ГРИВА ВӦЛӦСЬТЫН (СЫКТЫВ УЕЗДЫН)
Исполком.
Ӧні исполкомын уджалӧны кык шлен, председательыс секретаръяс курсъяс вылын, Сыктывдінкарын. Председатель мунӧм бӧрын сійӧс вежысьыс (заместительыс) омӧля видзӧдлӧ мукӧд учрежденньӧяс вылӧ, ёнджыка уджыс сюрӧ мӧд шленыслы. Весиг заместительыс оз быд лун ветлы исполкомас, олӧ гортас. Инвалидъяслы отсалан кампания вылӧ оз и видзӧдлы, ачыс ещӧ председательын сэні, кампанияыс регыд нин помасяс-а. Колӧ Чугаевлы ёнджыка видзӧдлыны исполкомса удж вылӧ гортса дорысь.
Лавка.
Лавкаын вӧлі воджынся учёт. Став тӧварсӧ выльысь лыддьӧма. Тӧварыс судзсьӧ. Ньӧжйӧникӧн лавка ёнмӧ, пырӧны выль шленъяс, сӧмын взноссӧ вештӧны омӧля. Тӧвар вайӧны коланӧс, дерт, оз жӧ тырмы ставторйыс, мый колӧ крестьяниныдлы-а. Крестьяналӧн нажӧтка омӧль, сы вӧсна омӧля ньӧбасьӧны...
Лыддьысян керкаын
уджалӧны комсомолечьяс, лӧсьӧдалӧма кружокъяс уна пӧлӧсӧс, ньӧжйӧникӧн пыр уджалӧны, сӧмын медколан ӧти сельскокӧзяйственнӧй кружокыс ӧні дугдыштіс уджавнысӧ мыйлакӧ.
Школаын
велӧдӧм мунӧ, некутшӧм кост на велӧдӧмас эз вӧв. Ӧти велӧдысьыс отпускын, сы пыдди локтіс выль велӧдысь, сьӧлӧмсьыс кутчысис аслас удж дінӧ. Заводитчис удж школаса му вылын. Уна пӧлӧс кӧйдыс мӧдӧдіс
Гӧрӧм
помасис. Видз-му уджалӧны важ ногӧн, выль ног уджавны полӧны: этша пӧ нянь быдмас этша му вылад. Ёнджыка колӧ велӧдны крестьянаӧс агрономъяслы.
Ӧні унджыкыс кер кылӧдӧны. Уналӧн аслас нянь оз тырмы, муяссӧ кӧдзны босьталісны водзӧсӧн.
Северолесса служакъяс вылӧ уджалысьяс норасьӧны.
Бергач.
