ТАНКИСТЪЯС

Миян ОГИПТАД, мӧд ногӧн кӧ, отдельнӧй гвардейскӧй истребительнӧй противотанкӧвӧй артиллерийскӧй дивизион, пырӧ вӧлі гвардейскӧй танкӧвӧй армияӧ. Тайӧ армияыслӧн ӧти корпус, сы лыдын и миян дивизион, отсаліс пехоталы орӧдны прӧтивниклысь чорыда крепитӧм оборонительнӧй рубеж да вуджны сэті наступлениеӧ. Первойя жӧ косяс дивизионса командирӧс ранитіс, и дивизионӧн командуйтны ковмис босьтчыны меным, штабса начальниклы, кытчӧдз оз ыстыны выль командирӧс. Дивизион наступайтіс танкъяс бӧрся пехотакӧд орччӧн, и ёнджыкасӧ орудиеяссӧ ковмис расчётъяслы йӧткыны-нуны киясӧн. А ЗИС–3 абу кокни орудие, сійӧс он ӧткодяв «сорокопяткакӧд», кодӧс артиллеристъяс шуисны ас костаныс «прощай, Родина»-ӧн. Машинаяс волісны миян дорӧ сӧмын сигнал серти.

Наступайтім сьӧкыда, лоины гырысь воштӧмъяс и пехоталӧн, и танкистъяслӧн, и миян, противотанкистъяслӧн. Мӧд луннас миян наступайтан ӧдыс ёна чиніс и, мӧдарӧ, прӧтивник водзсасис пыр чорыдджыка, тыдалӧ, отсӧг вылӧ воисны выль вынъяс. Наступайтысьяс зурасисны выль крепыд оборонительнӧй рубежӧ. Пехоталы быть лои сувтны, сійӧ «водіс», кутіс окопайтчыны. Команда серти сувтісны да саймовтчисны дзебасъясӧ танкъяс, но ӧти танк вӧлі нин прӧтивниклӧн окопъяс дорас. Регыд пемдіс. Войнас артиллеристъяс дасьтісны КП. Тадзи коли лун-мӧд.

Ӧтчыд асывнас водз разведчикъяс вайисны КП-ӧ танкистӧс. Сійӧ, буракӧ, кыссьӧма передӧвӧйсянь да усьӧма разведчикъяс окопӧ.

Сы вылӧ видзӧднысӧ вӧлі страшнӧ. Чужӧмыс кытсюрӧ сотчӧма, кельыдлӧз синъясыс пыдӧ вӧйӧмаӧсь, еджгов юрсиыс гартчӧма пратьясӧн. Гимнастёрка мышкас дзонь местаыс абу, тыдалӧ, ранаыс уна. Миян врач пыр жӧ вӧчис сылы кык укол. Кор ме видзӧдлі сы вылӧ, ме сійӧс пыр жӧ тӧді. Тайӧ вӧлі менам земляк, сержант Есев, Эжва вожса коми зон, кодкӧд ми кольӧм во тӧдмасьлім армейскӧй передвижнӧй госпитальын. Сержант воис ас садяс, и медводдза кывъяссӧ сійӧ горӧдіс комиӧн: «Юны, юны!..» Ме висьталі разведчикъяслы, мый танкист корӧ ва, и найӧ здук мысти пыртісны салдатскӧй пӧртйӧн тырыс ва. Сержант горша дыр юис, а ваыс вомкӧтшъясӧдыс тюрис-визувтіс морӧс вылас. Блиндажын йӧзыс чукӧрмис уна. Быдӧнлы окота вӧлі тӧдны, кыдзи татчӧ веськаліс сержант-танкист. Артиллеристъяс пиысь кодкӧ удитӧма нин звӧнитлыны танкистъяслы, и татчӧ пыр жӧ локтісны сержантлӧн ротаса командирыс капитан Серов да сыкӧд тшӧтш нӧсилкаясӧн некымын танкист.

...Капитан Серов висьталіс, мый сержант Есев буретш сійӧ танксьыс, коді наступайтігас воис прӧтивниклӧн позицияясӧдз. Ми асьным аддзылім, кыдзи танк лыйсигтыр ветлӧдіс сэті, сэсся друг сувтіс: ни водзӧ ни бӧрӧ. То ли сійӧ мина вылӧ веськаліс, то ли снаряд орӧдіс гусеницасӧ, ни Серов, ни ми эгӧ тӧдӧй. Но миянлы ставнымлы вӧлі гӧгӧрвоана, мый машинаыс кӧть оз вӧр, экипажыс ловъя: танк лыйсис пушкаысь и пулемётысь. Танкистъяс да артиллеристъяс следитісны сы бӧрся.

Фашистъяс кутісны оборонасӧ ыджыд сикт таладорын. Сикт гӧгӧрыс сулалісны артиллерийскӧй да миномётнӧй батареяяс, сикт таладорас да бокъясас чурвидзисны дзотъяс, блиндажъяс, пулемётнӧй ячейкаяс.

Кыдзи мездыны пикӧ воӧм танкистъясӧс? Та йылысь думайтісны не сӧмын командиръяс, но и став боецъясыс, и танкистъяс, и артиллеристъяс.

