СЬӦКЫД ЛУН

Сиа 100-ӧд гвардейскӧй дивизияысь 14 ОГИПТАД-са командиръяслы да боецъяслы, кодъяс усины Рӧдина вӧсна.

Фронт вылын вӧлі лӧнь. Дасӧд гвардейскӧй дивизия тӧлысь саяс нин сулаліс оборонаын. Став сертиыс тӧдчис, мый кыкнанладорас, миян войска и прӧтивник, дасьтысисны чорыд бойяс кежлӧ. Салдатъяс шмонитісны ас костаныс: дӧзмим нин бокъяснымӧс пӧжны, мед кӧть ӧдйӧджык заводитны наступайтны ли мый ли. Вӧлі тайӧ нелямын коймӧд вося май тӧлысьын. Прӧтивник вӧлі на миян страна территория вылын. Ӧти кывйӧн шуны, Победаӧдз вӧлі ылын на, сійӧ эз на тыдав.

Капитан Маевский, противотанкӧвӧй дивизионса командир, тэрыба петіс блиндажысь да гӧгӧрбок видзӧдліс. Вӧлі шоныд тувсов рыт. Тӧрыт войнас чорыда зэрис, и ӧні васӧд тувсов муыс ньӧжйӧ оняліс-косьмис. Гӧгӧр чӧв-лӧнь. Татшӧмыс шоча овлӧ передӧвӧй вылын.

Капитан бӧрся блиндажысь петіс сылӧн ординарецыс, ефрейтор Васькин, да мыйкӧ юаліс капитанлысь, но мӧдыс нинӧм эз вочавидз, сӧмын ӧвтыштіс кинас: «Эновтчы пӧ меысь». Сійӧ радейтіс ветлыны ӧтнасӧн.

Противотанкӧвӧй дивизионӧн командуйтны индісны Маевскийӧс неважӧн на, бӧръя косьын сылӧн командир, майор Алейник, сьӧкыда ранитчис. Алейник дырйи сійӧ вӧлі дивизионас штабса начальникӧн. Командирлӧн уджыс сылы вӧлі бура тӧдса, сы вӧсна мый тупкӧса огневӧй позицияяс вывсянь лыйсигӧн унджык лыйсян расчётъяссӧ вӧчавліс ачыс. Кӧть и регыдик на, но командирӧн асьсӧ чувствуйтіс зумыда. Но дзик мӧд делӧ лыйсьыны восьса огневӧй позиция вывсянь. Тайӧ зэв ӧпаснӧ и страшнӧ. Гашкӧ, та вӧсна и офицеръяс оз ёна кӧсйӧмӧн мунны противотанкӧвӧй артиллерияӧ. Кыдзи дивизионса командир — бойсӧ Маевский эз на нуӧдлы.

Капитан Маевскийӧс ас дорас корис полкса командир, кодлӧн команднӧй пунктыс вӧлі километр кымын бӧрвылынджык. «Колӧ лоны, регыд заводитчас!» — мунігас думайтіс сійӧ. Сідзи и лои. Полкса командир сы вылӧ и чукӧртӧма, медым дивизионъяс водзӧ сувтӧдны наступайтан могъяс. Шуны кӧ дженьыда, дасӧд гвардейскӧй дивизиялы вӧлі сувтӧдӧма мог — орӧдны прӧтивниклысь оборонасӧ да босьтны неыджыд кар, зэв колана кӧрт туй узел. Дивизионлы вӧлі шуӧма став артиллериякӧд тшӧтш нуӧдны артиллерийскӧй подготовка, сэсся пехота бӧрся вуджны наступлениеӧ. Бой кежлӧ дасьтысьны сетісны кык лун. Стӧч кык лун мысти, водз асывнас, час чӧж артподготовка бӧрын пехота заводитіс наступайтны. Сы бӧрся мӧдӧдчис дивизион. Лоас кӧ сідз, мый прӧтивник уськӧдчас контратакаӧ, дивизион восьса позиция вывсянь веськыд наводкаӧн вермас бырӧдны враглысь танкъяссӧ, не лэдзны орӧдны миян обороналысь визь.

...Аслас команднӧй пунктӧ локтӧм бӧрын сійӧ пыр жӧ корис ас дорас батареяса командиръясӧс да стӧчмӧдіс батареяяслысь могъяссӧ, кутшӧм батареялы кыті да кутшӧм батальонкӧд наступайтны.

Аски асывнас капитан Маевский шуис ветлыны мӧд батареяӧ, кӧні командирнас вӧлі лейтенант Родин, коді неважӧн на лоис комбатӧн. Таӧдз сійӧ вӧлі огневӧй взводын командирӧн. Капитан кӧсйис аслас синъясӧн аддзывны да прӧверитны, кыдзи батарея дасьтысьӧ бой кежлӧ. Татшӧм жӧ могъясӧн первой батареяӧ муніс штабса начальник, коймӧд батареяӧ — дивизионса комиссар.

Мунігас нин сылы тӧд вылас уси полкса комиссар майор Пронинкӧд тӧрытъя сёрниыс. Пронин звӧнитіс асывнас водз: Валентин Петрович, кыдзи дасьтысянныд аски кежлӧ? — юаліс сійӧ. — Миянсянь кутшӧмкӧ отсӧг колӧ, оз?

— Аттьӧ, — вочавидзис Маевский. — Справитчам асьным. Водзын быдса сутки на...

— Снарядъясыд тырмымӧн?

— Пока ваялӧны. Регыд лоас тыр боекомплект...

— Быд орудие вылӧ сё снаряд?

— Да, комиссар ёрт.

— Этшакодь... Ачыд гӧгӧрвоан, косьыс лоӧ чорыд... Ме думысь, колӧ содтыштны на. Ме сёрнитла Свиридовкӧд, полкса командиркӧд...

