СЕРЖАНТ СЕНЬКИН ОЛӦМЫСЬ ӦТИ ЛУН
Сержант Сенькин кыкнан пеляс пуктіс наушникъяс да пуксис рация дорӧ. Сійӧ вӧлі ар дас кӧкъямыса коми зон. Батареяӧ сійӧ воис коркӧ тӧвнас, полкӧвӧй школа помалӧм бӧрын. Ичӧт туша вӧснаыс батареяын ставӧн шуисны сійӧс пацанӧн, но сійӧ сыысь некор эз дӧзмыв, сӧмын век нюмъяліс. Ӧні сійӧ пукаліс рация дорын зумыша, вомсӧ неуна калькӧдыштӧмӧн, видзӧдіс блиндаж пельӧсӧ да кывзіс эфирысь шумсӧ. А сэні збыльысь вӧлі ёна шума: шутьлялісны, чирзісны, горзісны батареяяслӧн, танкъяслӧн рацияяс. Сенькин кыліс и немецъяслысь сёрни, налысь командаяс. Сэні, передӧвӧйын, коймӧд час нин мунӧ чорыд кось. Думнас радист вӧлі батареяса командир дінын, сылӧн наблюдательнӧй пунктын, кӧть и ачыс сійӧ батареялӧн огневӧй позиция вывсянь кутіс сыкӧд йитӧд. Вот кӧні ӧні жар! Талун комбат куимысь нин корліс батареясӧ восьтыны би, а век ӧтилаӧ. Тыдалӧ, фашист чорыда жмитӧ сэті.
Наблюдательнӧй пунктын комбат дорын радистнас вӧлі рядӧвӧй Святослав Знаменский, либӧ прӧстӧ Славик. Кор Сенькин юаліс сылысь, мый нин выльыс налӧн НП-ын, сійӧ эз вочавидз юалӧм вылас, сӧмын ньӧжйӧник, мед, буракӧ, комбат эз кыв, матьыштіс. «Полӧ. Сійӧн и матькӧ...» — думыштіс Сенькин. Сылы ӧні тӧд вылас уси, кыдзи тулыснас найӧ ректысисны эшелонысь. Сэки станция вылӧ уськӧдчисны квайт «юнкерс» да заводитісны шыблавны бомбаяс да резны-сяркӧдны пулемётъясысь. Но, шуд вылӧ, регыд воисны миян истребительяс да найӧс бӧр вӧтлісны, ӧти «юнкерс» весиг уськӧдісны станциясяньыс неылӧ. Бомбитӧм бӧрас Знаменскийӧс муртса аддзисны: повзьӧмвылысь вӧлі пышйӧма посёлокас, кытысь и вайӧдіс сійӧс батареяӧ дежурнӧй патруль.
Сенькинлы уси тӧд вылас и тайӧ наступлениеводзвывса сыкӧд бӧръя сёрниыс. Найӧ пукалісны орччӧн да ӧти салдатскӧй котёлокысь панялісны консерв яй сора греча рок.
— Но, пацан, ӧні тэ кутчысь! — велӧдіс Знаменский. — Позьӧ юртӧ воштыны!..
— Тэ дорысь да ме дорысь вежӧраджык йӧз юрнысӧ воштӧны, а миянлы мый? — сідз-тадз воча сылы шуис Сенькин.
— Энлы, энлы, пацан. Менам юрӧй мукӧд вежӧрасяыс ёна донаджык... Ме жӧ музыкант!.. — шуис Знаменский да син пӧвнас мигнитіс Сенькинлы. Сійӧ вӧлі лӧз синъяса, мичаник чужӧма, ыджыд тушаа зон. Кыдзкӧ тешкодя, серам сорӧн, видзӧдліс Сенькин вылӧ, сэсся чеччис да вешйис сы дорысь: Славик восьлаліс кокниа, но зумыда. Став восьласыс быттьӧ петкӧдліс сылысь сямсӧ да и донсӧ. Сенькин ӧбидапырысь синсӧ вештывтӧг дыр видзӧдіс сы бӧрся. Та бӧрын найӧ регыд торъялісны: Знаменскийӧс ас дорас НП-ӧ босьтіс комбат, а Сенькин коли батареяӧ, огневӧй позиция вылӧ.
