ВӦЛӦСЬТУВСА НАЛОГӦВӦЙ КОМИССИЯЯС ЙЫЛЫСЬ
Сельхозналог йылысь норасьны крестьяна кутасны вӧлӧсьтувса комиссияясӧ.
Таво налогӧвӧй комиссияяс лоӧны вӧлӧсьтъясын. Став норасьӧмъяссӧ не веськыда сельхозналог пуктӧмысь крестьяна кутасны сетны сійӧ комиссияясӧ. Норасьӧм вылас крестьяналы сетсьӧ срокыс ӧти тӧлысь. Колян воӧ срокыс вӧлі сӧмын кык вежон. Дерт, норасьӧм вылӧ колан эскӧданпасъяс тӧлысьнад крестьяниныд вермас нин судзӧдны. Налогӧвӧй комиссияяслы став норасьӧмсӧ быть колӧ видлавны налогсӧ босьтны заводиттӧдз.
Колян воӧ налогӧвӧй комиссияяс вӧліны сӧмын уездъясын. Крестьяналы норасьӧмӧн лоӧ вӧлі шыӧдчыны уездӧдз. Ӧти-кӧ, уездыд сиктсяньыд ылын, мӧд-кӧ, уездувса налогӧвӧй комиссияӧ норасьӧмыс вӧлі чукӧрмӧ зэв уна да, видлалӧмнас нюжалӧ. Сэсся ӧд уездыд спутютӧ быд вӧлӧсьтысь уджалан сямсӧ, олӧмсӧ, му сикассӧ оз тӧд. Сы вӧсна таво и уджсӧ уездувса налогӧвӧй комиссияяслысь вуджӧдісны вӧлӧсьтувса комиссияяслы.
Вӧлӧсьтувса налогӧвӧй комиссия кутас видлавны крестьяналысь ставсикас норасьӧмсӧ сельхозналог йылысь: учёт вылӧ кӧ босьтӧмаӧсь видз-мусӧ да скӧтсӧ лишнӧйӧс, колӧ кӧ вӧлі крестьянинлы закон серти сетны кокньӧд, да сійӧ кокньӧдсӧ окладнӧй листас абу пасйӧмаӧсь — скидка сеттӧмысь, сэсся налогсӧ кӧ срок дорсьыс водзджык корӧны.
Крестьянинлы кӧ кажитчас комиссияыслӧн шуӧмыс нелючкиӧн, сійӧ вермас норасьны уездувса комиссиялы.
Вӧлӧсьтувса налогӧвӧй комиссия став сылы локтан норасьӧмъяссӧ видлалӧ кымын вермӧ регыдӧн. Сэсся сійӧ юӧртӧ водзвыв, кутшӧм сиктсянь воисны норасьӧмъясыс, сэтчӧс сельсӧветса юралысьсӧ.
Вӧлӧсьтувса налогӧвӧй комиссияын унджык шленыс лоӧны сиктса крестьяна. Став шленыс комиссияын вит морт. Куимыс на пиысь сиктса крестьяна пиысь: волисполкомын юралысьыс (комиссияас юралысьыс сійӧ и лоӧ), сэсся представитель мӧда-мӧдлы отсасян комитетысь дай представитель сиктса йӧзсянь. Кык шленыс лоӧны финансӧвӧй да видз-му удж нуӧданінсянь воӧм йӧз.
Татшӧм налогӧвӧй комиссия кутас зэв бура тӧдны вӧлӧсьтувса олӧмсӧ, весиг йӧзсӧ дай норасьӧмъяссӧ видлавны кутас веськыда, сорсьытӧг (ӧшыбкатӧг).
Крестьяналы нелючкияс сельхозналог пуктӧмын корсьны таво лоӧ зэв кокни.
