ПРӦТИВНИКЛӦН КЫТШЫН

Рытъя рекогносцировка бӧрын капитан Силин водіс: кӧть час кымын шойччыштны. Луныс вӧлі сьӧкыд, дивизия веськалі прӧтивниклӧн кытшӧ. Ещӧ сьӧкыд вӧлі сыысь, мый батареялӧн эз кольны минаяс. Но шойччыны эз удайтчы. Капитан муртса на унмовсис, гораа зуммеритіс телефон. Телефонист, буракӧ, ойбыртӧма жӧ да дыркодь эз шыась. Аппарат эз эновтчы, век гораджыка жуньгис. Телефонист тэрыба босьтіс трубкасӧ, мӧдарсяньыс кыліс мать да мать:

— Ті мый сэні ставныд стынитанныд али мый? Мый сы дыра он шыась?! Юрныд абу жаль?

Мӧдыс, мыкталігтыр, правдайтчис:

— Ме ывлаӧ петалі ичӧт могӧн...

— Мед гач пытшкад лэдзин, абу кӧ вежысьыд, а аппарат эн лысьт эновтны... Тӧдан, кутшӧм обстановкаыс?

Кутшӧм обстановкаыс, телефонист, буракӧ, эз тӧд. Но гӧгӧрвоис — бура гӧгӧрвоис: колӧма садьмӧдлыны напарниксӧ.

Вӧлі нин асъя вой, регыд югдыны заводитіс. Телефонист садьмӧдіс капитанӧс. Сійӧ чеччис, кружкаӧ кисьтіс чайникысь кӧдзыд ва, тільыштіс чужӧмсӧ, синъяссӧ. Садьмис, и унмыс быттьӧ абу и вӧлӧма.

— Капитан ёрт, звӧнитіс полковник, дивизияса командир, дзик пыр жӧ корисны дивизия штабӧ.

— Ладнӧ, ладнӧ, ме гӧгӧрвои нин. Уна-ӧ кадыс?

— Вит час лоӧ. Чуксавны шофёртӧ?

— Оз ков. Ми Петякӧд подӧн мунам. Абу ылын. Мед сӧмын автоматъяс босьтас.

Тайӧ Петяыс вӧлі комбат Силинлӧн ординарецӧн.

Час джын мысти комбат вӧлі нин дивизия штабын. Штабнӧй блиндажын вӧлі тшына, — кӧть чер ӧшӧд. Дивизияса командир полковник Сизов да штабса начальник Серов пукалісны пӧвъясысь вӧчӧм пызан сайын да видзӧдалісны пызан вылас вольсалӧм карта. Найӧ мый йылысь кӧ ас костаныс негораа сёрнитісны. Пызан шӧрас сулаліс тыртӧм консерв банка, коді вӧлі тыр папирос помъясӧн. Пызан ӧтар-мӧдар помъясас тшынасис тыртӧм гильзаысь вӧчӧм кык коптилка.

— Пуксьы, капитан! — шуис полковник да индіс тыртӧм снаряд ящик вылӧ. — Ті, буракӧ, асьныд гӧгӧрвоанныд нин, мыйла ми тэнӧ татчӧ корим.

Силин довкнитіс юрнас: бура пӧ гӧгӧрвоа...

— Положение миян сьӧкыдысь-сьӧкыд, — заводитіс комдив. — Немецъяс вот-вот заводитасны выль атака. Найӧ вермасны орӧдны миян обороналысь линиясӧ, дзугны ставсӧ. Ог дзеб, татшӧмыс вермас лоны. Миян коли личнӧй составысь дивизияын джынйыс кымын, а немецъяслӧн выныс ӧні кежлӧ куим пӧв унджык. Медся главнӧйыс, налӧн уна танк. Мый лоӧ тэнад батареякӧд? Дерт, ми танкоопаснӧй нырвизьын сувтӧдалім противотанкӧвӧй артиллерия, минируйталім матыстчанінъяссӧ, но ӧд танкъяс — танкъяс и эмӧсь. Ми тані сӧветуйтчим штабса начальниккӧд да шуим: мед «катюшаяс» эз веськавны прӧтивник киӧ, батареясӧ колӧ взорвитны. Ме звӧнитлі армия штабӧ, найӧ асьныс тӧдӧны, кутшӧм положениеӧ ми веськалім. Командующӧй корис кутчысьны ещӧ кӧть нин лун джын. Сійӧ кӧсйысис отсавны, но веськыда кӧ шуны, ме ог аддзы, кыдзи миянлы отсавны. Медым мездыны миянӧс кытшысь, этша вылӧ колӧ кык дивизия...