Сенькин чеччис да амбразураӧд видзӧдліс батареялӧн огневӧй позиция вылӧ. Ыджыд калибра пушкаяслӧн кузь стволъясыс чургӧдчӧмаӧсь водзлань да чӧла дзоргӧны передӧвӧйлань, быттьӧ виччысьӧны команда.
Батареяын старшӧй офицерыс лейтенант Перминов сёрнитіс мӧд орудиеса расчёткӧд, кияснас шенасигтыр мыйкӧ висьталіс налы. Лейтенант вӧлі том на, сӧмын кольӧм во локтіс артучилищеысь, но лыддис асьсӧ батареяын ветеранӧн. Со локтіс сы дорӧ телефонист, мыйкӧ висьталіс сылы да бӧр котӧртіс блиндажӧ, кӧні вӧлі батареялӧн КП — команднӧй пунктыс. Сенькин думыштіс, мый лейтенантӧс корисны телефон дорӧ дивизион штабсянь. Перминов тэрыба котӧртіс телефонист бӧрся.
Сенькин видзӧдліс часі вылас. Кадыс вӧлі 14 час 30 минут. Кад нин шыасьлыны наблюдательнӧй пунктӧ, радистлы колӧ прӧверитчыны быд дас —кызь минут мысти. Сенькин ки пыдӧснас неуна кучкалыштіс рация футлярас, — сылы кажитчис, мый кучкалыштӧм бӧрас век бурджыка кылӧ, — прӧверитіс антеннасӧ, лӧсьӧдіс рациясӧ колана волна вылӧ да микрофонсӧ матыстіс вом дорас:
— Алё! Алё! «Катшасин!», «Катшасин!», тайӧ ме — «Гым»... Кыдзи менӧ кылан? — небыдик гӧлӧсӧн юаліс сійӧ, сэсся друг не аслас гӧлӧсӧн горӧдіс: — «
«Катшасин» Знаменский гӧлӧсӧн вочавидзис:
— Эй, «Гым!» Ме тэнӧ бура кыла! Кыла! — мӧдысь шуис, сэсся содтіс: — «Гым», нӧрӧвитышт, удж лоас!
«Гым»-Сенькин калькӧдыштіс вомсӧ, ланьтіс аслас рация дорын. «Удж кӧ и удж. Миян сэтшӧм уджыс...» — думыштіс сійӧ.
«Катшасин» друг корис микрофон дорӧ лейтенант Перминовӧс. Сенькин мый вынсьыс горӧдіс связнӧйлы, мед сійӧ дзик пыр жӧ корас лейтенантӧс.
Здук мысти лейтенант вӧлі нин микрофон дорын. Мый вӧчсис передӧвӧйын, сійӧ тӧдіс нин: звӧнитлісны сылы дивизион штабсянь. Немецъясӧс вӧтлісны веськыдвыв фланг вылысь, но найӧ эз лэччысьны и ӧні выль вынъясӧн кутісны контратакуйтны пехотаӧс коймӧд батареялӧн НП весьтын. Вермас-ӧ пехота кутчысьны прӧтивниклӧн танкъяс водзын? Колӧ виччысьны медся лёкторсӧ! Батареялы не бӧрыньтчыны, а босьтны круговӧй оборона. Пехотнӧй полкса командир корис отсӧг вылӧ танкъяс, но найӧ локтасны сӧмын час мысти, дас квайт часын. Ӧні найӧ туйынӧсь. Мед кӧть мый оз ло, колӧ кутчысьны!..
Пельк, визув лейтенант босьтіс микрофон трубка. Гожъялӧм чужӧмыс сылӧн зэвтчис, плешкас мыччысис муртса тӧдчана чукыр.
— «Катшасин!», ме кывза! — тӧждысяна шуис сійӧ.
