«СВЯЗЬ! СВЯЗЬ!»

Ыджыд тупӧсь кодь нимтӧм гӧгрӧс мыльк. Сійӧ некымынысь вуджліс киысь киӧ. Ӧні сэні вӧліны немецъяс, лун и вой ёнмӧдісны позициясӧ. Миян гвардейскӧй пехотнӧй полкса командир полковник Пасько аслас разведчикъяскӧд да артиллеристъяскӧд лун-мӧд следитіс сы бӧрся, тӧдмаліс прӧтивниклысь огневӧй точкаяс да думайтіс, кыдзи эськӧ бӧр босьтны мыльксӧ ичӧтджык воштӧмъясӧн. А босьтны сійӧс колӧ вӧлі быть, сы вӧсна мый тайӧ мылькйыс босьтіс ыджыд тӧдчанлун не сӧмын полклӧн, но и дивизиялӧн оборонаын. Тайӧ мыльк вывсяньыс тыдаліс гӧгӧр ылӧдз. Веськыда атакуйтны, гӧгӧрвоана, лоӧны уна воштӧмъяс. Пасько думайтіс, думайтіс и шуис наступайтны огневӧй вал бӧрся. Аслас мӧвпъяс йылысь сійӧ висьталіс дивизияса командирлы, и сійӧ ошкис полковниклысь плансӧ да отсӧг вылӧ сетіс быдса гаубичнӧй полк да реактивнӧй миномётъяслысь, «катюшаяслысь» дивизион.

Кӧть и сьӧкыда, но мыльксӧ век жӧ лои босьтӧма. Гитлеровецъяс бӧрыньтчисны асланыс важ дасьтӧм позицияяс вылӧ, коді вӧлі ӧти ыджыд сикт таладорын, мыльксяньыс километра кымын ылнаын.

Ывлаыс вӧлі кӧдзыд, чушкис кӧдзыд тӧв, коді йиджӧ сьӧлӧмӧдзыд. Кытчӧ кӧть он бергӧдчы, тӧлыс швачкӧ ӧтмоза, гартлӧ лымсӧ, койӧ сійӧс синмад, сьыліад.

Асывнас ыджыд вына, ён артиллерийскӧй подготовка бӧрын Пасько мӧдӧдіс наступлениеӧ полксьыс кык батальон, пулемётнӧй да миномётнӧй ротаяс. Наступайтісны сідзи, кыдзи и вӧлі думыштӧма, огневӧй вал бӧрся. Артподготовка дырйи батальонъяс босьтісны атакаӧ петан рубежъяс. Сигнал серти артиллерия вӧчис шковгысь снарядъясысь дорвыв биа визь. Пехота муніс атакаӧ тайӧ шковгысь снарядъясыс бӧрся сизимдас-сё метраысь не ылынджык.

Сылы, коді эз ветлы атакаӧ огневӧй вал бӧрся да эз аддзыв фугаснӧй снарядъяслысь аскӧдыс орччӧн кын муас грымӧдӧмсӧ, кор кын му корӧгъясыс швачӧдӧны каскаад, морӧсад, кор бӧрвылад и водзвылад шковгӧны прӧтивниклӧн минаяс да сьӧлӧмад писькӧдчӧ-нюжӧдчӧ сьӧд смертьлӧн кузь кос чуньясыс, некор не гӧгӧрвоны, мый сійӧ лоӧ огневӧй вал бӧрся наступайтӧмыс.

Мӧд батальонса коймӧд ротакӧд тшӧтш огневӧй вал бӧрся муніс аслас разведчикъяскӧд да связистъяскӧд гаубичнӧй батареяса командир капитан Истомин, комбат–3.

Мыльксӧ босьтӧм бӧрын нин сылӧн дзик веркӧссьыс разведчикъяс аддзисны миян пушкаӧн пазӧдӧм немецкӧй блиндаж. Войнас разведчикъяс сійӧс вӧчисны выль ног: дзик мӧдарӧ бергӧдісны амбразурасӧ. Югдігкежлӧ НП вӧлі дась. Ӧні колӧ вӧлі виччысьны, мый немецъяс оз кутны миритчыны выгӧднӧй мыльк воштӧмнас да кутасны зільны бӧр босьтны сійӧс, контратакуйтны. Сідзкӧ, колӧ кутчысьны. А кор миян вуджасны бара наступлениеӧ, полкын эз тӧдны.