Полковник ланьтіс.

— Полковник ёрт, ме ассьым батареяӧс тӧрыт нин минируйті. Быд машина улӧ пуктім ми тырмымӧн тол. Немецъяс кӧ матыстчасны батарея дорӧ, — сэк жӧ взорвитам, налы кольӧ сӧмын сынӧдыс...

— А ті онӧ чайтӧй, мый немецъяс тӧдӧны миян «катюшаяс» йылысь? Мыйлакӧ чорыда нин кутчысисны ми дорӧ, — пырис сёрниас штабса начальник.

Силин важӧн нин думайтіс та йылысь, гӧгӧрвоис батарея вӧсна ассьыс кыв кутӧмсӧ, кыдзи сылӧн командир. «Катюша» Краснӧй Армиялӧн пока вӧлі секретнӧй ӧружиеӧн. Сідз, «катюшаяс» пырӧны вӧлі фронтӧвӧй артиллерия составӧ либӧ артиллериялӧн РГК составӧ. Фронтӧвӧй соединениеясӧ найӧс ыстылісны наступайтігӧн, прорывъяс вӧчигӧн. Немецъяс, дерт, первойсяньыс пуктылісны уна вын Краснӧй Армиялӧн выль оружие тӧдмалӧм могысь, сы йылысь сведениеяс чукӧртӧм могысь, весиг ысталісны миян тылӧ диверсионнӧй отрядъяс.

«Гашкӧ, и ӧні немецъяс кытшлалӧны менам батарея гӧгӧр, — аслас КП-ӧ бӧр мунігӧн думайтіс комбат. — Оз артмы налӧн нинӧм!»

...Силин, дерт, водліс жӧ, но унмовсьыны сідзи эз и вермы. Югдігас на бара сувтіс стереотруба дорӧ, бергӧдаліс окулярсӧ шуйгавывсянь веськыдвылӧ и, мӧдарӧ, зілис стӧча тӧдмавны, мый вӧчсьӧ прӧтивниклӧн позицияяс вылын.

Регыд мысти прӧтивник заводитіс наступайтны. Таркӧдчисны пулемётъяс, грымӧдісны пушкаяс. Лыйсьӧм шыыс пыр содіс и содіс, наступайтысьяс пыр ӧтарӧ матысмисны миян оборона линиялань. Немецкӧй пехота водзын петісны налӧн танкъясыс. Тшын-бус, сынӧдыс лоис загӧр. Прӧстӧй синмӧн позис нин аддзыны и гӧгӧрвоны, мый прӧтивник зілис пырны миян частьяс тылӧ, торйӧдны найӧс юкӧнъяс вылӧ да пасьвартны найӧс. Татшӧм налӧн важысянь нин тӧдса тактикаыс.

Силин видзӧдіс стереотруба пыр да лыддис дас вит танк. Тайӧ вӧліны шӧркодь танкъяс. Найӧ матыстчисны нин шочиник кыддза рас дорӧ, кысянь заводитчис дивизиялӧн оборонительнӧй линияыс. Сэні воддза окопъясас виччысисны найӧс пехота, автоматчикъяс, пулемётчикъяс, миномётчикъяс, пэтээровецъяс, гранатаясӧн, «КС» бутылкаясӧн боецъяс. Насянь шуйгавылынджык неыджыд мыльк гӧгӧр сулаліс истребительнӧй противотанкӧвӧй дивизион, кодлӧн орудиеясыс вӧлі тупкысьӧмаӧсь маскировочнӧй сеткаясӧн.

Матыстчис медтӧдчана здук. Танкъяс, лыйсигтыр, век матысмисны и матысмисны. Силин думнас индіс визь, кысянь водзӧ лэдзны танкъясӧс оз позь. Виччысис сійӧ здуксӧ. Танкъясӧн кыпӧдӧм бус вӧснаыс омӧля тыдаліс пехота, коді локтіс танкъясыс бӧрся. Кор бусыс разалыштас, сэки тыдовтчылас рудоввиж рӧма йӧз чукӧр, кодъяс зілисны сайӧдчыны танкъяс сайӧ. Полкӧвӧй артиллерия гымӧдіс на кузя, крӧшитіс найӧс, но найӧ бара жмитчылісны чукӧрӧ да лёкысь горзігтыр вӧтчылісны танкъяс бӧрся.

