КУЗЬ НАДЕЯ

Автобус сувтланінӧ Катерина эз чеччы, а корис шофёрсӧ лэччӧдны чой горув, аслас грездӧ кежан туй весьтӧдз. Таті гортӧдзыс кык пӧв матын. Тракторнӧй туй первой муныштӧ вӧрті, сэсся вӧр дортіыс кайӧ нӧрысӧ. Сысянь тыдалӧ нин сылӧн Кулига грездыс да и аслас керкаыс.

Автобус сувтыштліс индӧм местаӧ. Томиник тӧдтӧм нывбаба отсаліс Катериналы петкӧдны кӧлуйсӧ. Катерина аттьӧаліс шоферсӧ да петіс машинаысь. Автобус мӧдӧдчис водзӧ.

Нывбаба гӧгӧр видзӧдліс: муыс заводитӧма вежӧдны, пуяс вылын заводитӧмаӧсь мыччысявны коръяс. Катерина неуна сулыштіс, сэсся волысаліс нопсӧ, киясас босьтіс тыра сумкаяс да ньӧжйӧник мӧдіс катовтны тӧдса туй кузя. Тайӧ туйӧдыс совхоз ваяліс тӧвнас тракторӧн Мизин ю дорысь турун. Ӧні туйыслӧн джуджыд кӧлеяясас пукаліс гудыр ва. Катерина ньӧжйӧ восьлаліс туй шӧрӧдыс да думнас радліс, мый бара воис ас гортас, мый карса олӧмыс коли бӧрӧ, мый водзын тані быдса тулыс, гожӧм дай ар. Сылы вӧлі нимкодь, мый бара аддзӧ важысянь тӧдса местаяс. Кымынысь сійӧ ветліс тайӧ туйӧдыс то видз вылӧ, то ягӧ вотчыны? Нимкодь сыысь, мый аддзысяс аслас грездса тӧдсаяскӧд, кодъяс, дерт нин, кутасны юасьны карын олӧм-вылӧм йылысь. Таво Катерина первойысь тӧвсӧ колляліс карын ныв ордас, коді кольӧм ар мырдӧн сорӧн лэччӧдіс сійӧс. Да и Татьяна нылыс вӧлі и ӧні оз лэдз локны гортас, ов пӧ тані, мый пӧ сэні кузь гожӧмнас кутан вӧчны?.. Но Катерина эз сӧгласитчы, кӧть и нылыс эскӧдіс быд ног. Гашкӧ, бур ногӧн кӧ и колӧ вӧлі сӧгласитчыны сыкӧд: ӧд карад олігӧн пес ни ва оз ков пыртлыны, ставыс дась. Но мыйӧн шондіыс катовтчис тулыслань да пӧльыштавны кутіс небыд лун тӧв, Катерина эз кут ӧшйыны инас, сьӧлӧмыс кыскӧ сиктӧ, гортас и ставыс...

Вӧрыс помасис. Катерина сувтіс шойччыштны, пыдісянь лолыштіс. О, енмӧй, енмӧй! Кӧні ещӧ вермас лоны татшӧм сӧстӧм сынӧдыс? Лолыштан, да кӧдзыд ключ ва моз сынӧдыс став мудзтӧ вештӧ, вын-эбӧстӧ содтӧ!

Катерина видзӧдліс туй бокті нюжалысь вӧр вылӧ, сэсся бергӧдчис бӧрлань. Сэні, шоссе вылын, кылӧ, век журъялісны машинаяс. Здук мысти бӧр волысаліс нопсӧ, босьтіс сумкаяссӧ да мӧдӧдчис водзӧ. «Кая нӧрыс йылӧдзыс и тыдовтчас керкаӧй», — думыштіс сійӧ да нюмъёвтіс аслыс... Друг ас бӧрвывсьыс кыліс пошкӧм. «Коді тайӧ вӧтӧдӧ менӧ?» — думыштіс, сэсся друг бергӧдчис. Сійӧс вӧтӧдіс ыджыд сьӧд пон. Кор сійӧ дзикӧдз матыстчис Катерина дорӧ, гораа увӧстіс да пельяссӧ топӧдӧмӧн кутіс никсыны. Понйыс тӧдіс нывбабаӧс. «О, господи!.. Тайӧ тэ, Парма? Ай-ай, кутшӧма менӧ повзьӧдін! Ме чайті нин, мися, кӧинъяс вӧтчӧны. Ай да Парма! Мый нӧ ӧтнадӧн ветлан? Кӧні кӧзяиныд?» — малаліс понсӧ да сёрнитіс сыкӧд Катерина.

— Кыдзи кӧні? Со нӧ ме! — шыасис олӧма мужик, Катериналӧн соседыс, Иван Кириллович, сиктса ногӧн кӧ, Кирӧ Иван. — Видзӧда, кодкӧ катовтӧ миян Кулигалань. Ме и ӧддзӧді воськовъясӧс. Ме эг думайт, мый тайӧ тэ, Катерина Ивановна...

— Ме, ме... Со кысся-локта. Кодкӧ тай век кыскӧ гортладорад. А тэ, сосед, кысянь локтан? Кытчӧ нин ветлін?

Иван Кириллович пуктіс туй бокас сумкасӧ, кытысянь тыдалісны чер вороп да ножовка йыв.

— Ветлі важ мельнича дорӧ. Таво скӧтсӧ кӧсйӧны видзны гожӧмбыд Мизин сайын. Ӧні лысьтысянінсӧ дзоньтышталім. Гортӧ локтігӧн нин видлі вуграсьны, но оз сёй, ӧти чери эз дэбнитлы. Сьӧлышті да гортлань веськӧдчи. А тэ мый? Кысянь? Гӧститны али пыр кежлӧ?

— Ог тӧд, кыдзи-мый лоас, — сідз-тадз шуис Катерина. — Локта со тай-а...

— Бур, бур, мый локтан. Меным гажаджык лоӧ. А то миян Кулиганым пӧшти тыртӧммис. Кодӧс креста деревняӧ катӧдӧны, коді мунӧ сиктысь... Но, а тэ ачыд мый? Кутшӧмджык нин карас олӧм-вылӧмыс?

— Кутшӧм?.. Олӧны тай. Оз позь норасьны. Татьяналӧн патераыс ыджыд, куим жыръя. Ныла-пиаӧс быдтӧ. Пиыс таво школаӧ нин мунас, а нывкаыс садикӧ ветлӧдлӧ. Борис зятьӧй — шань мужик, оз позь кулитны. Милицияын уджалӧ, — начальник кутшӧмкӧ.

— Б-ур... Зятьыд кор татчӧ волӧ, век чолӧмасьӧ, оз ыджыдӧ пуксьы.

— Оз вӧлі лэдзны локнысӧ. Шойччы пӧ тані, тырмас пӧ ноксьыны, нэм чӧжыд мырсин. Шойччыны сэні, дерт, позьӧ. Ставыс, майбыр, дась, пес и ва. Луннас сӧмын, гашкӧ, корсюрӧ лавкаӧ песок-няньла ветлан. Со и став уджыс. Ставыс нин быттьӧ эм, а быттьӧ век жӧ мыйкӧ оз тырмы, век ёнтӧ сьӧлӧмтӧ. Гажтӧм гортсьыд, кыскӧ татчӧ и ставыс.

