ЗАВОДӦ МЕДАСЬӦМ ЙЫЛЫСЬ

Колян арын Коми обласьтысь мунісны Уральскӧй заводъясӧ пес пилитны куим сюрс морт кымын. Колян во октябр тӧлыссянь таво март тӧлысьӧдз найӧ уджалӧмаӧсь да, пес нормаясыс тырӧма да, гортӧ локталӧны.

Ме заводысь локтысь йӧзкӧд уна сёрниті. Быдӧн зэв ёна маитчӧны. Нажӧтканыс налы зэв этша сюрӧма. Сӧмын вермӧмаӧсь нажӧвитны 15 пуд няньӧн морт вылӧ да сьӧмтор гортӧдз мунны мында. Со мый висьтавлӧны Чассаяс да Пальсаяс: заводӧ пӧ воим, да индалісны уджавны нюр вылӧ. Вӧрыс зэв шоч. Нюр пиас пӧ вӧялам пидзӧсысь вылӧджык няйтӧ. Пес дон пӧ таво колян восяысь ёна донтӧм вӧлі. Пес дон сертиыс пӧ няньыс да мукӧд сёянторйыс вывті донаӧсь. Лунтыръя мырсьӧм-уджалӧм вылӧ пӧ муртса кынӧмыд пӧтӧ.

Вывті ёна шогсьӧны заводысь локтысьяс налог мынтӧмысь. Шуӧны: некыдзи пӧ таво он вермы налогтӧ мынтыны. Унджыкыслӧн налӧн гортса ыджыд семьяясыслӧн няньыс ӧні нин абу.

Мукӧдыс ӧнісянь нин бара мӧвпалӧны аслыныс нажӧвитчан туйяс. Ӧтик мужик чукӧр со мый шуисны: гортӧ пӧ воам да пывсьыштам, дай сэсся кытчӧкӧ мунам тувсавны — пуръясьны. Сэсся сы бӧрын гортӧ волытӧг пурйӧн кывтам. Пур вылысь воам, турун-нянь чукӧртыштам да бара лоӧ заводӧ мунны.

Татшӧм олӧмыд гӧль крестьяналы абу, дерт, бур. Унджыкыс заводӧ ветлысьяс вӧвтӧм йӧз.

Водзӧ кежлӧ мед татшӧмыс гӧль крестьяналы оз ло, колӧ обласьтувса отдел трудалы да обпрофсӧветлы заводӧ медавлысьяскӧд договоръяс вӧчалігӧн бура тӧдмӧдавны водзвыв: кутшӧмджык заводын уджаланіныс, абу-ӧ уджалӧмыс вывті донтӧм, оз-ӧ уджалысьяс пӧръяссьыны заводӧ мунӧмӧн.

Профсӧветлы колӧ заводӧ мунысьясӧс зільны ӧтувтны профсоюзӧ.

Ст. Цывунин.