«Кодӧсь, пежъясыд!» — гӧгӧрвоис Силин. Сьӧлӧмыс сылӧн пузис, вирӧдз курччаліс вом доръяссӧ, но вӧчны нинӧм эз вермы. «Катюшаяслӧн» эз вӧвны минаяс. Сійӧ сӧмын сэки такалыштіс, кор кутісны шлочӧдны бронебойщикъяслӧн противотанкӧвӧй ружьеяс («пэтээръяс»), кутісны сяркӧдны пулемётъяс. Ещӧ здук мысти гымӧбтісны противотанкӧвӧй орудиеяс, маскируйтчӧм противотанкӧвӧй дивизионлӧн пушкаясыс.

Немецъяслы тайӧ лоис виччысьтӧмторйӧн. Найӧ чайтісны босьтны обороналысь воддза линиясӧ пырмунігмоз. Но эз артмы. Куим танк ӧтпырйӧ сувтісны: кыксьыс пуркйис-кайис кыз сьӧд тшын, а коймӧдыс гӧграліс-гартчис гусеница пӧв вылас. Но танкъяс век на лыйсисны пушкаясысь да пулемётъясысь, кытчӧдз мӧд бронебойнӧй снаряд эз ланьтӧд найӧс.

Силин ставсӧ тайӧ аддзыліс аслас синмӧн и вӧлі нимкодь сылы, но такӧд тшӧтш сійӧ бура тӧдіс, мый ӧні заводитчас настӧящӧй тышыс: коді кодӧс вермас?!

Немецъяс вуджӧдісны бисӧ противотанкӧвӧй артиллерия позицияяс вылӧ. Артиллеристъяс дорын гымӧдісны-потласисны снарядъяс, муыс сьӧд сюръяӧн качліс вылӧ.

Но и артиллеристъяс эз чӧв овны: мыльк вывсянь дугдывтӧг лэбисны лӧз трассаӧн бронебойнӧй снарядъяс. Залп бӧрся залп. Ещӧ ӧзйис куим танк, кодъяс эз удитны бергӧдчыны. Но и артиллеристъяслӧн лоины воштӧмъяс. Силин аслас синъясӧн аддзыліс, кыдзи мыльк вывсянь качлісны вылӧ пушкалӧн кӧлесаяс, тыртӧм снаряднӧй ящикъяс. Сідзкӧ, вӧлі веськыд попадание. Но найӧ лыйсисны пыр содысь ӧдӧн. Шуны кӧ нин, налӧн позицияыс ӧні вӧлі бурджык: найӧс кытъястікӧ тупкис-сайӧдіс мылькйыс, рельефыс, сэк, кор немецъяс, налӧн танкъясыс тыдалісны ки пыдӧс вылын моз да вӧліны бур мишеньӧн. Сэтчӧ жӧ, немецъяс вывті сюйсисны водзӧ, бӧр бӧрыньтчыны вӧлі сьӧкыд. Артмис сэтшӧм случай, кутшӧмыс шоча овлӧ фронт вылын: прӧтивник эз вермы бӧрыньтчыны.

Комбат Силин виччысис, мый водзӧ кутасны вӧчны немецъяс. Противотанкӧвӧй пушкаяслӧн лыйсян ӧдыс эз чин, а, мӧдарӧ, содіс. Регыд мысти сійӧ гӧгӧрвоис нин: раз бергӧдчыны эз вермыны, налы колис мунны сӧмын водзӧ, сідзкӧ, мунны прорыв вылӧ. Танкъяс содтісны мунан ӧдсӧ.

Силин думайтіс та йылысь, и эз пыр кыв телефонистлысь гӧлӧссӧ, коді корис сійӧс аппарат дорӧ.

— Командир ёрт! Полковник телефон дорын!

Силин босьтіс трубкасӧ.

— Кутшӧм нин делӧясыс, Силин? — телефон трубкаын ёна трачкӧдчис да омӧля вӧлі кылӧ. — Мый чӧв олан? Кутшӧм делӧясыс, мися?! — горзіс телефон трубка.

Силин быд кыв торйӧн висьталіс, дженьыда рисуйтіс обстановкасӧ.