— Дерт жӧ, — сӧгласитчис Иван Кириллович. — Аслад нянь шӧрӧмыд век на чӧскыдджык вӧлі йӧзыдлӧн пирӧг дорысь...

— Но, а тэ кыдзи олан? Кыдз здоровьеыд?

— Слабог, чер-пилаӧн вӧдитча на. Да ягтӧ на эг вунӧд, кытшовтла на корсюрӧ. Директор кодкӧ лунӧ ачыс пыраліс гортӧ, бӧр корӧ стрӧитчан бригадаӧ. Ачыс кӧ корӧ, кыдзи ӧткажитан? Корсюрӧ ветлывла, — ошйысьыштіс Иван Кириллович, сэсся сёрнисӧ друг бергӧдіс мӧдарӧ:

— Тэ, Катерина, кывлін, пӧди: менам Марья регыд и кувсис тэнад мунӧм бӧрын.

— Кывлі! Прӧсти бласлӧви сылы. Тӧвнас Игӧ Сандра пыраліс да висьталіс.

— Сідзтӧ вот. Ӧтнамӧн ӧні ола, маитча, — ышловзис Иван Кириллович.

— Мужикыдлы ӧткӧныдлы сьӧкыд, дерт, — жалитыштіс соседсӧ Катерина, а ачыс думыштіс: «Век на збодеритӧ, а воясыс личкӧмаӧсь и сійӧс. Коркӧ кутшӧм ярскӧб да збой вӧвлі... Фронт вылысь бӧр воис дзонь-здоров, весиг абу ранитчылӧма. Кыкысь нин воліс корасьны...»

— Да-а. Сьӧкыд ӧткӧныдлы да и гажтӧм...

Найӧ мыйкӧ дыра кежлӧ ланьтлісны, сулалісны чӧв, быттьӧ сёрниыс быри. Парма пукаліс на дорын да частӧ видзӧдлывліс кӧзяиныс вылӧ, виччысис сійӧс.

Иван Кириллович корсюрӧ видзӧдлывліс жӧ Катерина вылӧ да сы моз жӧ думайтіс: «Дыр-ӧ ветліс, а тӧдчымӧн пӧрысьмӧма. Ӧбиднӧ, мый сэтшӧм ӧдйӧ котӧртӧ кадыс! А том дырйиыс кутшӧм мича вӧвлі! Кодыр да кытчӧ вошӧма сылӧн мичлуныс?..» Том дырйиыс Кирӧ Вань ёна вӧтлысьліс Катя бӧрся, но том ныв матӧ эз сибӧдлы ас дорас. Ӧбиднӧ, ок кутшӧм ӧбиднӧ! А ӧні со сулалӧны орччӧн, варовитӧны, кыкнанныс ӧтмоза чусмӧмаӧсь-пӧрысьмӧмаӧсь. Войдӧр кӧ эськӧ тадзи вӧвлі?! Но сэки нинӧм эз артмы...

— Эк, Катеринушка да свет Ивановна! — Гораа ышловзис Иван Кириллович да шуйга кисӧ пуктіс Катериналы пельпом вылас.

Катерина повзьыштіскодь да кутіс тэрмасьны: тэрыба копыртчыліс, босьтіс киас нопсӧ да волысалігмоз шуис:

— Но мый, сосед? Шойччыштім и водзӧ. Тадзи сулалігад гортӧдзыд некор он во.

— Гортыд тэнад некытчӧ оз пышйы, места вылас сулалӧ, кӧзяйкасӧ виччысьӧ, — такӧдыштіс Иван Кириллович. — Вай сумкаястӧ.

— Босьтан кӧ нин, на нопсӧ босьт. Сійӧ сьӧкыдджык.

Иван Кириллович нопйыслысь ӧти волыссӧ сюйис веськыд пельпомас да мӧдӧдчис Парма понйыскӧд. Катерина на бӧрся. Туйыс кайис нӧрыс паныд. Нывбаба вӧтчис гырыся восьлалысь соседыс бӧрся да корсюрӧ удитліс на юасьны:

— Милка каньӧс ме Ӧксиньлы кольлі. Ловъя-ӧ?

— Мый сыкӧд лоас? Ловъя.

— Коньӧрӧй, менӧ, пӧди, вунӧдіс нин... А мый ещӧ выльторйыс Кулигаад?

— Мый выльыс? Торъяыс, буракӧ, нинӧм абу. Воам, да бабаяс аски ставсӧ висьталасны.

Кор воисны нӧрыс йылӧдз, пыр жӧ тыдовтчис налӧн Кулига грездыс. Мыйӧн Катерина аддзис грездсӧ да ассьыс керкасӧ, сьӧлӧмыс мӧдіс йирксьыны, кыдзи том дырйиыс мусуксӧ аддзӧм бӧрын. Мый бара мортлӧн овлӧ бурджыкыс чужан мусӧ аддзӧм дорысь?!

Нӧрыс ньылыд найӧ лэччисны тэрыба и регыд мысти найӧ вӧліны Кулигаынӧсь нин.

— Со ми и гортад воим, — шуис Иван Кириллович да сувтіс Катериналӧн важиник керка дорӧ. Туй бокас пуктіс Катериналысь нопсӧ. — Войнас ӧд пачтӧ он ломты. Гашкӧ, миянын узян? Майбыр, местаыс эм.

— Аттьӧ, муна Ӧксинь ордӧ, — вочавидзис Катерина. — Сійӧ ӧтнасӧн жӧ.

— Кыдз кӧсъян. Со менам керкаыс воча, шоныд, пачын пӧсь шыд, жаритӧм чери. Самӧвар пуктам.

— Аттьӧ, аттьӧ, Кириллович! Коркӧ мӧдысь пырала.

— Жаль, жаль. Эк, Катерина Ивановна, — ышловзис Иван Кириллович. — Век жӧ кутшӧм ӧбиднӧ, мый тэкӧд абу ӧтлаынӧсь. Весьшӧрӧ сэки ме сайӧ эн мун.

— Да мый нин важсӧ казьтывны, ылӧ кольӧмасӧ? Киссьӧм ватӧ он курав.

— Сійӧ вернӧ. Чайтлі-ӧ коркӧ ме, мый ӧтнамӧн кута овны татшӧм керкаас? — кинас ӧвтыштіс аслас керка вылӧ. — Ставсӧ аслам киӧн вӧчӧма, серӧдӧма-баситӧма. А ӧні ӧтнамлы пытшкас пырны абу окота.

Катерина нинӧм эз шу та вылӧ, сӧмын ышловзис, да мӧдӧдчис Ӧксинь дорӧ. Найӧ нэм чӧжыс пӧдругаасисны.

Иван Кириллович ньӧжйӧ-ньӧжйӧ кайис кильчӧ вылас, но керкаас пырны эз тэрмась, век видзӧдіс Катерина бӧрся, кытчӧдз сійӧ эз саяв.

