӧрас, тырас кызь кӧкъямыс.
— А меным кор вӧлі сы мындаыс, менам кык челядь нин вӧлі. Кад нин, ка-ад, — нюжӧдіс шофёр, сэсся друг содтіс: — Ми Ленакӧд коймӧдӧс нин виччысям, — Федя ӧзтіс папирос, но сёрни эз дугӧдлы:
— Регыд том бабаыс сылы пи ваяс. Бара праздник. Бара ковмас тіянлы ветлыны внуктӧ видзӧдлыны, — сэсся папироссӧ мыйлакӧ бӧр шыбитіс да кутіс ошйысьны.
— Хм... Менам вот ичӧтджыкыс сэтшӧм быдмӧ. Лукав и, мудер и. Век ыждалӧ да мыйкӧ корӧ, — то мыйкӧ сет сылы, то вай, то мыччы. Мамыс дзик матӧ воис. Быдмас да, буракӧ, начальникӧн лоас.
— Гашкӧ, — жугыля вочавидзис Митипер. — Челядьыд тай век бать-мам вылас мунӧны.
— Дугды, Митипер дядь, — эз сӧгласитчы Федя. — Ме бара сы кодь эг вӧв. Кыдз нӧ сійӧ бать-мамлысь не кывзысьны?
Машина петіс сиктысь. Асфальтируйтӧм туйыслӧн ӧтар-мӧдар бокас шылькнитчӧмаӧсь муяс. Ӧтарас, лун бокас, кӧдзӧма турун, мӧдарас — пуктӧма картупель.
«О, господи! Мый бара ӧні вӧчсьӧ муяс вылас?!» — думайтіс Митипер, а сэсся, быттьӧ важсӧ казьтыліг, негораа шуис:
—
Машина журӧдіс водзӧ. Федя мыйкӧ кӧсйис шуны, но эз лысьт торкны Митипер дядьӧс, сиктын сійӧс ставӧн уважайтісны.
— Сідзтӧ сідз, но нинӧм он вӧч! Ӧні ставсӧ машина вӧчӧ, — век жӧ шыасис Федя. — А йӧзыс мый? Пенсия — закон серти, сідзкӧ законнӧя шойччӧны.
— Сійӧ и эм, мый ставсӧ машина. Ме абу паныд машинаыдлы. Кыті да кор позьӧ, колӧ, дерт, машинаӧн. Тэ вот быд лун карысь кыскасян. А тэ вот коркӧ лэччыв да видзӧдлы, кыдзи тракторыд ытшкӧ да кыдзи бокӧвӧй йӧзыд уджалӧны. Сідз вот. А шойччыны? Мед шойччӧны, кор уджыс абу. Войдӧр крестьяниныс шойччыліс сэки, кор туруныс вӧлі зорӧдын да няньыс йӧртӧдын.
Ӧлдӧтья тувкис верӧсыслы бокас: эн пӧ сӧр-из нем абусӧ. А аслас, коньӧрлӧн, плешкас чепӧссьӧма пӧсь, кинас кутчысьӧма кынӧмас. Кор шоссесӧ кыкнанладорсяньыс топӧдіс вӧр, Ӧлдӧтья яндысьӧмӧн видзӧдліс Федя вылӧ да корис сувтӧдлыны машинасӧ.
— Мый нӧ он висьтав, ме эськӧ важӧн сувті! — шыасис шофер, кежис дзик туй бокас да личкис тормоз вылас. Машина сувтіс.
— Вай, тьӧтка, пырав вӧрас, видзӧдлы, эм-ӧ таво тшак-вотӧсыс?
— Кынӧмыс топӧдӧма, коньӧрӧс,.. — Митипер жалитыштіс гӧтырсӧ.
Кор Ӧлдӧтья бӧр локтіс да пуксис машинаас, чужӧмнас оз нин сэтшӧма чукрась, вӧлі гажаджык. Федя лэптыліс шуйга кисӧ, видзӧдліс часі вылас да мӧдӧдчис водзӧ. Ӧлдӧтья весиг повзискодь: друг да Федя сёрмас сы вӧсна, оз удит босьтны грузсӧ. Митипер пукаліс чӧла да мыйкӧ, буракӧ, чорыда думайтіс. Корсюрӧ шочиника видзӧдлывліс гӧтырыс вылӧ да думнас жалитіс сійӧс: «Гашкӧ, эз ков вӧрзьыны места вылысь?! Коньӧрӧй мучитчӧ кынӧмнас, да ещӧ майшасьӧ челядьыс вӧсна. Сылы, майбыр, быдтор жӧ сюрлі. Мед кӧть эз вӧв война вылын, а быдсямасӧ жӧ аддзыліс, быдторсӧ нуис ас вывтіыс. Мужикъястӧгыд медся сьӧкыд уджъяссӧ ковмис вӧчны. Ставсӧ терпитіс, да война бӧрын сылы, Митиперлы, ныла-пиаӧс козьналіс. Сӧмын вот ӧбиднӧ, мый найӧ ӧтдортчисны гортсьыс, эновтісны пӧрысь бать-мамсӧ. Но ладнӧ, Витя мед эз лок, сійӧ ыджыд мортӧн лои. А мӧдыс? Нылыс велӧдчӧ учителявны да оз и думайт гортӧ локны. Быттьӧ миян сиктын оз позь учителявны.
Митипер пукаліс да ышлолаліс: «Кутшӧм бес менӧ вӧрзьӧдіс гортысь? Быттьӧкӧ на локтӧм бӧрын Витя вежас ассьыс думсӧ. Эк, пӧрысь нин да век на йӧй. Том дырйи ми быттьӧ бурджыкӧсь вӧлім, ёна кывзысьлім бать-мамлысь. Свадьба вылӧ кӧ эськӧ корисны, сійӧ мӧд делӧ...»