Танкӧвӧй ротаса командир капитан Серов йитчыліс рация пыр бригадаса командир полковник Шаровкӧд да корис сійӧс лэдзны ветлыны аслас ротаса кольӧм танкъясӧн экипаж дорӧ, но полковник эз лэдз: воштан пӧ ӧстатки танкъяссӧ. Полковник тшӧктіс думыштны мыйкӧ мӧдтор. А Т–34 биа кытшын вӧлі коймӧд лун нин. Танк эз нин лыйсьы ни пушкаысь, ни пулемётысь, — сідзкӧ, налӧн быри боеприпасыс... Мый вӧчны? Сэки капитан Серов думыштіс ыстыны асъя войнас автоматчикъясӧс. Сійӧ котыртіс танктӧг кольӧм танкистъясысь да пехотаысь быдса взвод. Автоматчикъяс водз асывнас петісны бруствер сайӧ да мӧдӧдчисны танклань, но буретш сэки разведчикъяс окопӧ уси сержант Есев. Кор воис ас садяс да сылы висьталісны, мый найӧс мездыны ыстісны автоматчикъясӧс, сійӧ чирӧм гӧлӧсӧн шӧпкӧдіс:

— Сёр нин... Мед оз мунны...

Автоматчикъясӧс бергӧдісны бӧр. Коді вӧлі КП-ын, ставӧн сувтісны, ланьтісны, коді куритчис — шыбитіс чигаркасӧ. Есев бара корис ва, бара юис, юис уна, сэсся корис ас дорас матӧджык Серовӧс да заводитіс висьтавны, мый лоис сыкӧд да сылӧн ёртъяскӧд. Ӧні вежӧрыс вӧлі ясыд, сёрнитіс ньӧжйӧ, тэрмасьтӧг, сідзи, быттьӧ сылӧн ёртъясыс сулалісны сы син водзын дзик ловъяӧсь.

* * *

...Экипажас вӧліны нёльӧн: танкса командир лейтенант Сомов, механик-водитель старшина Валитов, татарин, стрелок-радист сержант Есев, коми, да заряжающӧй Кисин, чуваш. Кыдз шуласны, интернациональнӧй экипаж... Кӧть экипажас ӧти морт эз тырмы, шуисны петны бойӧ сытӧг: справитчам пӧ. Наступлениеӧ петігӧн Сомов эновтіс командирскӧй местасӧ да пуксис орудие дорӧ, а сержант Есевлы тшӧктіс пуксьыны пулемёт дорӧ.

Наступайтны петісны пехоталӧн сигнал серти ставӧн ӧтпырйӧ. Танкӧвӧй рота наступайтіс «ромбӧн». Немецъяс пӧшти ӧтпырйӧ стройысь петкӧдісны кык танк, — найӧ сотчыны эз сотчыны, но наступайтны водзӧ эз вермыны: буракӧ, орины гусеницаясыс или лои мыйкӧ мӧдтор. Мукӧдыс лыйсигтыр мунісны водзӧ. Лейтенант Сомовлӧн танкыс ыджыд ӧдӧн ордйис мукӧдъяссӧ да тӧвзис водзӧ. Кӧть сьӧкыда, ыджыд воштӧмъясӧн, но век жӧ удайтчис босьтны прӧтивник обороналысь воддза рубежсӧ. Войнас наступайтысьяслӧн матысмисны тылӧвӧй подразделениеяс, танкистъяс заправитчисны. Войыс пемыд, водзӧ мунны вӧлі оз позь. Аскинас югдігас наступайтысьяс уськӧдчисны водзӧ, но наступайтан ӧдыс эз нин вӧв важкодь. Найӧ зурасисны прӧтивниклӧн ёна крепитӧм выль оборонительнӧй рубеж сайӧ. Немецъяс водзсасисны чорыда, буракӧ, налы отсӧг вылӧ воисны выль вынъяс.

Кор прӧйдитны позьтӧм би улын пехота «водіс» да кутіс окопайтчыны, полковник Шаров сетіс танкистъяслы приказ бӧр бӧрыньтчыны исходнӧй позицияяс вылӧ да сайӧдчыны дзебасъяс сайӧ, маскируйтчыны. А лейтенант Сомов, буракӧ, эз кыв тайӧ приказсӧ да орудиеяссьыс шковгигтыр тӧвзис водзӧ. Со сійӧ локтіс нин прӧтивниклӧн траншеяяс дорӧдз. Немецъяс кутісны котравны окопъясӧдыс. Сомов зілис горӧдны Валитовлы, медым сійӧ нуӧдіс танксӧ окопъяс пӧлӧныс, но шумысла Валитов нинӧм эз кыв: шлемофоныс кыкнанныслӧн вӧлі торксьӧма. Сэк механик-водитель ачыс нин гӧгӧрвоис, мый колӧ вӧчны. Танк заводитіс «утюжитны» окопъяссӧ. Немецъяс мыйкӧ лёк ногӧн горзісны, зілисны петны окопсьыс, но Есевлӧн пулемётысь пуляясыс быдлаысь суӧдлісны найӧс. А выліас, башняын, лейтенант Сомов дугдывтӧг гыпӧдіс пушкасьыс, пазӧдаліс паныдасьлысь пулемётнӧй ячейкаяс, дзотъяс. Кисин муртса удитіс зарадитавны пушкасӧ.

Танк вель дыр нин «утюжиталіс» окопъяс, но ӧти дзот некыдзи эз ланьт, дугдывтӧг сяргӧ пулемётысь. Сэки Валитов веськӧдіс танксӧ сылань. Содтіс газсӧ, танк уськӧдчис водзлань, петіс траншеяысь да кайис вылӧ, да ыджыд ӧдӧн кавшасис дзот вылӧ. Танк улын мыйкӧ кажакыліс, Валитов крута бергӧдіс танксӧ места вылас. Танк кутіс вӧйны. Сэки Валитов ещӧ содтіс газсӧ, и танкыс петіс гуысь, вӧвлӧм дзотысь, буретш сэтысь, кытысянь неважӧн на сяркӧдіс пулемёт. Ӧні сійӧ ланьтіс пыр кежлӧ.