Сенькин ӧти наушниксӧ кутіс пель дорас (мӧдыс вӧлі Перминов ордын) да кыліс батареяса командир Баградзелысь тӧдса гӧлӧссӧ.
— Кацо, миянлань локтӧны немецкӧй танкъяс! Кылан, кацо. Лӧсьӧдчы!..
Сенькин став сьӧлӧмсяньыс радейтіс батареяса командирӧс. И ӧні, кор кыліс сылысь гӧлӧссӧ, сійӧ быттьӧ аддзис сійӧс сэтысь, наблюдательнӧй пунктысь... Капитан Баградзе — грузин, паськыд пельпомъяса, зумыд тэчаса, шӧркодь тушаа морт. Сьӧд сэтӧр синъяс вевдорас шевкнитчӧмаӧсь мегырӧн сук сьӧд синкымъяс. Комбат некор эз дышӧдчыв быд асыв бритчыны, и бан бокъясыс сылӧн лӧсталісны лӧзоват рӧмӧн. Сюрлі кӧ коркӧ прӧст кад, сійӧ ньӧтчыд эз пукавлы сідзи, век мыйкӧ да мыйкӧ вӧчис: то полкса разведчикъяскӧд видзӧдаліс прӧтивниклысь оборона, то часъясӧн сулавліс стереотруба дорын да стӧчмӧдавліс ориентиръяс, пасъяс, то копыртчыліс карта весьтӧ да пасъяліс сэтчӧ выль цельяс да дасьталіс на вылӧ даннӧйяс.
Сенькин некор оз вунӧд сылысь шмонитӧмсӧ. Сійӧ частӧ шулывліс: «Э-э, кацо, миянлы ковмас дыр овны... Бура овны!..»
Сенькин друг дрӧгмуні, кутіс лапйӧдлыны синъяссӧ, — кыліс капитан Баградзелысь гӧлӧссӧ: «Кытчӧ тэ? Сувт!», сэсся мыйкӧ гораа грымӧбтіс. Перминов кӧсйис лӧсьӧдыштны пилоткасӧ, но киыс ӧшйис сынӧдас. Тӧдтӧм на тревога топӧдіс кыкнанныслысь сьӧлӧмнысӧ. Радист видзӧдліс лейтенантлы чужӧмас, но нинӧм эз гӧгӧрво... Мый лоис НП-ын? Но некымын здук мысти бара кыліс комбатлӧн гӧлӧсыс, но сійӧ эз нин вӧв сэтшӧм гажа, кыдзи водзті.
— Минаяс!.. — шуис комбат. — Миянлы татчӧ шӧтӧны минаяс, — мӧдысь шуис сійӧ, сэсся сетіс приказ:
— Лейтенант Перминов! Ӧні жӧ, дзик пыр, татчӧ, НП-ӧ, ысты радист Сенькинӧс... Рациятӧгыс.
Сенькин гӧгӧрвоис: Знаменскийкӧд, сідзкӧ, мыйкӧ лоис!
...Регыд мысти Сенькин восьлаліс нин вӧр діӧд наблюдательнӧй пунктлань. Вӧрыс тані быттьӧ куш, увъяссӧ сувйӧмаӧсь минаяс да снарядъяс. Уна пуяс чегъяссьӧмаӧсь сартас моз. Видзӧдан да думайтан: ок и чорыд жӧ ыджыдысь-ыджыд бушков таті прӧйдитӧма...
Вӧр діысь Сенькин петіс эрд вылӧ да лэччис сёнӧ, кыті улітіыс визувтіс ичӧтик шор. Шор пӧлӧныс трӧпа нуӧдӧ передӧвӧйлань. Тані сылы паныдасисны раненӧйяс, — найӧ ас кокнаныс мунісны медсанбатӧ. На пиысь кодсюрӧлӧн кӧртӧд йылын ӧшаліс киыс, кодлыськӧ бинтуйтӧмаӧсь юрсӧ, ӧти кок пӧв йылас чеччаліс-кыссис ёртъяс пельпом вылас мыджсьӧмӧн. Паныдасисны унаӧн. Сенькин кӧсйис юавны, мый нин вӧчсьӧ передӧвӧйын, — но эз юав, — передӧвӧйыс вӧлі орччӧн. Сійӧ пӧрччис пилоткасӧ да гугнас чышкис чужӧм вывсьыс шорӧн визувтысь пӧсьсӧ, сэсся котӧрӧн уськӧдчис НП-лань.