Сэсся водзын лоан бой йылысь думайтіг, сійӧ эз и тӧдлы, кыдзи воис мӧд батареяӧ. Комбат Родин стереотруба пыр видзӧдаліс прӧтивниклысь позиция, стӧчмӧдаліс цельяслысь координатъяс. Кор аддзис комдивӧс, лейтенант вешйис стереотруба дорысь да доложитіс командирлы, мый ӧні вӧчӧ батарея.

— Гвардияса капитан ёрт, мӧд батарея...

Комдив ӧвтыштіс кинас.

— Ладнӧ, ладнӧ, лейтенант! Водзӧ уджалӧй! Став орудиеыд лючки-ладнӧ-ӧ?

— Ставыс бур. Мӧд взвод помалӧ кодйыны запаснӧй ОП.

— Ветлам на дінӧ...

Огневӧй позиция вылын найӧс встретитіс батареяын старшӧйыс.

— Орудийнӧй расчётъясад йӧзыс тырмӧны? — юаліс Маевский.

— Стӧч сідз! Расчётъяс укомплектуйтӧма тырвыйӧ, — батареяса старшӧй офицер пыдди вочавидзис лейтенант Родин.

Да, шуны кӧ нин веськыда, противотанкӧвӧй артиллерияӧ ни салдатъяс, ни офицеръяс оз зэв окотапырысь локны. Тані весиг пехота серти войнавывса уджъяс ёна сьӧкыдджыкӧсь.

Дивизионын ӧні унджыкыс вӧліны выль йӧз. Татчӧ, оборонаӧ сувттӧдз, гвардейскӧй противотанкӧвӧй артиллерийскӧй полк выльысь формируйтчис Рыбинск карын. Полклы сетісны ЗИС–3 выль орудиеяс, выль американскӧй «Додж» машинаяс, укомплектуйтісны тырвыйӧ йӧзӧн. Батареяясын унджыкыс вӧліны выль йӧз, кодъяс эз на тышкасьлыны прӧтивниклӧн танкъяскӧд. Важ составыс сьӧкыд бойясын унаӧн пӧгибнитісны, унаӧн ранитчисны. Тані нин, оборонаын сулалігӧн, дивизионса офицеръяс зілисны бурджыка тӧдмавны выль боецъясӧс да дасьтыны найӧс водзын лоысь бойяс кежлӧ.

Со и ӧні капитан Маевский сувтіс ӧти орудийнӧй расчёт дорӧ да быттьӧ сідз-тадз юаліс:

— Страшнӧ медводдза бой водзвылад? А?

— Ми немецкӧй танкъясыскӧд эг на воюйтлӧй, — шуис на пиысь ӧти. — Ме таӧдз гаубичнӧй полкын вӧлі наводчикӧн...

— Страшнӧ, дерт... Ме гӧгӧрвоа... Ме ачым тіян моз жӧ коркӧ первойысь паныдасьлі немецкӧй танкъясыдкӧд... Но повны оз ков, — такӧдана шуис Маевский. — Дивизион миян уна нин воюйтліс танкъясыскӧд. Сылӧн тшӧт вылас уна нин сотӧм да жугӧдӧм танк... — Сэсся чӧв олыштӧм бӧрын мӧдысь эскӧдана шуис: — Танкысь сӧмын оз ков повны. Сыкӧд позьӧ тышкасьны и гранатаясӧн. А вот коді повзьӧ да пышйӧ сыысь, сійӧ и пӧгибайтӧ. Со тіян комбатыд висьталас тадзи жӧ, — Маевский видзӧдліс Родин вылӧ. — Аддзасны на вылӧ локтысь танк и кодсюрӧ уськӧдчӧны пышйыны, быттьӧ танкыс оз вермы суӧдны сійӧс, быттьӧ сылӧн ни пулемёт, ни пушка абу, — сёрнитіс Маевский. — Кор танкыс матын нин, бурджык уськӧдчыны окоп пыдӧсас, а не котӧртны танк водзвылас. Танкыд все равно суӧдас да талялас, либӧ пулемётысь сяркӧдас. А окоп пыдӧссьыс тэнӧ танкыд оз судз... А ещӧ бурджык, тэнад киад кӧ эм противотанкӧвӧй граната либӧ сотчысь смесь тыра бутылка. Кор танкыс прӧйдитас окоп весьтті, сэки и шыбит сылы бӧрвылас, моторас, гранатасӧ либӧ бутылкасӧ.

Родинкӧд тшӧтш комдив Маевский воліс нёльнан орудие дорас, сёрнитіс боец-артиллеристъяскӧд, ышӧдіс найӧс. Бӧръя орудие дорас дивизионса командир окопын видзӧдліс ӧти нишаӧ, кытчӧ вӧлі тэчӧма снарядъяс. Комдив стрӧга горӧдіс:

— Взводса командир, ме дорӧ! Тайӧ нӧ мый? Видзӧдлы: со некымын снаряд век на заводскӧй смазкаа... Тэ жӧ артиллерист, он тӧд, мый вермас лоны ыджыд неминуча... Ӧні жӧ выльысь чышкалӧй снарядъяссӧ, а тэ, комбат, прӧверит и меным доложит...

Сэсся комдив шыасис боецъяс дорӧ:

— Дышӧдчӧмыд вермас вӧчны ыджыд-ыджыд лёктор. Тӧданныд, мый орудиеысь лыйсигӧн стволыс ёна пӧсялӧ, а мавтӧм снаряд стволсьыс петӧм бӧрын пыр жӧ вермас взорвитчыны, а то и взорвитчыны ствол пытшкас. Гӧгӧрвоанныд, мый сэки лоас эськӧ?!

Капитан Маевский лӧсьӧдчӧ нин вӧлі мунны аслас команднӧй пунктӧ, но наблюдатель друг горӧдіс:

— Воздух! Воздух! Ставӧн дзебасъясӧ.

Здук мысти нин батареяын быттьӧ некод эз и вӧвлы. Вылын, сынӧдас, батареяяс весьтын, гӧграліс «рама», самолёт-разведчик, коді ёна дӧзмӧдчыліс артиллеристъяслы. Сы бӧрын век нин вӧвлывлі артналёт. Но тайӧ пӧрйӧ сійӧ лэбаліс эз дыр, фронт линия пӧлӧн лэбис водзӧ.

