КЫДЗИ УДЖАЛӦ КУЧИК ЗАВОД? — ОМӦЛЯ.

МЫЙЛА ОМӦЛЯ? — ЮРАЛЫСЬЫС ОМӦЛЬ

Сыктывдінкар бокын эм Обласьтувса овмӧс нуӧдан юкӧдлӧн (ОМХ) кучик завод. Заводыс таво вӧчис зэв этша кучиксӧ. Тайӧ ставыс лои агентъяс вӧсна, кодъяслы вӧлі тшӧктӧма вӧчтӧм кучиксӧ чукӧртны. Мукӧд агентыс весиг ӧти кучик эз вай. Удж нуӧдысьыс, буракӧ, заводас уджсӧ ньӧти оз куж нуӧдныс, пыр уджыс бӧрӧн мунӧ. Позьӧ вӧлі тулыснас ва вынӧн дубсӧ тойны пуд 800 кымын, тойисны сӧмын 150 пуд. Вӧчтӧм дубыс ӧні туплясьӧ, тшыкӧ. Уджалысьясыс коръясӧкӧ шыасьлісны удж нуӧдысь дінӧ, висьтавлісны, мый колӧ да позьӧ вӧчны, сӧмын удж нуӧдысьыс омӧля лыддьысьӧ рабочӧйясыдкӧд — рабочӧйтӧ ыстас сӧмын кытчӧкӧ ылӧджык, кытчӧ ыстывлӧны...

Кучик заводын удж закон чукӧр (кодекс законов о труде) абу; сы вӧсна рабочӧйяслӧн удж нуӧдыськӧд пансьывлӧ ён зыкъяс. Удж нуӧдысь заводӧ волӧ зэв шоча, лёк поводдя дырйи моз быттьӧкӧ шонді мыччысьлас, да пыр и бӧр вошӧ. Заводын часі ни, форточка ни — нинӧм абу. Удж нуӧдысь оз гӧгӧрво: сӧмын ӧд рабочӧйяскӧд ӧтвылысь уджалӧмӧн позьӧ лэптыны уджсӧ. Сы йылысь эськӧ колӧ удж нуӧдысьлы мӧвпыштны ёнджыка.

Заинт.