Гӧгӧр кыліс гым-гам, грымакылісны снарядъяс, сьӧкыд минаяс. Кытысянькӧ матысянь клопйӧдлісны миномётъяс, трачкӧдісны противотанкӧвӧй ружьеяс. Водзынджык дугдывтӧг сяркӧдчисны автоматъяс, пулемётъяс.
Наблюдательнӧй пунктын окопсӧ вӧлі пазӧдӧма снаряд ли, мина ли. Бруствер бокас вӧлі ыджыд воронка. Бокынджык пыді ячейкаын сулаліс стереотруба, а сы дорын — комбат Баградзе. Сенькин матыстчис сы дінӧ.
— Капитан ёрт! — горӧдіс Сенькин. — Сержант Сенькин...
— Ладнӧ, ладнӧ, кацо, — ӧлӧдіс комбат да ӧвтыштіс кинас. — Буретш воин, кацо!.. Молодец! Со видзӧдлы, — индіс капитан. — Аддзан?
Комбат кыдзкӧ не асногӧныс видзӧдліс окоп пыдӧсас, пуктіс кияссӧ Сенькинлы пельпомъясас да бергӧдіс веськыдвылӧ. Сэні окоп пыдӧсас павкнитӧм шынель улын куйліс Знаменский; чужӧмыс сылӧн быттьӧ вӧйӧма, югыдлӧз мича синъясыс видзӧдісны енэжас, вир сора муӧсь веськыд киыс шевкнитчӧма. Сенькин кӧсйис босьтлыны юр вывсьыс пилоткасӧ, но эз удит: комбат кыскыштіс сійӧс асланьыс.
— Рация дорӧ, кацо! Некор!.. А Знаменский? Сійӧ ачыс мыжа... Трус вӧлӧма, — сэсся дженьыда висьталіс сы йылысь, мый лоис налӧн НП-ын. — Друг заводитісны шпаритны миномётъясысь. А сійӧ, — синнас индіс Знаменский вылӧ, — кӧсйис пышйыны татысь... вӧрас. Мыйӧн петіс окопысь... первойя минаыс жӧ и суис сійӧс. Вот тадз, кацо... Эз кӧ вӧрзьы рация дорсьыс, ӧні на эськӧ ловъя вӧлі.
Сенькин уськӧдчис рация дорӧ, да пыр жӧ йитчис ОП-кӧд, огневӧй позициякӧд. Комбат сулаліс стереотруба дорын да мыйкӧ кылӧ броткӧдчис, не то видчис, не то сьыліс. Лыйсьӧмыс, буракӧ, ещӧ на чорзис, пельыд чуналӧ. Старшӧй лейтенант, пехотнӧй батальонса командирӧс вежысь, коді ӧнӧдз чӧла сулаліс окопын да бинокльӧн видзӧдіс мунысь бой вылӧ, друг чирӧм гӧлӧсӧн мыйкӧ горӧдіс комбатлы. Мӧдыс довкнитіс юрнас да видзӧдліс схема-карта вылӧ, сэсся копыртчис Сенькин дорӧ да висьталіс ориентир. Радист ставнас зэвтчис да горӧдіс микрофонӧ:
— Ориентир № 3.