Аскинас Катерина ломтыліс ыджыд пачсӧ, но овмӧдчыны сэні эз на лысьт: тӧвбыд ломтывтӧм бӧрад вермас кольмӧдны. Мыйсюрӧ вӧчис горт гӧгӧрыс да рытнас бӧр муніс узьны Ӧксинь ордӧ.

Мӧд луннас пач ломтылӧм бӧрын лунтыр идрасис: мыськаліс джоджъяссӧ кильчӧ помӧдзыс, ӧшиньясас ӧшліс занавесъяс, пыркӧдіс-тӧлӧдіс вольпасьяссӧ, лӧсьӧдіс крӧватьсӧ. Стенын бара кутіс тічкыны часі, — керкаын бӧр лои олан сер: сӧстӧм, шоныд, гажа. Милка каньыс кургис ӧшиньдорса лабичын, — сійӧ ӧні гортас дзик ӧти ловъя пемӧс.

Войдӧр Катерина видзліс мӧс, порсь, курӧгъяс, а ӧні нинӧмыс абу. Да и мый сылы, ӧтнасыслы, наысь? Аттьӧ, государство мынтӧ сылы быд тӧлысь пенсия, тырмӧ. Карса шума олӧм бӧрын керкаын лӧнь, мый важӧн нин виччысис Катерина. Корсюрӧ пыравлісны сійӧс видлыны да варовитыштны сылӧн важся соседка-пӧдругаясыс, и бара кольлі ӧтнасӧн. Но гажтӧмтчыны — эз гажтӧмтчы, сійӧ важысянь велалӧма ӧткӧн олӧмас. Да и гажтӧмтчынысӧ некор, — сиктын олігӧн уджыс век тырмӧ. Прӧстджык кадӧ, шойччигмоз, пуксьыштлас ӧшинь дорас да видзӧдӧ сӧдз ывлаас, ветлысь-мунысьяс вылӧ, журъялысь машинаяс да тракторъяс вылӧ, соседыслӧн кӧрӧбка кодь мича керка вылас да оз гӧгӧрво, — эскыны-ӧ аслыс, мый бара воис гортас, ас грездас, кӧні быд турун сі сылы тӧдса да дона. Тані абу карын кодь, а ставыс аслыссяма, мӧд нога. Частӧ-частӧ сылы дум вылас усьлӧ важыс, ылӧ бӧрӧ кольӧмаыс.

Корсюрӧ пыравліс и соседыс — Иван Кириллович, отсавліс Катериналы: то ва гоз ваяс аслас юкмӧсысь, то пес поткӧдлыштас, то ӧшинь ув потшӧссӧ дзоньталыштас, то лавкаысь нянь-песок ваяс. Катерина велаліс ли мый ли, эз нин кут сэтшӧма ӧтдортчыны сыысь. Мӧдарӧ: сы дырйи сылы вӧлі быттьӧ спокойнӧйджык. Корсюрӧ думнас весиг жалитіс сійӧс: коньӧр ӧтнасӧн жӧ коли, позьӧ гӧгӧрвоны, кутшӧмджык мужик мортыдлы ӧткӧн олӧмыс?..

Найӧ нэмсӧ вӧліны соседъясӧн, быдмисны ӧтлаын, коллялісны том кадсӧ, но Катерина некор эз радейтлы сійӧс, матӧ эз сибӧдлы ас дорас, кӧть и мӧдыс быд ногӧн лебезитіс сы водзын, зілис кыскыны ас бердас. Сідзи и нэм чӧжыс налӧн олан туйыс муніс орччӧн, а некор эз матыстчыв, кыдзи оз ӧтлаасьны додь пӧлӧз туйяс.

Иван Кириллович ӧні дзор еджыд юрсиа лабутнӧй морт, а ичӧт дырйиыс вӧлі рыжӧй юрсиа да чангыля ныра тешкодь детинка. Челядь чукӧр вӧлі мунасны мельнича дорӧ вуграсьны, и пока найӧ ноксьӧны берег дорын вугыр шатинъясӧн, сійӧ кытчӧкӧ вошлас, да регыд мысти чери тыра туисӧн нин мунӧ гортас. Ӧтчыд челядь следитісны сы бӧрся. Вӧлӧмкӧ, Сидӧр вискысь сійӧ лэптавлӧ кодлыськӧ гымгаяс. Та бӧрын челядь кутісны ӧтдортчыны сыысь. Вуграсьӧм бӧрас челядь ӧтвылысь пуӧны юква, а сійӧ некор эз партитчыв на дінӧ: пуас ӧтнасӧн, либӧ ӧтнасӧн мунас гортас. Ваня не сӧмын мудер вӧлі, но и вильыш, немторйысь эз яндысьлы. Мукӧддырйи вӧчас сэтшӧмтор, мый челядьлӧн эськӧ юрсиыс сувтіс, а сійӧ синсӧ оз лапнитлы. Школаын велӧдчигӧн нин частӧ чуймӧдліс весиг учительӧс. Ӧтчыд сійӧ сёрмис школаӧ. Учитель юалӧ: «Куликов, мыйла сёрмин?» Сійӧ яндысьтӧг крапкис: «Каколя шаньга тэчи...» Мый сэтчӧ шуан? Витӧд классын велӧдчигӧн нин математика кузя вӧлі контрольнӧй удж. Ваняыдлӧн задачаыс абу артмӧма, и тетрадяс гижӧма: «Николай Петрович! Миян Кулигаын колькйыд донтӧм. Колӧкӧ, аски вая!»

Сиктын сэки вӧлі семилетка, ШКМ-ӧн шуисны. Школасӧ помалӧм бӧрын водзӧ велӧдчыны эз мун, а батьыскӧд кутіс ветлӧдлыны вӧравны. Быдмис-сӧвмис гортас, лоис жӧникӧн. Ай-мамыс олісны бура, и ӧтка писӧ видзисны бура. Кӧть и мичлуныс сылӧн эз вӧв, но мукӧд зонъяс серти пасьтасис бура.

Война водзвылын Катерина кутіс пӧдругаясыскӧд петавлыны рытъяснас войпукны. Сиктын ныв-зон уна, накӧд гажа. Катя пыр жӧ шыбитчис Ванялы синмас: то корӧ кадриль йӧктыны, то мырдӧн вӧзйысьӧ сійӧс колльӧдны. Кӧть и пасьтасис бура, но Катялы эз кажитчы сійӧ, эз сибӧд ас дорас. И век жӧ арнас, лым пуксигӧн, Ваня ыстіс сы дорӧ корасьны. Катя, дерт, ӧткажитіс сылы, эз кӧсйы лоны Гӧрд Ваньлӧн гӧтырӧн, а бать-мамыс эз невӧлитны. Сиктса том йӧз син саяс шулісны сійӧс Гӧрд Ваньӧн.

А петіс верӧс сайӧ тракторист Федя сайӧ. Сійӧ эз вӧв на сиктысь, а тулыс-арнас уджаліс на колхозын

МТС-сянь. Он вӧлі ӧткодяв сійӧс Ванякӧд. Федя — ыджыд тушаа, шань, мича, авъя морт, мастера гудӧкасис. И со ӧні на фотокарточка вылын пукалӧ гудӧка да нюмъялігтыр видзӧдӧ Катерина вылӧ. Катерина сійӧс ёна радейтліс, но эз удайтчы налӧн шуда олӧмыс. Заводитчис война.