Регыд мысти Родин горӧдіс: «Отбой!» Лейтенант Родин сьӧлӧмсяньыс матькыштіс да видіс зенитчикъясӧс: «Проклятӧйӧс бара эз вермыны уськӧдны! Гадыд тадзи быд лун ӧти и сійӧ жӧ кадӧ лэбалӧ...

Недыр мысти комдив Маевский вӧлі нин аслас команднӧй пунктын да кутіс прӧверитны разведчикъясӧн индӧм выль цельяс да дасьтыны на кузя лыйсьӧм вылӧ даннӧйяс. Тадзи колис луныс. Рытнас бара корис ас дорас батареяса командиръясӧс. Сэні жӧ вӧліны штабса начальник да дивизионса комиссар. Пӧвъясысь тувъялӧм ичӧтик пызан вылын тшынӧн чусасис снаряд гильзаысь вӧчӧм коптилка. Майбыр, война вылад салдат кужис думыштны да вӧчны не сӧмын татшӧм коптилкаяс! Комбатъяс ӧти бӧрся мӧд докладывайтісны батареяяслӧн бой кежлӧ дасьлун йылысь, налӧн боевӧй комплект йылысь, уна-ӧ вайӧма быд орудие вылӧ бронебойнӧй да осколочнӧй снарядъяс. Штабса начальник юӧртіс раненӧйяслы отсӧг сетӧм йылысь, салдатъясӧс вердӧм йылысь...

Комбатъяс пиысь быдӧн бура тӧдіс, мый аски лоас сьӧкыд удж, чорыд бой... Та вӧсна найӧ эз вӧвны уна сёрниаӧсь.

— Эй, Васькин! — горӧдіс Маевский. — Вайлы татчӧ ассьыд фляжкатӧ. Кисьтав ёртъяслы прӧщайтчӧм могысь фронтӧвӧй сё грамм. Аски код тӧдас, мый лоӧ?.. Коді ловйӧн коляс?!

Васькин кисьталіс быдӧнлы то кружкаӧ, то стӧканӧ.

— Став бурсӧ тіянлы! Аскиа победа вӧсна! — шуис Маевский, лэптіс кружкасӧ. Ставӧн юисны да закуситісны сыр торйӧн.

— А ӧні разӧдчамӧй! — кыв кӧрталіс капитан Маевский. — Мунӧй асланыд йӧз дорӧ, ещӧ на сёрнитӧй накӧд... и шойччыны. Кадыс коли этша.

Асылыс вӧлі лӧнь. Асыввылын ыпъяліс асъя кыа, сэсся мыччысис шонді. Ставыс заводитчис индӧм план серти. Вит час да комын минут асылын миян авиация вӧчис прӧтивник позицияяс вылӧ налёт. Сьӧкыд бомбаяс гораа грымӧдісны-потласисны, косявлісны-чашйисны мусӧ да ыджыд сьӧд сюръяӧн кыпӧдлісны вылӧ.

Стӧч квайт часын дивизияса команднӧй пунктъяссянь енэжӧ качис гӧрд ракета. Тайӧ — артиллерийскӧй подготовка вылӧ сигнал. Сынӧдын юргис радистъяслӧн сигнал: «Артподготовка!» И... заводитчис!.. Уна мукӧд орудиеяскӧд тшӧтш грымӧдіс и индӧм цельяс кузя Маевскийлӧн дивизион.

Тадзи гымаліс быдса час. Уна сё снаряд лэбисны комдив юр весьтті прӧтивниклань. Сэсся кыпӧдчис пехота да уськӧдчис атакаӧ. Прӧтивник чорыда водзсасис, но век жӧ кутчысьны эз вермыны да заводитіс бӧрыньтчыны. Миян танкъяс, пехота да артиллерия — на бӧрся... Пӧшти пырмунігмоз босьтісны сійӧ ичӧтик районнӧй карсӧ, кодӧс вӧлі индӧма приказын. Но сувтны оз позь, колӧ вӧлі мунны водзӧ. Танкъяс мунісны медводзын. Тайӧ луннас прӧтивниклысь оборонасӧ орӧдӧм бӧрын миян частьяс прӧйдитісны бойясӧн дас километрысь унджык.

Аски асывнас эз на тӧвзьы снарядъясысь да минаясысь тшын дукыс, колӧ вӧлі бара мунны водзӧ. Бара сьӧкыд бойяс. Противотанкӧвӧй артиллерия муртса вевъяліс танкъяс да пехота бӧрся. Дивизион частӧ вежлаліс огневӧй позицияяс.

Рытъявылыс миян частьяс, медводз танкистъяс, зурасисны прӧтивниклӧн чорыда крепитӧм выль позиция вылӧ. Пехота окопайтчис. Танкъяс бӧрыньтчисны да сайӧдчисны дзебасъясӧ.

Полкса командир приказ серти дивизионлы колӧ вӧлі корсьны выгоднӧй огневӧй позиция. Сійӧс вӧлі индӧма ыджыд кыддза рас дорын, кыті туйыс вожалӧ кык пельӧ. Колӧ вӧлі пыр жӧ окопайтчыны.

Комдив Маевский муніс индӧм местаас дивизион водзвылын штабнӧй машинаӧн. Шофёр включитіс радио. Москва буретш сетіс бӧръя юӧръяс — Совинформбюролысь сводка. Сэні висьтавсис, мый: «энскӧй нырвизьын миян гвардейскӧй соединение, кодӧн командуйтӧ генерал Бобров, босьтіс кар, — ыджыд кӧрт туй узел. Виӧма уна фашистӧс, прӧтивниклысь босьтӧма 20 артиллерийскӧй орудие, бырӧдӧма 16 танк. Наступление мунӧ водзӧ...» Витыс на пиысь — дивизионлӧн удж, — думайтіс Маевский. Сылы вӧлі сьӧлӧм вылас нимкодь. Артиллеристъяс, кӧть и дивизионӧ локтісны неважӧн на, наступайтігӧн асьнысӧ петкӧдлісны бура, воюйтісны кужӧмӧн. Вит танк абу этша. Аттьӧ налы!