Пуксис рыт, сэсся пемдыны кутіс. Сомов думыштіс бӧр бергӧдчыны асланым позициялань, но танк улын друг лёкысь гымӧбтіс: то ли ыджыд противотанкӧвӧй мина вылӧ веськаліс, то ли веськалі ыджыд снаряд. Танк дрӧгмуні да сувтіс. Войыс передньӧй край весьтын вӧлі югыд: прӧтивник ӧшліс парашютъяс вылӧ югыд ракетаяс. Прожекторъяс кырлӧдлісны пемыд сынӧдсӧ, орудие стволъясысь петавлісны кузь гӧрд биа кывъяс. Кось муніс и войнас. Прӧтивниклӧн да миян артиллерия костын муніс войся дуэль.

А Сомовлӧн танк сулаліс, эз вӧр, пытшкас вӧлі чӧв-лӧнь, сӧмын ичӧтик газ вылын ньӧжйӧник мургис моторыс. Валитов чужӧм вывсьыс шлемнас чышкис пӧсьсӧ, сэсся негораа, быттьӧ аслыс, шуис:

— Но вот, другъяс, и воим...

Сылысь кывъяссӧ кывлісны, дерт, и ёртъясыс, но некод нинӧм эз шу. Танкын вӧлі чӧв-лӧнь. Сӧмын неуна бӧрынджык Сомов гажаа эскӧдіс:

— Энӧ на юрнытӧ ӧшӧдӧй... Мыйкӧ думыштам на,.. — шуис Сомов да лэптыштіс люк вевтсӧ: кӧсйис петавны да видзӧдлыны, мый лоис танкыскӧд. Но люк вевтас да башняас сэк жӧ шпотӧдчыны кутісны разрывнӧй пуляяс: туп-туп-туп... Сідзкӧ, сэті петӧм йылысь думайтны вӧлі нинӧм: танксӧ немецъяс босьтӧмаӧсь кытшӧ. Кор передӧвӧйын лӧньыштіс (тыдалӧ, немецъяс водісны шойччыны), Сомов век жӧ петаліс аварийнӧй улыс люкӧдыс видзӧдлыны, ёна-ӧ жугаліс танкыс. Лейтенант, дерт, пыр жӧ аддзис: орӧма шуйга гусеницаыс: усьӧма кык трак. Тані, фашистъяс кытшын, танксӧ ремонтируйтӧм йылысь и сёрниыс оз вермы лоны. Ковмас виччысьны отсӧг. Но кор сійӧ локтас? Да и локтас-ӧ? Лейтенант бӧр пырис танк пытшкас, ӧзтіс ичӧтик лампочка, пуксис аслас местаӧ, пӧрччис шлемсӧ да шыасис ёртъясыс дорӧ:

— Миян батюшконым (тадзи сійӧ шуис танксӧ) эз ӧтчыдысь миянӧс мездыв смерть киясысь. Ӧні сійӧ ачыс шедіс лэчкӧ. Орӧма шуйга гусеницаыс. Матігӧгӧрын абу весиг гоз-мӧд трак. Асьныд тӧданныд, фашистъяс кытшалӧмаӧсь миянӧс, кутӧны би улын. Чайта, гӧгӧрвоанныд, мый тані сійӧс ремонтируйтны ми огӧ вермӧй... Но ме ті моз жӧ надейтча: миянӧс оз вунӧдны, мездасны. А миян танк мыйкӧ дыра кежлӧ петіс стройысь, да пока эз на лок отсӧг, ӧнісянь сійӧ лоӧ босьтны позьтӧм крепостьӧн. Кутам водзӧ косясьны, бырӧдавны фашистскӧй гадъясӧс. Ме думысь, гӧгӧрвоана ставыс?

Экипажлы, дерт, ставыс вӧлі гӧгӧрвоана. Найӧ мӧд ног эз и думайтны, ставыс ӧтмоза надейтчисны, мый найӧс коркӧ да коркӧ мездасны ёртъясыс.

Сомов неуна чӧв олыштіс, тыдалӧ, мыйкӧ думайтіс, сэсся шмонитӧмӧн горӧдіс:

— Казакъяс, талун старшина миянлы ӧбедтӧ, буракӧ, оз вай. Пока миян неуна эм прӧст кад, вай корсялӧй «сидӧръястӧ»^Тадзи серам сорӧн шулісны вещмешӧкъяс./^ да перйӧй НЗ. Кӧть сійӧ и вӧрзьӧдны позьтӧм, миянлы талун, чайта, позяс вӧрзьӧдны.