Ӧні сідзи и лои. Мыйӧн югдіс, миномётнӧй да артиллерийскӧй батареяяс кутісны сизьдыны мыльксӧ сідзи, кӧть юртӧ эн лэптыв. Ылӧ лыйсьысь немецкӧй артиллерия лыйліс миян тылӧ, корсис миянлысь батареяяс.

Капитан Истомин пукаліс тэчаса немецкӧй улӧс вылын да синсӧ вештывтӧг видзӧдіс стереотрубаӧд да висьтавліс вычислительлы аддзӧм цельяслысь координатъяс. Бӧръя атака дырйи веськыд кисӧ ранитіс, и ӧні ӧшаліс кӧртӧд йылын. А батареяыс сулаліс НП бӧрвылын вит километра сайын.

Недыр мысти комбат заводитіс нуӧдны выль цель кузя пристрелка. Первой лыйсис сӧмын ӧти орудие, мукӧдъяс виччысисны команда. Тані, НП-ын, бура кылӧ ӧрудиеяслӧн укӧстӧмыс, и здук мысти НП весьтті шувгӧмӧн поткӧдӧны сынӧдсӧ да лэбӧны прӧтивниклань сьӧкыд снарядъяс. Прӧтивниклӧн позиция вылын найӧ грымӧдӧны-потласьӧны, а кын сьӧкыд муыс сявкнитӧмӧн кайӧ вывлань да разалӧ.

Блиндажын, кӧбрегын моз, кӧдзыд, уль руа. Немецъяслӧн татчӧ кольӧма ичӧтик кӧрт пач, но луннас ломтыны оз позь, фашист пыр жӧ казялас. Амбразура пыр весиг бинокльтӧг тыдалӧны немецкӧй окопъяс, пулемётнӧй точкаяс, миномётъяслы окопъяс. Налӧн окопъяс сайын сулалӧ ыджыд сикт, кӧні корсюрӧ котралӧны ӧтарӧ-мӧдарӧ немецъяс. Сутки чӧжӧн капитан Истомин удитіс пасъявны карта вылас прӧтивниклысь вель уна цель, нуӧдны на кузя пристрелка. Но главнӧй сьӧкыд уджыс сылӧн вӧлі водзын. Выль наступление заводитчытӧдз сылӧн батареялы пуктӧма мог пӧдтыны немецъяслысь ылӧ лыйсьысь батареясӧ. Тайӧ батареяыс ӧні чӧв олӧ, но пристрелкасӧ нуӧдіс асланыс передньӧй край кузя. Мыйла сідз вӧчисны, Истомин, дерт, важӧн гӧгӧрвоис: кор миян пехота пырас налӧн позиция вылӧ, батарея кутас гыпӧдны на кузя, медым бырӧдны сійӧс. Миян артиллеристъяс важӧн нин тӧдмалісны налысь тайӧ тактикасӧ, и зілисны регыдджык тӧдмавны да корсьны вражескӧй огневӧй позицияяс. Ӧні сідз жӧ: Истомин тӧдіс нин налысь координатъяссӧ. Дивизионса командир сувтӧдіс сы водзӧ мог: буретш сійӧ здукас, кор немецкӧй батареяяс заводитасны лыйсьыны, Истоминлы колӧ аслас батареялысь став би вынйӧрсӧ веськӧдны сы вылӧ, медым пыр жӧ пӧдтыны сійӧс.

Нёльнан орудиесӧ пристреляйтӧм бӧрын комбат сетіс «отбой» команда да боецъяслы тшӧктіс ӧбедайтны: старшина буретш сэки вайис НП-ӧ сёян-юан. Комбат ачыс сёйтӧгыс водіс нар вылӧ, — колӧ вӧлі неуна кӧть шойччыштны. Но шойччыны сылы эз удайтчы. Разведчик Полин, кодӧс комбат ыстыліс батареяӧ гранатаясла, вайӧдіс блиндажӧ кутшӧмкӧ тӧдтӧм мортӧс. Сійӧ вӧлі дӧмаса важ гын сапӧга, киссьӧм ыж ку пася, юр вылас — важ пелюк. Коді видзӧдлас сы вылӧ, пыр жӧ гӧгӧрвоас, мый паськӧмыс оз лӧсяв сылӧн чужӧмыслы. Чужӧмыс сылӧн гӧгрӧс, шыльыд, мичаа бритӧма, лӧсталӧ кумачӧн. Еджыд синкым улас быттьӧ дзир йылын бергалӧны ӧтарӧ-мӧдарӧ вижоват синъяс.