Выль огневӧй позициялань мунігӧн, капитан аслас синъясӧн аддзыліс пазӧдӧм немецкӧй орудиеяс, сотчысь танкъяс, фашистъяслысь уна шой. Наступление заводитчис бура. Дивизион пока ни йӧзӧс, ни техника эз вошты. Весиг ни ӧти ранитчӧм эз вӧв.

...А вӧвлі кад! Сьӧкыд вӧлі!.. Сылы дум вылас уси война заводитчигас медводдза луныс.

Капитан Маевский войнаӧдз на помавліс Ленинградскӧй артиллерийскӧй училище. Муніс сэтчӧ велӧдчыны зэв окотапырысь Сыктыв бердса Мизиндорса шӧр школа помалӧм бӧрын. Училище помалӧм бӧрын сійӧс индісны гаубичнӧй артиллерийскӧй огневӧй взводса командирӧн. Тайӧ частьыскӧд сійӧ веськаліс 1940 воын Литваӧ. Полк сулаліс Каунас карын. Война заводитчытӧдз на тӧлысь водзджык петіс отпускӧ да воис Коми муӧ чужан сиктас, кӧні сійӧ гӧтрасис ас сиктса жӧ томиник учительница Зоя Петровна вылӧ, кодкӧд ӧтлаын помаліс Мизиндорын шӧр школа. Зоя Петровна помаліс пединститут да бӧр локтіс уджавны аслас сиктӧ. Маевскийкӧд найӧ дугдывтӧг гижасисны, каникулъяс дырйи кадсӧ коллявлісны ӧтлаын, и со налӧн вӧлі свадьба. Но том гозъялы дыр овны ӧтлаын эз удайтчы. Олӧмыс став плансӧ дзугис. Свадьба бӧрас вежон мысти Маевскийлы воис телеграмма, кодӧн пыр жӧ корисны бӧр локны аслас полкӧ. Кадыс вӧлі тревожнӧй. Маевский гӧтырсӧ колис гортас, да и нунысӧ вӧлі некытчӧ. Полк сулаліс лагерын граница дорын, а Каунасын квартира эз вӧв. «Тэ, Зоя, эн лӧгась, квартиратӧ корся да ӧбязательнӧ вола тэла!» — мунігас шуис сійӧ. И регыд мысти заводитчис война. Лейтенант Маевский локтіс полкас война заводитчытӧдзыс на. Полкын салдатъяс и командиръяс шӧйӧвошӧмаӧсь: быд лун кык-куимысь армиялӧн частьяс весьтті зэв уліті лэбаліс немецкӧй самолёт-разведчик, но уськӧдны сійӧс оз тшӧктыны: миян пӧ Германиякӧд эм ӧта-мӧд вылӧ не уськӧдчӧм йылысь договор. Быдӧн тӧдісны, мый граница дорӧ фашистъяс чукӧртӧны войска, но миян чӧв олісны, быттьӧ сідзи и колӧ. И со воис час, кор ставыс путкыльтчис. Войнаӧдзыс кык лун водзджык полк вуджӧдіс пушкаяссӧ, тракторъяссӧ да мукӧд техника кык километр ылнаӧ бокӧ, вӧрӧ. А война заводитчан асывнас, нёль часын, немецкӧй самолётъяс бомбитісны полклысь лагерсӧ сідз, мый сэтысь нинӧм эз коль. А миян самолётъяс мыйлакӧ эз лэбавны.

«Тревога» сигнал серти полк мӧдӧдчис границалань, и час мысти вӧлі сэні нин. Заводитчис ыджыд кось. Пограничник-геройяслы отсӧг вылӧ косьӧ пырис и дивизия. Полклӧн гаубицаяс сулалісны пехотакӧд орччӧн да бырӧдалісны фашистскӧй танкъяс, бронемашинаяс. Тшын, бус, тшынсьыс загӧр, лолавны он вермы. Тайӧ войналӧн медводдза луннас полк воштіс ассьыс джын орудиесӧ, но сы участокті фашистъяс эз вермыны вуджны граница. Воши и уна йӧзыс. Рытнас локтіс приказ: бӧрыньтчыны Каунас карӧдз. Кор асывнас полк локтіс карӧдзыс, сэні вӧліны нин фашистъяс. Ковмис взорвитны кольӧм орудиеяссӧ, машинаяс да мукӧд техника. Дивизия кыдз дивизия — эз вӧв, и полк эз вӧв. Эз вӧвны командиръяс ни политработникъяс. Медся ыджыд чина офицернас вӧлі Маевскийлӧн дивизионса командирыс — капитан Терещенко. Сійӧ чукӧртіс кольӧм частьясысь йӧзсӧ. Чукӧрмис кыксё кымын морт. Тшыгӧсь, косясьлӧм паськӧмаӧсь, найӧ петісны кытшысь сӧмын июль помын. Кутшӧм сьӧкыд вӧлі туйыс — тайӧ нин мӧд сёрни. Ӧти косьын лейтенант Маевскийӧс сэки ранитіс киас.

...Кор локтісны карта вылын индӧм кыддза рас дорӧдз, штабса начальник тапкис капитанлы пельпомас:

— Извинитӧй, капитан ёрт, ті, буракӧ, унмовсинныд? Воим индӧм местаӧдз...

— Аттьӧ, ме ог узь. Мыйлакӧ дум вылӧ уси важыс, войналӧн воддза лунъясыс...

Кор аддзис ыджыд кыддза рас, сійӧ друг паляліс важсӧ казьтылӧмъясысь, перйис планшетсьыс карта да сверитіс местаыскӧд.

— Да, тайӧ кыддза раскыс... Туйыс тані вожалӧ. Вернӧ! Рас шуйгаладорас неыджыд сикт.