Гымалысь бой вӧсна радист муртса кыліс комбатлысь гӧлӧссӧ. Комбат шуаліс батареялы ориентиръяс, налы тӧдса лыдпасъяс: буссоль, угломер, прицел, уровень, снаряд. Сынӧдас кӧть чорыда гымаліс, Сенькин век жӧ бура кыліс аслас рӧднӧй коймӧд батареялысь НП весьтті шувгӧмӧн лэбысь снарядъяссӧ, кодъяс гыпйӧдлісны прӧтивниклӧн матысса мыльк вылын. Кадыс быттьӧ сувтіс: радист ӧні думайтіс сӧмын сы йылысь, кыдз эськӧ бурджыка да стӧчджыка передайтны огневӧй позиция вылӧ комбатлысь командаяс. Ӧні эз думайт, да и некор вӧлі думайтны сы йылысь, мый вот-вот вермасны вины сійӧс, кӧть и корсюрӧ синмыс усьлі окоп пыдӧсын куйлысь Знаменский вылӧ. Полӧмыс сылӧн бара воши. Да и сэні сыкӧд капитан, комбат–3, ён, мича, повтӧм морт, радейтана командир. Сы дінын абу страшнӧ...
Корсюрӧ комбат шыасьліс пехотаса старшӧй лейтенант дорӧ, мыйкӧ юавліс ли, висьтавліс ли сылы. А сійӧ сюръя моз вӧрзьӧдчывтӧг сулаліс прӧст ячейкаын да видзӧдіс бинокльӧн. Вушйӧм фуражка увсьыс чургӧдчӧмаӧсь пӧсялӧмысла ва юрси пратьяс. Гимнастёрка мышкыс ньылӧмзьӧма, лоӧма сьӧд. Шуйга пельпомвывса погон вывсьыс усьӧма ӧти звездочка, — шуйга погоныс — лейтенант, веськыдыс — старшӧй лейтенант.
Немецкӧй танкъяслӧн мургӧмыс да лязгӧмыс век матыстчис и матыстчис, накӧд тшӧтш матысмис и снарядъяслӧн гыпӧдӧмыс. А снарядъясыс вӧліны эз враглӧн, а асланым, рӧднӧй коймӧд батареялӧн. Неуна водзынджык тайӧ шум-гамас юрӧбтіс «ура», кыліс противотанкӧвӧй гранатаяслӧн шковгӧмыс. Тайӧ пехота уськӧдчис контратакаӧ. Водзын ыпъяліс-сотчис кык немецкӧй танк. Радист Сенькин сюся кыйӧдіс капитан чужӧм бӧрся, и друг казяліс, мый сылӧн чужӧмыс югдыштіс, здук кежлӧ сявкнитліс радлун. А ачыс Сенькин вермис кӧ эськӧ видзӧдлыны аслас чужӧм вылӧ, то эськӧ пыр жӧ аддзис, мый чужӧмас сылӧн ыпъяліс дзик жӧ сэтшӧм радлун, кыдзи и капитанлӧн.
Немецъяслысь атака лои венӧма, найӧ бӧрыньтчисны асланыс позиция вылӧ, мыльк сайӧ. Передӧвӧйын мыйкӧ дыра кежлӧ пуксис чӧв-лӧнь.
— О, господи! Ещӧ ӧти атака венім, — шуис старшӧй лейтенант, лэдзис бинокльсӧ да бергӧдчис комбатлань. Радист Сенькин сӧмын ӧні аддзис сылысь омӧльтчӧм, косіник чужӧмсӧ, кыті шорӧн визувтіс пӧсьыс. Синъясыс вӧйӧмаӧсь быттьӧ гуӧ. Сійӧ эз нин вӧв том, тайӧ старшӧй лейтенантыс, и гашкӧ, сы вӧсна и видзӧдліс Сенькин вылӧ пиыс вылӧ моз да мигнитіс, быттьӧ кӧсйис шуны: «Аддзан, пиук, кыдзи воюйтам... Да тэ, буракӧ, абу полысь рӧдысь...» Сэсся окопъясті котӧртіс аслас батальонӧ.
Сенькин дорӧ матыстчис да пуксис комбат Баградзе.
— Но, кыдзи лолалан, кацо? Страшнӧ?
Сенькин лэптыштліс пельпомъяссӧ.
— Лючки-ладнӧ, капитан ёрт! Пока ставыс бур...
— Кывзы, Сенькин... Ме ӧнӧдз ог тӧд, кыдзи тэнӧ шуӧны?
— Менӧ? — Сенькин видзӧдліс сы вылӧ. — Ме — Алексей...