— Капитан ёрт, задание пӧрті олӧмӧ. Вайи ноп тыр «лимонка»... А тайӧс, — индіс дядьӧ вылӧ, — раскысь куті. Телефон провод серти мунӧ батареялань...

Капитан бӧр чеччис, кӧдзыд ваӧн тільыштіс чужӧмсӧ, чышкысис, сэсся матыстчис пӧвъясысь тувъялӧм пызан дорӧ. Видзӧдліс тӧдтӧм морт вылӧ да юаліс:

— Коді тэ? Мый тэ тані миян позицияяс вылысь корсян?

Тӧдтӧм морт чӧв оліс. Капитан бара юаліс:

— Коді тэ? Роч, немец?

— Ме... ме... роч... Муна вӧлі мӧд сиктӧ ныв дорӧ...

Буретш сэки пырис Полин, коді петаліс разведчикъяс дінӧ ӧбедайтны. Сійӧ кыліс бӧръя кывъяссӧ тӧдтӧм мортлысь.

— Эн сӧр, сиктас нуӧдӧ бур туй. А тэ мыйла сэті эн мун, а собин лым пытшті, — горӧдіс Полин. — Командир ёрт, тайӧ дядьӧыс со эсійӧ сиктсьыс. — Полин индіс немецкӧй позициялань. — Старӧста. Ми тайӧс ӧтчыд кыйӧдлім нин, но сэки эз сюр. Пиыс полицейскӧй. Сиктса бабаяс курыд синваӧн бӧрдӧны та вӧсна, кыкнанныс пӧ ая-пиа зверь кодьӧсь.

— Ме тэнсьыд бӧръяысь юала, — кобурасьыс пистолет перйигмоз горӧдіс капитан.

— Да-а! Ме висьтала. Менӧ мырдӧн ыстісны татчӧ. Мун пӧ тӧдмав, кӧні пӧ сулалӧны орудиеясыс. Тэнӧ пӧ нинӧм оз вӧчны, кӧть и кутасны. Со кыдзи пасьтӧдісны. Ме ордын офицеръяс олӧны, сэні кутшӧмкӧ штаб ли мый ли. Ради бога, ен могысь, энӧ виӧй менӧ! Сиктсаяслы ме лёксӧ нинӧм эг вӧч. Ме абу мыжа.

Комбат чӧв оліс, кывзіс. Сэсся матыстчис стереотруба дорӧ да веськӧдіс сійӧс сикт вылӧ. Сэсся корис ас дорас «дядьӧӧс» да тшӧктіс:

— Со тіян сиктыд, он кӧ пӧръясь. Видзӧдлы да висьтав, кӧні тіян керкаыд?

«Дядьӧ» матыстчис стереотруба дорӧ да чуймӧмӧн горӧдіс:

— Ой, кутшӧм матын. Со сикт шӧрас ыджыд керкаыс. Ӧшинь улас кык кыдз пу.

— Ӧти пу йылас скворечник?

— Да.

Истомин нюммуніс аслыс. Тайӧ скворечникыс вӧлі сылӧн мӧд ориентирӧн.

Капитан вештіс сійӧс стереотруба дорысь, ачыс копыртчис окуляр дорӧ. Здук мысти сетіс команда:

— Первое орудие, к бою! Ориентир! Правее! Прицел! 3 снаряда фугасным! Беглый огонь!

Куимнан снарядыс веськалісны стӧча... Керкаыс места вылас эз вӧв, сэтысь кайис тшын сюръя. Комбат корис «дядьӧӧс» видзӧдлыны, но сійӧ эз матыстчы: сідз гӧгӧрвоис, кытчӧ лыйис капитан. «Дядьӧ» бӧрдіс. Капитан тшӧктіс разведчикъясӧс нуӧдны сійӧс полк штабӧ. Найӧ мунісны.