— Гӧгӧрвоана! — вочавидзис полковник. — Силин, синтӧ эн вештыв шуйга фланг вылысь. 26-ӧд полклысь позициясӧ, буракӧ, фрицъяс орӧдісны... либӧ сылань мунӧ... Менам связьыс абу накӧд. Регыд лӧсьӧдасны... Гӧгӧрвоин? Ми ставсӧ вӧчам сы могысь, медым тіян дорӧ ӧти фриц эз веськав. Ставыс! Следит кызь квайтӧд бӧрся!

Дивизияса командирлӧн юӧрыс эз ло Силинлы виччысьтӧмторйӧн. Гӧгӧрбок вӧлі фронт, и со шуйга флангын сійӧс орӧдӧмаӧсь. Положениеыс сьӧктаммис ещӧ и сійӧн, мый шуйга флангас Силинлӧн КП-сянь тыдаліс омӧля, вӧлі ылынкодь. Шуйга флангсяньыс матынджык вӧлі КП-ыс сылӧн вежысьлӧн, старшӧй лейтенант Зыковлӧн, и Силин йитчис сыкӧд. Зыков вочавидзис сылы, мый прӧтивникӧс пока оз аддзы, но шум сертиыс тӧдчӧ, мый соседыслӧн положениеыс сьӧкыд.

— Тайӧс ме и ачым тӧда, — шуис комбат. — Колӧ ӧні жӧ сэтчӧ мунны. Жарыс ӧні сэні лоас. А тані немецъяс, буракӧ, сибдісны.

Силин ещӧ ӧтчыд видзӧдліс стереотрубаӧд: передӧвӧйын муніс сьӧкыд бой. Кӧнсюрӧ муніс рукопашнӧй тыш. Ӧні кежлӧ немецъяслӧн кольӧма сӧмын вит танк, мукӧдыс ставыс сотчисны. Аттьӧ артиллеристъяслы да бронебойщикъяслы. Пехотаӧс вӧлі торйӧдӧма танкъясысь.

Силин котӧрӧн сорӧн окопъясӧд уськӧдчис Зыков дорӧ. Сы бӧрся уськӧдчис сылӧн ординарецыс, сержант Зотов. Зыков КП дорӧ матыстчигӧн, шуйга флангсянь кыліс сэтшӧм шум, мыйысь пӧшти чуналӧны пельясыд...

Силин сувтіс Зыковкӧд орччӧн да кутіс кывзыны, мый жӧ сэні вӧчсьӧ?! Орӧдісны эз оборона линиясӧ? Комбат сэки эз на тӧд, мый 26-ӧд полклы отсӧг вылӧ воӧма выль десантнӧй батальон, коді вӧлі дивизияса командирлӧн резервын. Найӧ бӧр бурмӧдісны полклысь позициясӧ, да весиг вуджисны контратакаӧ. Силин сэки, дерт, эз на тӧд, мый 26-ӧд полкса командир ачыс ранитчӧма морӧсас и сідз веськӧдліс бойнас, мый противотанкӧвӧй гранатаясӧн да «КС» бутылкаясӧн нёль боец уськӧдчисны воча, мый сійӧ «КС» бутылканас полкса пӧварыс ӧзтӧма кык машина... Нинӧм тайӧс Силин пока эз тӧд. Силин эз тӧд и сійӧс, мый 26-ӧд полк вылӧ уськӧдчысь кызь танкысь кыкыс век жӧ орӧдісны оборонасӧ да ыджыд ӧдӧн локтісны, случайнӧ ли, эз ли, «эрэс» батареялань. Ранитчӧм зверьяс моз, локтігас нырисны ставсӧ, мый веськалі син улас. Орудиеяслӧн гым вӧсна налӧн эз кыв мотор жургӧмыс, и кажитчис, мый локтӧны оз збыль танкъяс. Силин здук видзӧдіс на вылӧ и ещӧ здук мысти вежӧртіс: тайӧ жӧ кык танкыс писькӧдчӧмаӧсь да локтӧны батарея вылӧ. Бырӧдны ӧні жӧ! Но кыдзи?