...Катялы корсюрӧ усьлывлӧ тӧд вылас, кыдзи Кирӧ Вань война бӧрын нин воліс корасьны мӧдысь. Ветлӧдліс сиктӧд сэки тшапа, тӧдіс, мый сиктӧ ёна унджык мужикыс бӧрсӧ эз воны. Зонъяс эз вӧвны, и сійӧ быд нывлы либӧ том дӧвалы вӧлі колана мортӧн.

Катерина бура помнитіс: ӧтчыд рытнас сійӧ локтіс вартанінысь. Кильчӧ помас пӧрччис бусӧсь сапӧгъяссӧ, кайис кильчӧ вылас да пуксис лабичас. Керка ӧдзӧсыс вӧлі восьса, и кильчӧ вылӧ бура кыліс мамыслӧн да Кирӧ Ваньлӧн сёрниыс.

— А тэ сыкӧд аскӧдыс сёрнитін? — кылӧ юаліс мамыс.

— А вот ӧні и сёрнитчам. Сійӧ ӧд коркӧ йӧйталіс, эз мун ме сайӧ, а ӧні... А ӧні ӧткажитчыны сійӧ оз вермы, да и оз лысьт. Сиктын нывъяс уна, кӧть пруд прудит. Бӧрйы любӧйӧс. А ме сійӧс каганас босьта. Оз, оз ӧткажит! — эскана чорыда шуис Кирӧ Вань.

— Да, ӧні жӧникъясыд абуӧсь. Ачыд тӧдан, мыйтаӧн эз локны. Тэныд некод оз ӧткажит, радпырысь мунасны, — сӧгласитчис мамыс. — Дзонь-здоров, слабог, весиг пӧ абу ранитчылӧмыд. Шуда морт тэ вӧлӧмыд, Ваня...

— Шуда не шуда, а збыль, ме весиг эг ранитчыв. Ме жӧ бура лыйся. Аттьӧ колӧ шуны поконик батьлы. Сійӧ ичӧтысянь новлӧдліс менӧ вӧрӧ, велӧдіс бура лыйсьыны, а асьсӧ вот эз видз. Со и менӧ мӧдӧдісны запаснӧй полкӧ лыйсьыны велӧдны. Сэсся дивизионнӧй складын уджалі...

Катя пырис керкаас. Ваня эз шӧйӧвош, эз падмы: пукаліс пызан дорын. Гимнастёрка кизьяссӧ да ӧти медальсӧ сідз чиститӧма, мый найӧ син ёрмӧн дзирдалісны. Рыжӧй юрси пратьясыс лэччысьӧмаӧсь плешас. Ачыс пукаліс пызан дорын да куритчис.

— Со тэ дорӧ Ваня ыджыд могӧн локтӧма, — Катерина дорӧ небыдика шыасис мамыс.

— Кывлі, — вочавидзис Катя да муніс мыссьыны.

— И мый тэ шуан? — пырис сёрниас Ваня.

Катя майтӧгӧн мыськис кияссӧ, чужӧмсӧ, ки чышкӧдӧн бура чышкысис, зеркалӧ водзын сыналіс юрсисӧ, сэсся вӧлисти спокойнӧя шыасис:

— Ме жӧ тэд ӧтчыд висьтавлі нин. Мыйла мортыслы лов пытшкас пырны? Ме виччыся ассьым верӧсӧс, Федяӧс, буракӧ, гӧгӧрвоана ставыс. — Шуис эз сы ради, медым дӧсадитны Гӧрд Иванлы, а прӧста сійӧ эз вермы аддзыны Федя пыдди мӧд мортӧс.

Ваня, дерт, эз виччысь тайӧс. Чужӧмыс сылӧн дон гӧрдӧдіс, корана видзӧдліс Катя мам вылӧ, быттьӧ корис сысянь отсӧг. Вочасӧн скӧрыс, буракӧ, пузис, чунь рӧчнас камӧдыштіс пызан помас:

— Тэ йӧй али прӧсуж?! Да оз лок тэнад Федяыд, кылан, оз ло-ок! Тайӧ жӧ быдӧнлы гӧгӧрвоана. Похоронкаыс воис? Воис. Мый ещӧ тэд колӧ? А сійӧс ӧд прӧста оз ыставны.

— Быдторйыс овлӧ. Пуклан сиктысь тай нелямын коймӧдын похоронкаыс вӧлӧма жӧ, а ӧні пӧ ачыс локтӧма.

Мамыс ышловзис.

— Енмыс тӧдӧ, кулӧма-ӧ, ловъя-ӧ. Ловъя кӧ вӧлі, мыйла нӧ эськӧ кӧть ӧти письмӧ оз гиж? Век жӧ, буракӧ, абу нин ловъя миян дона зятьным, — сӧгласитчис сійӧ Кирӧ Ванькӧд.

Ваня чеччис. Муніс порог дорас да кутшӧмкӧ не аслас гӧлӧсӧн шуис:

— Смотри! Ачыд тӧдан. Ме сэсся кевмысьны ог кут. Коркӧ ачыд гӧгӧрвоан да сёр лоӧ. Кыдз шуласны, гырддзаыд матын, да он курччы, — сэсся зымнитіс ӧдзӧснас да тэрыба петіс керкасьыс.

— Тэ, ныланӧй, весьшӧрӧ тадз лэптысян, — дивитыштіс Катяӧс мамыс. — Кӧсъян дӧваӧн кольччыны? Ой-ой, сьӧкыд ӧд лоӧ. Уна синва ковмас лэдзны. А сыкӧд эськӧ шог он кут тӧдны... Сійӧ батьыс кодь жӧ топыд, крепыд, уджач, зіль морт. Смотри, эн ылав, эн ворссьы. Менам ӧд нэмыс овсьӧма, а тэнад ставыс на водзын.

— Да ме ог кӧсйы сы сайӧ! Неужтӧ тэ он гӧгӧрво?.. — кевмысис Катя. — Ме ичӧтысянь эг радейтлы сійӧс. Бурджык дӧваӧн кольны. Телегатӧ пӧперек он йӧткышт. — Сэсся уськӧдчис крӧвать вылас да лимзӧмӧн бӧрддзис.

...Ӧшинь ув град йӧрас Катерина пуктыштіс лук, сёркни, морковь, — арнас, мыйкӧ быдмас кӧ, внукъясыслы лоӧ гӧснечтор, Иван Кириллович отсаліс гӧрыштны участоксӧ да сэтчӧ пуктіс неуна картупель. Кулигаын олысьяслӧн усадьбаныс ыджыд, а Катерина ассьыс сдайтіс совхозлы, сӧмын горт дорас кольыштіс неуна.