Прӧтивник содтіс лыйсян ӧдсӧ. Ӧні мыльк кузя лыйлісны не сӧмын миномётъяс, но и артиллерия. Корсюрӧ шыасьліс и ылӧ лыйсьысь немецкӧй батарея, лыйсис торъя квадратъяс кузя, — тыдалӧ, пыр на корсис огневӧй позицияяс. А минаяс шпотӧдчисны пыр матынджык и матынджык комбатлӧн НП дорын. Но капитан та вылӧ эз видзӧд: сійӧ виччысис дивизион штабысь вычислительясӧс, кодъяс ваясны тӧдмалӧм цельяс кузя стӧчмӧдӧм координатъяс. Гашкӧ, аски, гашкӧ, аскомысь, ещӧ аскомысь заводитчас выль наступление. Сэк кежлӧ колӧ лоны дасьӧн.

Минаяс то матыстчылісны НП дорӧ, то бӧр ылыстчылісны огневӧй позициялань. Звӧнитіс батареяын старшӧйыс, лейтенант Зимин, мый ӧти немецкӧй снаряд матӧ уси окоп дорӧ да осколокнас веськалі машина моторӧ. И сёрниыс друг ори, батареякӧд йитӧдыс воши.

— Связь! — горӧдіс Истомин. Телефонист уськӧдчис блиндажысь, но муртса на сійӧ кавшасис бруствер вылӧ, немецкӧй миналӧн осколок сатшкысис кокас. Телефонист бӧр шливгис-уси окопас. Сійӧ кӧсйис сувтны кок йылас, но гораа ойӧстіс да лёздіс-уси.

— Связь! — мӧдысь горӧдіс капитан. Уськӧдчис мӧд телефонистыс, коді вӧлі кӧрталӧ ёртыслысь ранитчӧм коксӧ. Но и сылы удайтчис кыссьыны сӧмын сё кымын метра ылнаӧ, — немецкӧй мина и сійӧс суӧдіс да чашйис-косявліс. Телефонистъяс тані сэсся эз вӧвны. Блиндажын вӧлі сӧмын комбатлӧн связнӧйыс. Капитан видзӧдліс сы вылӧ. Сійӧ вӧлі ар кызя кымын томиник коми зон, Алексей Канев, комбатлӧн земляк. Найӧ кыкнанныс вӧлі Сыктыв вожысь. Ӧтчыд, кор Алексей вайис капитанлы доппаёк, воисны сёрниӧ асланыс сикт йылысь. Алексей сэки гарыштіс комбатлы:

— Тӧданныд, капитан ёрт, ми тіян Веняыдкӧд Мизинын ӧти классын велӧдчим...

— Да? — сӧмын шуис капитан, сы вӧсна мый сылӧн Веня пиыс эз нин вӧв ловъя, усьлі нелямын кыкӧд воын Ленинградскӧй фронт вылын. Сылы зэв неокота вӧлі вӧрзьӧдны важ дойсӧ. Да и сійӧ ачыс эз вӧв уна сёрниа. Кор Алексей веськалі тайӧ батареяас, первойсӧ сійӧ вӧлі вычислительӧн отделениеын. Найӧ регыдӧн и тӧдмалісны, мый землякъяс, а кор пӧгибнитіс комбатлӧн связнӧй, Истомин босьтіс Алексейӧс сы пыдди.

Алексей сьӧлӧмсяньыс радейтіс комбатӧс, зілис быдтор вӧчны сы моз жӧ, весиг ветлӧдлыны сы моз. Ӧти видзӧдласыс серти гӧгӧрволіс сылысь кӧсйӧмсӧ, корӧмсӧ.

Капитан Истомин эз вӧв кадрӧвӧй офицерӧн. Войнаӧдз сійӧ уджаліс учительӧн Сыктыв вожса ӧти сиктын. Армияӧ босьтісны война заводитчӧм бӧрас коймӧд луннас. Курсъяс помалӧм бӧрын сійӧ вӧлі вычислительнӧй взводса командирӧн, и во саяс нин командуйтӧ батареяӧн. Командир сійӧ вӧлі стрӧг, но веськыд. Та вӧсна салдатъяс радейтісны сійӧс, ёна пыдди пуктісны, эз ӧтдортчыны сыысь. Шуны кӧ нин, найӧ кыкысь нин мездылісны сійӧс смерть шамырысь. Ӧтчыд кыскисны ӧдва ловъяӧс пазалӧм блиндажысь, мӧдысьсӧ — сотчысь керкаысь, кӧні вӧлі сылӧн НП.