— Стоп, Ваня! — тшӧктіс сувтны шофёрыслы. — Воим, буракӧ...

Штабса начальниккӧд петіс машинаысь, гӧгӧр видзӧдліс да мӧдӧдчис корсьны КП. Сы бӧрся восьлалісны управление взводса боецъяс, вычислительяс, разведчикъяс. Недыр мысти сувтіс, босьтіс бинокль да ещӧ ӧтчыд гӧгӧр видзӧдліс да сэсся индіс:

— Вот тані лоас дивизионлӧн КП, — ньӧжйӧник шуис дивизионса командир. Разведчикъяс заводитісны кодйыны окопъяс да блиндаж вылӧ места. Связист корис татчӧ комбатъясӧс.

Кор чукӧрмисны ставӧн, Маевский паськӧдіс карта да корис матыстчыны комбатъясӧс. Сійӧ видзӧдліс быдӧн вылӧ да шуис:

— Асывнас полкса разведка юӧртіс, мый прӧтивник тайӧ рубежас, — сійӧ индіс карта вылӧ, — вайӧ миянлы паныд содтӧд войска. На лыдын быдса танкӧвӧй дивизия... Колӧ чайтны, мый найӧ вот-вот вуджасны контрнаступлениеӧ. Полкса командир миян водзӧ сувтӧдіс мог — кутны тайӧ участоксӧ, мед таті эз прӧйдит ни ӧти танк. Со тайӧ туй вожсяньыс кыддза раскӧдз. — Капитан индаліс быд комбатлы, кытчӧ вӧчавны огневӧй позицияяс. — Раскас сувтасны штаб, машинаяс, боеприпас, кухня. Ӧні разӧдчӧй ставныд батареяясӧ, мед кык час мысти вӧлінныд дасьӧсь паныдавны немецкӧй танкъяс.

Пехота кодйысьӧма нин, дасьӧсь нин окопъяс, ячейкаяс.

Артиллеристъяс пыр жӧ босьтчисны уджӧ — дасьтыны огневӧй позицияяс, — кодйыны пушкаяслы да аслыныс окопъяс. Телефонистъяс нюжӧдісны проводъяс огневӧй позициясянь команднӧй пунктӧ, дивизион штабӧ, полкса командирлӧн КП-ӧ.

Позицияяс вылын пока вӧлі лӧнь. Войнас мудз боецъяс асланыс шынельясӧ гаровтчӧмӧн водалісны шойччыны, коді кытчӧ: то орудие дорӧ, то снаряд ящикъяс дорӧ.

Дивизионса командир корис ас дорас комбатъясӧс, сетіс приказ:

— Чеччыны 5 часын. Квайт час кежлӧ мед вӧлінныд дасьӧсь паныдавны врагӧс. Колӧ чайтны, найӧ оз узьны, виччысьӧны лӧсялана здук. Танкъяскӧд кӧть ми паныдасьлім нин, но кутӧй тӧд вылын, тані найӧ ёна унджык. Кось водзвылын ещӧ на сёрнитӧй боецъяскӧд. Дивизион кутас отсавны 25-й пехотнӧй полклы. Йитчӧ батальонъяскӧд.

...Асывнас дыр виччысьны эз ковмы. Неыджыд артподготовка бӧрын дивизионлӧн огневӧй позициялань кутісны кыссьыны ӧти бӧрся мӧд уна танк. Наблюдатель висьталіс комдивлы. Сійӧ копыртчис стереотруба дорӧ:

— Да-а... Унаӧн и локтӧны, — быттьӧ аслыс, негораа шуис капитан. — Буракӧ, найӧ кӧсйӧны пырны 25-й полклы тылас. Телефонист!

— Ме кывза! — горӧдіс сійӧ.

— Ӧні жӧ йитчы пехотакӧд,.. — сэсся бара кутіс видзӧдны стереотруба пыр. Танкъяс пыр матыстчисны и матыстчисны. Со тыдалӧны нин налӧн бокъясас еджыд крестъясыс.

— Пасько кывзӧ! — горӧдіс телефонист.

— Сосед ёрт! Сёрнитӧ «Гым». Танкъяссӧ аддзанныд?

— Да-да... Найӧ локтӧны миян позицияяс вылӧ. Кӧсйӧны, буракӧ, коймӧд батальон бокиті пырны сылы тылас.

— Да-да. Ме аддза...

— Тіян вылӧ, войнавывса енъяс, ёна надейтчам. Чайта, онӧ лэдзӧй!.. — Маевский матыстчыліс стереотруба дорас, но бӧр вешйис: танкъяс сідз нин бура тыдалісны приборъястӧг. Комдив недыр наблюдайтіс локтысь фашистскӧй танкъяс бӧрся, сэсся горӧдіс телефонистлы:

— Дивизион, к бою! — рочӧн командуйтіс.

И сэк жӧ батареясянь ӧти бӧрся мӧд воис воча кыв:

— Бой кежлӧ дасьӧсь!

Комдив мӧдӧдчис мӧд батареяӧ, коді вӧлі КП-сянь медматын.

Танкъяс сувтлытӧг люзьгӧны-кыссьӧны, кывны нин кутіс моторъяслӧн жургӧмыс. Батарея дась, боецъяс чӧв олӧны, виччысьӧны, орудиеяссӧ веськӧдӧма локтысь танкъяс вылӧ. Километр. 800 метр... 700...

Комдив шуис Родинлы:

— Пӧра!

Лейтенант Родин, мӧд батареяса командир, первойӧн пырис бойӧ. Сійӧ гораа кызӧктіс да горӧдіс:

— По танкам... Прямой наводкой... Бронебойным. Огонь!..

Батарея лэдзис первойя залп. Заряжающӧйяс муртса удиталісны заряжайтны: Огонь! Огонь! Огонь!

Водзын локтысь танкъяс пиысь пуркйис нин тшын сюръя. Танкъяс заводитісны лыйсьыны воча. Кымынкӧ танк кутісны кежны бокӧджык, артиллеристъяслы нарошнӧ лӧсьӧдісны бокнысӧ. Ещӧ сувтісны кык танк!.. А куим танк ыпъялісны нин би пиын. Снарядъяс грымӧдісны сэні и тані...