Танкъяс вӧліны нин куимсё метрысь не ылынджык. Медым локны та ылнасӧ, налы колӧ сӧмын кык-куим минут. Силинлы вежӧрас йиджис, мый тайӧ здукыс ӧні уна йӧзлӧн, кодъяс вӧлі окопъясын на дорын, лоӧ олан да кулан мераӧн. Мыйла бронебойщикъяс чӧв олӧны? Сійӧ видзӧдліс водзӧ, веськыдвылӧ. Сэні окопъясысь неуна водзынджык вӧлі ячейка, кӧні куйліс противотанкӧвӧй ружьелӧн расчёт. Мӧд кыкыс вӧлі шуйгавылынджык. Талунъя лунӧдз Силин эз на аддзыв налысь уджсӧ, и ӧні поліс, мый налӧн нервъясыс оз выдержитны. Найӧ вермасны бисӧ восьтыны водзджык, и сэки вермас лоны ыджыд неминуча. Тані колӧ лыйсьыны стӧча, ас кадӧ!

Но поліс сійӧ весьшӧрӧ. Первой номерыс, ыджыд тушаа, ён, крепыд мужик, быттьӧ ёртъяссӧ ышӧдӧм могысь бергӧдіс налань гожъялӧм чужӧмсӧ да мигнитіс: «Со миянӧдз пӧ воис ӧчередь!» Сэсся ружьесӧ топӧдіс пельпом бердас, ланьтіс, зэвтчис. Бронебойщикъяслӧн окопысь муртса дзирдыштіс лун югыдас би кыв, и сэк жӧ танклысь бронясӧ нюлыштіс сійӧ би кывйыс. Танк дёрнитчис, но век на муніс. Пуляыс сылы кучкӧма рикошетӧн. И воча кыв пыдди танклӧн пушка дулоысь чепӧсйис ыджыд би кыв, и бронебойщикъяслӧн окоп дорын кыптіс му сюръя. Нырад чангис сотчӧм тол дук, а снарядлӧн осколокъясыс чирйисны-вундалісны куст йывъяс.

Силин повзьӧмӧн видзӧдліс окопӧ.

Расчётыс вӧлі ловъя, и первой номерыс сідзжӧ спокойнӧя метитчис ружьесьыс, тыдалӧ, корсис танк броняысь сылы коланаин. Кузь-кузь секунд кыссис тайӧ, сэсся грымӧбтіс лыйӧм шы. Силин, буракӧ, ёнджыка сьӧлӧмнас кыліс, а эз аддзы, мый танклы воис пом. Сэтысь пуркйис-кайис сьӧд тшын. Но ӧд коли на мӧд танкыс. А сійӧ дзик дзонь, кыдзкӧ тешкодя чукльӧдлігтыр, кыссис-локтіс окоплань. Куимысь кыліс лыйӧм шы пэтээрӧн. Танклы смотрӧвӧй щельясӧ боецъяс лыйлісны и винтовкаясысь, и автоматъясысь, но танкыс вӧлі быттьӧ урсалӧма, — век локтіс и локтіс. Гашкӧ, коли нин ветымын метр Зыков КП-ӧдз. Локтігас танк лыйсис пушкаысь и пулемётысь. Сьӧлӧмсӧ кырлан дойӧн Силин аддзыліс, кыдзи танклӧн снарядыс веськалі стрелкӧвӧй ячейкаӧ да чашйис сійӧс, кыдзи боецъяс кинысӧ шевкнитӧмӧн усялісны-шлёпкысисны муас.

Силинлы кодкӧ тувкис мышкас. Сійӧ бергӧдчис да паныдасис ординарец Петя Зотов синъяскӧд. Сійӧ ӧти киас кутіс кык бутылка «КС», а мӧднас индіс локтысь танк вылӧ...

— Позьӧ меным, капитан ёрт?!

Силин сӧмын довкнитіс юрнас. Думайтӧм вылӧ сылӧн кадыс эз вӧв.

Петя босьтіс бутылкаяссӧ мӧд киас да пелька чеччыштіс-вуджис бруствер вомӧн да уськӧдчис кузь турун пиӧ. Чукльӧдлігтыр, сійӧ кыссис танклы воча, зілис веськавны сылӧн «мёртвӧй пространствоӧ», кор позяс сувтны да стӧча шыбитны бутылкаяссӧ. Силин следитіс, кыдзи Петя бӧрся вӧрис туруныс, и сійӧ думыштны эз куж, кыдз быттьӧ ясыд небесаын гым, — друг танкыс кежис. Аддзыліс-ӧ танкистыс танклань кыссьысь мортсӧ али кежис случайнӧ, Силин тӧдны эз вермы. Ӧні сійӧ ясыда аддзис, мый танкыс локтӧ Петя вылӧ. Сылӧн ординарецыс вылӧ, дзик веськыда. И оз кӧ ло чудо, танкыс талялас мортсӧ.

