ВЕЖОНЧӦЖСЯ ВӦЛӦМТОРЪЯС

Болгарияын

правительствоыс век ӧтарӧ виалӧ рабочӧй-крестьянаӧс. Колян вежоннас зэв уна йӧзӧс арестуйталісны Плевна, Новеца, Ябланица да мукӧд каръясын. София карын арестуйтісны 50 рабочӧйӧс, Стара-Загораын — кыксё морт саяс. Уна арестованнӧйӧс виалісны.

«Коми Сикт» № 6-ын ми гижлім, Болгарияса король Софияса собор взорвитысьясӧс пӧ «прӧститӧма», джагӧдӧм пыдди тшӧктӧма тюрмаын видзны. Сэтшӧм юӧрыс вӧлӧма ылӧдлӧм. Корольыд собор взорвитысьястӧ тшӧктӧма джагӧдны. Сійӧ тшӧктӧм кузя май 27-ӧд лунӧ Софияын, площадь вылын, ӧшӧдісны Коевӧс, Задгорскӧйӧс да Фридманӧс.

Ӧні Софияын бара судитӧны коммунистъясӧс гуся типография лӧсьӧдӧмысь.

Сӧмын ӧд кымын ёна пондас Болгарияса правительство виавны рабочӧйӧс да крестьянаӧс, сӧмын регыдӧн кодъяс аслыс гу.

Румынияын,

Крайова округын, крестьяна кыпӧдісны восстанньӧ лёк ногӧн видз-му юклӧмысь. Жандармъяскӧд тышкасигӧн 15 крестьянинӧс ранитӧмаӧсь. Жандармъяс жуглӧмаӧсь крестьяналысь видз-му уджалан машинаяс.

Бухарестын (Румынияса столичаын) коммунистъяс вылын суд век на эз помась. Коммунистъяс век на тшыгйӧдчӧны; суд вылас пукавны весиг оз вермыны, куйлӧны.

Китайын.

Генерал Чжан Цзолинь англияса да америкаса посолъяслы кӧсйысис топӧдны Сӧвет Республикаяс представительяслысь уджсӧ да коллявны найӧс Асыввыв Китай кӧрт туй вылысь (Манчжурияысь). Сійӧ кӧрт туй вылас удж нуӧдысьяссӧ вӧлі пуктӧны Сӧвет правительство да Китайса правительство. Ӧні кӧрт туйяс управляйтысь Иванов ёрт вӧлі лэдзӧма приказ уволитны кӧрт туй вывсьыс став белогвардеечьяссӧ. Кӧрт туйвыв Правленньӧысь председательыс Баогуйдзин (китайса правительствоӧн пуктӧм морт) Иванов ёртлысь приказсӧ вежис.

Сы понда миян представитель, Карахан ёрт, сетіс Китайса правительстволы гижӧд, тшӧктӧ вынсьӧдны Иванов ёртлысь приказсӧ, сэсся Баогуйдзинӧс уволитны да сы местаӧ пуктыны мӧд мортӧс.

Сӧвет Республикаяс, тӧдӧмысь, Чжан Цзолиньлы оз сетчыны. Америкаса да англияса капиталистъяслы не аддзывны нин китайса кӧрт туйтӧ.

Японияын

бара вӧлі му вӧрӧм (землетрясенньӧ). Куим карысь став керкаыс дзикӧдз киссьӧмаӧсь.

ГЕРМАНИЯЫН.

Гинденбургӧс президентӧ бӧрйӧм бӧрын капиталистъяс кыпӧдӧны сёрни законпуктас (конституция) вежӧм йылысь. Капиталистъяс лӧсьӧдчӧны сарнысӧ бӧр корны, сӧмын ӧні оз на лысьтны, полӧны рабочӧйясысь.

Берлинын (германияса столичаын) арестуйтӧмаӧсь белогвардеечӧс Дружеловскӧйӧс. Шобсигӧн сы ордысь аддзӧмаӧсь Коминтерн да Сӧвет учрежденньӧяс ним вылӧ вӧчӧм пальшивӧй печатъяс да бланокъяс. Сійӧ вӧлӧм вӧчалӧ пальшивӧй документъяс сӧвет учрежденньӧяс нимсянь да вузавлӧ капиталист государствояслы.

ПОЛЬШАЫН

дзескӧдӧны мукӧд сёрниа йӧзӧс. Вильноын роч кывйӧн сёрнитысь йӧз корӧны вӧлі восьтыны роч школа. Польшаса министр Грабскӧй шуис, ми пӧ восьтам сӧмын роч школа Россияысь пышйӧм йӧзлы (еджыдъяслы). Мукӧдлы пӧ ас кывъя школа восьтыны огӧ лэдзӧй.