— Огонь! Огонь! — горзіс лейтенант Родин.

Дзонь танкъяс локтісны век матӧджык, пушкаясысь и пулемётъясысь лыйсигтыр, матыстчисны батареялань... Некымын танк воисны нин сэтчӧдз, мый огневӧй позиция дорын кутісны дзижъявны осколокъяс гаубичнӧй батареяяслӧн, кодъяс лыйсисны танкъяс кузя закрытӧй позиция вывсянь.

Буснас да тшыннас сьӧдасьӧм Родин, пилотканас пӧсьсӧ чышкалігтыр, чирӧм гӧлӧсӧн горзӧ: Огонь! Огонь!

Мӧд батареялӧн ОП-ын, кӧні вӧлі дивизионса командир Маевский, гымӧбтіс некымын вражескӧй снаряд. Капитан удитіс уськӧдчыны окоп пыдӧсас. Куим мортӧс ранитіс, кыкӧс виӧма. Ланьтіс и ӧти орудие. Кыліс горзӧм, ойзӧм. Локтісны санитаръяс.

Маевский лӧсьӧдыштіс пилоткасӧ да сюся следитіс танкъяс бӧрся. Друг мӧд батарея вылӧ локтысь танкъяс кутісны кежны шуйгавылӧ да веськыдвылӧ, первой да коймӧд батареяяслань.

Маевский тэрыба котӧртіс аслас КП вылӧ. Пыр жӧ звӧнитіс да предупредитіс коймӧд батареяӧс, сэсся йитчис первой батареяса комбаткӧд.

— Мишин, сюся видзӧд, виччысь, талань кежис кымынкӧ танк!..

Неыджыд мыльк сайын дасьтысис бой кежлӧ первой батарея, джудждӧдалісны окопъяс, цельяс, дасьтісны орудиеяс. Мишинлы вӧлі любӧ, кыдзи орудийнӧй расчётъяс кужӧмӧн маскируйтӧмаӧсь орудиеяс. Ӧні ставсӧ ковмис дасьтыны бойӧ. Сійӧс кӧсйис ошкыштны расчётъяссӧ, но эз удит: корисны телефон дорӧ.

— Сёрнитӧ витӧд, — шуис Маевский. — Ставӧн сайӧдчӧй окопъясӧ. Гаубицаяс вуджӧдасны бисӧ тіян батарея дорӧ. Сэсся следитӧй танкъяс бӧрся.

Гаубицаяслӧн медводдза снарядъясыс грымакылісны локтысь танкъяс водзын. Ӧти снаряд веськалі цельӧ, танкъяс костӧ. Танкъяс кутісны разӧдчавны, но век на локтісны батареялань. «Нинӧм! — эскӧдіс асьсӧ Мишин, — паныдалам и найӧс». Сійӧ матыстіс бинокльсӧ син дорас.

— Эк, мамтӧ шогӧдысьяс! Унаӧн ті вӧлӧмныд! Но нинӧм! Видзӧдлам, коді кодӧс.

Танкъяс мунӧны кык визьӧн, — татшӧм боевӧй пӧрадокыс. Люкъясыс пӧдсаӧсь, тыдалӧ, полӧны... Сідзкӧ, мӧд батарея бура гӧститӧдіс найӧс! Сідз! Сідз!

Мишин эз вештыв синсӧ танкъяс вылысь. Кутіс думнас артавны ылнасӧ: 800 метр. 700... 600... Боецъяс зэвтчӧмаӧсь, виччысьӧны. Наводчикъяс ляскысьӧмаӧсь панорама бердӧ. Кад!

Орудиеяс гымӧбтісны залпӧн. Ещӧ ӧтчыд, ещӧ, ещӧ... Воддза кык танкыс сувтісны, наысь пуркйис кыз сьӧд тшын. Мукӧд танкъясыс заводитісны воча лыйсьыны. Ӧти орудиелысь наводчиксӧ ранитіс, сы местаӧ сувтіс командирыс.

Маевский сюся следитіс бойыс бӧрся, сеталіс сӧветъяс. Друг сійӧ казяліс, мый дивизионлань лэбӧны вражескӧй самолётъяс. Танкъяс бергӧдчисны, эз прӧйдитны. А самолётъяс ичӧтик сьӧд чутъясысь пыр ыдждісны, лоины бомбардировщикъясӧн. Сідзкӧ, эз на помась косьыс!

— Орудиеяс маскируйтны, боецъясӧс — окопъясӧ! — батареяяслы сетіс команда Маевский. Минут вит кымын кытшлалісны пикируйтысь бомбардировщикъяс. Бомбаяс гӧгӧр грымӧдісны-потласисны, но уроныс дивизионлы эз ло. Мыйӧн сӧмын самолётъяс лэбисны бӧр, артиллеристъяс уськӧдчисны орудиеяс дорӧ. Но друг кысянькӧ на дорӧ плавгысис рама, самолёт-разведчик, корректировщик. Сідзкӧ, виччысь ылӧ лыйлысь батареясянь би. Сідзи и лои. Регыд мысти батареяяс гӧгӧр кутісны грымӧдны гырысь сьӧкыд снарядъяс.

Мыйла прӧтивник вӧчис тадзи, комдив пыр жӧ гӧгӧрвоис: ӧні бара виччысь танкъяслысь атака. Маевский предупредитіс комбатъясӧс, сюся следитіс вражескӧй танкъяс бӧрся.

Маевский думыштчис воддза бой йывсьыс. Тышыс вӧлі сьӧкыд. Дивизион воштіс нёль орудие, дас мортӧс виӧма, дас кымынӧс ранитӧма... Но и фашистъяс колины татчӧ кӧкъямыс танк. Ещӧ на чорыдджык бой водзын! — думыштіс капитан, сэсся шыасис телефонист дорӧ.

— Йит менӧ лейтенант Родинкӧд.