...Алексей зумыда воськовтіс комбатлань да прӧстӧ, не устав серти, шыасис сы дорӧ:

— Позьӧ меным?

Капитан Истомин нинӧм эз удит шуны. Алексей тэрыба бергӧдчис да котӧрӧн петіс блиндажысь. Мунігмозыс нин горӧдіс разведчикъяс землянкаӧ, мый НП-ын комбат колис ӧтнасӧн, мед кодкӧ мунас да пуксяс телефон дорӧ. Мӧд телефонӧн комбат ачыс звӧнитліс дивизион штабӧ да корис ыстыны телефонистӧс да радистӧс.

А Алексей, буракӧ, чужлӧма шудаӧн, — везитӧ сылы. Кор сійӧ петіс наблюдательнӧй пунктысь, на участокын вӧлі лӧнь, — немецъяс бисӧ вуджӧдӧмаӧсь шуйга фланг вылӧ, кӧні оборонасӧ кутіс мӧд батальон. Телефон проводсӧ киас кутіг, Алексей котӧртӧ, усьлӧ, чеччӧ да бара котӧртӧ водзӧ. Шуйга пельпомас ӧшаліс аппарат, а веськыд пельпомас ӧшӧдӧм тыр катушкаыс сьӧкыда дзенӧдіс мышкуас. Ывлаыс кӧдзыд, но Алексейлы жар, ньылӧмыс шорӧн визувтӧ мышку воргаӧдыс. Друг проводыс мыні кисьыс. «Со кӧні орӧма!» — думыштіс. Линия бокас неылын вӧлі сьӧд воронка. «Миналӧн осколокыс орӧдӧма...» — шуис аслыс. Сэсся корсис проводыслысь мӧд помсӧ, йитіс, гартіс изолентаӧн. Киас пӧлялыштӧм бӧрын, кисӧ сюйис пась питшӧгас да кабралыштіс сэні. Сэсся медым прӧверитны линиясӧ, ачыс йитчис да кутіс зуммеритны... Шыасис НП, но сёрнитіс эз комбат, а кодкӧ мӧд. Алексей повзискодь: коді вермис шыасьны комбат пыдди? Но сэк жӧ ачыс гӧгӧрвоис, мый комбат дорас ыстіс разведчикъясӧс. Кӧнкӧ, на пиысь кодкӧ и пукалӧ телефон дорын. Но мыйта кӧть эз горзы «Фиалка!» (тайӧ огневӧйлӧн позывнӧйыс), сійӧ эз шыась, чӧв оліс, — сідзкӧ, кытӧнкӧ водзын ещӧ ӧтилаті орӧма. Шыасис комбат, да тшӧктіс Алексейлы мунны водзӧ, кыдзи позьӧ ӧдйӧджык.

Алексей уськӧдчис водзӧ, весиг эз видзӧдлы бӧрвылас. Друг сійӧ кыліс миналысь шутьлялӧм шысӧ. Алексей уськӧдчис муас, чужӧмнас ляскысис му бердас да сьӧкыда лолаліс. Неуна куйлыштіс, шойччыштіс да бара уськӧдчис водзӧ, котӧртіс-котӧртіс да бара сунгысис муас. Минаяс ли, снарядъяс ли ӧні шковгисны то бӧрвылас, то водзын, то бокъясас. «Тайӧ абу минаяс, а орудиелӧн осколочнӧй снарядъяс, — думыштіс. — Миналӧн воронкаыс ичӧтджык...» Лыйсьӧны пыр ӧтмоза, неуна коставлӧмӧн, — тыдалӧ, тылысь корсьӧны миянлысь коммуникацияяс да батареяяслӧн огневӧй позицияяс.

Друг грымӧбтіс сы бокын матын. Кор сійӧ воис ас садяс, первой гӧгӧр видзӧдліс. Тыдалӧ, взрывыслӧн гыыс шыбитӧма сійӧс бокӧ. Пельясас гораа чунгис. Бокынджык тыдаліс ыджыд сьӧд гӧп, му корӧгъясыс тупкӧмаӧсь матігӧгӧр еджыд лымсӧ сьӧд муӧн.

Алексей пуксис, видліс ассьыс ки-коксӧ. Первойсӧ думыштіс, мый сійӧс чорыда ранитіс, но киясыс вӧліны дзоньӧсь, ыджыд дойыс некӧн эз кыв, сӧмын мышкуас ёнтіс.