Тӧдлытӧг колис тулыс. Тулыс помнас, страда вылӧ петтӧдз, сиктын век пасйисны Иван лун — рӧдительяслысь лун. Коді вермӧ, сэки ставӧн кайлӧны кладбище вылӧ рӧдвуж гуяс вылас казьтыштны паметьсӧ. Катерина ичӧтика пӧжасьыштіс жӧ да йӧзыскӧд тшӧтш кайліс бать-мам гу вылас. Рытъявылыс нин сы ордӧ пырис соседыс, Иван Кириллович. Талун сійӧ вӧлі вӧччӧма: вышивайтӧм еджыд дӧрӧма, руд костюма, юр вылас — кокньыдик идзас шляпа.

— Бур лун тэныд, Катерина! Но и жар талун, прӧстӧ пӧжӧ, — шляпанас ӧвтіс чужӧмас. — Бать-мам гу вылад кайлін? Ме тай мыйкӧ смекайті да эг аддзыв тэнӧ?

— Ме здук кежлӧ и кайлі. Татьяна челядьыскӧд кӧсйӧ вӧлі волыны да тэрмаси. Мыйкӧ тай эз локны-а...

Иван Кириллович матыстчис Катерина дорӧ да мыччис сылы целофан мешӧкын свежӧй чери.

— Тӧрыт ветлі кыйсьыны. Рытнас кӧсйи пыртны да сёр нин вӧлі, мися, узян нин. Эг лысьт садьмӧдны.

— Аттьӧ, Кириллович! Мыйла нӧ сы мындасӧ? Уна-ӧ нӧ меным ӧтнамлы колӧ?

— Нинӧм! Сёян. Ачыд гӧстьясӧс виччысян. Сэні сирпиян эмӧсь и. А ме ӧд аслым бара на кыя.

— Он кӧ тэрмась, пуксьы. Чай шонта.

— Аттьӧ, чайсьыд ог ӧткажитчы, — Иван Кириллович пуктіс шляпасӧ лабичас да витнан чуньнас шыльӧдыштіс дзугсьӧм юрсисӧ. — Ивановна, час ме петала да посводз ӧдзӧстӧ лӧсьӧдышта. Мыйкӧ сьӧкыда воссьӧ-пӧдлассьӧ. Керкаыд, буракӧ, вӧйӧ..

Иван Кириллович петаліс гортас, вайис инструмент тыра сумкасӧ да кутіс ноксьыны посводз ӧдзӧс дорын. Екатерина сэк кості керис черисӧ да скӧвӧрӧда тыр жаритіс электроплитка вылын. Пызан вылас лэптіс дзужгысь самӧвар, вайис пӧжас няньсӧ да четушка еджыд вина.

Иван Кириллович пырис керкаас, синнас кытшовтіс пызан вывсӧ да нимкодьпырысь шуис:

— Лӧсьӧдышті. Эн маитчы, ӧні ӧдзӧсыд бура воссьӧ и пӧдлассьӧ.

— Ыджыд аттьӧ тэд, Кириллович. Мун китӧ пожйышт да матыстчы пызан дорас. Чай юыштам.

Иван Кириллович мыськис кисӧ, зеркалӧ водзын сыналіс юрсисӧ да вӧлисти пуксис.

— О, тэ нин, Катерина, черитӧ удитӧмыд жаритны, — быттьӧкӧ сідз-тадз шуис, а ачыс син бӧжнас видзӧдліс четушка вылӧ.

Катерина стӧканӧ кисьтіс чай да вештыштіс гӧстьлы.

— Со, Кириллович, винасӧ кисьт румкаас да юышт. Карса гӧснеч на. Татьяна пуктӧма сумкаӧ.

Иван Кириллович падъявтӧг босьтіс сулеясӧ, восьтіс пробкасӧ да кисьтіс.

— А мӧд румкаыс нӧ кӧні? — корсис синнас пызан вылысь.

— Ме ог ю. Вай гӧститчы: пӧрӧд румкасӧ да нуръясьышт.

— Кыдз нӧ сідз? Талун ӧд неунатӧ позьӧ. Тӧдан, кутшӧм лун.

— Нинӧм, нинӧм. Юышт вай, вошйӧд менсьым бать-мамӧс да Федяӧс.

Иван Кириллович воча нинӧм эз шу, чӧв-лӧнь пӧрӧдіс румкасӧ вомас, кызӧктіс, чышкыштіс вом доръяссӧ дӧрӧм соснас да вӧлисти вилкаӧн сутшкис ёнкодь кельчи. Федяӧс казьтыштӧмыс, тыдалӧ, эз во сьӧлӧм вылас Иван Кирилловичлы, чӧв оліс, корсюрӧ видзӧдлывліс Катерина вылӧ да думайтіс: «Мый дыра олам орччӧн, а тадз кыкӧн, ӧта-мӧдлы воча, эг на пукавлӧй да сёрнитлӧй. Ок эськӧ, том дырйиыс кӧ вӧлі татшӧм рам да сёрниа?! Пӧрысьмим кыкнанным. Катеринушка, кытчӧ вошӧма тэнад мичлуныд? Мыйла да кор чусалӧмаӧсь чӧд тусь кодь лӧз синъясыд? Кытчӧ вошӧма сӧдз шабді юрсиыд, сой кызта кӧсаыд? Юрсиыд дзормӧма, шочмӧма, кӧсаыд кольӧма шыр бӧж кодь...» Да, Катерина эз нин вӧв важкодь мича, но Иван Кириллович век радейтӧмӧн видзӧдіс сы вылӧ. А вӧлі ӧд кад, кор сійӧ надейтчывліс том нывбаба вылӧ.

...Фронт вылысь воӧм бӧрын тӧлысь кымын мысти колхозын пуктісны сійӧс бригадирӧн. Кор Катерина ӧткажитіс сылы, Кирӧ Вань пыр жӧ и гӧтрасис. Сиктын вӧлі уна том ныв, но сійӧ мыйлакӧ босьтіс гӧтырнас эз нывъяс пиысь кодӧскӧ, а челядьтӧм дӧва бабаӧс, Прокӧ Марьяӧс, кодлӧн верӧсыс усьлӧма жӧ 1943 воын. Марья вӧлі Катерина кодь жӧ том, но лэчыд кывъя збой нывбаба. Сиктын сёрнитісны, мый воддза мужиксӧ пӧ сійӧ весиг нӧйтлывлӧма. Збыль-ӧ тайӧ, код тӧдас... Ваня дінын кӧть сійӧ вӧлі кукань кодь рам, Ваня эз радейт сійӧс (думсьыс век на надейтчис Катерина вылӧ), но йӧзыслы тайӧс нинӧмӧн эз петкӧдлы. Марья оліс верӧс дорас бура, кань моз кургис сы дорын, водзті моз эз горзыв, эз видчыв верӧсыс вылӧ. Да и мый сылы вӧлі видчынысӧ? Мужик сійӧ справнӧй, уджач, быдтор сяммӧ вӧчны, киыс быдлаӧ сибалӧ. Турун-пестӧ заптас сідзи, мый век вӧлі лишнӧй кольӧ. Двореч кодь выль керка лэптіс, пытшкас ставыс дзирдалӧ-югъялӧ. Но тайӧ став бур оласногсӧ быттьӧ нарошнӧ вӧлі веськӧдӧма соседкаыслы паныд.