Сійӧ дась вӧлі сувтӧдны машинасӧ, бӧр подӧн бергӧдчыны гортас. Но ӧні кысь нин! Со тыдалӧны нин кузь трубаяс, джуджыд керкаяс, вот-вот карӧ воам. Ӧлдӧтья, коньӧрушкоӧй, инас эз ӧшйы, чужӧмыс вежыньтчӧма, бара, буракӧ, кынӧмсӧ топӧдіс. Думнас Митипер моз жӧ каитчис, мый весьшӧрӧ вӧрзис гортсьыс. Мыйла сэтчӧ та ылнасӧ кыссьыны, эз ӧд свадьба вылӧ корны?! Витя всё равно оз кывзысь налысь, вӧчас ас ногыс, невестасӧ кӧ любитӧ. Виччысь сӧмын! Да и кыдзи дивитан найӧс, кор ми асьным сэтшӧмӧсь вӧлім. Митипер сайӧ менӧ бать вӧлі оз сет, да ме ӧти платье кежысь сы дінӧ ачым муні. Бӧрын нин ставыс ладмис. Слабог, бура олім, ньӧти ог каитчы. Гашкӧ, и Витя шуда лоӧ.
Федя друг сувтӧдіс машинасӧ. Асланыс думъясӧ вӧйтчиг, найӧ эз и тӧдлыны, кыдзи Федя вайӧдіс найӧс кӧрт туй вокзал дорӧ. Вокзалбердса площадь вылын сулалісны уна машинаяс.
Федя петіс кабинасьыс, муніс мӧдарас, восьтіс Митипер гозъялы ӧдзӧссӧ.
— Воимӧй, соседъяс. Извинитӧй, ӧні тэрмася. — Сэсся кузовсьыс босьтіс да муас пуктіс чемодансӧ. — Миян складыс тані матын. Поездыс дыркодь на оз мун. Ме грузитча да бӧр татчӧ локта, пуксьӧда тіянӧс вагонас, колльӧда.
Федя муніс, а Митипер гозъя пырисны вокзалӧ. Ӧлдӧтья чукрасис да гӧгӧр видзӧдаліс: корсис закод. Митипер, дерт, пыр жӧ гӧгӧрвоис гӧтырыслысь майшасьӧмсӧ да нуӧдіс залсьыс туалетӧ. Сэсся бӧр локтіс залас да кутіс видзӧдавны поездъяслысь ветлан расписаниесӧ, сэсся сувтіс ӧчередьӧ. Касса дорын ӧчередьыс вӧлі вель ыджыд.
Митипер чуймӧмӧн видзӧдліс ӧчередь вылӧ: «Кытчӧ да мыйла та мында йӧзыс быд лун мунӧны? Гашкӧ, ми моз жӧ челядьныс дінӧ?..»
Ӧчередьын сулалігас бара юрас вирдыштіс: «Мыйла эськӧ ми мунам?! Пӧрысь выжыв жӧ нин, буракӧ, ме, —видыштіс асьсӧ. — Да мед гӧтрасьӧ сы вылӧ, коді сылы кажитчӧ. Кутшӧм нӧ ми сылы велӧдысьяс. Миянлы ӧд сыкӧд не овны?! Натальлы кӧ оз кажитчы, сійӧ нинӧм на оз висьтав. Кутшӧм сылы делӧ вок дорӧдзыс? Да и ми асьным мый сылы шуам? Кыдзи сійӧс велӧдны кутам? Тешкодь артмӧ и ставыс! Велӧдны, велӧдны! Миянӧс коркӧ велӧдлісны жӧ, но вӧчлім ас ногӧн».
Митипер друг петіс ӧчередьсьыс, пуксис тыртӧм скамья вылӧ да, гӧтырсӧ виччысигмоз, кутіс асьсӧ такӧдны: «Збыль ӧд, Витя дорӧ ӧні мунны нинӧмла. Абу ичӧт, ачыс тӧдӧ, мый вӧчны! Корис кӧ эськӧ свадьба вылӧ, — быть мун. Он мун сэки — оз ло лӧсьыд! А ӧні мӧд делӧ. Кор на ещӧ свадьбаыс лоас? Лоас кӧ вообще?» Сэсся думнас бара асьсӧ кутіс видны: «Пӧрысь йӧй, пӧрысь йӧй! Мыйла ме тадзи гортын эг куж думыштны? Коді менӧ вӧтліс гортысь! Эк, сісь юр!»
Кор локтіс Ӧлдӧтья, шуис сылы, мый билетъяссӧ оз кӧсйы босьтны. Сэсся варовитісны вель дыр, тыдалӧ, эскӧдіс гӧтырсӧ, мыйла оз босьт билетъяссӧ. Гӧтырыслы нимкодь лои, весиг чужӧмыс шыляліс: сылы муннысӧ неокота жӧ вӧлі. Сӧмын юрсӧ довкйӧдліс да шуаліс:
— Сё збыль, вернӧ, вернӧ. Кутшӧм ми, кос шегъяс, ӧнія том йӧзӧс велӧдысьяс. Слабог, мед гӧтрасьӧ. Сылы овны гӧтырыскӧд, а не миянлы. Мед олӧны. Сӧмын вот Натальыд жаль, бӧрдӧ кӧ.
—
Митипер босьтіс чемодансӧ, а гӧтырыслы сетіс сумкасӧ, да петісны ывлаӧ. Пыран кильчӧсянь неылӧ пуксисны скамья вылӧ да Федяӧс виччысигмоз заводитісны нуръясьны пӧжас няньӧн.