Алексей мездысис катушка волысъяссьыс, пуктіс сійӧс ас бокас орччӧн да арыштіс синъяссӧ, чуймис. «Со мый вӧлӧма! — думыштіс сійӧ. — Катушка тэ менам, катушка! Тэ менсьым смертьсӧ ас вылад босьтӧмыд! Видзӧдтӧ, гадыд, мый вӧчӧма?..» Катушкасьыс проводсӧ вӧлі джынйӧдзыс орӧдӧма, быттьӧ нарошнӧ пуртӧн вундӧма! Тыдалӧ, ыджыд ён осколок веськалӧма. — Вот тайӧ да-а! Со кӧні смертьыд вӧлӧма!.. — ас кежас сёрнитіс сійӧ. Кутшӧма сійӧ мудзис, мыйта мучитчис, терпитіс, а медся ыджыд лёкыс со кытчӧ суис. Мый вӧчны? Сылӧн аслас тӧдлытӧг тюрӧбтіс синваыс. Сэсся турдӧм кияснас кутіс разьны катушкасӧ да перъявны орӧм проводъяссӧ. Пукалігас сылӧн бӧр кӧдзаліс мышкуыс, кынмисны киясыс, но уджавны колӧ! Сы пыдди некод оз вӧч. Сійӧ пӧлявліс кисӧ, сюйліс пась питшӧгас да чабравліс. Сэсся гач зепсьыс перйис перочиннӧй пурт да заводитіс весавны провод помъяссӧ да йитлыны найӧс. Уна-ӧ кадыс коли, сійӧ, дерт, оз тӧд. Кисӧ шонтыштӧм бӧрын йитӧм местаяссӧ заводитіс гартлыны изолентаӧн, но и лентаыс быри. Мый вӧчны? Сэсся перйис индивидуальнӧй пакет да бинтнас кутіс гартлыны йитӧминъяссӧ. Кор помаліс тайӧс, Алексей бӧр гартіс проводсӧ катушкаас. Сувтіс, неуна чеччалыштіс кок йылас, сэсся катушкасӧ волысаліс веськыд пельпомас, а аппаратсӧ шуйгаас. Босьтіс киас линия проводсӧ да уськӧдчис котӧртны водзӧ. Ӧні котӧртіс эз нин веськыда, а кытшовъясӧн. Но проводыс кисьыс бара уси. Сійӧ бергӧдчыліс, корсис проводсӧ, чабыртіс киас да сідз кутіс котӧртны. Регыд мысти проводыс бара ори, а мӧдар помыс, кӧть кутшӧма эз корсь, эз сюр. Сэки Алексей йитіс аслас катушкаысь проводсӧ. Но тырмас оз? Колӧ тырмыны! Батареяӧдз, колӧ лоны, абу нин ылын. Да и кӧнкӧ локтӧны сылы воча...

Ывлаас век на ыджыдаліс кӧдзыд, чушкис чизыр тӧв, но Алексей кӧдзыдсӧ быттьӧ эз кыв. Сійӧ ӧні думайтіс сы йылысь: регыд локтас батареяӧ, сэні шонтысяс, юас пӧсь-пӧсь чай да бӧр мунас наблюдательнӧй пунктӧ комбат дорӧ. Но сійӧс суис выль неминуча. Сійӧ локтіс тӧдса ичӧтик ю дорӧ, кодӧс наступайтігас вуджисны йи вывті. А ӧні? Ӧні юыс вӧлі восьса километра кымын улын и вылын. Юас бовъялісны сӧнік пиын йи пластъяс. Тыдалӧ, немецкӧй артиллерия чорыда тані уджалӧма?! Юыс кӧть и векньыд, но век жӧ ю, восьса, и сійӧ лоис Алексейлы бара мытшӧдӧн. Быттьӧ немецъяс нарошнӧ потшӧмаӧсь сылысь туйсӧ. Восьсаинӧдыс юсьыс кайӧ еджыд ру, быттьӧ турун сотӧны. Кытшовтны кӧ, ковмас вель ылӧдз. Улӧдз лэччыны, либӧ вылӧ кайны, — сэки батареяӧдзыс проводыс оз судз. Локтӧны оз меным воча? Гашкӧ, найӧ пӧгибнитісны? Мый вӧчны? — кымынӧдысь нин талун юаліс Алексей.