Война бӧрын Катерина оліс сьӧкыда, тырмытӧма, да ещӧ видзис пӧрысь мамсӧ да и быдтіс Таня нывсӧ. Трудоденьяс вылӧ колхоз мынтысьліс этша, пӧшти нинӧм, а овны колӧ. Слабог, мездыліс картупель: асывнас пӧжалӧм картупель, луннас картупеля рок, рытнас кӧдзыд картупель. Да ещӧ корсюрӧ кушман. Сэтчӧ жӧ бригадир кутіс кедзовтны Катяӧс. Гӧрд Вань эз вунӧд, мый Катя кыкысь нин ӧткажитіс сылы. Ӧні, мыйӧн лоис бригадирӧн, быд ногыс зілис водзӧс босьтны сыысь, увтыртны: то турун-пестӧ вайны вӧв оз сет, то ыстӧ медся сьӧкыд удж вылас. А мыйӧн усьыштас лым, сійӧс, первойӧс, тӧвбыд кежлӧ ыстӧ ылі ягӧ вӧр лэдзны. Казьтыштны кӧ ставсӧ, мыйыс сӧмын эз вӧв?.. Катерина ставсӧ терпитіс, но эз пӧкӧритчы. Сійӧ и ачыс бура тӧдіс, мыйла сідз вӧчӧ бригадирыс, но некодлы и некытчӧ эз норасьлы.

Колины вояс, ӧбидаыс вочасӧн вуніс. Бригадир эз нин кут сэтшӧма дзескӧдны, весиг корсис удж, мед бӧр бурасьны, сибӧдчыны Катерина дорӧ. Но бригадирлӧн Марья гӧтырыс дыр на веглясис сы водзын, вежӧктіс сылы. О, енмӧй, кыдзи сӧмын эз видлы Катеринаӧс, эз вежнясьлы сы водзын. Йӧз дырйи, кӧть ӧтнасӧн медся лёк кывъяснас пинясьліс: «Тэ менам мужиккӧд узьлан, кырсалысь кань! Кӧсъян мырддьыны. Муна да синтӧ чапала...» Да, мыйыс эз вӧвлы?! Катерина и тайӧс терпитіс. Сӧмын ӧтчыд, лавка дорын йӧз дырйи, кӧсйис кракӧтьӧн сьӧлыштны ныр-вомас, но кутчысис, эз сьӧлышт, сӧмын ньӧжйӧник шуис: «Мый нӧ йӧйтӧ песан?» да муніс аслас туйӧд.

...И со ӧні вӧвлӧм бригадир (кор нин сійӧ вӧлі!) пукалӧ пызан сайын, юӧ чай-вина да варовитӧ Катеринакӧд, быттьӧ коркӧ нинӧм абу и вӧвлӧма. Да и мыйла казьтывны важ лёксӧ, ылӧ бӧрӧ кольӧмасӧ?

Иван Кириллович вомас пӧрӧдіс мӧд румка, закуситіс бура свежӧй чериӧн да видзӧдліс Катерина вылӧ.

— Пӧрысьмим, Ивановна, пӧрысьмим. Быттьӧ неважӧн на томӧсь вӧлім, а миян туйным горув нин мӧдӧдчис. Тэнад и менам челядьным карын олӧны, миянлы внукъяс быдтӧны. Да-а... Водзджык эновтіс менӧ Марьяӧй. А кӧзяйкатӧгыд кутшӧм олӧм? Кулӧм бӧрас мӧскӧс и порсьӧс сдайті совхозӧ.

— Мужик мортыдлы, дерт, скӧтнад вӧдитчыны абу кивыв: колӧ вердны-юктавны, лысьтысьны. А тэ вай чайтӧ ещӧ ю, со выльӧс кисьті, — Катерина вештыштіс сылань чай стӧкан, кор аддзис, мый четушкаыс тыртӧммис. — Тані ӧд, гортад, карад дорын и чайыс чӧскыд кӧра...

— Кӧнешнӧ, тані ӧд миян и ваыс мӧд пӧлӧс, — вочавидзис Иван Кириллович. — Менӧ ӧд пиӧй корӧ жӧ карас, да эг лэччы ни ог лэччы. Кыдзкӧ-мыйкӧ нэмӧс тані нин колляла. А тӧлыс ӧтнадыдлы кузь, — блюдйысь чайсӧ чипйӧдлігтыр варовитіс сійӧ. — Луннас вӧлі лыжиася да ягӧ кайла, брӧдитышта тӧдса местаясті. А войнас? Садьман да он и тӧд, мый вӧчны? Войыс кузь, виччысьны он вермы, кор нин югдас. А ӧні мӧд нога. Восьтан синъястӧ, видзӧдлан ӧшиньӧд, тэ нин мыйкӧ ноксян керка дорад. Весиг нимкодь.

Кыкнанныс видзӧдлісны ӧшиньӧд. Ывлаыс кымӧртчӧма, кутіс войтасьны, — таво вылӧ первойысь. Регыд мысти зэрыс ӧддзис, мӧдіс шарӧдчыны шифера керка весьтас. Найӧ чӧв олісны, асланыс думъясӧн. Сэсся Иван Кириллович пыдісянь ышловзис да негораа шыасис:

— Олӧмыс миян тэкӧд коли, Ивановна, а ме ӧнӧдз на жалита, мый том дырйиыд эн мун ме сайӧ. Вывті гордӧй вӧлін.

— Нинӧм он вӧч, сосед. Мый вӧлӧма, кольӧма.

— Тэ, Ивановна, ан скӧрмы ме вылӧ, но ме став сьӧлӧмсянь шуа: вудж ме ордӧ овнытӧ, он кут каитчыны. Аддзан, керкаӧй менам чача кодь мича, пытшкӧсас ставыс эм, — ло сэн тыр кӧзяйкаӧн, — бара корасьны заводитіс Иван Кириллович. Вина юыштӧм бӧрад варовмис: — И ныв дорад нинӧмла лэччыны. Сылӧн аслас семья. А ми кыкӧнӧсь лоам. Сьывны да йӧктыны кутам ме дорын. Деньга запасыд менам эмышт. Тэа-меалы тырмас и кольӧ на. Кутшӧм лӧсьыд эськӧ вӧлі миянлы тэкӧд. А ӧні мый, ӧтнад олан да? Ӧти пескыд и пачад чискӧ да кусӧ, а кыкыд нин югыда ломтысьӧ.

— Сідзнад, гашкӧ, и сідз, Кириллович. Ме ӧд война кадсянь нин дӧва, велалі нин ӧткӧн олӧмас а тэ, пӧди, эн и думыштлы, мый ӧтнадӧн колян.

Иван Кириллович быттьӧ эз и кывлы Катериналысь шуасьӧмсӧ, век синіс асланьыс:

— Со и ме шуа, Ивановна: эз ков миянлы ӧта-мӧдысь ӧтдортчыны, — ӧтлаын колӧ овмӧдчыны.

— Ю ещӧ, Кириллович, чайтӧ, вай кисьта. Самӧварыс век на дзужгӧ. — Катерина зілис сёрнисӧ бергӧдны мӧдарӧ.

— Аттьӧ, ог нин. Ӧткӧн олігад мукӧддырйиыс нянь кусӧкыс горшад оз пыр.