— Менам вокӧй Алёша жӧ... Кывзы, Алёша, ме важӧн нин кӧсъя юавны тэнсьыд да век некор вӧлі: тэ Комисьыс кодарысьджык?
— Ме? — быттьӧ эз гӧгӧрво Сенькин да бара видзӧдліс капитан вылӧ.
— Да-да... Тэ, мися, кодарынджык олан Комиас? Тіян Коми муыд ыджыд.
— Да, ме... Сыктыв вожысь. Эм миян сэтшӧм мича Сыктыв ю. Сы берег вылын миян столица Сыктывкар. Сы берег пӧлӧн пуксялӧмаӧсь уна коми сиктъяс. Ок и мича местаяс эмӧсь миян сэні!.. — любӧпырысь горӧдіс Сенькин.
— А мыйла, тэ чайтан, Алёша, ме юалі? — кытчӧкӧ ылӧ бокӧ думыштчӧмӧн видзӧдігтыр сідз-тадз шуис Баградзе. — Менам сэні Комиад, Воркутаын, Алёша вокӧй уджалӧ. Инженер. Шахтаяс стрӧитӧ. Войнаӧдз век вӧлі корӧ гӧститны. Сылы ме век кӧсйысьлі, а сідз и эз удайтчы ветлыны. Некор ли мый ли вӧлі...
— Миянсянь Воркутаӧдз ылын. Ме сэні эг на жӧ вӧвлы.
— Ладнӧ, Алёша, эн шогсьы. Война бӧрын обязательнӧ вола Комиад и ми тэкӧд ветлам Воркутаад... Алёша, а кымын арӧс тэныд?
— Меным?
Капитан эскис сылы, эз кут водзӧ юасьны, а сэсся кыдзкӧ мӧвпалана негораа шуис:
— Э-эк, кацо, кацо... Кутшӧм на тэ том... Кызь арӧс... Тэнад арлыдӧн ме велӧдчи Москваын, архитектурнӧй институтын. Помалі сійӧс да куим во уджалі Сибирын. Архитектор. Главнӧй архитектор... Сэсся вот заводитчис тайӧ проклятӧй войнаыс... Нинӧм... Ставыс лоӧ бур. Мед сӧмын регыдджык помасяс войнаыс-а.
Капитан ланьтіс, синъясыс сылӧн меліа нюмъялісны, буракӧ, тӧд вылас уси мыйкӧ буртор.
— Алёша, а Алёша... Тэ извинит менӧ, — нюмъялігтыр бара шыасис сійӧ. — А тэнад эм пӧдруга? Но, мичаник, тэ кодь томиник, ныв, кодӧс тэ ёна-ёна радейтан?
Сенькин неуна шӧйӧвошискодь. Аслас радейтӧм йылысь сійӧ некор на некодлы эз висьтавлы, да и некод на эз юасьлы... А вот комбат юаліс. «Дерт жӧ, эм сылӧн радейтана муса ныв, велӧдчӧ Сыктывкарын, педучилищеын, да гижалӧ сылы мелі-мелі письмӧяс. Найӧ кыкнанныс велӧдчисны ӧти школаын, кӧсйисны водзӧ велӧдчыны ӧтлаын, но эз удайтчы, суис война, и водз-водз лоис мунны война вылӧ...»
— Эм, — дженьыда вочавидзис сійӧ да чангылякодь ныра прӧстӧй чужӧмыс сылӧн югдіс, лоис мичаджык, сӧстӧмджык. Радейтана нывсӧ казьтылӧмысь сьӧлӧм вылас лоис кыпыд, долыд, быттьӧ морӧс зепъясас письмӧясыс шонтісны сійӧс. Ӧні найӧ комбаткӧд кыкнанныс пукалісны чӧла, асланыс думъясӧ вӧйтчӧмӧн. Колӧ чайтны, найӧ думайтісны ӧтитор йылысь... А водзынджык, окоп пыдӧсын куйліс Знаменский, вӧвлӧм радист, и сійӧс быттьӧ ӧні некоднанныс эз аддзыны.