Силин кӧсйис котӧртны бронебойщикъяс дінӧ, но... Но турун пиысь друг сувтіс Петя. Мёртвӧй пространствоыс надёжнӧя видзис сержантӧс, кӧть и сулаліс танк туй вылын. Петя мый вынсьыс ӧвтыштіс кинас, и здук мысти бутылкаыс зёльмуні танкас. Силин эз кывлы бутылка жугалӧмсӧ, но биыс нюлыштіс бронясӧ, би кывйыс кутіс паськавны. Но танкыс эз сувт, сійӧ муніс водзӧ... Сотчысь танк, кӧть вӧлі синтӧм нин, чажӧдіс-локтіс сы водзын сулалысь морт дорӧ, а тшын пиас сэсся некод нин эз аддзыв, кыдзи сержант шыбитіс мӧд бутылкасӧ.

Ставыс артмис сэтшӧм ӧдйӧ, мый Силин эз сразу гӧгӧрво лоӧм трагедиясӧ. Сійӧ луннас век на оліс булькйӧн пуысь тышнас; мый весиг эз аддзыв сылысь помсӧ. Сӧмын сэки, кор окопъяс весьтын лоис чӧв-лӧнь, юр вемсӧ йирыштіс мӧвп: ӧд сылӧн ординарецыс, Петя Зотов, сержант, сылӧн земляк, коми пармаса зон, абу нин ловъя. Окота вӧлі горш тырнас горӧдны, медым пӧдтыны сьӧлӧмыслысь дойсӧ, но гӧлӧсыс сибдіс, эз шед. Сійӧ чашнитіс гимнастёрка воротниксӧ, и орӧм кизьясыс сяркӧдісны-усялісны бобы тусьяс моз окоп пыдӧсас. Сійӧ гӧгӧрвотӧма видзӧдліс на вылӧ, сэсся синсӧ вештіс Петяӧн сотӧм танк вылӧ. Танкыс сотчис трачкӧдчигтыр, быттьӧ вӧлі пуысь. Бисьыс калитчӧм краскаыс шумӧн потласис-сьӧласис. Кажитчис, танкыс кучиксӧ вежӧ. Силин бергӧдчис мӧдарӧ.

Бойыс лӧньыштіс. Вӧлі гӧгӧрвоана, мый первой атакасӧ лои венӧма. Колӧ виччысьны выль атака, сідзкӧ, колӧ дасьтысьны сы кежлӧ. Сійӧ сетіс Зыковлы команда: став усьӧмъяссӧ чукӧртны да дзебны ӧти братскӧй гуӧ.

Силин бӧр муніс аслас КП-ӧ, и, кажитчӧ, буретш ас кадӧ. Эз на удит подчинённӧйясыслы сетны кутшӧмсюрӧ приказаниеяс, сійӧс корисны телефон дорӧ. Звӧнитіс полковник.

— Силин? Со мый, капитан! Ӧні жӧ котӧрӧн лок штабӧ. Мый? Да бӧрыннас, бӧрыннас... Дзик пыр жӧ!

Полковник гӧлӧсын кыліс не то волнуйтчӧм, не то ещӧ мыйкӧ. Сылӧн волнуйтчӧмыс вуджис капитанлы... Мый лоис?

Силин кватитіс телефон трубкасӧ да горӧдіс:

— Эм! Дзик пыр локта!..

Дивизияса командир виччысис нин Силинӧс. Мыйӧн сӧмын сійӧ петкӧдчис блиндажын, полковник нюжӧдіс сылы бумага лист:

— На, лыддьы! Армияын командующӧйсянь радиограмма! — гажа юӧртіс сійӧ. Силин босьтіс бланксӧ, тэрыба нуӧдіс син пырыс строчкаяссӧ: «Ыстам «эрэслы» боекомплект! Лӧсьӧдӧй самолётъяслы пуксян полоса!..»

— Но, мый шуан?! — нимкодьпырысь юаліс полковник.