Вещмешӧкъясысь ставӧн перйисны сукар, тушонка банка. Сомовлӧн аслас НЗ-ыс эз вӧв (сійӧ сы йылысь ёна некор эз тӧждысьлы), и ӧні нюжӧдліс паньсӧ то ӧти дорӧ, то мӧд дорӧ. Сёйны сёйисны, колӧ вӧлі юны, ваыс кольӧма этша, сӧмын ӧти фляга. Пожъялісны вомнысӧ и тырмас, колӧ видзны васӧ. Танк вывсьыс ва баксӧ немецкӧй бронебойнӧй снаряд сквӧзь розьӧдӧма, и ваыс сэтысь ставнас петӧма. Сёйигмозыс Сомов висьталіс ёртъясыслы ас олӧмсьыс разнӧй гажа историяяс, кодъяс вӧліны войнаӧдз, и найӧ жугыля нюмъялісны. Сэсся Сомов друг лоис серьёзнӧй да юаліс:

— Интереснӧ эськӧ тӧдны, кутшӧм талун Совинформбюролӧн сводкаыс? Рация миян оз уджав, газетъяс оз вайны, сідзкӧ, ми сійӧс ог тӧдӧй. А мый вӧчим тані ми? Вай видзӧдлам. Колӧ шуны, мый талун уджалім эг лёка... Валитов, кылан? — сійӧ мыйкӧ буркнитіс вомгорулас. — Ӧти-кӧ, ӧзтім ӧти танк. Мӧд-кӧ, пазӧдім нёль дзот да блиндаж. Коймӧд-кӧ, кык противотанкӧвӧй орудие. Некымын пулемёт... Сідз, Валитов? И Валитов утюжиталіс окопъяс, кӧні вӧліны немецъяс... Уна-ӧ? Код тӧдас? Вот тадзи, другъяс. Энӧ вунӧдӧй, гашкӧ, коркӧ ковмас доложитны начальстволы. А ӧні, другъяс, со мый ме шуа тіянлы: немецъяслы кӧ век жӧ удайтчас ӧзтыны миянлысь танкнымӧс, ми кодъям сы улӧ окоп-гу... Ковмас кӧ, и сэтысянь кутам водзсасьны...

Аварийнӧй улыс люк пыр танкистъяс лэччисны танк улас да заводитісны уджавны. Уджалісны водсӧн, танк улын сувтсӧн он сувт. Кодйысисны ичӧтик салдатскӧй зыръясӧн, пуртъясӧн, черӧн, куш киясӧн, — мукӧд шанцевӧй инструментъяс эз вӧвны, да и вӧлі кӧ, уджавны наӧн он вермы. Ой, кутшӧм сьӧкыд кодйысьны танк улын! Ньылӧмыс визувтіс шорӧн, но нинӧм он вӧч! Колӧ! Кытчӧ мусӧ воштыны? Шыблавны ортсӧ он вермы: чургӧдан юртӧ, фашистскӧй пуля розьӧдас. Ковмис мусӧ тэчавны, мый позьӧ, гусеница бокъясас, а мыйкӧ мында танк пытшкас.

Куимӧн уджалісны уліас, ӧти дежуритіс танк пытшкас. Кор фашистъяс казялісны, мый роч танкистъяс мыйкӧ вӧчӧны танк улас, найӧ ещӧ на ёнджыка заводитісны лыйсьыны да шыблавны гранатаяс. Но танк сулаліс: сылысь бронясӧ пуляӧн да гранатаясӧн, весиг осколочнӧй снарядӧн он писькӧд!.. Первой дежуритіс ачыс командир Сомов. Сійӧ синсӧ эз вештыв перископ окуляр дорысь. Кор казявліс немецъяслысь ноксьӧм, сійӧ сэтчӧ веськӧдліс снаряд либӧ пулемётнӧй ӧчередь. А лыйсис сійӧ бура. Ӧні со бара горӧдіс уліас:

— Содтӧй асланыд сводкаӧ ещӧ ӧти противотанкӧвӧй орудие... Сійӧс веськӧдӧны вӧлі буретш ми вылӧ... Ковмис ӧлӧдны...

Лейтенантӧс вежис Кисин. Немецъяс лӧньыштісны, буракӧ, сёйны кутісны... Но корсюрӧ грымӧбталіс пушкаысь и Кисин. Регыд мысти сійӧ юӧртіс, мый пазӧдіс полевӧй кухня.

Рыт кежлас окоп-гу вӧлі дась. Экипаж пуксис шойччыштны. «Да эськӧ юыштны ӧні!».. — быдӧн думыштіс, но гораа шуны некод эз кут. Нем виччысьтӧг танк пытшкын друг грымӧбтіс да кыліс Кисинлӧн горӧдӧм... Мый лои? — чуймисны ставӧн. Медводз уськӧдчис танк пытшкӧ сержант Есев. Сылы пыр жӧ синмас шыбитчис, мый Кисинлӧн чужӧмыс ойдӧма вирӧн, синъяс местаас — гӧпторъяс. Шуйга киыс ӧшаліс плеть моз. Жугалӧм перископ розьӧдыс вывлань кайис загӧр тшын.

Есев эз на тӧд, мый лоис тані, но пыр жӧ гӧгӧрвоис. Неминучаыс локтӧма ортсысянь. Сійӧ друг ичӧтика лэптыштіс люк вевтсӧ. Танк дорсянь котӧртӧ вӧлі ичӧтик тушаа кызіник немец. Есев сетіс автоматысь ӧчередь. Фашист суніс муас, эз кут вӧрны... Медым прӧверитны асьсӧ, сійӧ сетіс мӧд ӧчередь.

Кисин кималасӧн веськыд кинас малыштіс Есевлысь пидзӧссӧ да ньӧжйӧник юаліс:

— Витя, тайӧ тэ? Ме нинӧм ог аддзы... Виин гадӧс?

Есев бӧр мичаа тупкис люксӧ. Пуляяс век ӧтмоза швачӧдісны башняӧ, быттьӧ таркӧдісны барабанӧ. Есев копыртчис Кисин дорӧ.

— Мӧдар югыдас мӧдӧді пеж гадӧс... А кыдзи тайӧ лои, Федя?