Пыр жӧ шыасис лейтенант Родин — комбат–2:

— Иван Иванович, дона ёрт, — горзіс Маевский. — Ӧні жӧ вежӧй огневӧй позициятӧ... Мунӧ запаснӧйяс вылӧ.

Комдив Маевскийкӧд сёрнитігмоз, лейтенант Родин ӧттшӧтш сеталіс командаяс:

— Отбой! Корӧй машинаяс! Мунам запаснӧйяс вылӧ... — И сэк жӧ комдивлы: — Капитан ёрт, снарядъяс колины этша, эмӧсь раненӧйяс!

— Эн шогсьы. Снарядъяс ваясны, ме сеті нин команда. А раненӧйясӧс нуасны...

— Капитан ёрт! Менам сӧмын кык орудие коли...

— Тӧда... Ачыд гӧгӧрво, менам запаснӧйяс абу... Кутчысь! Танкъяссӧ лэдзӧй витсё-квайтсё метр ылнаӧдз, и прямӧй наводкаӧн... А прӧст салдатъяссӧ гранатаясӧн сувтӧд окопъясӧ. Ме звӧнита пехоталы, мед найӧ сетасны тэныд кык противотанкӧвӧй ружье.

Родинкӧд сёрнитӧм бӧрын Маевский йитчыліс мукӧд батареякӧд. Первой батареяын став орудиеыс вӧлі дзонь, коймӧд батареяын кольӧма сӧмын кык. Комдив ӧлӧдіс:

— Ті маскируйтчӧй сідзи, мед фашистъяс эз казявны тіянӧс, мед чайтӧны, мый авиация да ылӧ лыйлысь батарея вӧчисны ассьыныс уджсӧ. Чайта, ӧні унджык танкыс мӧдӧдчас туй кузя вӧрлань... Сэні найӧс паныдалас мӧд батарея.

Комдивлысь мӧвпсӧ комбатъяс гӧгӧрвоисны бура. Регыд мысти и заводитчис артиллерийскӧй налёт, а мыйӧн сійӧ помассис, бара мыччысисны танкъяс.

Маевский матыстчис стереотруба дорӧ да кутіс следитны танкъяс бӧрся. Думнас арталіс, кымын танк локтӧ на вылӧ. Ӧти, кык, куим... дасӧдз воис да сьӧлыштіс. А дивизион чӧв оліс, виччысис найӧс. Капитан Маевский кыйӧдіс танкъяс бӧрсяыс и неуна лӧньӧдыштіс асьсӧ; найӧ локтісны буретш сідзи, кыдзи чайтіс сійӧ: унджыкыс туй кузя, а мукӧдыс орччӧн. Танкъяс бӧрсяыс локтіс пехота.

Тайӧ ыджыд кӧрт зверь чукӧрыс локтіс веськыда мӧд батареялань.

Комдив звӧнитіс комбатлы:

— Танкъясыс оз на тыдавны? А ми тані аддзам и кылам нин шумсӧ... Кутчысь, дона ёрт! Кутчысь!

Немецкӧй танкъяс пырӧны вӧлі «мешӧкӧ». Маевский ӧлӧдіс первой да коймӧд батареяса командиръясӧс:

— Заводитӧй лыйлыны пыр жӧ, кор заводитас мӧд батарея.

Здук-мӧд мысти Маевский кыліс: мӧд батарея сетіс залп, ӧтиӧс, мӧдӧс, коймӧдӧс. Позьӧ вӧлі чайтны, мый лыйсьӧ сэні оз кык орудие, а батареяса нёльнан орудиеыс. Сэсся сэні заводитісны лыйсьыны сэтшӧм частӧ, мый капитан весиг думыштіс: менам-ӧ тайӧ батареяыс сэні?

Водзын локтысь немецкӧй танкъяс шӧйӧвошисны-падмисны. Кык танк ыпъяліс нин, а бӧръяясыс жмитісны воддзаяссӧ. Стӧч кык минут мысти тайӧ чукӧрмӧм танкъяс кузяыс кутісны лыйлыны первой батареялӧн нёльнан орудиеыс да мӧд батареялӧн кык орудие. Танкъяс кутісны кежавны бокӧ, быттьӧ нарошнӧ, лӧсьӧдісны миян пушкаяслы бокнысӧ да гусеницаяссӧ лыйлӧм вылӧ. Со ещӧ ӧти танк тшынасиг сувтіс... мӧд... коймӧд... Немецкӧй пехота водіс. На кузя кутісны сизьдыны гаубицаяс. Но кольӧм танкъяс мунісны водзӧ, кутісны паськӧдчыны атака вылӧ. Миян орудиеяслӧн лыйсян ӧдыс век содіс и содіс, кыліс залп бӧрся залп. Орудиеяс дорӧ ӧтлаасисны гвардейскӧй миномётъяс-катюшаяс. Танкъяс быттьӧ саялісны тшын-бус пиас. Волнуйтчӧмысла Маевскийлӧн сьӧлӧмыс чорыда тіпкис. Звӧнитіс Родинлы:

— Танкъяс век зырӧны и зырӧны, быттьӧ налӧн помыс абу. Верманныд-ӧ кутчысьны? Сетӧй гоз-мӧд осколочнӧйӧн пехота кузя...

Комдивсянь медматын вӧлі коймӧд батареялӧн огневӧй позицияыс, сійӧ бура кыліс орудиеяслысь шковгӧмсӧ. Комдив пыр жӧ казяліс, кор ланьтіс ӧти орудие...

— Мый лоис, Векшин?

— Наводчикыс ранитчис.

— Гранатаяс! Гранатаяс! — горзіс комдив.

Сьӧкыд вӧлі коймӧд батареялы. Кыкнан орудиесьыс петісны стройысь наводчикъясыс: ӧтисӧ виисны, мӧдыс сьӧкыда ранитчис. Ӧти орудие дорас сувтіс взводса командир, а мӧд дорас — батареяса парторг. И налӧн лыйсян ӧдыс эз чин, кыкнанныс лыйсисны бура. Со ӧзйис нӧшта ӧти танк, мӧд... Но ӧти танк век жӧ воис ӧти орудие дорӧдз, таляліс сійӧс да расчётсӧ. Мӧд орудиеыс ӧзтіс сійӧ танксӧ.