Силин чуймӧмысла чӧв оліс, немтор эз шу. Сійӧ виччысис любӧйтор, но не сӧмын тайӧс. Ыстыны «катюшаяслы» минаяс ӧні, немецъяс ныр улын, кор дивизиясӧ кытшалӧма да ещӧ матігӧгӧрын нинӧм сэтшӧм аэродром кодьыс абу?! Татшӧмторсӧ думыштны он лысьт! Да, тайӧ кӧ збыльмас, дивизион вермас кокниа петны кытшысь да йитчыны армияса мукӧд частьяскӧд...

Силин ещӧ ӧтчыд лыддис радиограммасӧ да бӧр сетіс полковниклы.

— Кывзӧй приказ! — мӧд, официальнӧй гӧлӧсӧн нин шуис сійӧ. — Ті, капитан Силин, батареяысь ни ӧти воськов эн вӧчӧй. Пыр сэні лоӧй! Дасьтӧй батареясӧ лыйсигкежлӧ. Дасьтӧй расчётъяс ӧні жӧ!.. А ті, майор, — полковник шыасис сапёрнӧй батальонса командир дорӧ, — ӧні жӧ заводитӧй дасьтыны пуксян полоса. Местасӧ ачыд бӧрйы. Мый ковмас, шыасьӧй штабса начальник дорӧ... Кык час мысти полосаыс мед вӧлі дась. Кор эштас, доложитӧй меным личнӧ!.. И ещӧ, самолётъяскӧд йитӧд кутӧм могысь, ті, Силин, индӧй да инструктируйтӧй торъя боец-ракетчикъясӧс. И мыйӧн самолётъяс пуксясны да ректасны сэтысь снарядъяссӧ, пыр жӧ ваясны батареяад. Став мукӧдторйыс — тіян сайын. Ме кута виччысьны «эрэсъяслӧн» залп вылӧ дасьлун йылысь доклад... А цельяссӧ, кытчӧ мӧдӧдны минаяс, индас менам штабӧй. Прӧста энӧ воштӧй ни ӧти секунда. Залп бӧрын пыр жӧ вешйӧй ОП вылысь, мунӧй сэтысь.

Силин локтіс аслас КП-ӧ. Зыков висьталіс, мый немецъяс заводитӧмаӧсь выль атака, орӧдӧмаӧсь оборона линиясӧ ӧтпырйӧ некымын местаын. Мӧд эшелонса батальонъяс лэдзисны прӧйдитны танкъяслы, а пехотаӧс паныдалісны передӧвӧй окопъясын. Но и танкъясыс бара веськалісны противотанкӧвӧй батареяяслӧн би улӧ. Шум-гам, тшын-бус! Татшӧм адас дивизиялӧн вынъясыс вочасӧн сыліны, частьясын коли став составсьыс джынйыс кымын. Эз бурджык вӧв делӧыс и артиллеристъяслӧн. Бырны кутісны снарядъяс. Лыйсян ӧдыс чиніс, и лоис сэтшӧм здук, мый налы отсӧг вылӧ, полковник приказ серти, воисны зенитчикъяс. Найӧ петкӧдісны ассьыныс орудиесӧ восьса позиция вылӧ да сувтӧдісны немецкӧй танкъясӧс. А рас сайын, пӧшти обороналӧн кытш шӧрас, артиллерийскӧй обстрел вылӧ видзӧдтӧг, пессисны-мырсисны сапёръяс. Найӧ пӧрӧдалісны пуяс, тягачьясӧн берталісны мыръяс, муӧн тырталісны да трамбуйтісны гӧпъяс. Тадзи вочасӧн артмис самолётъяслы пуксян полоса. Кык час мысти кымын сапёръяслӧн командир доложитіс полковниклы, мый пуксян полосаыс дась. Армия штабӧ муніс срочнӧй радиограмма.

Кызь минут мысти воисны самолётъяс. Кык нёль мотора самолёт жургисны-лэбисны пу йывъяс весьтті и веськӧдчисны пуксян полосаӧ. Немецъяс ӧнӧдз пыр на чайтлісны, мый дивизия олӧ бӧръя здукъяс. Кор аддзисны самолётъяслысь пуксьӧмсӧ, найӧ чуймӧмысла шемӧсмисны... А кор воисны ас садяс, самолётъяс вӧліны му вылынӧсь нин.