— Казялі ме сійӧс сёрӧн. Сійӧ, гадыд, танк вылӧ кавшасьӧма, кӧсйӧма, буракӧ, люк вевтсӧ восьтны да мина шыбитны. Но люктӧ ӧд он на сідз восьты. Ме буретш сэки перископӧс лэдзи, а сійӧ, гадыд, перископ розьӧдыс лэдзӧма граната... И со мый лои. Ме ачым мыжа, муртса тіянӧс эг подведит... — мыкталігтыр висьтасис Кисин.

— Витя, друг, ме нинӧм ог аддзы. Зэв нин чорыда резьӧбтіс. Кӧртав. Кыла, вирыс тюрӧбӧн визувтӧ морӧсӧд... — сійӧ, буракӧ, ачыс эз на тӧд, мый синъясыс абуӧсь.

Есев уліысь чукӧстіс Сомовӧс, корис пыравны танк пытшкас. Мӧдысь сійӧс корны эз ковмы, лейтенант быттьӧ сэні и вӧлӧма. Найӧ Есевкӧд кольӧм ванас мыськисны Кисинлысь чужӧм вывсьыс вирсӧ, топыда бинтуйтісны синъяссӧ да лэччӧдісны окоп-гуӧ. Танкысь перйисны да лэччӧдісны гуӧ ӧти пуклӧс да пуксьӧдісны сэтчӧ.

— Ми тэнсьыд синъястӧ, Федя, топыда кӧрталім, — такӧдіс Сомов. — Энӧ повзьӧй, мый онӧ аддзӧй...

Кисин чӧв оліс, буракӧ, воштіс садьсӧ. Дыр-ӧ оліс сійӧ, экипаж пиысь некод оз тӧд, — найӧ куимнанныс следитісны прӧтивник бӧрся. Кор час-мӧд мысти Валитов видліс сійӧс, Кисин вӧлі кын нин. Ёртъясыс перйисны окоп-гу помас ниша, гаровтісны плащ-палаткаӧн да сэтчӧ — тыртісны-гуалісны. Пас вӧлі пуктыны нинӧмысь, но Валитов вайис кытыськӧ тыртӧм ведра. Сэтчӧ Сомов пуртӧн парсаліс: «Кисин Федор, герой-танкист. Ми огӧ вунӧдӧй...» Сэсся салют пыдди автоматсьыс мӧдӧдіс немецъяслы ӧчередь.

Орудие дорӧ пуксис Валитов. Танк увсянь, дерт, тыдаліс омӧля, но танк панорама пырыс бура аддзис ставсӧ, мый вӧчсис матігӧгӧрын. «Топыда кытшалӧмаӧсь!» — сӧмын думыштіс сійӧ.

Немецъяс дзикӧдз вельмисны, тыдалӧ, юӧмаӧсь ассьыныс шнапсӧ ли мый ли. Найӧ дугдывтӧг, мыйӧн позьӧ, клёнӧдісны танк кузя да рупор пыр горзісны: «Рус Иван, сдавайся!..»

Немецъяс некыдз эз вермыны гӧгӧрвоны, мыйла ӧнӧдз эз сдайтчыны пикӧ воӧм роч танкистъяс. Да и тайӧс налы некор не гӧгӧрвоны...

Сомовлы окопын эз пукавсьы. Бара кайис орудие дорӧ, а Валитовӧс ыстіс уліӧ.

Валитов лэччис окоп-гуӧ, пуксис муас да тэрмасьтӧг гаровтіс чигарка, ӧзтіс да азыма кыскыштіс, мый весиг тшӧкмуні. Мыйкӧ вель дыр думайтіс, сэсся друг юаліс:

— Кывзы, Витя... Ме важӧн нин кӧсъя юавны тэнсьыд, да век некор. Тіян сэні, Комиад, ёна кӧдзыд?

Есев синсӧ вештывтӧг бинокльӧн видзӧдіс немецкӧй позициялань, и эз сразу вочавидз, но коркӧ век жӧ шыасис:

— Кодлы ӧд кыдзи. Корсюрӧ местаясын овлывлӧ нелямын саяс градус. Но миян йӧз винёлӧсь, кӧдзыдсьыс оз повны, ассьыныс уджсӧ век вӧчӧны. Уджыс сідз оз сулавлы. А войвыв районъясын, шуам, ветымын саяс на овлывлӧ. Со кыдз!.. А мыйла тэ юасян, кӧдзыд абу? Вот войнаыс помасяс — куимнанным мунам Коми муӧ. Ме тіянлы аддза мича-мича нывъясӧс. Миян нывъяс збыль мичаӧсь — еджыд кудель юрсиа, кельыдлӧз синъяса рочаканьяс... Но а тэ век жӧ мыйла юалін?

— Да сідз прӧста. Ӧтитор дум вылӧ уси да. Менсьым дядьӧс коркӧ кулакавлісны да ссылкаӧ ыстісны семьянас тіянӧ, Комиад кытчӧкӧ. Энлы, кыдз нин шусьӧ районыс? Солскӧй район эм?

— Эм. Сӧмын абу Солскӧй, а Сысольскӧй. Ме кывлі жӧ, кӧнкӧ пӧ Сыктыв вожын эмӧсь переселенецъяслӧн посёлокъяс. Но сэні ме эг вӧвлы.

— Да-да! Асьныс пӧ стрӧитӧмаӧсь кутшӧмкӧ посёлок ли, деревня ли. Ӧні на сэні олӧны. Асланыс колхоз пӧ. Сӧмын вот посёлок нимсӧ вунӧді. А воча чойясӧй пӧди гырысьӧсь нин, невестаясӧн лоины. Пӧди комиӧн сёрнитӧны, а гашкӧ, и коми сайӧ верӧс сайӧ петісны нин.