Вот тадзи коймӧдысь кораліс Иван Кириллович соседкасӧ. Коймӧдысь пукаліс ӧти и сійӧ местаын, пызан помын. Первойсӧ Катерина думнас сераліс соседсӧ, тешкодьӧн кажитчисны сылӧн кывъясыс, но кор ас кежас думыштчыліс, то ачыс кутіс эскыны: гашкӧ, соседыс прав, кыкӧннад збыльысь кокньыдджык лоӧ, гажаджык нэм помтӧ коллявны. Абу нин том, мый сылы ӧні мича верӧссьыс? Пӧрысьлуныс ӧткодяліс мичасӧ и мисьтӧмсӧ, ставнысӧ вӧчӧ пӧрысьӧн. Эз ӧд прӧста, кӧнкӧ, Таня нылыс частӧкодь сьывлы: «Красоту уносят годы, а доброту не унесут...»

Шуны кӧ нин, Иван Кирилловичлӧн мичлуныс эз и вӧвлы. И со ӧні Катерина корсюрӧ видзӧдлывлӧ паськыдкодь ныра чужӧм вылас, дженьыд чуньяса кияс вылас, и оз нин коркӧя моз кажитчы зывӧкӧн.

Пӧрысь морт — пӧрысь морт и эм, но зато век на зіль, уджач, вежӧра кӧзяин. Сыкӧд позяс нэм тӧждысьтӧг бура овны.

Катерина Ивановна ачыс вӧлі небыд сьӧлӧма нывбаба. И ӧні гортас, самӧвар дорын пукалігӧн, гортса тувсов сынӧдыс, мича да паськыд ывла вылыс, буракӧ, вӧрзьӧдісны сылысь сьӧлӧмсӧ. Татшӧм здукас сійӧ вермис и сӧгласитчыны, но век жӧ воча кыв шуны эз тэрмась. Да и шуны кӧ, велалӧма нин овны ӧтнасӧн, ас пытшкас терпитны шогсӧ и нимкодясьны шоча овлысь скуп радлуннас. Кымын во нин сійӧ дӧва, а бокӧвӧй мужикъяс вылӧ некор эз видзӧдлыв.

Иван Кириллович стӧкансӧ первой пӧрӧдіс блюдъяс, сэсся мыйлакӧ вывлань пыдӧсӧн пуктіс. Сійӧ вешйис пызан дорысь да пуксис лабичас ӧшинь дорӧ.

— Важӧн нин тадзи эг гӧститлы некод ордын. Аттьӧ ещӧ ӧтчыд. Видзӧд, кутшӧм гажа кыкӧныдлы? Мый дыра варовитім. Эк, Катерина, Катерина. А тэ вай век жӧ бурджыка думыштлы...

Туй кузя грымӧдіс прицепа «Беларусь». Иван Кириллович видзӧдліс ӧшиньӧдыс да гажтӧма шуис:

— Бара нин Пукланысь турун вайӧны куканьяслы. Совхозыслӧн бырӧма нин.

— Ог тӧд, таво кутшӧм лоӧ, а кольӧм гожӧмын поводдяыс вӧлі мича. Позьӧ вӧлі турунтӧ заптыны тырмымӧн. Ме и то кык чалькостса зорӧд сдайтлі.

— Да-а. Поводдяыс вӧлі мича. Позьӧ, дерт, вӧлі заптыны турунтӧ. Но кыдзи век миян овлӧ: уна видзьяс миян век пуктытӧг кольӧны да.

— Сідз нин, дерт, пӧди, туруныс кӧ оз тырмы, — сӧгласитчис Катерина, сэсся сёрнисӧ друг бергӧдіс мӧдарӧ, — кӧть кыдзи, а гортад век жӧ лӧсьыдджык овны, — сэсся Катерина чеччис да заводитіс пызансӧ идравны. Иван Кириллович чеччис жӧ, кӧсйис отсавны нуны залавка вылас самӧварсӧ, но Катерина эз сет:

— Мун, пуксьы. Ме ачым, ачым.

Пызансӧ идралӧм бӧрын Катерина бӧр пуксис аслас местаӧ да водзӧ нуӧдіс панӧм сёрнисӧ:

— Таня оз вӧлі лэдз татчӧ локны, а ме мырдӧн сорӧн и локті. И ог каитчы. Ӧні сьӧлӧмӧй быттьӧ бӧр ас местаас лои. Век жӧ тані, сиктад, овны спокойнӧйджык, медтыкӧ войнаяс бара эз лоны.

— Войнаыд, другӧ, кӧнкӧ некодлы оз ков, не сӧмын тэныд да меным. Ми сійӧс тӧдам. А му шар вылас ӧні шуштӧм, то ӧтилаын, то мӧдлаын ворсӧны биӧн. Видзӧдлан телевизортӧ, да мукӧддырйиыс сӧмын мыйсӧ он кывлы да аддзыв. Юрсиыд сувтӧ. А тані миян чӧв-лӧнь. Пышкай кӧ гораджыка чирӧстас, ставӧн нин кыласны... — Сэсся друг юаліс: — А тэ нӧ эськӧ мыйла он волы телевизорсӧ видзӧдны ме ордӧ. Интереснӧй кинояс овлӧны. Ме ӧд рытнас дыр ог узь.

— Татьяна тай кӧсйӧ вӧлі машинаӧн вайны ассьыныс ичӧт телевизорсӧ, да ме эг тшӧкты. Мися, меным гортад и сідз гажа лоӧ.

— Гажа, дерт. Мем и то ӧні лои гажаджык. Асывнас чеччан, видзӧдлан ӧшиньӧд: тэнад пач трубасьыд тшын петӧ, тэ ачыд ветлӧдлан-ноксян ӧшинь улад. Меным и любӧ...

Ывлаыс важӧн нин кобис, важӧн дзирдалӧ тувсов югыд да мелі шонді, ворсӧдчӧ югӧръяснас ӧшинь стеклӧясын, ва гӧпъясын. Шонді-матуш бергӧдчис нин рытыввыв, а найӧ век на пукалісны да ньӧжйӧник сёльгисны-варовитісны, кыдзи сук парма вӧрын сӧстӧм ёль. Сёрнитісны то ӧтитор йылысь, то мӧдтор йылысь, но Иван Кириллович век зілис сёрнисӧ синны аслас колана визьӧ, кыдзкӧ век жӧ кыскыны ас дорас тайӧ нывбабасӧ. «Войдӧр кӧ эз артмы, гашкӧ, ӧні артмас?!» — воис юрас ылыс надея. Сылы тані лӧсьыд, весиг гортас мунны абу окота, но мунны колӧ. Пӧра нин...

— Лӧсьыд, эськӧ, тэ ордын гӧститны да, но колӧ и кад тӧдны. Ыджыд аттьӧ, Катеринушка да свет Ивановна, ставсьыс, — джодж шӧрас жӧдзиг, аттьӧаліс кӧзяйкаӧс. — Надейтча, ӧні и ме ордӧ коркӧ пыралан, — сэсся идзас шляпасӧ пуктіс юр вылас да веськӧдчис ӧдзӧслань. Ӧдзӧс дорас сулалыштіс на да ещӧ на аттьӧаліс:

— Ещӧ аттьӧ. А тэ, соседушка, век жӧ думыштлы, мый ме тэныд висьталі. Ен могысь, он кут каитчыны.