Силин, дерт, эз аддзыв, кыдзи пуксисны самолётъяс, но тӧдіс, мый тайӧ здукас машинаясӧ грузитӧны «катюшаяслы» снаряд-минаяс. Капитан аддзӧ, мый бӧръя кадас обстановкаыс ёна вежсис и батарея оз вермы лыйсьыны тадзи. Бойыс муніс матын, и сетӧм залпыс эз сет эськӧ колана результат. Медым бырӧдны цельяссӧ, мунны поражение вылӧ, колӧ вӧлі лэдзны направляющӧй установкасӧ улӧджык, медым сетны залпсӧ веськыд наводкаӧн. Та могысь колӧ вӧлі кодйыны машинаясӧн воддза кӧлесаяс увсьыс мусӧ либӧ сувтӧдны машинаяссӧ пӧкатаинӧ. Но пӧката местаыс матігӧгӧрын абу. Коли ӧтитор — кодйыны мусӧ, кодйыны ӧні жӧ, а то лоас сёр. Батареецъяс босьтчисны уджӧ. А немецкӧй танкъяслӧн шыыс пыр матысмис и матысмис. Силин да вычислитель вӧчисны расчётъяс, дасьтісны лыйсьӧм вылӧ даннӧйяс. Силин думыштіс, мый лоас некымын минут мысти: танкъяс орӧдасны обороналысь мӧд линиясӧ да веськаласны увтасінӧ, сёнӧ, кытчӧдз сӧмын километр кымын лоӧ. Сетам позянлун мунны налы ещӧ кыксё-куимсё метр и сэки став батареяӧн сетны залп.

Силин лыйсян даннӧйяссӧ сетіс Зыковлы, а ачыс звӧнитіс полковниклы да доложитіс батареялӧн дасьлун йылысь, сӧмын колӧны снарядъяс, найӧс эз на вайны...

— Виччысь, вот-вот ваясны! — вочавидзис полковник. — Час джын кымын ми вермам на кутчысьны.

Силин терпитны вермытӧг виччысис снаряд тыра машинаяс, частӧ видзӧдлывліс сылань, кытысянь долженӧсь локны грузӧвикъяс. Но найӧ эз вӧвны. Мый лоис сэні!? Медым не думайтны та йылысь, сійӧ бара ляскысис стереотруба дорӧ. Немецкӧй танкъяс вӧлі утюжитӧны водзын сулалысь окопъяс, сэсся мӧдӧдчисны водзӧ, пырисны нин оборона кытшӧ. Мунігас весиг найӧ сувтыштавлісны, медым виччысьны пехотасӧ.

ОП-сянь звӧнитліс Зыков. Сійӧ доложитіс, мый снарядъяс вайисны, батарея дась восьтыны би.

— Телефон дорысь некытчӧ эн мун, — тшӧктіс сылы Силин. Матыстчис бара стереотруба дорӧ да кынмис места вылас, эз вӧрзьыв: сійӧ виччысис, кор танкъяслӧн клиныс ставнас локтас увтасінӧ. Коли минута, мӧд... И со воддза танкыс воис нин сён шӧрӧдзыс. Виччысьны водзӧ вӧлі нинӧмла. Сійӧ бура тӧдіс, мый веськыд наводкаӧн сетӧм залп бырӧдас танкӧвӧй колоннасӧ ставнас... Воис кад... Пӧра! Силин горӧдіс телефон трубкаӧ:

— Батарея, к бою!

Сэсся волнуйтчӧмысла неуна тіралан гӧлӧсӧн командуйтіс:

— Расчеты — в укрытие! Командиры установок — в кабины! Водители — моторы! Батарея, залпом огонь!

Гым-йирк-тарк, мыйкӧ чажгис-дзуртіс, сэсся лӧнис. Позиция весьтын кыпаліс еджгов тшын, сэсся разаліс.

Кельыд би гы тупкис увтасінсӧ, сэні ставыс сотчис, сыліс, пӧрис шомӧ — и металл, и пуяс, и муыс. Жарыс кылӧ вӧлі весиг тані. Силин тшӧктіс позиция гӧгӧрыс ӧзтыны дымӧвӧй шашкаяс, а ачыс котӧртіс ОП вылӧ, машинаяс дорӧ. Кор чукӧрмисны ставӧн, сійӧ пуксис первойя машинаас да мӧдӧдчис. Артмӧм коридорӧд колӧ вӧлі петкӧдны кытшысь батареясӧ. Сы бӧрся петас и дивизия.