Алексейлы уси тӧд вылас, кыдзи сійӧ торйӧдчис комбаткӧд. Капитан, дерт, сы пыдди вермис ыстыны любӧй разведчикӧс. Сэки эськӧ сылы лои яндзим ёртъясыс водзын... «Видзӧд пӧ, комбат аслас борд улын видзӧ ассьыс земляксӧ!..» Ӧні сійӧ асьсӧ весиг ошкис, мый вӧзйысис ачыс да вермас веськыда видзӧдлыны синмас и комбатлы аслыс, и ёртъясыслы...

Думайтны нинӧм, колӧ водзӧ мунны. Алексей корсис кузь бедь да лэччис берег дорӧ. Сэні неуна сулыштіс, разьыштіс катушкасьыс проводсӧ, сэсся видзӧдліс ю вылас: артыштіс, кыдзи вуджны?! Ковмас чеччавны пласт вылысь пласт вылӧ. Алексей йӧткыштчис да чеччыштіс матысса пласт вылӧ. Сійӧ пӧлыньтчис, но Алексей удитіс чеччыштны мӧд вылӧ, коймӧд вылӧ. Гын сапӧгыс сылӧн пыр жӧ йизис, лоис вильыд. Юыс абу паськыд, но джуджыд-ӧ? Со берегыс матын нин, воськов куим-нёль... Алексей чукӧртіс став вынсӧ да чеччыштіс водзӧ. Но пластыс вӧлӧм ичӧт да эз кут сійӧс. Пластыс пӧлыньтчис, и Алексей вильдіс да бузгысис ваас. Йиа ваыс сотыштіс сійӧс, быттьӧкӧ пуан ваӧн. Кор сувтіс кок йылас, ваыс сылы лои морӧсӧдзыс. Первой корсис шапкасӧ, — слава богу, сійӧ абу на ёна удитӧма кӧтасьны. Сэсся, йи торъяссӧ кияснас вешталіг, Алексей писькӧдчис береглань. Дзик берег дорас йиыс вӧлӧма дзонь, и сійӧ гыжъясис-парсасис, но век жӧ кайис берегас. Сы шуд вылӧ, берегыс вӧлі ляпкыд. Сылӧн чунь помъясысь петіс вир. Кайис берег вылӧдз да бадь куст дорӧ, кытчӧ тӧлыс эзджык веськав, водіс гатшӧн, лэптіс кокъяссӧ, медым лэдзны гын сапӧгъяссьыс васӧ. Сэсся чеччис, зэлӧдіс проводсӧ да кӧрталіс бадь кустас, мед сійӧ эз вӧй ваас, да мӧдӧдчис водзӧ. Восьлавны вӧлі сьӧкыд, — паськӧмыс лоис дзескыд, сійӧ йизис, эз кут куснясьны. Быд воськолын сійӧ чегъяссис да зурӧдіс яяс, быттьӧ ёсь пуртӧн. Алексейлӧн дзикӧдз быри эбӧсыс, вильдіс да уси. Кӧть кыдз эз зіль сувтны, но эз вермы. Тадзи и сійӧс аддзисны батареясянь воча воысь связистъяс. Найӧ, дерт, пыр жӧ гӧгӧрвоисны, мый лоис Алексейкӧд.

...Кыдзи Алексей веськалі батареяӧ, омӧля помнитӧ, кыскисны сійӧс, быттьӧ йи ёкмыльӧс, плащ-палатка вылын. Но бура помнитӧ: мыйӧн пыртісны сійӧс ыджыд да шоныд землянкаӧ, сійӧ пыр жӧ грымгыси-уси, быттьӧ шыбитісны сэтчӧ йи ёкмыль. Пӧрччӧдӧм йылысь сёрниыс эз мун: кыдз эськӧ ӧдйӧджык мездыны йи пытшсьыс. Кодкӧ вайис ыджыд пурт да заводитісны вундавны паськӧмсӧ, — тадзи перйисны йи пытшсьыс. Жара ломтысис кӧрт пач. Старшина пыр жӧ вайис выль кос паськӧм.