— Гашкӧ и. Миян сиктын ӧти семья олӧ жӧ. Но найӧ абу татаринъяс, а кутшӧмкӧ мӧд нация. Ме ог тӧд кутшӧм. Ставыс чиганъяс кодь сьӧдӧсь. А менсьым дядьӧс кытчӧкӧ нуисны жӧ, семьяыс ӧнӧдз на оз тӧд кӧні. Сиктын тай некутшӧм суд ни нинӧм эз вӧв. Войнас пӧ локтісны кык кузь шынеля морт, и ставыс. Весиг семьяыскӧд прӧщайтчыны абу лэдзӧмаӧсь.

— Мый нӧ вӧчӧма?

— Да нинӧм! Народлӧн враг пӧ, шуӧны. Колхозын бригадираліс. Меным сэки дас вит, буракӧ, вӧлі. Велӧдчи школаын. Сы ради менӧ весиг комсомолӧ эз босьтны. Ён мужик вӧлі. Тулыснас муртса на сылыштас, а сійӧ кӧмтӧгыс нин ветлӧдлӧ.

— Сідз ӧд прӧстӧ эз нуны, мыйкӧ, буракӧ, вӧчис нин?

— Да нинӧм, мися. Менам мам висьталӧ, мый вӧлӧма колхознӧй собрание. Миян грездысь ӧти том нылӧс Коми Верховнӧй Сӧветӧ кандидатӧ индӧмаӧсь. Уджалӧ пӧ бура. Сійӧ кыскасьӧма вӧрын. Вӧр кыскалан плансӧ век тыртӧ вевтыртӧмӧн. А нывкаыс кыскасьӧма Чалкоӧн, — колхозын сійӧ медбур, медъён вӧлыс — Печорскӧй пӧрӧда. Да вот. А миян дядьыс и шуас: «Чалконад и кын мыр вермас кыскасьны да плансӧ вевтыртны...» Сыысь и, буракӧ, пуксьӧдӧмаӧсь...

— Да-а... Быдторйыс овлӧ, — ышловзис Валитов да кутіс зарадитны автомат дисксӧ. — Патроныд пӧшти эз нин коль. Тэнад эм на?..

— Дискӧй абу дзик тыр...

Рыт кежлас экипажлӧн боевӧй счётыс ещӧ на содіс. Сомов пазӧдіс кык пулемётнӧй ячейка да ӧти миномёт расчётыскӧд, Есев — противотанкӧвӧй орудие, Валитов — прожекторнӧй установка. Танкистъяс кутчысисны, водзсасисны немецъяслы. Настроениеыс вӧлі кыпыд, но...

Рытнас кутшӧмкӧ ыджыд пушкаысь ли, танкысь ли бронебойнӧй снаряд веськалі танкӧ башняас. Башняыс сибдіс, эз кут бергавны. Стройысь петіс пушкаыс — поті сылӧн противооткатнӧй устройствоыс, мыйтӧг оз позь лыйсьыны. Жугалі панорамаыс. Мӧд снаряд пасьвартіс моторсӧ. Машинаын ыпнитіс би, но шуд вылӧ ломтасыс моторас пӧшти эз вӧв и машина эз взорвитчы. Бисӧ кусӧдісны муӧн, кодӧс шыблалісны танк пытшкас. Танкистъяс ӧні аддзисны, мый налӧн танк дорӧ немецъяс вайӧдӧмаӧсь «тигр» — сьӧкыд танк, — сідзкӧ, сылӧн тайӧ уджыс.

Ӧні танк пытшкын быдӧн думайтісны: мый ӧні вӧчны? Сёрнитісны ас костаныс ньӧжйӧ, быттьӧ кодкӧ гусьӧн кывзысис.

— Кытчӧдз патронъяс оз бырны, кутам водзсасьны татысянь, окопсянь, — шуис Сомов. — Чайта, талун войнас локтасны да мездасны миянӧс.

Войыс коли вель лӧня, но, дерт, узьны некод эз узь, синъяссӧ эз куньлыны, — кутшӧм нин узьӧм! «А фашистъяс кӧ ӧзтасны танксӧ? Сэки ми ставным тані чишкасям...» — ас кежас думайтіс быдӧн.

Войыс коли, а миян бара на эз локны мездыны. А немецъяс век на виччысисны, мый роч танкистъяс петасны танк увсьыс да лэптасны кинысӧ. Но танксӧ мыйлакӧ эз штурмуйтны. Мыйла? Код тӧдас... Гашкӧ, полісны, гашкӧ, кӧсйисны ставнысӧ ловйӧн босьтны...

«Тигр» матігӧгӧрын эз тыдав, буракӧ, войнас бӧр мунӧма аслас позиция вылӧ, либӧ саймовтчис керкаяс сайӧ. Немецъяс сы местаӧ вӧлі вайӧмаӧсь противотанкӧвӧй пушка, но лыйнысӧ эз удит: танк увсьыс автоматнӧй ӧчередьыс бырӧдіс расчётсӧ.

Танкистъяс видзӧдлісны ӧта-мӧд вылас, настроениеныс бара кыптыштіс. А немецъяс мыйкӧ дыра кежлӧ бара ланьтлісны, буракӧ, думайтісны, кыдзи эськӧ бырӧдны тайӧ роч танксӧ, коді сы ыджда урон вӧчис налы?..

