ЧЕРНЫБ СИКТЫН

Сёльдінса вӧлӧсьт, Емдін уезд

Черныбын 92 керка. Эм кооператив: уджалӧ бура, вузасьӧ 3 деревнялы. Став шленыс 135 морт, на пытшкысь 31 нывбаба. Тӧварыс донтӧм, ставыс колан тӧвар; ӧні сӧмын нажӧткатӧм пондаыс озджык вермыны босьтасьныс-а, прӧмысыд сэсся таво вӧлі зэв этша дай. Кооперативыскӧд ӧтвыв уджалӧ ӧтласа удждысяна да с.-к. тӧварищество; сэні 51 шлен. Кооператив кыдзи вермӧ сетӧ быдлаӧ отсӧг тӧварӧн либӧ деньгаӧн: арнас сетліс школаӧ ситеч занавес вылӧ, сэсся велӧдчысь допризывникъяслы жертвуйтіс 30 шайт, ӧні бара лэбалан машина «Коми морт» вылӧ сетіс 30 шайт.

Эм сэсся лавка союз окоталӧн, да тӧварыс сэні зэв этша — пӧдласян выйын нин.

Эм школа, колӧ сӧмын кытсюрӧ ремонт вӧчны: краситны вевтсӧ (сімны нин мӧдӧма), джоджъяссӧ краситны да вӧчны пачьяс. Пӧшти став челядя йӧзыс велӧдӧны челядьнысӧ, велӧдтӧмыс зэв шоч. Школаын частӧ овлӧны спектакъяс да собранньӧяс. Спектак видзӧдны йӧзыс зэв окочӧсь. Школаӧ локтӧ газет «Югыд туй», да школаыс ачыс корӧ «Крестьянскӧй газет» да сыкӧд журнал «Сам себе агроном». Учительыс ещӧ ас вылас судзӧдӧ «Учительскӧй газет».

Февраль 1-ӧд лунсянь воссис гырысьӧс велӧдан школа (ликпункт), 13 морт вылӧ эськӧ да, велӧдчынысӧ гижсисны 30 морт; морт 25 век волӧны, оз сӧмын нигаыс тырмы, этша ыстісны да. Велӧдчыны ёна окотитӧны.

Эм ен тӧдтӧм кружок (сэні 11 морт); кружокыс ас тшӧт вылӧ судзӧдӧ журнал «Безбожник у станка».

Сэсся кымынкӧ крестьяна ӧтвылысь судзӧдӧны газет «Беднота».

Ӧні лӧсьӧдісны вӧльнӧй пӧжарнӧй дружина, сэтчӧ гижсисны 11 морт.

Самӧкур пуысьяс миян зэв шоч, юлывлӧны сэсся сӧмын коркӧ нин ыджыд праздникъясӧ; ӧні воис выль милиционер да, ёна самӧкур пуысьяскӧд кӧсйӧ вермасьны. Сэсся эм комиссия самӧкур пуысьяскӧд вермасьысь.

В. Попов.