ПАДЖГАЫН НЫВБАБАӦС УВТЫРТӦНЫ

Колӧ видзӧдлыны та вылӧ чорыда

Ме — Сыктыв уездысь, Гаръя сиктысь — Оверина Иван Наста. Куим во сайын ме мунлі верӧс сайӧ Гаръяса гражданин Оверин Пиля Петыр сайӧ. Во мысти менӧ мужикӧй бӧр гортӧ вӧтліс. Ме сетлі судӧ таысь. Обсуд судитліс мужиксянь сетны меным пай дай кагалы пай. Паджгаса волисполкомӧ воис Обсудсянь исполнитан лист. Сэтісянь коли дзонь во нин, волисполком мужиксянь меным ӧнӧдз на нинӧм эз перйы. Ме ола бать ордын — тшыг нисьӧ пӧт. Быд лун ветла волисполкомӧ, мед сэні меным сетасны пайтӧ суд шуӧм серти. Волисполкомса юралысьыс да милиционер пыр шуӧны: аски пӧ да, оз позь пӧ да. Кора ас ордӧ исполнитан листсӧ да, оз сетны. Сэсся нӧ ме кыдзи кута овны? Со ӧд и гожӧм воис, колӧ удж вылӧ мунны — няньӧй абу, кага видзысь босьтны нинӧм вылӧ. Збыль кӧ эм нывбабалӧн мужиккӧд ӧткодь праваыс, абу кӧ важ моз, мездӧй тшыг куланінысь да кыдзисюрӧ олӧмысь! Ті нин кӧть, бур дона войтыр, газетын уджалысьяс, индӧй туйсӧ, кыдзи да мый колӧ вӧчны.

Мучитчысь нывбаба Наста.

Редакциясянь. Ми шуам Оверина Иван Насталы: Коммунист партия дай Сӧвет власьт нывбабаӧс мужиккӧд праванас ӧткодяліс, дорйӧ нывбабаӧс мужикъясӧн увтыртӧмысь да дзескӧдӧмысь. Со тай нӧ судыд тэнӧ дорйис, шуис важ мужикыдлысь босьтны аслыд дай кагалы пай. Ми огӧ тӧдӧ, мый вӧсна Паджгаса милиционер сы дыра нюжӧдӧ (дзонь во!) суд шуӧм серти перйыны тэныд пайсӧ.

Ми тані юалам та йылысь паджгаса милиционерлысь, корам талун жӧ перйыны Овериналы пай. Сэсся корам видзӧдлыны чорыдджыка та вылӧ Административнӧй Отделӧс дай прокуратураӧс. Оверинаӧс пайсӧ сетӧм мысти корам юӧртны редакцияӧ.