Луныс коли ньӧжйӧ, ок кутшӧм ньӧжйӧ. Найӧ сюся видзӧдісны гӧгӧр, мед неминучаыс виччысьтӧг эз вермы локны на дінӧ. Но ӧтитор вӧлі лёк: ваыс быри, весиг вомнысӧ кӧтӧдны нинӧмӧн. И сэки налы бара везитіс: рытъявылас ызӧбтіс зэр, кисьтіс ведраысь моз. Окоп-гуас ваыс визувтіс няйт, маслӧӧсь, бензин дука, но юисны и сійӧс, мыськисны кияснысӧ, чужӧмнысӧ, чукӧртісны быд тыртӧм дозйӧ, кытчӧ вӧлі позьӧ. Муыс тані сёйӧд, и ваыс чукӧрмис окоп-гуас кок шегйӧдзыс нин. Сомов пӧрччис гимнастёркасӧ, улыс дӧрӧмсӧ, да мыссис коскӧдзыс зэр ванас, сэсся важ дӧрӧмсӧ шыбитіс да пасьталіс выльӧс.

— Но вот, другъяс, со и ми пывсим, — гажа шмонитіс Сомов. — Ок, эськӧ вӧлі кӧ ӧні наркомовскӧй сё грамм?! А, кыдз чайтанныд? Вӧлі эськӧ эз олӧм, а чӧскыд ма!.. — сераліс Сомов. — Чуксала тіянӧс вӧчны ме моз жӧ, кыдз шуласны, босьтны пример.

Воча некод эз шыась, некод нинӧм эз шу. Сэки Сомов кутіс артавны, уна-ӧ коли налӧн боеприпасыс, но артавнысӧ вӧлі нинӧм нин, запасыс эз вӧв. Мыйӧн зарадитӧма, — сійӧ и ставыс!..

— Со мый, ёртъяс! Патронъяс миян эз кольны. Мый эм, — сійӧс зарадитӧма... Сідзкӧ, сійӧс колӧ видзны. Весьшӧрӧ не видзны ни ӧти пуля. Сідзкӧ, врагӧс сибӧдны матӧджык, медым лыйны стӧча, вины гадӧс. А войнас, кор немецъяс лӧньыштасны, видлам мунны татысь. Ми ассьыным удж вӧчим, мый вермим. Ми абу дезертиръяс ни предательяс...

Фашистъяс асланыс думъясысь эз лэдзчысьны. Пемдігас нин Есев друг казяліс: немецкӧй салдат танк дорӧ кыскӧ канистра. «Со мый пеж ловъясыд думыштӧмаӧсь!» — думыштіс сержант да первой шлёпнитіс салдатсӧ, а мӧд пулянас розьӧдіс да ӧзтіс канистрасӧ.

Танкистъяс бӧръя кадас частӧ видзӧдлывлісны асланым позициялань. Но сэні вӧлі лӧнь. Гашкӧ, дугдісны наступайтны? Али дасьтӧны выль ыджыд наступление? Танклӧн экипажыс нинӧм эз тӧд, налысь сьӧлӧмсӧ личкис кутшӧмкӧ ыджыд тӧдтӧм дой... Мый лоас?

Сержант Есев перйис гач зепсьыс письмӧ да кутіс лыддьыны. Письмӧыс вӧлі гортсяньыс, гижис Маша чойыс. Письмӧыс воис наступлениеӧ петтӧдз на, но воча кывсӧ мыйлакӧ сразу эз гиж, дышӧдчис. Гижны ӧні али мый?

Есев заводитіс гижны, но нинӧм эз артмы, — юрыс вӧлі тыр мукӧд мӧвпъясӧн. Заводитӧм письмӧсӧ бӧр сюйис зептас... «Мӧдысь помала... А лоас-ӧ тайӧ «мӧдысьыс»? — вирдыштіс юрас. Но письмӧсӧ бӧр перйис зепсьыс, косявліс посни торъяс вылӧ да шыбитіс кок улас, таляліс...

— Эй, казакъяс? Мый юрнытӧ ӧшӧдінныд? — друг горӧдіс Сомов да заводитіс сьывны:

На позицию девушка

Провожала бойца...

Валитов да Есев отсалісны сылы. Сьылӧмыс вочасӧн пыр гораммис. Помалісны ӧтиӧс, заводитлісны мӧдӧс. Сэсся Сомов друг шуис, медым быдӧн сьылас аслас рӧднӧй кыв вылын ассьыс радейтана сьыланкыв. Заводитіс сійӧ ачыс, — сьыліс «Ой, мороз, мороз...» Гӧлӧсыс сылӧн вӧлі мича, сӧстӧм, гора. Валитов да Есев кывзісны, синсӧ эз вештывны командир вылысь. Сы бӧрын сьыліс Есев коми сьыланкыв «Югыд кодзув». Сомовлы кажитчис, мый кӧть кывъяссӧ эз гӧгӧрво, а мелодияыс сьӧлӧмӧдз йиджана. Валитов эз кӧсйы сьывны, но Сомов да Есев корисны, мый сійӧ тшӧтш сьыліс татарскӧй сьыланкывйысь куплет...

Немецъяс чуймисны: «Мый тайӧ лои роч танкистъясыскӧд? Кулӧм водзвылас гажӧдчӧны? Шнапс али мый юӧмаӧсь...»

Пемдіс. Лои лӧнь. Немецъяс дугдісны лыйсьыны, эз лэдзавны югыд ракетаяс, эз ӧшлыны найӧс парашютъяс вылӧ... «Немецъяс мыйкӧ бара выльтор думыштӧмаӧсь!» — воис юрас Сомовлы, но ассьыс мӧвпсӧ некодлы эз висьтав, чӧв оліс. Матыстчис, буракӧ, пом, — лейтенант кыліс тайӧс сьӧлӧмнас.