Радист Сенькин наушникъяссӧ бара пуктіс пельясас, и сэні бара кутіс кывны чирзӧм, горзӧм, шутьлялӧм. Кодікӧ код вылӧ кӧ гораа матькис. Бӧр локтіс аслас батальонысь старшӧй лейтенант. Сійӧ вӧлі, буракӧ, мыссьӧма, чужӧмыс свежӧймӧма, потласьӧм важ гимнастёркасӧ вежӧма. Пуксис на дорӧ, гаровтіс чигарка, сюйис уна рӧма мича мундштукӧ, ӧзтіс да чеччис. Недыр мысти сулаліс нин аслас ячейкаын. Сэсся сійӧ друг скӧрысь шыбитіс чигаркасӧ окопас да чирӧм гӧлӧсӧн горӧдіс комбатлы:
— Комбат, бара мӧдӧдчисны...
И быттьӧ медым вынсьӧдны тайӧ кывъяссӧ, окоп водзӧ шлёпкысис мина, ещӧ мина. И здук мысти ставыс бара воши бой мунысь шум-гамас. Баградзе сулаліс аслас стереотруба дорын, а Сенькин матыстчис сы дінӧ да пуксис. Бара шыасис рӧднӧй коймӧд батарея, дивизионысь мукӧд батареяяс, и гӧгӧр ставыс гымакыліс, йиркакыліс. Тӧлыс вайӧдіс окопӧдз сотчысь танкъяслысь дуксӧ. Эрд вылас водзын некымынлаын сюръяӧн моз енэжас качис сьӧд тшын, — тайӧ сотчисны немецкӧй танкъяс. Кутшӧмкӧ немецкӧй танклӧн ӧти снаряд грымӧбтіс окоп бӧрвылын. Му кӧмӧкъясыс резыштісны окопӧ, сяркнитісны рация кузя. Сэсся гусеницаяслӧн лязгӧмыс да моторлӧн мургӧмыс кутіс кывны дзик орччӧн. Старшӧй лейтенант пуктіс бинокльсӧ, нишасьыс босьтіс кык противотанкӧвӧй граната да тэрыба кайис бруствер вылӧ. Сійӧ видзӧдліс окопӧ, паныдасьліс синъяснас Сенькинкӧд, быттьӧ кӧсйис шуны сылы: «Нинӧм, другӧ, он вӧч... Колӧ!»
Здук мысти сійӧ саяліс да грымӧбтіс чорыд взрыв. Эз кут кывны моторлӧн жургӧмыс, гусеницаяслӧн лязгӧмыс, и сьӧд тшын визь бара качис-нюжӧдчис вывлань, кельыдлӧз енэжлань.
Комбат, дерт, унджык аддзӧ радист дорысь. Аддзыліс сійӧ и кыдзи старшӧй лейтенант сувтӧдіс немецкӧй танксӧ да ачыс тшӧтш пӧгибнитіс. Комбат шыбитіс фуражкасӧ. Лӧсталысь сьӧд юрсиыс лэдзсьысьӧма гожъялӧм плеш вылас. Сенькин синсӧ вештывтӧг видзӧдӧ сы вылӧ да думайтӧ, мый сылӧн капитаныс ӧні друг быттьӧ быдмыштіс, тушанас ыджыдджык лоис, пельпомъясыс быттьӧ ещӧ паськалыштісны. Капитан вӧрӧдыштіс кокъяссӧ, быттьӧ кӧсйис зумыдджыка сувтны, сэсся друг копыртчис рация дорӧ.
— Но вот, кацо-друг, миян вылӧ танкъяс локтӧны...
Сенькин, дерт, пыр жӧ гӧгӧрвоис тайӧ страшнӧй кывъяссӧ. Сідзкӧ, на водзын некод нин эз вӧв: ни противотанкӧвӧй пушкаяс, ни противотанкӧвӧй ружьеяс. Найӧ кыкӧнӧсь — сійӧ да капитан — колины тайӧ ки пыдӧс пасьта му вылас. «Ас вылас корас батареялысь би» — вирдыштіс Сенькинлӧн юрас. — Колӧ батареялысь бисӧ веськӧдны татчӧ...»
