КАПУСТА ПУКТӦМ ЙЫЛЫСЬ

Кутшӧм му колӧ.

Капусталы градъяс оз ков вӧчавны, абу кӧ нин вывті увтас, васӧд места, пуктыны шыльыдінӧ.

Капуста улӧ мутӧ колӧ бурмӧдны арсяньыс (позьӧ и тулыснас) куйӧдӧн. Колӧ сылы додь куйӧд 12−25 квадрата сажень улӧ. Пуктытӧдзыс мусӧ колӧ пинёвтны. Ичӧт кӧ местаыс, пинёвтӧм пыдди шыльӧдны куранӧн.

Капуста колӧ пуктыны увтасджыкинӧ, шоръяс да юяс бокъясӧ, мед эськӧ матынджык вӧлі киськавны ваыс. Тшӧкыда капустатӧ некор оз ков пуктыны, колӧ пуктыны шоча дай ӧти визьӧ радӧн-радӧн. Капустасӧ пуктігӧн муас розьяссӧ колӧ вӧчавны торъя беддьӧн. Беддьыс вӧчсьӧ аршын кузя кымын. Бедь помсӧ ёсьтӧны. Мед розьсӧ вӧчалігас муыс оз сибды, позьӧ ёсьтӧм помсӧ тупкыны жӧчӧн. Розьяссӧ колӧ вӧчавны мӧда-мӧдсьыс аршын кост.

Капуста рӧсада йылысь.

Капуста рӧсада колӧ бӧрйыны латшкӧсджыкӧс, дженьыдик кокаӧс, пемыд коръясаӧс. Кокйыв кайӧм рӧсадатӧ пуктӧмысь бурыс этша. Рӧсадасӧ водзвыв босьттӧдзыс колӧ киськавны да видзчысьӧмӧн лӧсьыда перъявны. Муысь перйӧм бӧрын рӧсада пуктытӧдз видзны оз позь, мед вужъясыс оз косьмыны. Пуктан лунсӧ колӧ бӧрйыны букыд лун либӧ пуктыны рытын. Муӧ пуктігӧн колӧ вужсӧ неуна орӧдны, мед вужйыс ёнджыка паськалас, пуктыны сэсся личыда. Киӧн вужъяссӧ вӧрӧдны оз позь, сыысь вужъясыс висьмӧны. Рӧсада коксӧ муас колӧ неуна сюйыштны, сэсся гӧгӧрыс киӧн топӧдыштны, мед рӧсада кок гӧгӧрыс вӧлі ичӧтик гуран. Гураныс колӧ, мед киськалігӧн ваыс эз мун бокӧ.

Киськавны рӧсадасӧ пуктӧм бӧрас колӧ пырысьтӧм-пыр. Дзик вуж бердас ватӧ оз ков кисьтны, неуна бокӧджык. Киськалігас кӧ ваыс ӧдйӧ пырӧ, либӧ рӧсадаыс пӧрӧ, колӧ муӧн тыртыштны, лӧсьӧдны. Капуста рӧсада справитчӧ лун кык-куим мысти. Кутшӧм рӧсада кулӧ, сійӧс колӧ вежны выль рӧсадаӧн.