И збыльысь, сійӧ регыдӧн воис. Пемыдас саймовтчӧмӧн немецъяс бара вайӧдісны танк дорӧ ассьыныс «тигрсӧ». Кор ставыс вӧлі дась, найӧ бара ӧшлісны парашютъяс вылӧ еджыд ракетаяс, и бара лоис лунын кодь югыд.

Танкистъяс, дерт, ӧні югыдас аддзисны «тигртӧ», но вӧлі сёр нин да вӧчны нинӧм эз вермыны: автоматнӧй пуляӧн сійӧс он писькӧд. «Тигр» матысянь лэдзис танк кузя кык бронебойнӧй снаряд, да пыр жӧ вешйис. Миян артиллеристъяс кутісны гындыны сійӧ местасӧ, кӧні вӧлі «тигр», но сёр нин, сійӧ удитіс мунны. Сомовлӧн танк ӧзйис, снаряд письтіс пытшкас. Танк пытшкын мыйкӧ потласис, чегъясис, грымӧдчис. «Ок, ӧбиднӧ, кутшӧм ӧбиднӧ, мый оз вермыны найӧ водзсасьны!.. А ӧд кымын «тигрӧс» найӧ сотлісны, петкӧдлісны стройысь?!» — Сомовлӧн ӧбидаысла тюрӧбтіс синваыс, но эз петкӧдлы ёртъясыслы, бергӧдчис бокӧ да на тӧдлытӧг чышкаліс синвасӧ.

Есевлы мыйкӧ швачӧбтіс юрас, и сійӧ уси. Унйылысь моз нин кыліс, кыдзи танк дорын грымӧдісны гранатаяс, трачкӧдчисны «шмайсеръяс», автоматъяс. Регыд мысти ставыс лӧнис.

...Кор Есев воис ас садяс, вӧлі лӧнь, сӧмын танк пытшкын мыйкӧ трачкӧдчис-сотчис. Пытшсяньыс кыліс загӧр, чад дук. Мыйӧн восьтіс синсӧ, пыр жӧ аддзис Сомовӧс да Валитовӧс. Найӧ куйлісны окопын. Валитов усьӧма сы кокъяс вылӧ, а Сомов куйліс сы бокын орччӧн. Сылӧн киясыс шевкнитчӧмаӧсь да куйлісны Есев морӧс вылын, быттьӧ сывйыштӧма сійӧс.

Есев первой ружтігтыр бергӧдчис бок вылас да мездысис Сомов киясысь. Сэсся ньӧжйӧник мездіс кокъяссӧ Валитов улысь да чеччис. Дойысла вом дорсӧ йириг, сійӧ видлаліс кыкнаннысӧ: кыкнанныс вӧлі кӧдзалӧмаӧсь нин. Колӧ вӧлі найӧс водтӧдны орччӧн. Но кыдзи? Валитов-поконик вӧлі кызіник морт, сьӧкыд. Пессис-пессис, но коркӧ век жӧ кыскис сійӧс да водтӧдіс орччӧн. Сэсся гимнастёрка зепъяссьыс босьтіс налысь документъяссӧ, кодлӧн мый вӧлі, асьнысӧ тупкис плащ-палаткаӧн, да лэдзис на вылӧ кыкнан боксьыс мусӧ. Ӧні позьӧ видлыны петны татысь. Сійӧ кызмырдӧн кавшасис выліас: сэні вӧлі пемыд, лӧнь. Немецъяс, буракӧ, матігӧгӧрын эз вӧвны. Первойсӧ чуймис: мыйла? А сэсся ачыс жӧ гӧгӧрвоис: найӧ ӧні, колӧ лоны, вӧліны дӧвӧленӧсь, мый бырӧдісны роч танк да сылысь экипажсӧ, коді сы мында лёктор вӧчис налы.

Дыр-ӧ кыссис Есев, сійӧ, дерт, оз тӧд, но кор воис асланым позицияӧдз, заводитӧ нин вӧлі рӧмдыны. Разведчикъяс вайисны сійӧс дивизион КП-ӧ.

Кор локтіс танкӧвӧй ротаса командир капитан Серов, Есев вӧлі ас садяс нин, сӧмын шӧпнитіс: «Капитан ёрт!», сэсся бӧр ланьтіс. Серов копыртчис сы весьтӧ, кыпӧдыштіс юрсӧ да окыштіс сійӧс, а кор неуна такалыштіс, кутіс юасьны экипаж йывсьыс. Есевлӧн вежӧрыс вӧлі ясыд, но сійӧ поліс, мый бӧр воштас садьсӧ, да тэрмасис висьтавны ставсӧ, мый накӧд лои наступайтан мӧд луннас да мый найӧ вӧчисны прӧтивниклӧн окопъяс дорын...

Ми ставным, кодъяс вӧлім сэтӧн, сьӧлӧмын ыджыд дойӧн да сэк жӧ гордитчӧмӧн кывзім сылысь жугыль висьтсӧ.

Помас Есев корис капитанӧс:

— Капитан ёрт! Висьталӧй начальстволы Сомов йылысь да и мукӧд йылысь... Найӧ — геройяс...

— Гижам и висьталам ставсӧ, кытчӧ колӧ и кодлы колӧ, — эскӧдіс Серов.

Есевӧс нуисны медсанбатӧ.

...Ассьыс гвардейскӧй танкӧвӧй армиясӧ Есев суӧдіс тӧлысь мысти Польшаын нин. Армия писькӧдіс туй Берлинӧ.