— Кутшӧм тэ писькӧс, Кириллович... Думыштлы вай: кыдзи нӧ тэ гӧтрасян, кор Марья кулӧмсяньыс воыс на абу. Прӧста абу лӧсьыд, мый йӧзыс шуасны, — ещӧ ӧти водзсасяна визь сюри сылы. Медым не ӧбидитны соседсӧ, веськыда эз ӧткажит, а сідз-тадз шуис:

— Кадыс эм на, водзын быдса гожӧм дай ар.

— Ладнӧ, ладнӧ. Ме муні. Эн скӧрмы. Ме тэныд ставсӧ висьталі, а тэ сэсся ачыд думайт, мый вӧчны. Слабог, абу нин дас сизим арӧса. Эн дивит, пӧжалуйста, мыйкӧ кӧ эг сідз шу.

Иван Кириллович петіс. Кильчӧ помас сійӧс виччысис Парма. Сійӧ чеччис да кӧзяин водзвылын мӧдӧдчис гортланьыс. Но кӧзяиныс эз тэрмась. Зепсьыс перйис папирос пачка да заводитіс куритчыны. Куритчигмозыс сійӧ видзӧдіс пышкай пара вылӧ, кодъяс купайтчисны туйвывса ва гӧптын, сэсся кутісны тшапмӧдчыны. Иван Кириллович на вылӧ видзӧдігӧн весиг нюммуніс, сэсся аслыс негораа шуис: — Пӧжалуй, делӧыс ладмас. Гӧгӧрвоана, карас сылы мунны абу окота. И тані ӧтнасӧн овны абу кокни. Нырсӧ лэптавны оз кут.

Иван Кириллович видзӧдліс аслас керка вылӧ да ӧвтыштіс кинас, быттьӧ корис ас дорас Катеринаӧс: «Видзӧд, кутшӧм керкаӧ кӧзяйкаӧн кора...» Сійӧ ньӧжйӧник вуджис туй вомӧныс, а дзиръя дорсяньыс ещӧ ӧтчыд видзӧдліс Катерина керка вылӧ. Сэсся кайис кильчӧ вылас, но керкаас пырны эз тэрмась. Сылы талун вӧлі нимкодь, сьӧлӧм вылас долыд, гажа, кыдзи и тувсов ывла вылын.

Чой горув, тэрыба, ӧти бӧрся мӧд, котӧртісны гожся лунъяс. Иван Кириллович шоч лун эз пыравлы Катерина ордӧ: то лавкаысь нянь ваяс, то коса тӧчитыштас да лэчталас, то ытшкыштас ӧшинь ув боръяссӧ. Картупель босьтісны ӧта-мӧдыслысь ӧтвылысь, — участокъясыс важ моз абу гырысьӧсь. Этша ӧмӧй уджыс сиктса овмӧсын? Быдлаӧ колӧны кияс. Иван Кириллович корасьӧм йылысь сёрни сэсся эз нин панлы. «Арнас, кор кӧдздӧдыштас, тон тыдовтчас: оз лэччы карас, — ме ордӧ локтас», — корсюрӧ думайтліс сійӧ. А Катериналӧн юрсьыс эз жӧ петав корасьӧмыс: мый вӧчны? Веськыда кӧ шуны, карас сійӧс ньӧти эз кыскы, — сьӧлӧмыс ичӧтысянь кӧртасьӧма сиктӧ, тані оліс нэм чӧжыс. Да и абу нин том кысъясьны ӧтарӧ-мӧдарӧ. Корсюрӧ и збыльысь вирдыштлывліс мӧвп: чукӧртны кӧлуйсӧ да петны соседыс ордӧ. Майбыр, сӧмын туй вомӧн вуджны. Но век жӧ кутшӧмкӧ гуся вын кутіс вӧчны тайӧ воськовсӧ. Мыйла? Код тӧдас? Буракӧ, ӧнӧдз вунӧдны эз вермы сійӧ мортсӧ, кодӧс сьӧлӧмсяньыс радейтіс первойысь и... медбӧръяысь. Вӧлі томджык, вӧліны сьӧкыд вояс, — а ӧні?

И со уси медводдза лым. Ставыс едждіс, букыш ывлаыс югдыштіс.

Аски асывнас чукӧртіс кӧлуйсӧ, внукъясыслы гӧснеч вылӧ пӧжалыштіс шаньгаяс да петіс туйӧ. Иван Кириллович колльӧдіс сійӧс. Мунісны чӧла, сёрниттӧг, сӧмын кокъяс улас чавкакыліс лым сора няйтыс.

Кор локтісны тӧдса нӧрыс йылӧдз, Катерина сувтіс.

— Аттьӧ, Кириллович, аттьӧ. Бергӧдчы бӧр, водзӧ сэсся эн мун. Карад лэччигӧн нопйыс кокньыд. Да и сумкаын гӧснеч кындзи нинӧм абу. А картупельыдла зять волас машинаӧн.

— Да-а, — ышловзис мӧдыс, — эг чайт ме, мый бӧр мунан... Надея вӧлі... А жаль...

— Сідз нин артмис тай, — правдайтчис быттьӧ Катерина. — Да и думыштлыны кӧ, колӧ ӧд и Танялы отсыштны. Век жӧ кык челядь быдтӧ, и ачыс уджалӧ. Тэ нин эн дивит менӧ, Кириллович. — Мыжа морт моз дорйысис Катерина.

— Ме ӧд мый? Кыдзкӧ да мыйкӧ. А тэ ачыд тӧдан, абу ичӧтик. Тӧлыс ӧд ой-ой ку-узь. Думыштан кӧ, лок, менам керкаыд век шоныд, ӧдзӧсыс век восьса. Дыр надейтчи, но надеясӧ ог вошты... Локтан кӧ, век рад лоа...

Пеля шапкаа, важ фуфайкаа, галошиа гын сапӧга, Иван Кириллович жугыля сулаліс да ышлолаліс. Видзӧднысӧ, чужӧм вылас омӧльтчыштӧма, чужӧмыс кельыд, вом доръясыс корсюрӧ тіралыштлӧны, — тыдалӧ, чорыда ӧбидитчӧма соседкаыс вылӧ. Сы дорын гартчис сылӧн вернӧй Парма понйыс.

Катерина жальпырысь видзӧдліс Иван Кириллович вылӧ да мӧдӧдчис водзӧ. Муніс тэрыба, весиг эз бергӧдчыв. Кор шоссе вылын сувтӧдіс пӧпутнӧй лесовоз машина да пуксис кабинаас, жальлуныс пыр жӧ воши. Бур, мый эз сӧгласитчы вуджны сосед ордас. Пока верма на овны, ӧтнамлы, гашкӧ, и бурджык. А мый лоас мӧд во тулыс, висьтавны сьӧкыд. Гашкӧ, и туй визьыс налӧн ӧтлаасяс...