АГРОНОМ БУРА УДЖАЛӦ

Быдлаӧ удитӧ волыны.

Крестьяна босьтчисны уджавны эжмӧм му уна переменаӧн.

Лоймаӧ локтіс выль агроном да зэв бура аслас уджӧн кужис сувтӧдны крестьяна син водзын. Ӧні агрономӧс корӧны быдлаӧ: лыддьысян керкаӧ, исполкомӧ заседанньӧ вылӧ, сельскокӧзяйственнӧй кружокӧ, школаӧ. Крестьяна пӧвстын уджалӧмсӧ нинӧм нин и висьтавны — быд лун кытӧнкӧ собранньӧ вылын да мый да. Ветлывлӧ верст 12 саясӧ маті сиктъясӧ. Лойма бокын вӧлі эжмӧм му, десятина куим кымын. Агроном тшӧктӧм серти сійӧ мусӧ крестьяна кӧсйӧны заводитны уджавны уна переменаӧн. Крестьяналӧн кӧсйысьӧмыс эз коль куш кывйӧн, май 12-ӧд лунӧ найӧ артельӧн заводитчисны эжасӧ косявны. Уджалісны ӧтлаын пӧрысь и том. Арнас сэтчӧ кӧсйӧны кӧдзны сю.

Селькор Мурогин.