Комбат–1 лейтенант Мишин, кор аддзис сы дорӧ локтысь уна танксӧ, заводитліс лыддьыны, кымын танк, но ӧвтыштіс кинас. Сӧмын думыштіс: «быд орудие вылӧ кык-куим танк!» Батарея первой лыйліс прицелӧн, а кор лоины матынджык, — веськыд наводкаӧн. Комбат дорын кутісны нин потласьны снарядъяс, резіс мусӧ, осколокъяссӧ, но сійӧ век сулаліс да сеталіс командаяс.

Полысьджык морт кӧ вӧлі, сійӧ, гашкӧ, водіс, ляскысис окоп пыдӧсас, но водны оз позь, и оз кӧсйы. Батареяыс сылӧн тышкасьӧ. Гым-грам йиркакыліс сынӧдас, плавъяліс тшын, а горшад сатшис порох тшын да бензин дук. Мишин казяліс, мый батареяас шуйга орудиеыс ланьтіс. Комбат эз аддзыв и эз тӧд, мый сійӧ орудийнӧй расчётас ӧтпырйӧ ранитчисны нёльӧн, а сэтчӧ, сылань, кыссьӧ фашистскӧй танк. Сійӧ кӧ воас сэтчӧдз, пазӧдас не сӧмын сійӧ орудиесӧ, но и батареясӧ дзоньнас.

Комбат Мишин бура тӧдіс, мый танккӧд панласьны он вермы, но сійӧ век жӧ уськӧдчис орудиелань, кӧть и думайтіс, мый оз удит. Лов шысӧ кутӧмӧн сійӧ котӧртіс и котӧртіс, кияснас шенасиг, да горш тырнас горзіс батареяӧ, медым сійӧс кылісны да гӧгӧрвоисны, кутшӧм беда виччысьӧ сійӧс.

Фашистскӧй танкист, дерт жӧ, аддзис котӧртысь мортсӧ да пулемётнӧй ӧчередьӧн вермис уськӧдны сійӧс. Но мыйлакӧ эз лый ни пушкаысь, ни пулемётысь. Гашкӧ, гӧгӧрвоис, мый котӧртӧ офицер, да нимкодясис, мый орудиесӧ талялас сылӧн танкыс, а офицерсӧ босьтас пленӧ. Быд пленнӧй офицерысь — награда...

Батареясянь аддзисны котӧртысь командирсӧ, кутісны горзыны сылы. Танк лыйис сылань ӧтчыд, мӧдысь. И друг орудиеысь кыліс лыйӧм шы. Танк сувтіс, бергӧдчис гусеница пӧв вылас да ланьтіс. Комбат век жӧ локтіс орудие дорӧдзыс да ачыс сувтіс наводчик пыдди.

Бой помасьтӧдзыс на дивизионса командирӧс ранитіс, пуля ли, осколок ли швачӧбтіс сылы киас. Вражескӧй снаряд гымӧбтіс дзик окоп дорас. Санитаръяс бинтуйтісны, кӧсйисны пуктыны нӧсилка вылӧ, но сійӧ горӧдіс:

— Энӧ тэрмасьӧй! Нуӧдӧй первой найӧс, кодъяс оз вермыны мунны...

Дойысла чукрасигтыр, сійӧ прикажитіс коймӧд батареялы, кодлӧн коли сӧмын ӧти орудие, мунны да ӧтлаасьны первой батареякӧд. Сэні ӧні сьӧкыд, мунӧ чорыд бой. Мӧд батареякӧд йитӧдыс эз вӧв, орӧма проводыс. Комдив ыстіс сэтчӧ связнӧйӧс да бӧрсӧ локны тшӧктіс первой батареяӧ. Ачыс сійӧ сэтчӧ мунас. Мишинлы ӧні сьӧкыд, кыдзкӧ колӧ отсавны.

Маевский ординарецыскӧд воисны первой батареяӧ. Бойыс тані то лӧньыштлас, то выльысь ыпнитлас. Фашистскӧй танкъяс тані пазӧдӧмаӧсь кык орудие да расчётъяссӧ. Но сійӧ танкъясыс тані аддзисны пом, пуркйис сэтысь кыз сьӧд тшын.

Маевский мучитчис дойысла, тыдалӧ, пуляыс вӧрзьӧдӧма лысӧ, но век на кутчысис. Тані нин сылы юӧртісны, мый Мишин ранитчӧма, мый батареяын кольӧма кык орудие. Комдив тшӧктіс на дінӧ сувтӧдны коймӧд батареялысь кольӧм орудиесӧ, кодӧс татчӧ кыскисны батареяса боецъяс. Ӧні первой батареяын бара лои куим орудие. Батарея водзӧ нуӧдіс бой, и сійӧ лӧньыштіс сӧмын рытъявылыс. Но, шуд вылӧ, миян частьяслы отсӧг вылӧ воис свежӧй сибирскӧй дивизия. Маевскийлӧн дивизион местаӧ сувтіс выль противотанкӧвӧй артиллерийскӧй полк. Бӧръя бояс Маевскийӧс ранитіс мӧдысь, тайӧ пӧрйӧ вражескӧй снайперлӧн пуляыс сатшкысис морӧсас. Сійӧс нуисны медсанбатӧ. Сійӧ вӧлі дӧвӧль: приказ лои пӧртӧма олӧмӧ. Сылӧн участокті эз прӧйдит ни ӧти танк. Дивизион сулаліс помӧдз, кӧть и сылӧн лоины гырысь воштӧмъяс. Да и фашистъяс колисны татчӧ дас кык танк...

Тайӧ вӧлі 1943 вося май тӧлысьын. Победа лунӧдз вӧлі быдса кык во на. Быдса сьӧкыд кык во.