Батареяын старшӧйыс лейтенант Зимин тшӧктіс старшиналы кӧть кытысь, а судзӧдны спирт. Регыд мысти старшина вайис спиртсӧ (бур старшиналӧн век быдтор запасын эм!). Санинструктор яй сотчытӧдзыс зыраліс гӧгӧр, сэсся пасьтӧдіс кос паськӧмӧн. Старшина ачыс стӧкан джынсяысь унджык спирт кисьтіс вомас... «На ю, шонтысь... Сӧмын эн висьмы», — вомас кисьтігӧн шуаліс сійӧ. Сэсся водтӧдіс нар вылӧ да ёна шебралісны.

Алексейӧс вайӧдӧм бӧрын лейтенант Зимин пыр жӧ звӧнитіс комбатлы да висьталіс Алексей йылысь, но сійӧ нинӧм эз шу, эз чуймы, быттьӧ ставыс сідзи и колӧ. Сійӧ сэк жӧ сетіс команда «батарея, к бою!» Да и дивитны сійӧс таысь эз позь, — сылӧн кадыс эз вӧв: немецъяс танкъясӧн уськӧдчӧмаӧсь контратакаӧ. Колӧ вӧлі водзсасьны, не лэдзны найӧс мыльк вылас, а то ставыс вошӧ весьшӧрӧ. Нёльнан орудиеыс батареяын заводитісны гыпйӧдлыны ӧтпырйӧ, и снарядъясыс налӧн гораа шувгӧмӧн тювисны фашистъяслань. Гыпӧдіс залп бӧрся залп. Кӧнкӧ водзынджык клопйӧдлісны полкӧвӧй миномётъяс, бокынджык — дзужгисны «катюшаяс».

Передӧвӧйын мый вӧчсис, тасянь эз тыдав, но став сертиыс тӧдчис, мый сэні эз вӧв кокни. Час кык мысти ставыс бӧр лӧнис, фашистъясӧс бӧр лои вӧтлӧма асланыс позиция вылӧ. Но тайӧн, колӧ чайтны, оз помась: фашистъяс оз лэдзчысьны, а гашкӧ, гырысьджык вынъясӧн уськӧдчасны бара.

Землянкаӧ шонтысьны пырисны батареецъяс, накӧд тшӧтш и лейтенант Зимин. Пыригмозыс на сійӧ горӧдіс:

— Кыдз нин мый миян геройным?

— Со нар вылын чискӧ-узьӧ... — кодкӧ вочавидзис сылы, но Алексей шыасис ачыс.

— Тані ме, лейтенант ёрт! — да юрсӧ кыпӧдіс вылӧ.

— Но, кыдзи-мый? Бӧр ловзин?

— Ловзи, буракӧ.

— НП-ӧ верман мунны?

— Дерт жӧ, верма!

— Комбат рация корис. Сійӧ надёжнӧйджык пӧ. Со ме вайи боепитание взводысь. Радистыс сэні нин.

— Эм рация нуны! — нар вывсьыс чеччигмоз горӧдіс Алексей.

Сы вылын ӧні ставыс вӧлі выль: и гимнастёркаыс, и гачыс, и гын сапӧгыс, и весиг шапкаыс. Пасьыс неуна вӧлі ыджыдджык, но нинӧм. Аттьӧ старшиналы, сійӧ зільӧма. Сійӧ пельпом вылас ӧшӧдіс рациясӧ, прӧщайтчис ёртъясыскӧд и петіс землянкаысь. Сыкӧд тшӧтш НП-ӧ муніс выль телефонист.

Ӧні ывлаын тӧлыс лӧньыштӧма. Сынӧдыс вӧлі сӧдз, сӧстӧм. Кор локтісны ю дорас, эз нин кут веськыдавны, лэччыліс улӧджык. Вуджисны важ чорыд йи вывті, сэсся бӧр локтісны провод дорас. Телефонист мунігмозыс видлаліс проводлысь йитӧминъяссӧ да бинта гӧрӧдъяссӧ вежлаліс изолентаӧн.

Регыд мысти рӧднӧй гаубицаяс бара заводитісны частӧ гыпйӧдлыны, и на юр весьтті шувгӧмӧн тӧвзисны снарядъяс. Буракӧ, немецъяслӧн оз пукавсьы места вылас.

Алексей Каневлы сьӧлӧм вылас вӧлі долыд. Сійӧ тэрмасис наблюдательнӧй пунктӧ, аслас комбат дорӧ, медым доложитны сылы сетӧм приказсӧ олӧмӧ пӧртӧм йылысь.