КУКАНЬ БЫДТӦМ ЙЫЛЫСЬ

Куканьӧс колӧ вердны ёнджыка йӧлӧн.

Куканьӧс быдтігӧн бура да прамӧя вердӧм — медколантор. Омӧля быдтӧм кукань сетӧ сӧмын убытка. Некор оз ков жалитны вердастӧ куканьлы. Сиктъясын вердасны куканьясӧс лун квайт-сизим йӧлӧн, сэсся заводитӧны вердны кутшӧмсюрӧ лёк сёянӧн. Кукань быдмӧ ыджыд рушкуа, вӧсньыдик, чукля кока, быдмӧ зэв омӧля да ньӧжйӧ. Медколан кадас, кор кукань самӧй быдмӧ, сӧвмӧ — куканьӧс пӧттӧдзыс оз вердлыны пӧтӧс сёянӧн. Омӧля вердӧмӧн куканьӧс быдтігӧн колӧ веськыда шуны: оз сулав воштыны кадсӧ да вынсӧ быдтӧм вылас, йӧла мӧс сэтшӧм куканьысь эн виччысь.

Куканьӧс йӧлӧн вердӧм дзик жӧ чаньӧс зӧрйӧн вердӧм кодь. Лысьтӧм йӧлӧн куканьӧс колӧ вердны вежон куим кымын. Сы бӧрын ньӧжйӧникӧн позьӧ заводитны вердны шливки ув йӧлӧн либӧ ваӧн сорлалӧмӧн. Тадзи вердӧмӧн мунас кукань вылӧ лысьтӧм йӧв ведра кызь кымын да 100 ведра кымын шливки ув йӧв, юктавны кӧ куканьсӧ куш йӧлӧн квайт тӧлысь чӧж. Миян крестьяналӧн мӧсъясыс вонас сетӧны йӧвсӧ 120 ведра. Сідзкӧ куканьлы ковмас юктавны квайтӧд юкӧнсӧ вогӧгӧрся лысьтӧм йӧлысь.

Первойсӧ, дерт, сымда йӧлыд куканьлы кажитчас уна, да ӧд крестьяниныд вердӧ ас йӧвнас, оз ньӧбӧмӧн. Ыджыда крестьяниныдлы оз и тӧдчыв. Сы пыдди быдтӧм куканьсьыд лоӧ йӧла мӧс.