Комбат гӧгӧрвоис салдатлысь думъяссӧ. Пыдісянь лолалігтыр сійӧ видзӧдліс салдатлы чужӧмас да сетіс команда, мыйысь Сенькинлӧн мышкуӧдыс прӧйдитіс кӧдзыд йирмӧг. Но места вывсьыс эз вӧрзьы...
— НЗО — ме... НЗО — ме... НЗО... — ме...
Тайӧ лоӧ вӧлі лыйсьӧм наблюдательнӧй пункт кузя — неподвижнӧй заградительнӧй
Куимысь тайӧс шуис комбат–3, куимысь стӧча передайтіс батареяӧ радист Сенькин, куимысь примитіс сійӧс огневӧй позиция вылын радист, куимысь передайтіс сійӧс батареяын старшӧйлы, лейтенант Перминовлы.
Наблюдательнӧй пункт дорын грымӧбтісны сьӧкыд фугаснӧй снарядъяс. Ӧти здукӧн найӧ парсалісны, кодйисны мусӧ, сынӧдас дзижъялісны посни и гырысь осколокъяс.
Дивизионлӧн наблюдательнӧй пунктсянь юӧртісны батареяӧ, мый батарея бырӧдіс квайт танк, а мукӧдыс бергӧдчисны бӧр. Стӧч индӧм кежлӧ воисны миян танкъяс да мунігмозыс пырисны бойӧ.
...Сенькинӧс перйисны час джын мысти кымын, а гашкӧ, и водзджык. Кор вайӧдісны ас садяс, сійӧ первойӧн аддзис Перминовӧс. Сійӧ видзӧдіс салдат вылӧ кутшӧмкӧ аслыспӧлӧс видзӧдласӧн.
— Ловъя?! — радистлысь косіник телӧсӧ моздорас босьтіг, юаліс сійӧ. — Ӧні эм кодлы висьтавны миян комбат йылысь.
Сенькин мездысис лейтенант моздорысь, сувтіс аслас кокъяс вылӧ, чышкаліс синъяссӧ. На дорті санитарнӧй нӧсилка вылын нуисны капитан Баградзелысь шойсӧ. Сылӧн юр вылас ыджыд рана, а мышкусӧ чашйӧма уна осколокӧн, — дзонь местаыс абу. И сэки радист Сенькин, буретш сійӧ Сенькиныс, коді яндысис аслас томлунысь, ичӧт арлыдысь, челядь моз ымӧстіс-бӧрддзис, пельпомъясыс кутісны тіравны, и няйт чужӧм кузяыс шорӧн моз визувтіс синваыс:
— Та-тайӧ... Сійӧ менӧ... тупкис аснас... — сыркъялігтыр шуаліс сійӧ. —
Сенькин висьталіс ставсӧ, мый аддзыліс. И быдӧнлӧн, коді вӧлі тані, гӧрддзасис горшыс, тюрис синваыс. Батареяын ставӧн радейтісны капитанӧс. Гашкӧ, быдӧн на пиысь уськӧдіс тӧд вылас комбатлысь кывъяссӧ: «Кутам бура овны...» и быдӧн эскисны, мый кутасны бура овны, сідзи, кыдзи тайӧс гӧгӧрволіс капитан. А Сенькин, коді тайӧс ставсӧ аддзыліс аслас синъясӧн, думайтіс сы йылысь, мый сійӧ ӧні ыджыд уджйӧза аслас капитан водзын, пехотаса старшӧй лейтенант водзын да ещӧ уна-уна йӧз водзын, кодъясӧс сійӧ эз тӧд да, гашкӧ, оз и кут тӧдны.
Аскинас миян частьяс мунісны водзӧ, накӧд тшӧтш и артиллерийскӧй полк, на лыдын и коймӧд батарея, кодлӧн командирнас лоис старшӧй лейтенант Перминов, а сылӧн радистӧн — сержант Алексей Сенькин.
